ດາຫຼາດ ໄດ້ຮັບຖືວ່າແມ່ນ “ ນະຄອນແຫ່ງມວນມາລາ”. ຢູ່ນະຄອນແຫ່ງນີ້, ດອກໄມ້ບານສະພັ່ງຕະຫຼອດປີ, ແຕ່ພິເສດໃນເດືອນ 2, ຊຶ່ງແມ່ນຈຸດເວລາກ້າວເຂົ້າສູ່ລະດູບານໃໝ່, ດອກໄມ້ນາໆຊະນິດຢູ່ ດາຫຼາດ ບານສະພັ່ງຢ່າງງາມຕາຍິ່ງກ່ວາເວລາໃດໝົດ. ດອກເໝີຍ, ດອກສະກຸຣະ, ດອກກຸຫຼາບ, ດອກບານຂາວ ພາກັນບານສະພັ່ງເອ້ຄວາມງາມໃນທ່າມກາງແສງແດດທີ່ອົບອຸ່ນໃນຕົ້ນລະດູບານໃໝ່. ເພື່ອຮັບຊົມຄວາມງາມຂອງດອກໄມ້, ແຂກທ່ອງທ່ຽວບໍ່ຕ້ອງໄປໃສຢູ່ຫ່າງໄກ, ພຽງແຕ່ແວ່ຢາມສວນສາທາລະນະຂອງນະຄອນ ກໍຈະໄດ້ຮັບຊົມຄວາມງາມທັງໝົດຂອງດອກໄມ້ນາໆຊະນິດດ້ວຍສີຫຼາກຫຼາຍທີ່ສວຍສົດງົດງາມ.
ສວນສາທາລະນະແຫ່ງດອກໄມ້ຂອງນະຄອນດາຫຼາດ |
ສວນສາທາລະນະແຫ່ງດອກໄມ້ຂອງນະຄອນດາຫຼາດໃນປະຈຸບັນ ແມ່ນແຫ່ງວາງສະແດງດອກໄມ້ຂອງຫວຽດນາມດ້ວຍດອກໄມ້ນັບຮ້ອຍຊະນິດທີ່ແຕກຕ່າງກັນ. ດ້ວຍເນື້ອທີ່ກ້ວາງຂວາງປະມານ 7000 m2 ແລະ ມີທີ່ຕັ້ງທີ່ສະດວກ ຊຶ່ງຕັ້ງຢູ່ຕອນທ້າຍຂອງໜອງ ຊວນເຮືອງ, ສວນສາທາລະນະແຫ່ງດອກໄມ້ໄດ້ດຶງດູດແຂກທ່ອງທ່ຽວຢ່າງຫຼວງຫຼາຍມາຢ້ຽມຊົມເມື່ອມີໂອກາດເຂົ້າມາທ່ອງທ່ຽວຢູ່ ດາຫຼາດ. ແຂກທ່ອງທ່ຽວທັງຫຼາຍຈະມີຄວາມປະທັບໃຈນັບຕັ້ງແຕ່ນາທີທຳອິດ ເມື່ອເຫັນປະຈັກຕາປະຕູໂຂງໃຫຍ່ຂອງສວນສາທາລະນະດອກໄມ້ຂອງນະຄອນ. ປະຕູໂຂງຂອງສວນສາທາລະນະຖືກອອກແບບດ້ວຍ 3 ຂອບດອກໄມ້ມີຮູບໂຄ້ງ ໂດຍຕິດຕໍ່ກັນດ້ວຍໂຖດອກໄມ້ນັບຮ້ອຍໂຖ. ລຽບຕາມ 2 ທາງຍ່າງແມ່ນລະບົບນ້ຳພຸ ອັນໄດ້ເຮັດໃຫ້ແຂກທ່ອງທ່ຽວທັງຫຼາຍຮູ້ສຶກເຢັນສະບາຍ. ນາງ ບຸຍຮ່ວຽນເຟືອງ ມາຈາກຮ່າໂນ້ຍ ເປີດເຜີຍວ່າ :
“ ສະຖານທີ່ທຳອິດທີ່ຂ້າພະເຈົ້າໄດ້ເລືອກເຟັ້ນເມື່ອມາຢາມດາຫຼາດ, ນັ້ນແມ່ນສວນສາທາລະນະດອກໄມ້ນະຄອນດາຫຼາດ. ຄວາມປະທັບໃຈທຳອິດ ເມື່ອມາແຫ່ງນີ້ ແມ່ນບໍລິເວນທີ່ກ້ວາງຂວາງດ້ວຍດອກໄມ້ນາໆຊະນິດປະກົດຂຶ້ນໃນສາຍຕາ. ການປະດັບປະດາຢູ່ສວນສາທາລະນະແຫ່ງນີ້ແມ່ນສວຍງາມທີ່ສຸດ, ທັງນີ້ກໍຊ່ວຍໃຫ້ແຂກທ່ອງທ່ຽວໄດ້ຖ່າຍຮູບເປັນທີ່ລະນຶກ ”
ເມື່ອຍ່າງຂ້າມຜ່ານປະຕູໂຂງດອກໄມ້, ແຂກທ່ອງທ່ຽວຈະຕົກສະເງີ້ເມື່ອເຫັນບັນດາສວນດອກໄມ້ສົດທີ່ມີສີຫຼາກຫຼາຍ ດ້ວຍດອກໄມ້ກວ່າ 300 ຊະນິດທີ່ແຕກຕ່າງກັນ, ໃນນັ້ນມີ ດອກກຸຫຼາບ, ດອກລີລີ, ດອກເບັນຈະມາດ, ດອກຂົນຕາ…ກໍລ້ວນບານສະພັ່ງເອ້ຄວາມງາມຕະຫຼອດປີ. ໃນສວນສາທາລະນະ ກໍຍັງມີສວນດອກກ້ວຍໄມ້ຊຶ່ງແມ່ນດອກໄມ້ຊະນິດທີ່ສວຍງາມທີ່ສຸດຂອງ ດາຫຼາດ ແລະ ສວນດອກກະປອງເພັດໃຫຍ່, ທັງນີ້ກໍຕອບສະໜອງຄວາມຕ້ອງການຮັບຊົມດອກໄມ້ ກໍຄືຄວາມຕ້ອງການແລກປ່ຽນຄ້າຂາຍຂອງແຂກທ່ອງທ່ຽວ. ນາງ ລິນດານ ແຂກທ່ອງທ່ຽວມາຈາກນະຄອນໂຮ່ຈິມິນ ເວົ້າວ່າ :
“ ມາຮອດສວນດອກໄມ້ຂອງນະຄອນ ດາຫຼາດ, ເຮົາໄດ້ຮັບຊົມຄວາມງາມຂອງດອກໄມ້ທຸກຊະນິດຢູ່ແຫ່ງນີ້. ມີດອກໄມ້ພິເສດຫຼາຍຊະນິດ ຕ້ອງໄດ້ຮັບການບົວລະບັດຮັກສາລະອຽດ ຈຶ່ງເຕີບໂຕໄດ້. ການຈັດວາງ, ປະດັບປະດາຢ່າງກົມກ່ຽວ ເຮັດໃຫ້ແຂກທ່ອງທ່ຽວມີຄວາມປະທັບໃຈ ”
ຮອດຍາມບຸນປີໃໝ່ປະຈຳຊາດ, ໃນແຕ່ລະປີ, ສວນສາທາລະນະດອກໄມ້ຂອງນະຄອນດາຫຼາດໄດ້ກາຍເປັນບ່ອນຈັດຕັ້ງງານບຸນດອກໄມ້ລະດູບານໃໝ່ ຊຶ່ງໄດ້ເຕົ້າໂຮມບັນດານັກສິລະປະການປູກດອກໄມ້ຂອງແຂວງຕ່າງໆນຳເອົາ ດອກໄມ້ມາແຂ່ງຂັນ. ນາງ ບຸຍຮ່ວຽນເຟືອງ ມາຈາກຮ່າໂນ້ຍເວົ້າວ່າ :
“ ຂ້າພະເຈົ້າມັກທີ່ສຸດຢູ່ໃນ ສວນສາທາລະນະດອກໄມ້ຂອງນະຄອນດາຫຼາດ ແມ່ນສວນດອກກ້ວຍໄມ້ ເພາະຢູ່ນີ້ ມີດອກໄມ້ຫຼາຍຊະນິດທີ່ສວຍງາມໄດ້ມາຈາກຜົນຂອງການຕັດຕໍ່ພັນທຸກຳ. ຂ້າພະເຈົ້າຄິດວ່າ ເມື່ອມາຮອດ ດາຫຼາດ, ຖ້າຫາກບໍ່ໄປຢ້ຽມຊົມດອກໄມ້ ແມ່ນເປັນໜ້າເສຍດາຍ ”
ດອກໄມ້ ດາຫຼາດບານສະພັ່ງຕະຫຼອດປີ, ແຕ່ລະປີພັດມີດອກໄມ້ໃໝ່ຫຼາຍຊະນິດຖືກນຳເອົາມາປູກ. ເມື່ອຮອດຍາມລະດູບານໃໝ່ວຽນມາ, ກໍແມ່ນຈຸດເວລາທີ່ດອກໄມ້ນາໆຊະນິດພາກັນບານສະພັ່ງເອ້ຄວາມງາມທ່າມກາງແສງແດດທີ່ອົບອຸ່ນສາດສ່ອງລົງມາຢູ່ທົ່ວເຂດ