ໝູ່ບ້ານຕາມເດືອງທີ່ຂຶ້ນກັບຕາແສງຕ້ຽນດຶກ ເມືອງຮຶງຮ່າ ແຂວງທ້າຍບີງ ແມ່ນດິນແດນທີ່ສັກສິດ ແລະ ເປັນແຫ່ງກຳເນີດ ແລະ ສ້າງພາລະກິດຂອງລາດຊະວົງເຈີນ ( 1226-1400) ທັງແມ່ນບ່ອນທີ່ລວງລັບຂອງເຈົ້າຊີວິດບັນດາອົງທຳອິດໃນສະໄໝລາດຊະວົງເຈີນ. ແຕ່ລະປີ, ແຂກທ່ອງທ່ຽວທີ່ມາຈາກສາລະທິດໄດ້ກັບຄືນເມືອຮຶງຮ່າ ຢ້ຽມຢາມເຂດປູຊະນີຍະສະຖານພະວິຫານບູຊາ ແລະ ສຸສານຂອງບັນດາເຈົ້າຊີວິດໃນ ສະໄໝລາດຊະວົງເຈີນຢູ່ໝູ່ບ້ານຕາມເດືອງ ເພື່ອໄຕ້ທູບທຽນອາໄລຫາເຖິງຄຸນງາມຄວາມດີ, ການປະກອບສ່ວນຂອງລາດຊະວົງເຈີນສຳລັບປະເທດຊາດຫວຽດນາມ.
ໝູ່ບ້ານຕາມເດືອງໃນແຂວງທ້າຍບີງ |
ໝູ່ບ້ານຕາມເດືອງ ກ່ອນນີ້ຍັງມີຊື່ເອີ້ນວ່າ ທ້າຍເດືອງ, ຕັ້ງຢູ່ໃຈກາງຕາແສງດຶກຕ້ຽນ. ເຂດປູຊະນີຍະສະຖານບັນດາເຈົ້າຊີວິດໃນ ສະໄໝລາດຊະວົງເຈີນຢູ່ ໝູ່ບ້ານຕາມເດືອງແມ່ນແຫ່ງທີ່ເປັນຂີດໝາຍປະຫວັດສາດຕິດແໜ້ນກັບລາດຊະວົງເຈີນ, ກັບເຈົ້າຊີວິດ ເຈີນທ້າຍຕົງ, ເຈີນແທ້ງຕົງ, ເຈີນເຍີນຕົງ ແລະ ບັນດານາຍພົນຜູ້ທີ່ມີຄວາມເກັ່ງກ້າສາມາດເຊັ່ນ: ນາຍພົນ ເຈີນຖູໂດະ, ເຈີນຮຶງດ້າວ, ເຈີນກວາງຂາຍ… ທ່ານ ຫງວຽນວັນບົນ ຮອງຫົວໜ້າຄະນະຄຸ້ມຄອງ ເຂດປູຊະນີຍະສະຖານພະວິຫານເຈີນ ໃຫ້ຮູ້ວ່າ :
“ ປະເທດຊາດ ກໍມີບັນພະບຸລຸດ, ສ່ວນແຂວງກໍມີດິນແດນທີ່ສັກສິດ. ທ້າຍບີງ ແລະ ຮຶງຮ່າຖື ໝູ່ບ້ານຕາມເດືອງແມ່ນດິນແດນສັກສິດຂອງແຂວງ. ປະຊາຊົນຈາກສາລະທິດໄດ້ກັບມານີ້ຢ່າງຫຼວງຫຼາຍ. ເມື່ອມານີ້, ປະຊາຊົນມີຄວາມເຂົ້າໃຈຕື່ມວ່າ ຢູ່ທ້ອງຖິ່ນຂອງຕົນໄດ້ມີເຂດດິນທີ່ສັກສິດ, ມີສຸສານຂອງບັນດາເຈົ້າຊີວິດ, ລາຊະທິດາ, ພະມະເຫສີໃນສະໄໝລາດຊະວົງເຈີນ. ປະຊາຊົນເຄີຍຈັດຕັ້ງການໄປຖະຫວາຍທູບທຽນບູຊາອາໄລຫາຢູ່ນີ້ ”
ບົນເນື້ອທີ່ດິນປະມານ 5000 ຕາແມັດ, ພະວິຫານບັນດາເຈົ້າຊີວິດໃນສະໄໝລາດຊະວົງເຈີນ ແລະ ພະວິຫານບູຊາພະອໍລະຫັນ ເຈີນຮຶງດ້າວ ໄດ້ຮັບການກໍ່ສ້າງຢ່າງລະອຽດລະອໍ, ສະຫງ່າຜ່າເຜີຍຢູ່ໃຈກາງຕາແສງຕ້ຽນດຶກ. ທ່ານ ຫງວຽນວັນບົນ ຮອງຫົວໜ້າຄະນະຄຸ້ມຄອງ ເຂດປູຊະນີຍະສະຖານພະວິຫານເຈີນ ໃຫ້ຮູ້ອີກວ່າ :
“ ກຸ່ມປູຊະນີຍະສະຖານນີ້ ມີບາງເຂດຕົ້ນຕໍ, ນັ້ນແມ່ນເຂດພະວິຫານບູຊາ ບັນດາເຈົ້າຊີວິດໃນສະໄໝລາດຊະວົງເຈີນ, ພະວິຫານບູຊາພະແມ່ໃນລາດຊະວົງເຈີນ. ຢູ່ເບື້ອງຊ້າຍມືແມ່ນເຂດພະວິຫານບູຊາພະອໍລະຫັນ ເຈີນຮຶງດ້າວ. ຢູ່ທາງນອກແມ່ນເດີນຈັດງານບຸນ. ຫ່າງຈາກນັ້ນບໍ່ໄກແມ່ນເຂດສຸສານຂອງລາດຊະວົງເຈີນ ”
ຢູ່ໝູ່ບ້ານຕາມເດືອງ ຍັງຄົງຕົວໂນນ 3 ແຫ່ງ, ແຕ່ລະແຫ່ງແມ່ນຂຸມຝັງສົບຂອງເຈົ້າຊີວິດອົງທຳອິດໃນ ສະໄໝລາດຊະວົງເຈີນ. ໂນນ 3 ແຫ່ງດັ່ງກ່າວມີຄວາມສູງປະມານ 5-6 ແມດ. ສຳລັບຊາວທ້ອງຖິ່ນ ແລະ ແຂກສາລະທິດແລ້ວ, ເຂດປູຊະນີຍະສະຖານພະວິຫານເຈີນ ແມ່ນແຫ່ງທີ່ສັກສິດ, ມີຄຸນຄ່າທາງດ້ານຈິດວິນຍານ.
ງານບຸນວິຫານເຈີນຢູ່ ໝູ່ບ້ານຕາມເດືອງໃນແຂວງທ້າຍບີງ ຖືກຈັດຂຶ້ນໃນເດືອນຈຽງໄລ່ຕາມຈັນທະປະຕິທິນໃນແຕ່ລະປີ. ປະຊາຊົນໃນທົ່ວປະເທດໄດ້ເຕົ້າໂຮມກັນມານີ້ ເຂົ້າຮ່ວມງານບຸນດ້ວຍການລະຫຼິ້ນຕ່າງໆເຊັ່ນ: ພິທີແຫ່ວໍ, ຕີມວຍ, ປ່ອຍວາ່ວ, ແຂ່ງຂັນໝາກກະໂພກ…ແລ້ວກໍຮອດວັນເພັງ, ວັນທີ 1 ໄລ່ຕາມຈັນທະປະຕິທິນໃນແຕ່ລະເດືອນ, ຊາວບ້ານບ້ານຕາມເດືອງຕ່າງກໍພາກັນໄປຖະຫວາຍທູບທຽນບູຊາຢູ່ພະວິຫານ. ປ້າເຈີນທິຖຳ, ຊ້າວບ້ານຕາມເດືອງ ເວົ້າວ່າ :
“ຮອດວັນເພັງ ແລະ ວັນທີ 1 ໂດຍໄລ່ຕາມຈັນທະປະຕິທິນໃນແຕ່ລະເດືອນ, ຢູ່ນີ້ມີຄົນມາຢ່າງໜາແໜ້ນ. ຕອນກາງເວັນ, ຊາວບ້ານໄປເຮັດວຽກ, ຮອດຕອນແລງ ຈຶ່ງມານີ້ ຖະຫວາຍທູບທຽນບູຊາ. ບັນດາພະອາຈານ ກໍມານີ້ສວນມົນພາວະນາໃຫ້ແຕ່ລະຄອບຄົວ. ”
ເກືອບ 8 ສະຕະວັດໄດ້ຜ່ານພົ້ນໄປ, ສຸສານ ແລະ ພະວິຫານບັນດາເຈົ້າຊີວິດໃນສະໄໝລາດຊະວົງເຈີນຍັງຄົງຖືກຊາວບ້ານໃນແຂວງທ້າຍບີງມາຖະຫວາຍ ດອກໄມ້ທູບທຽນບູຊາ. ໃນບັນດາໂອກາດຈັດງານບຸນ, ແຂກທ່ອງທ່ຽວນັບໝື່ນຄົນຈາກສາລະທິດໄດ້ພາກັນຫຼັ່ງໄຫຼມານີ້ ຖະຫວາຍດອກໄມ້ ທູບທຽນບູຊາອາໄລຫາຄຸນງາມຄວາມດີ ແລະ ການປະກອບສ່ວນຂອງລາດຊະວົງເຈີນ. ແຂກທ່ອງທ່ຽວຫຼາຍຄົນເມື່ອມາທັດສະນະສຶກສາ ຍັງສະໜັບສະໜູນເງິນທອງວັດຖຸ, ຮ່ວມແຮງແຮງໃຈພ້ອມກັບປະຊາຊົນທ້ອງຖິ່ນເພື່ອບູລະນະປະຕິສັງຂອນ ແລະ ອະນຸລັກຮັກສາເຂດປູຊະນີຍະສະຖານໃຫ້ສົມກັບເປັນແຫ່ງສ້າງພາລະກິດຂອງລາດຊະວົງເຈີນ .