(vovworld) – ໂດຍຕັ້ງຢູ່ໃຈກາງນະຄອນຫຼວງຮ່າໂນ້ຍ, ຫໍພິພິດທະພັນປະຫວັດສາດກອງທັບຫວຽດນາມ ແມ່ນໜຶ່ງໃນຈຳນວນຫໍພິພິດທະພັນແຫ່ງຊາດ 7 ແຫ່ງທີ່ມີວັດຖຸພັນ ແລະ ຈຳນວນແຂກມາຢາມຫຼາຍກວ່າໝູ່ໃນປະຈຸບັນ. ຫໍພິພິດທະພັນກາຍເປັນສູນວັດທະນະທຳ, ປະຫວັດສາດ, ແມ່ນສະຖານທີ່ດຶງດູດນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດ.
ຫໍພິພິດທະພັນປະຫວັດສາດກອງທັບ
(ພາບ: ອິນເຕີແນດ)
ມາຢ້ຽມຢາມຫໍພິພິດທະພັນ, ຜົວເມຍທ່ານ Guy Bagot, ສັນຊາດ ອົດສະຕາລີ, ໄດ້ຢຸດໄວ້ຢູ່ຕໍ່ໜ້າຮູບພາບພົນເອກ ຫວໍງວຽນຢາບ ໃນຫ້ອງວາງສະແດງ “ຫວໍງວຽນຢາບ - ພົນເອກ, ຜູ້ບັນຊາການໃຫຍ່“ ເປັນເວລານານສົມຄວນ. ທ່ານ Guy Bagot ໃຫ້ຮູ້ວ່າ, ປີ 1968 – 1970, ທ່ານໄດ້ພ້ອມກັບທະຫານອາເມລິກາ ເຂົ້າຮ່ວມສົງຄາມຢູ່ຫວຽດນາມ, ເວລານັ້ນທ່ານບໍ່ຮູ້ຫຍັງກ່ຽວກັບກຳລັງແຮງຂອງກອງທັບຫວຽດນາມ, ແຕ່ບັນດານັກຮົບຄືທ່ານຍາມໃດກໍ່ເຕື້ອງເຖິງ ພົນເອກ ຫວໍງວຽນຢາບ ດ້ວຍຄວາມເຄົາລົບນັບຖື.
“ຫໍພິພິດທະພັນກອງທັບ ແມ່ນອະນຸສາວະລີປະຫວັດສາດທີ່ຍອດຍິ່ງ, ຊ່ວຍໃຫ້ຂ້າພະເຈົ້າເຂົ້າໃຈກວ່າກ່ຽວກັບຊຸມເດືອນປີແຫ່ງສົງຄາມຂອງການປະຕິວັດຫວຽດນາມ ນັບແຕ່ປີ 1945 ມາຮອດປະຈຸບັນ. ໂດຍແມ່ນອະດີດນັກຮົບທີ່ເຄີຍເຂົ້າຮ່ວມສົງຄາມຢູ່ຫວຽດນາມແຕ່ປີ 1968-1969, ແຕ່ບໍ່ທັນກັບມາຫວຽດນາມຈັກເທື່ອ... ເມື່ອຮັບຟັງຂ່າວພົນເອກ ຫວໍງວຽນຢາບ ເຖິງແກ່ມໍລະນະກຳ, ຂ້າພະເຈົ້າພ້ອມກັບເມຍຕັດສິນກັບມາຫວຽດນາມ ເພື່ອສະແດງຄວາມເຄົາລົບນັບຖືຂອງຕົນທີ່ມີຕໍ່ທ່ານພົນເອກຜູ້ເກັ່ງກ້າສາມາດນີ້ “.
ພົນເອກ ຫວໍງວຽນຢາບ ຜູ້ບັນຊາການໃຫຍ່ກອງທັບປະຊາຊົນຫວຽດນາມ
(ພາບ: ອິນເຕີແນດ) ຫໍພິພິດທະພັນປະຫວັດສາດກອງທັບຫວຽດນາມ ກ່ອນນີ້ແມ່ນຫໍພິພິດທະພັນກອງທັບ, ໄດ້ຮັບການສ້າງຕັ້ງຂຶ້ນເມື່ອປີ 1956. ປີ 1959, ຫໍພິພິດທະພັນເລີ່ມເປີດປະຕູ ເພື່ອຕ້ອນຮັບແຂກເຂົ້າຢ້ຽມຢາມ, ຮອດປີ 1964, ຫໍພິພິດທະພັນໄດ້ປ່ຽນຊື່ວ່າ ສະຖາບັນ ຫໍພິພິດທະພັນກອງທັບ ແລະ ຮອດປີ 2002 ມີຊື່ວ່າຫໍພິພິດທະພັນປະຫວັດສາດກອງທັບຫວຽດນາມ. ປະຈຸບັນ, ຫໍພິພິດທະພັນວາງສະແດງວັດຖຸພັນປະມານ 2000 ຢ່າງ ໃນຈຳນວນວັດຖຸພັນທັງໝົດ 150.000 ຢ່າງ ໃນເນື້ອທີ່ 3200 ຕາລາງແມັດ, ເຊິ່ງໄດ້ວາດພາບໃຫ້ເຫັນປະຫວັດແຫ່ງການສ້າງສາ ແລະ ປົກປັກຮັກສາປະເທດຊາດນັບແຕ່ສະໄໝເຈົ້າຊີວິດຮຸ່ງ ເຖິງຍຸກສະໄໝ ໂຮ່ຈີມິນ, ກໍ່ຄືບາງບັ້ນຮົບ, ຍຸດທະສາດຂອງຊາດໃນປະຫວັດແຫ່ງການຕໍ່ຕ້ານຕ້ານສັດຕູຜູ້ຮຸກຮານ, ສ່ອງແສງບັນດາຍຸດໂທບາຍ, ແນວທາງ, ສິລະປະການທະຫານຂອງຫວຽດນາມ. ພັນເອກ ຫງວຽນຊວນນັງ, ຜູ້ອຳນວຍການຫໍພິພິດທະພັນປະຫວັດສາດກອງທັບຫວຽດນາມ, ໃຫ້ຮູ້ວ່າເນື້ອໃນວາງສະແດງຢູ່ທີ່ນີ້ແບ່ງອອກເປັນ 6 ສ່ວນຄື: ແມ່ຫວຽດນາມ ວິລະຊົນ, ຊາດຫວຽດນາມ ວິລະຊົນ, ກອງທັບປະຊາຊົນຫວຽດນາມ ວິລະຊົນ, ມູນເຊື້ອກອງທັບປະຊາຊົນຫວຽດນາມ; ອາວຸດ, ເຄື່ອງມືຜະລິດອາວຸດຂອງຫວຽດນາມ; ໂລກສະໜັບສະໜູນຫວຽດນາມ ທຳການຕໍ່ຕ້ານ ແລະ ການພົວພັນລະຫວ່າງກອງທັບປະຊາຊົນຫວຽດນາມ ກັບກອງທັບປະເທດຕ່າງໆ
“ມີປັດໃຈໜຶ່ງອີກທີ່ໄດ້ສ້າງຄວາມດຶງດູດໃຫ້ແກ່ນັກທ່ອງທ່ຽວນັ້ນແມ່ນ ຫໍພິພິດທະພັນຕັ້ງໃນບໍລິເວນປູຊະນີຍະສະຖານປະຫວັດສາດທີ່ຕິດພັນກັບນະຄອນຫຼວງຮ່າໂນ້ຍ, ນັ້ນແມ່ນເສົາທຸງຮ່າໂນ້ຍ. ນີ້ກໍ່ແມ່ນຫໍພິພິດທະພັນໜຶ່ງດຽວໃນລະບົບຫໍພິພິດທະພັນຫວຽດນາມ ທີ່ວາງສະແດງບັນດາວັດຖຸພັນໃຫຍ່, ບັນດາອາວຸດ, ພາຫະນະສົງຄາມຂອງທັງຫວຽດນາມ ແລະ ສັດຕູຢູ່ກາງແຈ້ງ. ປະຈຸບັນ, ຫໍພິພິດທະພັນມີຮູບຈຳລອງບັ້ນຮົບປະຫວັດສາດດ້ຽນບຽນຝູ ແລະ ບັ້ນຮົບ ໂຮ່ຈີມິນ ແລະ ໄດ້ແປເປັນ 6 ພາສາ, ດັ່ງນັ້ນຈຶ່ງໄດ້ຮັບການຕີລາຄາສູງຈາກນັກທ່ອງທ່ຽວ “.
ຍົນ MIG 21, ໝາຍເລກ 5121ທີ່ໄດ້ຍິງຕົກຍົນ B 52 ຂອງອາເມລິກາເມື່ອປີ 1972
(ພາບ: ອິນເຕີແນດ) ກວ່າເຄິ່ງສະຕະວັດແຫ່ງການສ້າງຕັ້ງ ແລະ ພັດທະນາ, ຍາມໃດຫໍພິພິດທະພັນກໍ່ເອົາໃຈໃສ່ເປັນພິເສດເຖິງວຽກງານວາງສະແດງ ແລະ ໂຄສະນາ. ລະບົບວາງສະແດງໄດ້ຮັບການປ່ຽນໃໝ່, ຍົກສູງທັງຂະໜາດ, ເນື້ອໃນ ແລະ ຮູບການ. ໃນ 10 ປີຜ່ານມາ, ຫໍພິພິດທະພັນໄດ້ຈັດງານວາງສະແດງ 70 ຄັ້ງ. ແຕ່ລະປີ, ບັນດາຄະນະຄົ້ນຄ້ວາຂອງຫໍພິພິດທະພັນເສາະຫາ, ຮຽບຮຽງວັດຖຸພັນໄດ້ປະມານ 500-600 ຢ່າງ. ພັນເອກ ຫງວຽນຊວນນັງ, ໃຫ້ຮູ້ວ່າ:
“ປະຈຸບັນ, ຫໍພິພິດທະພັນພວມວາງສະແດງຍົນ MIG 21, ໝາຍເລກ 5121, ໂດຍນັກວິລະຊົນ ຟ້າມຕວນ ຂັບໃນບັ້ນຮົບດ້ຽນບຽນຝູ ທາງອາກາດເມື່ອປີ 1972 ແລະ ຍິງຕົກຍົນ B 52 ຂອງອາເມລິກາ, ທີສອງແມ່ນລົດຕັງໝາຍເລກ 843, ທີ່ໄດ້ຕຳ່ໃສ່ປະຕູໂຂງຂອງທຳນຽບເອກະລາດເມື່ອວັນທີ 30/4/1975... ໃນນັ້ນຫ້ອງວາງສະແດງອາວຸດປະຖົມປະຖານໂດຍຫວຽດນາມຜະລິດເອງ ໄດ້ຮັບຄວາມສົນໃຈຈາກແຂກມາຢາມ, ພິເສດແມ່ນແຂກຕ່າງປະເທດ. ເຂົາເຈົ້າໃຫ້ຮູ້ວ່າ, ເມື່ອບໍ່ທັນມາຢາມຫໍພິພິດທະພັນ, ເຂົາເຈົ້າບໍ່ສາມາດນຶກຄິດໄດ້ວ່າປະເທດນ້ອຍ, ທຸກຍາກ ແລະ ບໍ່ໄດ້ປະກອບອາວຸດທີ່ທັນສະໄໝຄືຫວຽດນາມ ພັດຕີເອົາຊະນະລ່າເມືອງຂຶ້ນຝລັ່ງ ແລະ ຈັກກະພັດອາເມລິກາ ໄດ້. ແຕ່ເມື່ອມາຢາມແລ້ວ, ເຂົາເຈົ້າສາມາດເຂົ້າໃຈໄດ້ສ່ວນໃດສ່ວນໜຶ່ງວ່າ ເປັນຫຍັງຫວຽດນາມ ໄດ້ຮັບໄຊຊະນະຄືແນວນັ້ນ“.
ລົດຕັງໝາຍເລກ 843, ທີ່ໄດ້ຕຳ່ໃສ່ປະຕູໂຂງຂອງທຳນຽບເອກະລາດເມື່ອວັນທີ 30/4/1975
(ພາບ: ອິນເຕີແນດ) ເພື່ອຕອບສະໜອງຄວາມຮຽກຮ້ອງຕ້ອງການວາງສະແດງ ແລະ ຮັບໃຊ້ນັກທ່ອງທ່ຽວ, ຫໍພິພິດທະພັນປະຫວັດສາດກອງທັບຫວຽດນາມ ພວມຍື່ນສະເໜີໂຄງການກໍ່ສ້າງຫໍພິພິດທະພັນປະຫວັດສາດກອງທັບຫວຽດນາມແຫ່ງໃໝ່ຕໍ່ກະຊວງປ້ອງກັນປະເທດ, ດ້ວຍຫໍວາງສະແດງທີ່ທັນສະໄໝ ໃນເນື້ອທີ່ກວ້າງຂວາງກວ່າ ເພື່ອຊ່ວຍໃຫ້ນັກທ່ອງທ່ຽວພາຍໃນ ແລະ ຕ່າງປະເທດເຂົ້າໃຈແຈ້ງກວ່າກ່ຽວກັບປະເທດຊາດແລະຊາວຫວຽດນາມ; ກ່ຽວກັບຂອບຂະໜາດ, ກຳລັງແຮງຂອງກອງທັບປະຊາຊົນຫວຽດນາມ