ໝູ່ບ້ານປູກຜັກ ຈາເກວ ແມ່ນສະຖານທີ່ທ່ອງທ່ຽວທີ່ຂາດບໍ່ໄດ້ໃນລາຍການທ່ອງທ່ຽວຄົ້ນຫາ ໂຮ້ຍອານ ຂອງນັກທ່ອງທ່ຽວ. ໂດຍຫ່າງຈາກໃຈກາງນະຄອນ ໂຮ້ຍອານ ແຂວງ ກວ໋າງນາມ ປະມານ 3 ກິໂລແມັດ, ໝູ່ບ້ານປູກຜັກ ຈາເກວ ໄດ້ຢືນຢັນເຄື່ອງໝາຍການຄ້າທີ່ເປັນເອກະລັກສະເພາະຂອງຕົນກັບນັກທ່ອງທ່ຽວ ດ້ວຍລາຍການທ່ອງທ່ຽວເປັນຊາວກະສິກອນປູກຜັກໃນມື້ຫນຶ່ງ.
ຈາກນະຄອນໂຮ້ຍອານ, ນັກທ່ອງທ່ຽວເຄີຍຂີ່ລົດຖີບໄປຢ້ຽມຢາມໝູ່ບ້ານປູກຜັກ ຈາເກວ. ໃນໄລຍະກວ່າ 10 ປີມານີ້, ຊາວກະສິກອນປູກຜັກຢູ່ ໝູ່ບ້ານ ຈາເກວ ໄດ້ລື້ງເຄີຍກັບຮູບພາບນັກທ່ອງທ່ຽວຕ່າງປະເທດຫລາຍຄົນຂີ່ລົດຖີບເປັນຂະບວນໄປຢ້ຽມຢາມໝູ່ບ້ານ ແລະ ສະໝັກເປັນຊາວກະສິກອນປູກຜັກ. ໝູ່ບ້ານປູກຜັກ ຈາເກວ ດ້ວຍຜັກຫອມຫລາຍປະເພດ ແລະ ໄດ້ຮັບການປູກຝັງຕາມເຕັກໂນໂລຊີປອດສານພິດ ໄດ້ດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ. ປ້າ ໂດທິແທງ, ຊາວກະສິກອນປູກຜັກ ຢູ່ ຈາກວກ ໃຫ້ຮູ້ວ່າ:
ຊາວກະສິກອນແນະນຳວິທີປູກຜັກຫອມໃຫ້ແກ່ນັກທ່ອງທ່ຽວ
ພາບ:internet
|
“ຜັກຈາເກວ ຫອມຫລາຍ, ໃບຜັກນ້ອຍ. ຂ້າພະເຈົ້າປູກຜັກມາເປັນເວລາ 20 ປີແລ້ວ, ແລະ ຜັກໃນສວນຂອງຄອບຄົວສ່ວນຫລາຍແມ່ນຂາຍຍົກ. ຜັກຫອມຖືກໃຊ້ໃນອາຫານຫລາຍເຍື່ອງ. ເມື່ອນັກທ່ອງທ່ຽວມາຢາມ, ບາງຄົນຢາກປູກຜັກນຳ, ຂ້າພະເຈົ້າກໍ່ເຊີນເຂົາເຈົ້າເຂົ້າຮ່ວມເລີຍ. ແລະແນະນຳວິທີໃສ່ຝຸ່ນ, ຫົດນຳ້, ຂຸດຫນານປູກຜັກ. ເມື່ອເຫັນວ່ານັກທ່ອງທ່ຽວຮູ້ສຶກມ່ວນຊື່ນ, ແລະ ປູກຜັກຢ່າງສຸດຈິດສຸດໃຈ ຂ້າພະເຈົ້າກໍດີໃຈນຳ.”
ປະຈຸບັນ ທັງໝູ່ບ້ານມີປະມານ 100 ຄອບຄົວປູກຜັກ ໃນເນື້ອທີ່ 40 ເຮັກຕາ ດ້ວຍຜັກເກືອບ 30 ຊະນິດ ແລະ ເກັບກ່ຽວຕາມລະດູການ. ຫນຶ່ງໃນບັນດາຈຸດພິເສດຂອງໝູ່ບ້ານປູກຜັກ ຈາເກວ ນັ້ນແມ່ນ ຜັກຢູ່ທີ່ນີ້ ຖືກປູກຝັງຕາມແບບທຳມະຊາດ ແລະ ປອດສານພິດ. ປ້າ ເລທິບີງ ໃຫ້ຮູ້ຕື່ມອີກວ່າ:
“ການປູກຜັກຢູ່ທີ່ນີ້ ບໍ່ໃຊ້ສານພິດ ຫລືສານອື່ນຈັກເທື່ອ ພຽງແຕ່ໃຊ້ເທົາໃນແມ່ນ້ຳເປັນຕົ້ນ. ເມື່ອນຳເອົາຜັກຢູ່ບ່ອນອື່ນມາປູກຢູ່ທີ່ນີ້ ກໍເຫັນວ່າ ມັນຫອມກວ່າ.”
ເມື່ອນັກທ່ອງທ່ຽວມາແຫ່ງນີ້ຈະໄດ້ຮັບຟັງບັນດາເຄັດລັບໃນການປູກຜັກ ເພື່ອເຮັດໃຫ້ຜັກມີລົດຊາດເປັນເອກະລັກສະເພາະແລະຫອມກວ່າຜັກປູກຢູ່ບ່ອນອື່ນ.ອ້າຍ ໂຮ່ຊວນແທ່ງ, ຊາວກະສິກອນປູກຜັກຢູ່ ຈາເກວ ໃຫ້ຮູ້ວ່າ:
“ຜັກຫອມຢູ່ທີ່ນີ້ ມີກິ່ນຫອມກວ່າປູກຢູ່ບ່ອນອື່ນ ຍ້ອນທີ່ຕັ້ງພູມສາດ ສົມທົບກັບທີ່ດິນທຳມະຊາດ ແລະ ເທົາ, ໄຄໃນແມ່ນ້ຳ ໂກກໍ. ຜັກຢູ່ທີ່ນີ້ໃບນ້ອຍກວ່າ ແຕ່ກໍຫອມກວ່າ. ຖ້າຫາກນຳຜັກຢູ່ທີ່ນີ້ໄປປູກຢູ່ບ່ອນອື່ນ ກິນຈະບໍ່ຫອມຄືຜັກຢູ່ທີ່ນີ້.”
ໝູ່ບ້ານປູກຜັກ ຈາເກວ ເຖິງວ່າບໍ່ແມ່ນສະຖານທີ່ທ່ອງທ່ຽວໃນບັນດາລາຍການທ່ອງທ່ຽວກໍ່ຕາມ ແຕ່ພັດແມ່ນສະຖານທີ່ທ່ອງທ່ຽວແບບສະໝັກໃຈທີ່ຂາດບໍ່ໄດ້ໃນລາຍການທ່ອງທ່ຽວຂອງນັກທ່ອງທ່ຽວທຸກຄົນເມື່ອມາຢ້ຽມຢາມໂຮ້ຍອານ. ອ້າຍເວືອງຮ່ວາງ, ຜູ້ອຳນວຍການບໍລິສັດທ່ອງທ່ຽວ ກູລາວຈາມ ໃຫ້ຮູ້ວ່າ:
“ນັກທ່ອງທ່ຽວສ່ວນຫລາຍແມ່ນຕີລາຄາສູງຮູບແບບທ່ອງທ່ຽວເປັນຊາວກະສິກອນໃນມື້ຫນຶ່ງຢູ່ໝູ່ບ້ານຈາເກວ. ໝູ່ບ້ານປູກຜັກແມ່ນສະຖານທີ່ດຶງດູດນັກທ່ອງທ່ຽວ. ນັກທ່ອງທ່ຽວຕ່າງປະເທດມາແຫ່ງນີ້ຕ່າງກໍ່ຮູ້ສຶກແປກປະຫລາດ ຍ້ອນປະເທດເຂົາເຈົ້າບໍ່ມີຮູບການທ່ອງທ່ຽວນີ້. ຊ້ຳບໍ່ຫນຳ, ເຂົາເຈົ້າກໍ່ພ້ອມແລ້ວທີ່ຈະຈ່າຍເງິນປະມານ 40-50 ໂດລາສະຫະລັດເພື່ອກາຍເປັນຊາວກະສິກອນປູກຜັກ. ຍັງມີຈຸດພິເສດໜຶ່ງອີກທີ່ພາໃຫ້ນັກທ່ອງທ່ຽວມັກ ນັ້ນແມ່ນ ຜັກຢູ່ທີ່ນີ້ບໍ່ໃຊ້ສານພິດ, ຟຸ່ນເຄມີ ພຽງແຕ່ໃຊ້ເທົານຳ້ເທົ່ານັ້ນ. ສະນັ້ນ ຜັກຢູ່ໝູ່ບ້ານ ຈາກວກ ຈຶ່ງແມ່ນຜັກປອດສານພິດ.”
ນັກທ່ອງທ່ຽວຕ່າງປະເທດເປັນຊາວກະສິກອນປູກຜັກ
ພາບ: internet
|
ເພື່ອໃຫ້ເຄື່ອງໝາຍທ່ອງທ່ຽວຜັກ ຈາເກວ ມີຊື່ສຽງຄືປະຈຸບັນ ຕ້ອງເວົ້າເຖິງວິໄສທັດ ແລະ ຄວາມສຸດຈິດສຸດໃຈຂອງອຳນາດການປົກຄອງ ກວ໋າງນາມ ທຸກຂັ້ນ. ເພື່ອອະນຸລັກຮັກສາເຄື່ອງໝາຍຜັກ ຈາເກວມາເປັນເວລາເກືອບ 400 ປີນັ້ນ, ນັບແຕ່ປີ 2004 ມາຮອດປະຈຸບັນ, ຄະນະກຳມະການປະຊາຊົນ ນະຄອນ ໂຮ້ຍອານ ໄດ້ລົງທຶນຍົກລະດັບພື້ນຖານໂຄງລ່າງ, ຈົດທະບຽນປົກປ້ອງເຄື່ອງໝາຍເອກະສິດ “ຈາເກວ-ໂຮ້ຍອານ”. ອຳນາດການປົກຄອງ ນະຄອນ ໂຮ້ຍອານ ກໍ່ຮຽກຮ້ອງໃຫ້ບັນດາລາຍການທ່ອງທ່ຽວໃນບໍລິເວນຈັດໝູ່ບ້ານປູກຜັກ ຈາເກວ ເຂົ້າໃນລາຍການທ່ອງທ່ຽວ. ແລະ 10 ປີຜ່ານມາ, ໝູ່ບ້ານປູກຜັກ ຈາເກວ ໄດ້ຢືນຢັນໃຫ້ເຫັນວ່າເຄື່ອງໝາຍທ່ອງທ່ຽວວົງຄະນາຍາດໄດ້ປະສົບຜົນສຳເລັດ ແລະ ຊາວກະສິກອນແມ່ນຜູ້ໄດ້ຮັບຜົນປະໂຫຍດໂດຍກົງ. ຍ້ອນເຫດນັ້ນ, ຍາມໃດເຂົາເຈົ້າກໍມີສະຕິຮັກສາເຄື່ອງໝາຍ ແລະ ມີຄວາມໃກ້ຊິດສະຫນິດສະຫນົມກັບນັກທ່ອງທ່ຽວ. ຢູ່ທີ່ນີ້ ຊາວກະສິກອນທຸກຄົນຕ່າງກໍ່ໄດ້ຮັບຖືວ່າແມ່ນຜູ້ນຳທ່ຽວຂອງໝູ່ບ້ານ, ນັກທ່ອງທ່ຽວໄປຢ້ຽມຢາມເອງ ຫລືໄປຕາມຄະນະກໍລ້ວນແຕ່ໄດ້ຮັບການຕ້ອນຮັບຢ່າງສະຫນິດສະຫນົມ. ເອື້ອຍ Beth ນັກທ່ອງທ່ຽວທີ່ຫາກໍເປັນຊາວກະສິກອນປູກຜັກໃນມື້ຫນຶ່ງໃຫ້ຮູ້ວ່າ:
“ຂ້າພະເຈົ້າຮູ້ສຶກມ່ວນຫລາຍເມື່ອໄດ້ເຂົ້າຮ່ວມການປູກຜັກກັບຊາວກະສິກອນ. ຂ້າພະເຈົ້າຄິດວ່າ ຕົນເອງຕ້ອງຝືກແອບຫລາຍກວ່າ. ຂ້າພະເຈົ້າມານີ້ຕາມລາຍການທ່ອງທ່ຽວ. ນີ້ເປັນຄັ້ງທຳອິດທີ່ຂ້າພະເຈົ້າມາຢ້ຽມຢາມຫວຽດນາມ ແລະ ໂຮ້ຍອານ. ຂ້າພະເຈົ້າເຫັນວ່າ ຫວຽດນາມແມ່ນປະເທດງາມຫລາຍ.”
ເອື້ອຍ Beth ກໍຄືນັກທ່ອງທ່ຽວອື່ນອີກຫລາຍຄົນ ລ້ວນແຕ່ເວົ້າວ່າ ເຂົາເຈົ້າບໍຄິດໄດ້ວ່າ ມາຫວຽດນາມ ເພື່ອກາຍເປັນຊາວກະສິກອນຢ່າງແທ້ຈິງຄືແນວນີ້. ເມື່ອສັງເກດສວນຜັກຫອມທຸກຊະນິດ ທີ່ຂຽວອຸ່ມທຸ່ມ ນັກທ່ອງທ່ຽວຈະຮູ້ສຶກຈັບອົກຈັບໃຈຫຼາຍຈົນກໍ່ບໍ່ຢາກຍ້າຍໄປອອກຈາກແຫ່ງນີ້ອີກ.