(vovworld)- ສະຫນາມຫລວງບາດີງ, ໝາກຫົວໃຈຂອງນະຄອນຫລວງຮ່າໂນ້ຍ, ແມ່ນຫນຶ່ງໃນບັນດາສະຖານທີ່ປະຫວັດສາດ ແລະ ທັດສະນີຍະພາບທີ່ລືຊື່ຢູ່ຮ່າໂນ້ຍ. ບາດີງ ໄດ້ຮັບຄວາມເປັນກຽດຄືດັ່ງກ່າວ ຍ້ອນຢູ່ທີ່ນີ້ໄດ້ດຳເນີນເຫດການທີ່ສຳຄັນ ນັ້ນແມ່ນວັນທີ 2/9/1945 ປະທານໂຮ່ຈິມີນ ໄດ້ອ່ານບົດຖະແຫລງການປະກາດເອກະລາດ, ສະຖາປະນາປະເທດ ສາທາລະນະລັດປະຊາທິປະໄຕຫວຽດນາມ ຕໍ່ຫນ້າ ປະຊາຊົນຮ່າໂນ້ຍ ແລະ ເຂດໃກ້ຄຽງປະມານ 5 ໝື່ນຄົນ,.
ສະຫນາມຫລວງບາດີງ
ພາບ:baomoi.com
|
“ປະຊາຊົນ ທຸກຄົນໃນທົ່ວປະເທດ, ທີ່ໄດ້ກຳເນີດຂຶ້ນລ້ວນແຕ່ມີສິດສະເຫມີພາບ. ຕ້ອງມີສິດຕ່າງໆ ຜູ້ອື່ນຈຶ່ງບໍ່ສາມາດແຊກແຊງໄດ້, ໃນບັນດາສິດນັ້ນ, ມີສິດໄດ້ມີຊີວິດ, ສິດເສລີ ແລະ ສິດໄດ້ຮັບຄວາມຜາສຸກ..”
ບັນດາຄຳເວົ້າອະມະຕະຂອງບົດຖະແຫລງປະກາດເອກະລາດເມື່ອວັນທີ 2/9/1945 ໂດຍປະທານໂຮ່ຈິມີນ ອ່ານທີ່ສະຫນາມຫລວງ ບາດີງ ປະຫວັດສາດ ບໍ່ພຽງແຕ່ມີຄວາມໝາຍຢືນຢັນເຖິງພື້ນຖານເອກະລາດຂອງຫວຽດນາມເທົ່ານັ້ນ ຫາກຍັງເປີດສັງກະລາດແຫ່ງເອກະລາດ, ເສລີພາບໃຫ້ປະເທດຫົວເມືອງຂຶ້ນ ທີ່ຖືກກົດຂີ່ຂຸດຮີດໃນທົ່ວໂລກອີກດ້ວຍ. ບັນດາຄຳສັບທີ່ມີຄວາມໝາຍວັດທະນະທຳມະນຸດທີ່ຍິ່ງໃຫຍ່ ແລະ ເລິກເຊິ່ງນັ້ນ ຍັງສືບຕໍ່ດັງກ້ອງກັນວານ, ຝັງເລິກໃນດວງໃຈຂອງຊາວຫວຽດນາມຫລາຍຄົນ ເມື່ອມາຢ້ຽມຢາມສະຫນາມຫລວງ ບາດີງ ປະຫວັດສາດໃນຊຸມມື້ລະດູໃບໄມ້ຫລົ່ນນີ້ ແລະ ກໍ່ຢູ່ທີ່ນີ້ ພາຍຫລັງວັນຊາດທີ 2/9/1969, ພິທີງານສົບປະທານໂຮ່ຈິມີນ, ຜູ້ນຳທີ່ແສນເຄົາລົບຮັກຂອງປະຊາຊົນຫວຽດນາມ ກໍ່ຖືກຈັດຂຶ້ນຢ່າງສົມກຽດ ໂດຍມີການເຂົ້າຮ່ວມຂອງປະຊາຊົນນັບໝື່ນໆຄົນ ແລະເພື່ອນມິດສາກົນເປັນຈຳນວນຫລວງຫລາຍ. ຫລັງຈາກນັ້ນ ສຸສານປະທານໂຮ່ຈິມີນ ໄດ້ຖືກກໍ່ສ້າງຂຶ້ນຢູ່ສະຫນາມຫລວງ ບາດີງ, ແຕ່ລະມື້ ໄດ້ຕ້ອນຮັບປະຊາຊົນພາຍໃນປະເທດນັບໝື່ນໆຄົນ ແລະ ເພື່ອນມິດສາກົນເປັນຈຳນວນຫລວງຫລາຍມາຢ້ຽມຢາມ ແລະ ໄຫວ້ອາໄລເພີ່ນ.
ສະຫນາມຫລວງ ບາດີງ ໃນຕອນຄຳ່ຍາມຮ້ອນ
ພາບ:baomoi.com
|
ຊາວຫວຽດນາມ ຢູ່ທຸກແຖບຖິ່ນໃນທົ່ວປະເທດ ແລະ ນັກທ່ອງທ່ຽວສາກົນ ແຕ່ລະເທື່ອເມື່ອມາ ຮ່າໂນ້ຍ ກໍ່ລ້ວນແຕ່ມາຢ້ຽມຢາມສະຫນາມຫລວງ ບາດີງ, ພິເສດ ໃນໂອກາດວັນຊາດທີ 2/9 ປະຈຳປີ. ທ່ານ ຫງວຽນຫືວຈີງ, ນັກຮົບເກົ່າ ຢູ່ ແຂວງ ຟູທໍ້ ມາຢ້ຽມຢາມສະຫນາມຫລວງ ບາດີງ ໄດ້ແບ່ງປັນວ່າ:
“ພວກຂ້າພະເຈົ້າມາຢ້ຽມຢາມສະຫນາມຫລວງ ບາດີງ, ຢ້ຽມຢາມສຸສານປະທານໂຮ່ຈິມີນ, ຫໍພິພິດທະພັນປະທານໂຮ່ຈິມີນ ແລະ ບ່ອນຢູ່, ບ່ອນເຮັດວຽກຂອງເພີ່ນ. ເພື່ອຫວນຄືນຊຸມວັນໃນປີ 1969, ເມື່ອພວກຂ້າພະເຈົ້າພວມເຂົ້າຮ່ວມການຕໍ່ຕ້ານຢູ່ສະຫນາມຮົບ ແລະ ໄດ້ຮັບຂ່າວທີ່ວ່າ ລຸງໂຮ່ ເຖິງແກ່ມໍລະນະກຳ, ເວລານັ້ນພວກຂ້າພະເຈົ້າຕ່າງກໍ່ຮູ້ສຶກເສົ້າສະຫລົດໃຈທີ່ສຸດ ແລະ ຕັດສິນໃຈຈະປະຕິບັດຄຳຕັກເຕືອນຂອງປະທານໂຮ່ຈິມີນ: ເຮັດແນວໃດເພື່ອປົດປ່ອຍພາກໃຕ້ຫວຽດນາມ ຍິ່ງໄວກໍ່ຍິ່ງດີ, ເພື່ອໂຮມປະເທດຊາດເປັນເອກະພາບ”. ປະຕິບັດຕາມພິໄນກຳຂອງປະທານໂຮ່ຈິມີນ, ເດືອນ 4/1975 ພວກຂ້າພະເຈົ້າໄດ້ສຳເລັດຫນ້າທີ່ຊື່ງລຸງໂຮ່ ມອບໝາຍໃຫ້, ປົກປັກຮັກສາປະເທດຊາດ, ນີ້ແມ່ນສິ່ງທີ່ປະທານໂຮ່ຈິມິນຍາມໃດກໍປາດຖະຫນາ.”
ສຳລັບຊາວຫວຽດນາມຫລາຍຄົນ, ເປັນຕົ້ນແມ່ນ ປະຊາຊົນບັນດາແຂວງທາງພາກກາງ ແລະ ພາກໃຕ້ ເມື່ອໄດ້ໄປຢ້ຽມຢາມສະຫນາມຫລວງ ບາດີງ, ເຂົ້າຢ້ຽມສຸສານປະທານໂຮ່ຈິມີນ, ຢ້ຽມຢາມບ່ອນຢູ່ ແລະ ບ່ອນເຮັດວຽກຂອງເພີ່ນ, ຢ້ຽມຢາມຫໍພິພິດທະພັນໂຮ່ຈິມີນ ນັ້ນແມ່ນຄວາມມຸ່ງມາດປາດຖະຫນາໃນຊີວິດຂອງເຂົາເຈົ້າ. ວັນທີ 2/9, ກໍແມ່ນວັນປະທານໂຮ່ຈິມີນລ່ວງລັບໄປ, ປ້າ ຫງວຽນທິແຫ້ງ ຢູ່ ແຂວງ ບີງທ້ວນ ພາກກາງ ຫວຽດນາມ ໄດ້ເວົ້າດ້ວຍຄວາມຕື້ນຕັນໃຈວ່າ:
“ ມື້ນີ້ ຂ້າພະເຈົ້າໄດ້ເຂົ້າຢ້ຽມສຸສານປະທານໂຮ່ຈິມີນ, ຢ້ຽມຢາມບ່ອນຢູ່ຂອງເພີ່ນ ໄດ້ເຫັນຮູບພາບ ແລະ ບັນດາສິ່ງຂອງຊື່ງປະທານໂຮ່ຈິມີນນຳໃຊ້ ຂ້າພະເຈົ້າຮູ້ສຶກຕື້ນຕັນໃຈທີ່ສຸດ. ເພາະວ່າ ວຽກງານທີ່ປະທານໂຮ່ຈິມີນ ຮັບຜິດຊອບແມ່ນລຳບາກຫຍຸ້ງຍາກທີ່ສຸດ ແຕ່ເພີ່ນບໍ່ທັນໄດ້ເຫັນປະຈັກຕາມື້ປົດປ່ອຍພາກໃຕ້, ໂຮມປະເທດຊາດເປັນເອກະພາບ, ບໍ່ທັນໄດ້ເຫັນປະເທດຊາດປ່ຽນແປງຄືແນວໃດ, ຊີວິດການເປັນຢູ່ຂອງປະຊາຊົນແມ່ນດີຂຶ້ນກວ່າໄລຍະກ່ອນ. ມາຢ້ຽມຢາມສຸສານປະທານໂຮ່ຈິມີນ ພວກຂ້າພະເຈົ້າຍາມໃດກໍຄິດເຖິງຄຸນງາມຄວາມດີຂອງເພີ່ນ, ຕັດສິນໃຈປະຕິບັດຕາມຄຳສັ່ງສອນຂອງລຸງໂຮ່ທີ່ວ່າ: ລຸງແລະພວກຫລານພ້ອມກັນຮັກສາປະເທດຊາດ, ນຳປະເທດຊາດກ້າວຂຶ້ນ ແລະ ພັດທະນາຢ່າງໝັ້ນຄົງເຂັ້ມແຂງ.”
ສະຫນາມຫລວງ ບາດີງ ປະຈຸບັນ ແມ່ນສະຫນາມຫລວງໃຫຍ່ກວ່າໝູ່ຢູ່ ຫວຽດນາມ, ດ້ວຍບໍລິເວນທີ່ມີຄວາມຍາວ 320 ແມດ, ກວ້າງ 100 ແມດ. ຢູ່ທີ່ນີ້ມີເສົາຊັກທຸງຊາດດ້ວຍສູງ 25 ແມັດ. ນີ້ແມ່ນສະຖານທີ່ຈັດຕັ້ງການສວນສະຫນາມເນື່ອງໃນໂອກາດສະເຫລີມສະຫລອງວັນສຳຄັນຂອງຫວຽດນາມ ແລະ ກໍແມ່ນສະຖານທີ່ທ່ອງທ່ຽວ, ລະຫລິ້ນຂອງຊາວຮ່າໂນ້ຍ ແລະ ນັກທ່ອງທ່ຽວ.