(vovworld)- ປ່າສະຫງວນແຫ່ງຊາດ ກຸກເຟືອງ ຫລືເອີ້ນວ່າ ປ່າກຸກເຟືອງ ແມ່ນປ່າສະຫງວນແຫ່ງຊາດທຳອິດ ແລະ ກໍແມ່ນສະຖານທີ່ອະນຸລັກຮັກສາທຳມະຊາດຂອງຫວຽດນາມ. ປ່າສະຫງວນແຫ່ງຊາດ ກຸກເຟືອງ ນອນໃນບໍລິເວນສາມແຂວງ ຄື ນີງບີງ, ຮວ່າບີງ, ແທງຮວາ. ປ່າສະຫງວນແຫ່ງຊາດ ກຸກເຟືອງ ມີລະບົບສັດສາວາສີ່ງອຸດົມສົມບູນ, ຫລາຍຮູບຫລາຍແບບ, ມີລັກສະນະພິເສດສະເພາະຂອງປ່າເຂດຮ້ອນ. ຢູ່ທີ່ນີ້ ມີທ່າໄດ້ປຽບຫລາຍຢ່າງກ່ຽວກັບທັດສະນີຍະພາບທຳມະຊາດ, ລະບົບຊີວະພາບ, ບັນດາຄຸນຄ່າວັດທະນະທຳທີ່ມີມາແຕ່ດົນນານ ແລະ ກໍແມ່ນສະຖານທີ່ທ່ອງທ່ຽວຊີວະພາບທີ່ມີຊື່ສຽງ ອັນໄດ້ດຶງດູດນັກທ່ອງທ່ຽວຜູ້ມັກຄົ້ນຫາທຳມະຊາດເປັນຈຳນວນຫລວງຫລາຍ.
ປ່າສະຫງວນແຫ່ງຊາດ ກຸກເຟືອງ
ພາບ:internet
|
ປ່າສະຫງວນແຫ່ງຊາດ ກຸກເຟືອງ ມີເນື້ອທີ່ 22.200 ເຮັກຕາ, ຕັ້ງຢູ່ສາຍພູ ຕາມດຽບ. ຢາກເຂົ້າປະຕູ ປ່າສະຫງວນແຫ່ງຊາດ ກຸກເຟືອງ ທ່ານຕ້ອງໄປຜ່ານໄລຍະທາງກວ່າ 15 ກິໂລແມັດ ຂຶ້ນກັບເມືອງ ຍໍກວານ ແຂວງ ນີງບີງ. ຫ່າງຈາກ ປ່າສະຫງວນແຫ່ງຊາດ ກຸກເຟືອງ ປະມານ 1 ກິໂລແມັດ, ນັກທ່ອງທ່ຽວສາມາດສູບອາກາດປອດໂປ່ງເຢັນສະບາຍ ແລະ ໄດ້ຮັບຟັງສຽງນົກ. ປ່າສະຫງວນແຫ່ງຊາດ ກຸກເຟືອງ ມີລະບົບສັດສາວາສິ່ງອຸດົມສົມບູນ ດ້ວຍພືດ 2000 ປະເພດ ແລະ ສັດກວ່າ 2600 ປະເພດ, ໃນນັ້ນ ມີຫລາຍປະເພດຖືກຈັດເຂົ້າປື້ມແດງຫວຽດນາມແລະ ໂລກ. ປ່າສະຫງວນແຫ່ງຊາດ ກຸກເຟືອງ ແມ່ນຫນຶ່ງໃນຈຳນວນປ່າຊີວະນາໆພັນ 7 ແຫ່ງ ຂອງຫວຽດນາມ.
ເພື່ອສ້າງເງື່ອນໄຂໃຫ້ນັກທ່ອງທ່ຽວສາມາດຄົ້ນຫາທຳມະຊາດ, ສູນທ່ອງທ່ຽວຊີວະພາບ ແລະ ສຶກສາສິ່ງແວດລ້ອມ ສັງກັດ ປ່າສະຫງວນແຫ່ງຊາດ ກຸກເຟືອງ ໄດ້ຈັດ ຫລາຍຮູບການທ່ອງທ່ຽວຊີວະພາບເພື່ອໃຫ້ແກ່ນັກທ່ອງທ່ຽວເລືອກເຟັ້ນ. ອ້າຍ ເລືອງ ວັນຫວຽດ ຜູ້ນຳທ່ຽວຢູ່ ປ່າສະຫງວນແຫ່ງຊາດ ກຸກເຟືອງ ໃຫ້ຮູ້ວ່າ: ແຕ່ລະລະດູ, ຢູ່ ປ່າສະຫງວນແຫ່ງຊາດ ກຸກເຟືອງ ລ້ວນແຕ່ມີຈຸດພິເສດສະເພາະ, ແຕ່ໄລຍະເວລາສະດວກທີ່ສຸດເພື່ອໃຫ້ນັກທ່ອງທ່ຽວມາຢ້ຽມຢາມນັ້ນແມ່ນ ໃນຊ່ວງເວລາແຕ່ເດືອນ 9 -12 ທຸກປີ.
ເມື່ອມາຢ້ຽມຢາມ ປ່າສະຫງວນແຫ່ງຊາດ ກຸກເຟືອງ ທ່ານສາມາດຍ່າງຫລິ້ນຫລືຖີບລົດຖີບເຖິງບັນດາສະຖານທີ່ທ່ອງທ່ຽວຄື: ສູນກູ້ຊີບລີງ ແລະ ເຕົາ, ຮາກຖານເບິ່ງແຍງ, ກູ້ຊີບລີງປະເພດຫາຍາກ; ປ່າພືດ, ຮາກຖານອະນຸລັກຮັກສາ gen ພືດທີ່ຫາຍາກຂອງຫວຽດນາມ ແລະ ໂລກ; ລະບົບຖ້ຳເດີມ, ບັນດາຕົ້ນໄມ້ມີອາຍຸນັບພັນປີ, ຍອດພູ ໄມບາກ ມີຄວາມສູງ 648 ແມັດ. ທ່ານ ໂດຮົ່ງຫາຍ, ຮອງຜູ້ອຳນວຍການສູນທ່ອງທ່ຽວຊີວະພາບ ແລະ ສຶກສາສິ່ງແວດລ້ອມ ສັງກັດ ປ່າສະຫງວນແຫ່ງຊາດ ກຸກເຟືອງ ໃຫ້ຮູ້ວ່າ:
“ສະຖານທີ່ຢ້ຽມຊົມຕົ້ນຕໍ ນັ້ນແມ່ນບັນດາທາງຊອຍໃນປ່າທຳມະຊາດໄປເຖິງຕົ້ນໄມ້ເກົ່າແກ່, ຖ້ຳຂອງຄົນບູຮານ. ຕາມເສັ້ນທາງຊອຍນັ້ນ ນັກທ່ອງທ່ຽວສາມາດຄົ້ນຫາທຳມະຊາດກໍຄືລະບົບຊີວະພາບເທິງພູຫີນປູນ ຫລືຮ່ອມພູ.”
ຫນຶ່ງໃນບັນດາລາຍການທ່ອງທ່ຽວຊີວະພາບຊື່ງນັກທ່ອງທ່ຽວຫລາຍຄົນເລືອກເຟັ້ນເມື່ອມາຢ້ຽມຢາມ ປ່າສະຫງວນແຫ່ງຊາດ ກຸກເຟືອງ ນັ້ນແມ່ນລາຍການທ່ອງທ່ຽວຕັ້ງຄ້າຍໃນປ່າ ແລະ ທ່ຽວຊົມສັດທຳມະຊາດ ຫລື ເຂົ້າຮ່ວມລາຍການທ່ອງທ່ຽວຍ່າງຫລິ້ນໃນປ່າດົງດີບ, ໄປຊົມນົກຫາຍາກທຸກປະເພດໃນຍອດຈຳນວນກວ່າ 300 ປະເພດຢູ່ ປ່າສະຫງວນແຫ່ງຊາດ ກຸກເຟືອງ, ພາຍເຮືອ kayak ຢູ່ຫນອງ ມາກ ແລະ ຫນອງ ອຽນກວາງ. ສຳລັບບັນດາລາຍການທ່ອງທ່ຽວນີ້, ນັກທ່ອງທ່ຽງຕ້ອງການຜູ້ນຳທ່ຽວເພື່ອຮັບປະກັນຄວາມປອດໄພໃຫ້ແກ່ນັກທ່ອງທ່ຽວ. ອ້າຍ ເລືອງວັນຫວຽດ, ຜູ້ນຳທ່ຽວໃຫ້ຮູ້ວ່າ:
ນັກທ່ອງທ່ຽວຕ່າງປະເທດຢ້ຽມຊົມປ່າສະຫງວນແຫ່ງຊາດກຸກເຟືອງ
ພາບ:dulichvietnam.com
|
“ຢ້ຽມຢາມຖ້ຳ, ນອນ ແລະ ຕັ້ງຄ້າຍໃນປ່າ ແມ່ນການເຄື່ອນໄຫວມີລັກສະນະຄົ້ນຫາທຳມະຊາດ. ເມື່ອເຂົ້າຮ່ວມການເຄື່ອນໄຫວນີ້ ນັກທ່ອງທ່ຽວຕ້ອງມີສຸຂະພາບເຂັ້ມແຂງ. ຫົວຫນ່ວຍຈັດຕັ້ງລາຍການທ່ອງທ່ຽວ ກໍ່ກະກຽມຄ້າຍ ແລະ ເຄື່ອງກິນ. ເມື່ອເຂົ້າເລິກໃນປ່າ, ແມ່ນຕ້ອງຜ່ານເສັ້ນທາງລະອິດລະອ້ຽວ, ທຸລະກັນດານ, ດັ່ງນັ້ນພວກຂ້າພະເຈົ້າຈຶ່ງເລືອກເຟັ້ນບັນດາສະຖານທີ່ເໝາະສົມ. ອີງຕາມເງື່ອນໄຂທຳມະຊາດ, ນັກທ່ອງທ່ຽວສາມາດນອນຢູ່ຢູ່ໂນນພູ, ຈອມພູຫລືຮ່ອມພູ. ຍາມຄ່ຳຄືນ, ນັກທ່ອງທ່ຽວສາມາດຄົ້ນຫາກ່ຽວກັບຊີວິດຂອງສັດປ່າບາງປະເພດ.”
ແຕ່ລະປີ, ປ່າສະຫງວນແຫ່ງຊາດ ກຸກເຟືອງ ຕ້ອນຮັບນັກທ່ອງທ່ຽວກວ່າ 10.000 ເທື່ອຄົນ, ໃນນັ້ນ ສ່ວນຫລາຍແມ່ນນັກທ່ອງທ່ຽວຕ່າງປະເທດ. ໃນເວລາເຂົ້າຢ້ຽມຢາມ ປ່າສະຫງວນແຫ່ງຊາດ ກຸກເຟືອງ, ນັກທ່ອງທ່ຽວບໍ່ພຽງແຕ່ໄດ້ເຫັນປະຈັກຕາສັດຫາຍາກຫລາຍປະເພດເທົ່ານັ້ນ ຫາກຍັງໄດ້ຮັບຟັງຜູ້ນຳທ່ຽວແນະນຳກ່ຽວກັບຄຸນຄ່າຂອງຊັບພະຍາກອນທຳມະຊາດອີກດ້ວຍ, ຜ່ານນັ້ນ ນັກທ່ອງທ່ຽວຈະມີຄວາມເຂົ້າໃຈຕື່ມອີກກ່ຽວກັບຄຸນຄ່າຂອງປ່າ ແລະ ມີສະຕິໃນການອະນຸລັກຮັກສາສັດ,ພືດທຸກປະເພດ.
ສິ່ງທີ່ສ້າງຄວາມປະທັບໃຈທີ່ສຸດໃຫ້ແກ່ນັກທ່ອງທ່ຽວເມື່ອຢ້ຽມຢາມປ່າສະຫງວນແຫ່ງຊາດ ກຸກເຟືອງ, ນັ້ນແມ່ນໄດ້ເຫັນປະຈັກຕາທຸກສິ່ງທຸກຢ່າງໃນປ່າ ແລະ ຖ່າຍຮູບສັດທຸກປະເພດ ຊື່ງກ່ອນນີ້ເຂົາເຈົ້າພຽງແຕ້ໄດ້ຮັບຊົມຜ່ານປື້ມ, ຫນັງສືພິມຫລືໂທລະພາບເທົ່ານັ້ນ. ທ່ານນາງ Hyam, ນັກທ່ອງທ່ຽວມາຈາກ ອັງກິດ ແບ່ງປັນວ່າ:
“ຂ້າພະເຈົ້າບໍ່ຮູ້ໄດ້ວ່າ ໃນປ່າມີສິ່ງຫລາຍຢ່າງທີ່ພວກເຮົາສາມາດກິນໄດ້, ຕົວຢ່າງຄື: ໃບໄມ້, ໝາກໄມ້ ຫລືຮາກໄມ້. ພວກຂ້າພະເຈົ້າຮູ້ສຶກແປກປະຫລາດ ເມື່ອຄິດວ່າເປັນຫຍັງຄົນບູຮານພັດສາມາດດຳລົງຊີວິດໃນເງື່ອນໄຂຄືແນວນີ້ໄດ້. ຢູ່ໃນປ່າບໍ່ມີແສງສະຫວ່າງ, ບໍ່ມີໄຟຟ້າ…. ອາດຈະເວົ້າໄດ້ວ່າ ນີ້ແມ່ນສະຖານທີ່ທ່ອງທ່ຽວ ທຸກຄົນຄວນມາຢ້ຽມຊົມເທື່ອຫນຶ່ງ.”
ສຳລັບ ອ້າຍ Ruben Heimans, ນັກທ່ອງທ່ຽວມາຈາກ ໂຮນລັງແລ້ວ, ປ່າສະຫງວນແຫ່ງຊາດ ກຸກເຟືອງ ແມ່ນສະຖານທີ່ດູດດື່ມທີ່ສຸດ.
“ມາຢ້ຽມຢາມ ປ່າສະຫງວນແຫ່ງຊາດ ກຸກເຟືອງ, ພວກຂ້າພະເຈົ້າໄດ້ເຫັນແມງກະເບື້ອທຸກປະເພດ, ສັດບາງປະເພດ ແລະ ໄດ້ຢ້ຽມຢາມຖ້ຳສວຍງາມຈຳນວນຫນຶ່ງ. ປ່າສະຫງວນແຫ່ງຊາດ ກຸກເຟືອງ ແມ່ນແຫ່ງທີ່ມີທິວທັດທຳມະຊາດສວຍງາມ, ສະຫງົບງຽບ, ເໝາະສົມກັບຜູ້ທີ່ມັກພັກຜ່ອນຢ່ອນອາລົມ ແລະ ຊົມທິວທັດທຳມະຊາດ.”
ດ້ວຍຄວາມໃຫຍ່ໂຕມະໂຫຖານຂອງ ປ່າສະຫງວນແຫ່ງຊາດ ກຸກເຟືອງ, ນັກທ່ອງທ່ຽວສາມາດຮູ້ສຶກໄດ້ບັນດາຄຸນຄ່າແທ້ຈິງຂອງທຳມະຊາດ ຈາກນັ້ນຈຶ່ງມີຄວາມຮັກແພງ, ມີສະຕິກວ່າ ກ່ຽວກັບຄວາມຮັບຜິດຊອບຂອງຕົນໃນການອະນຸລັກຮັກສາທຳມະຊາດ. ອາດຈະເວົ້າໄດ້ວ່າ ປ່າສະຫງວນແຫ່ງຊາດ ກຸກເຟືອງ ແມ່ນສະຖານທີ່ທ່ອງທ່ຽວຂອງຜູ້ທີ່ມີຄວາມຮັກຕໍ່ທຳມະຊາດ ແລະ ບັນດາຄຸນຄ່າວັດທະນະທຳ.