(vovworld) - ປະຈຸບັນ, ມ໋ອງກ໋າຍ ພວມກາຍເປັນໜຶ່ງໃນບັນດາສະຖານທີ່ທ່ອງທ່ຽວໃນເຂດຊາຍແດນທີ່ສ້າງຄວາມດູດດື່ມນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດ. ຢູ່ທີ່ນີ້ມີທີວທັດທຳມະຊາດທີ່ສວຍງາມ, ມີຈຸດທ່ອງທ່ຽວພິເສດຫຼາຍແຫ່ງ, ມີວັດທະນະທຳອາຫານການກິນທີ່ເປັນເອກະລັກສະເພາະເຮັດໃຫ້ນັກທ່ອງທ່ຽວນິຍົມທີ່ສຸດ.
ນະຄອນມ໋ອງກ໋າຍ
(ພາບ: ອິນເຕີແນດ)
ສະຖານທີ່ທຳອິດໃນລາຍການທ່ອງທ່ຽວມ໋ອງກ໋າຍ ນັ້ນແມ່ນຕາແສງຈ່າໂກ, ດິນແດນແຫ່ງທຳອິດຂອງຫວຽດນາມ, ນີ້ແມ່ນແຫ່ງເຕົ້າໂຮມບັນດາປັດໃຈຢັ້ງຢືນອະທິປະໄຕຜືນແຜ່ນດິນຂອງຫວຽດນາມ ດ້ວຍແຫຼມຊາຫວີ, ບ່ອນຕັ້ງຮອຍແຕ້ມທຳອິດໃນແຜນທີ່ຫວຽດນາມ; ສາລາຈ່າໂກ, ສາລາທີ່ເຂັ້ມຄົ້ນໄປດ້ວຍວັດທະນະທຳຫວຽດນາມ; ໂບດຈ່າໂກ ທີ່ເກົ່າແກ່… ນັກທ່ອງທ່ຽວມາແຫ່ງນີ້ຜູ້ໃດກໍ່ຢາກຖ່າຍຮູບຢູ່ຂ້າງຫຼັກໝາຍອະທິປະໄຕຜືນແຜ່ນດິນຂອງຫວຽດນາມ ເພື່ອເປັນອະນຸສອນການຢ້ຽມຢາມດິນແດນຕອນທຳອິດຂອງປະເທດ
(ພາບ: ອິນເຕີແນດ)
ມ໋ອງກ໋າຍ ມີຫາດຊາຍທະເລຈ່າໂກ, ແມ່ນໜຶ່ງໃນບັນດາຫາດຊາຍທະເລຍາວກວ່າໝູ່ຢູ່ຫວຽດນາມ. ຫາດຊາຍທະເລຈ່າໂກ ຍັງຄົງຮັກສາຄວາມງາມແບບທຳມະຊາດໄວ້. ດ້ວຍຫາດຊາຍທະເລຂາວ ແລະ ຮາບພຽງ, ພ້ອມກັບຄື້ນທະເລທົບໃສ່ຝັ່ງຕະຫຼອດ. ນີ້ແມ່ນແຫ່ງເພື່ອໃຫ້ນັກທ່ອງທ່ຽວຍ່າງຫຼິ້ນ ແລະ ເຈືອຈານເຂົ້າທຳມະຊາດທີ່ປອດໂປ່ງ. ເອື້ອຍ ຫງວຽນຖູ່ຍລິງ, ບໍລິສັດທ່ອງທ່ຽວ Open Tour, ແນະນຳວ່າ:
“ທະເລຈ່າໂກ ເຕົ້າໂຮມຈຸດພິເສດຫຼາຍຢ່າງ. ນີ້ແມ່ນຫາດຊາຍທະເລແຫ່ງທຳອິດໃນແຜນທີ່ປະເທດຫວຽດນາມ. ທະເລຈ່າໂກ ແມ່ນຫາດຊາຍທະເລຕິດກັບຊາຍແດນ, ຢືນຢູ່ນີ້ກໍ່ສາມາດເຫັນເບື້ອງຈີນໄດ້. ຢູ່ອ້ອມທະເລຈ່າໂກ ຍັງມີສະຖານທີ່ທ່ອງທ່ຽວທີ່ລືຊື່ຫຼາຍແຫ່ງອີກຄືແຫຼມຊາຫວີ, ແຫຼມງອກ, ສາລາຈ່າໂກ, ໂບດຈ່າໂກ.”
ທະເລຈ່າໂກ
(ພາບ: ອິນເຕີແນດ)
ຍ້າຍອອກຈາກຈ່າໂກ, ນັກທ່ອງທ່ຽວກັບຄືນໃຈກາງນະຄອນມ໋ອງກ໋າຍ, ຢູ່ນະຄອນທ່ານຈະໄດ້ຮັບປະທານອາຫານທະເລທີ່ແຊບນົວຫຼາຍເຍື່ອງ, ເຊິ່ງປະຊາຊົນຢູ່ທີ່ນີ້ແນະນຳວ່າ, ນັ້ນແມ່ນອາຫານພິເສດສະເພາະຂອງທະເລມ໋ອງກ໋າຍ. ອາຫານທະເລທີ່ມີເຄື່ອງໝາຍມ໋ອງກ໋າຍ ໄດ້ປະກອບສ່ວນສ້າງຄວາມປະທັບໃຈ, ເຮັດໃຫ້ນັກທ່ອງທ່ຽວຄິດຮອດຄິດເຖິງເຂດດິນແຫ່ງນີ້. ອ້າຍ ຫງວຽນຕ໋ວນດຶກ, ບໍລິສັດທ່ອງທ່ຽວມິດຕະພາບ, ແຂວງກວາງນິງ, ໃຫ້ຮູ້ວ່າ:
“ການປຸງແຕ່ງສິນທະເລຢູ່ມ໋ອງກ໋າຍ ກໍ່ຕ່າງກັບເຂດຕ່າງໆ. ເວົ້າເຖິງມ໋ອງກ໋າຍ ແມ່ນເວົ້າເຖິງເຂົ້າປຽກສິນທະເລ ແລະ ອາຫານເຍື່ອງຕ່າງໆຂອງຈີນ. ອາຫານຢູ່ມ໋ອງກ໋າຍ ມີຫຼາຍຮູບຫຼາຍແບບ. ເຂົ້າປຽກຢູ່ທີ່ນີ້ບໍ່ພຽງແຕ່ແຕ່ງກັບກຸ້ງ, ປູທະເລເທົ່ານັ້ນ, ຫາກຍັງມີຊີ້ນໝູ ແລະ ຜັກອີກດ້ວຍ.”
ເຂົ້າປຽກສິນທະເລຢູ່ມ໋ອງກ໋າຍ
(ພາບ: ອິນເຕີແນດ)
ດ່ານຊາຍແດນສາກົນມ໋ອງກ໋າຍ ແມ່ນດ່ານຊາຍແດນພິເສດທີ່ສຸດຢູ່ຫວຽດນາມ, ເພາະວ່າມັນຕິດກັບນະຄອນ, ດັ່ງນັ້ນພຽງແຕ່ເຮັດລະບຽບການບໍລິຫານດ້ານການທູດຢ່າງງາຍດາຍເທົ່ານັ້ນ, ນັກທ່ອງທ່ຽວກໍ່ສາມາດໄປຢາມປະເທດຈີນໄດ້. ເອື້ອຍ ຫງວຽນຖູ່ຍລິງ, ແນະນຳວ່າ:
“ຖ້າຢາກຂ້າມດ່ານຊາຍແດນສາກົນມ໋ອງກ໋າຍ ເພື່ອໄປຍັງແຂວງກວາງຊິງ ຂອງຈີນ ນັກທ່ອງທ່ຽວພຽງແຕ່ກະກຽມບັດປະຈຳຕົວ ແລະ ຮູບຖ່າຍ ເພື່ອເຮັດໜັງສືຜ່ານແດນເທົ່ານັ້ນ ກໍ່ສາມາດໄປໄດ້ໂດຍບໍ່ຕ້ອງລໍຖ້າດົນ. ດ່ານຊາຍແດນອັດປະຕູເວລາ 16 ໂມງຂອງທຸກວັນ, ດັ່ງນັ້ນພວກຂ້າພະເຈົ້າຈະພາແຂກທ່ອງທ່ຽວໄປຢ້ຽມຢາມບັນດາແຫ່ງທີ່ມີຊື່ສຽງຂອງຈີນຄືສະໜາມຫຼວງ, ສຳນັກອົງການ ບໍລິຫານ, ຕະຫຼາດຕຸງຊິງ ແຕ່ຕອນເຊົ້າແລ້ວກັບມາຫວຽດນາມໃຫ້ທັນເວລາ“
ດ່ານຊາຍແດນສາກົນມ໋ອງກ໋າຍ
(ພາບ: ອິນເຕີແນດ)
ໄປທ່ອງທ່ຽວມ໋ອງກ໋າຍ, ທ່ານຈະມີໂອກາດແວ່ຢາມສູນການຄ້າມ໋ອງກ໋າຍ. ນີ້ແມ່ນຕະຫຼາດໃຫຍ່ກວ່າໝູ່ຢູ່ນະຄອນມ໋ອງກ໋າຍ, ແມ່ນແຫ່ງແລກປ່ຽນການຄ້າລະຫວ່າງນັກທຸລະກິດຫວຽດນາມ ແລະ ຈີນ. ກ່ອນທີ່ຈະອອກຈາກມ໋ອງກ໋າຍ, ນັກທ່ອງທ່ຽວສາມາດເລືອກຊື້ສິນຄ້າຫຼາຍປະເພດຄື: ອາພອນສະໄໝ, ເຄື່ອງໄຟຟ້າ, ເຄື່ອງໃຊ້ພາຍໃນຄອບຄົວ… ດ້ວຍຫຼາຍຮູບຫຼາຍແບບ ແລະ ລາຄາກໍ່ເໝາະສົມ. ເອື້ອຍ ລິງ ແນະນຳວ່າ:
“ຢູ່ມ໋ອງກ໋າຍ ຍັງມີຕະຫຼາດອື່ນໆອີກຫຼາຍແຫ່ງ, ແຕ່ແຫ່ງທີ່ນັກທ່ອງທ່ຽວມັກມາຊື້ເຄື່ອງຂອງຫຼາຍກວ່າໝູ່ແມ່ນຕະຫຼາດໃຈກາງມ໋ອງກ໋າຍ. ຈຸດພິເສດຂອງຕະຫຼາດແມ່ນພຽງແຕ່ເປີດປະຕູພຽງເຄິ່ງມື້ເທົ່ານັ້ນ, ດັ່ງນັ້ນນັກທ່ອງທ່ຽວເຄີຍໄປຕະຫຼາດແຕ່ 7 ໂມງເຊົ້າເຖິງ 12 ໂມງ. ໃນຕະຫຼາດທັງຂາຍສິນຄ້າຂອງຫວຽດນາມ ແລະ ຈີນ.“
ສູນການຄ້າມ໋ອງກ໋າຍ
(ພາບ: ອິນເຕີແນດ) ມ໋ອງກ໋າຍ ແມ່ນແຫ່ງເຕົ້າໂຮມຫຼາຍປັດໃຈ ມີທັງແມ່ນ້ຳລຳເຊ, ພູຜາປ່າໄມ້, ເຂດທົ່ງພຽງ ແລະ ທະເລອີກ. ມາແຫ່ງນີ້, ນັກທ່ອງທ່ຽວບໍ່ພຽງແຕ່ໄດ້ຊົມເຫັນທັດສະນີຍະພາບທີ່ສວຍງາມ ແລະ ຮັບປະທານອາຫານພິເສດສະເພາະຂອງມ໋ອງກ໋າຍ ເທົ່ານັ້ນ, ຫາກຍັງຊອກໄດ້ຈຸດເວລາສະຫງົບງຽບຢູ່ເຂດທ່ອງທ່ຽວແຫ່ງຈິດວີນຍານອີກດ້ວຍ. ຜູ້ໃດມີໂອກາດໄປຢ້ຽມຢາມມ໋ອງກ໋າຍ ແລ້ວ, ກໍ່ຢາກໄດ້ກັບມາອີກ, ເພາະວ່າຢູ່ທີ່ນີ້ຍັງມີຫຼາຍສິ່ງຫຼາຍຢ່າງທີ່ຈັບອົກຈັບໃຈພວມລໍຖ້ານັກທ່ອງທ່ຽວມາຄົ້ນຫາ.