(vovworld)- ກຸງເກົ່າ ເຫ້ວ ບໍ່ພຽງແຕ່ສ້າງຄວາມດູດດື່ມນັກທ່ອງທ່ຽວດ້ວຍບັນດາສຸສານ, ວັດວາອາຮາມ, ວິຫານທີ່ເກົ່າແກ່, .. ເທົ່ານັ້ນ ຫາກ ນະຄອນເຫ້ວ ຍັງດຶງດູດນັກທ່ອງທ່ຽວດ້ວຍຄວາມງາມດ້ານສະຖາປັດຕະຍະກຳຂອງວັດວາອາຮາມຫລາຍຫລັງ. ປະຈຸບັນ ຢູ່ ເຫ້ວ ມີວັດໃຫຍ່, ນ້ອຍ ກວ່າ 100 ຫລັງ, ໃນນັ້ນ ມີວັດຫລາຍແຫ່ງມີອາຍຸຫລາຍກວ່າໝູ່ຄື: ວັດ ລີງມູ້ ໄດ້ຮັບການກໍ່ສ້າງເມື່ອປີ 1601, ວັດ ບ໋າວກວກ ໄດ້ຮັບການກໍ່ສ້າງເມື່ອປີ 1674, ວັດ ຕືດາມ ກໍ່ສ້າງເມື່ອປີ 1683. ບັນດາວັດວາອາຮາມ ຢູ່ ເຫ້ວ ລ້ວນແຕ່ແມ່ນບັນດາກິດຈະກຳສະຖາປັດຕະຍະກຳທີ່ເປັນເອກະລັກສະເພາະ ແລະ ຖືກຕັ້ງໃນບໍລິເວນທີ່ຕົ້ນໄມ້ຂຽວອຸ່ມທຸ່ມປົກຄຸມ. ບົດຂຽນຂອງນັກຂ່າວ ລານແອງ.
ວັດທຽນມູ້
ພາບ:internet
|
ໃນໄລຍະພັນປີຜ່ານມາ, ບັນດາວັດວາອາຮາມ ຢູ່ ເຫ້ວ ລ້ວນແຕ່ແມ່ນສະຖານທີ່ຊາວ ເຫ້ວ ກໍຄືແຂກທ່ອງທ່ຽວມາຈາກທຸກສາລະທິດ ເຄີຍແວ່ຢາມ ເພາະຄວາມງາມດ້ານສະຖາປັດຕະຍະກຳ ກໍຄືບັນຍາກາດສະຫງົບງຽບຢູ່ທີ່ນີ້ໄດ້ ເຮັດໃຫ້ເຂົາເຈົ້າຮູ້ສຶກຈິດໃຈສະຫວາດສະເຫວີຍກວ່າ. ອ້າຍ ຫງວຽນແທງກົງ, ຊ່າງພາບສະໝັກຫລິ້ນ ພວມຢ້ຽມຢາມວັດຢູ່ເຫ້ວ ໃຫ້ຮູ້ວ່າ:
“ນັກທ່ອງທ່ຽວມາຢ້ຽມຢາມເຫ້ວ ຕາມປົກກະຕິແລ້ວແມ່ນຈະໄປຢ້ຽມຢາມວັດທີ່ມີຊື່ສຽງຄື: ວັດທຽນມູ້, ວັດຕືດາມ. ເພາະວ່າ ບັນດາວັດວາອາຮາມນີ້ແມ່ນວັດທີ່ໃຫຍ່ໂຕ, ມີອາຍຸຫລາຍຮ້ອຍປີ ແລະ ຕິດພັນກັບປະຫວັດຄວາມເປັນມາຂອງນະຄອນເຫ້ວ.”
ສະຖານທີ່ທຳອິດທີ່ນັກທ່ອງທ່ຽວໄປຢ້ຽມຢາມໃນລາຍການທ່ອງທ່ຽວຄົ້ນຫານະຄອນເຫ້ວ ນັ້ນແມ່ນ ວັດ ຕືດາມ. ວັດຫລັງນີ້ ຖືກຕັ້ງຢູ່ ຕາແສງ ເຈື່ອງອານ ນະຄອນເຫ້ວ ແລະ ໄດ້ຮັບການກໍ່ສ້າງໃນທ້າຍສັດຕະວັດທີ 17. ວັດ ຕືດາມ ລວມມີ 3 ຫ້ອງໃຫຍ່ ແລະ 2 ຫ້ອງນ້ອຍຂ້າງເຮືອນ. ຢູ່ 2 ເບື້ອງຂອງວັດ ມີ ຫໍລະຄັງ ແລະ ຫໍກອງ. ຢູ່ກາງເດີນວັດ ມີຮູບປັ້ນເຄິ່ງໂຕຂອງ ນັກບວດ ເຕີມມີງ ຊື່ງແມ່ນຜູ້ມີຄຸນງາມຄວາມດີຫລາຍຢ່າງຕໍ່ວັດ ດ້ວຍຂະບວນການສ້າງສາ ແລະ ພັດທະນາພຸດທະສາດສະຫນາ ຈີນ -ຫວຽດນາມ. ເອື້ອຍ ມາຍແທງເຮືອງ, ນັກທ່ອງທ່ຽວ ມາຈາກ ຮ່າໂນ້ຍ ແບ່ງປັນວ່າ: ຖ້າຫາກຜູ້ໃດມາຢ້ຽມຢາມ ເຫ້ວ ຢາກເຂົ້າໃຈຄຳຖາມທີ່ວ່າ ເປັນຫຍັງນັກທ່ອງທ່ຽວເຄີຍເອີ້ນນະຄອນ ເຫ້ວ ແມ່ນນະຄອນແຫ່ງວັດວາອາຮາມ
“ມາຢ້ຽມຢາມ ເຫ້ວ, ໂດຍສະເພາະເມື່ອມາຢ້ຽມຢາມວັດ ຕືດາມ ຂ້າພະເຈົ້າເຫັນວ່າ ຢູ່ທີ່ນີ້ບັນຍາກາດ ສະຫງົບງຽບທີ່ສຸດ ເຮັດໃຫ້ຈິດໃຈສະຫວາດສະເຫວີຍກວ່າ. ວັດຫລັງນີ້ ມີຄວາມງາມພິເສດສະເພາະ ແລະ ກໍແມ່ນສະຖານທີ່ເລີ່ມຕົ້ນຂະບວນການພຸດທະສາດສະຫນາເພື່ອຕ້ານຄືນລະບອບພະເດັດການອາເມເລິກາ ແລະ ອຳນາດການປົກຄອງໂງດີງຢ້ຽມ.”
ຖ້າຫາກ ວັດຕືດາມແມ່ນສະຖານທີ່ຮັກສາບັນດາເຫດການແຫ່ງການຕໍ່ສູ້ ແຕ່ບໍ່ໃຊ້ຄວາມຮຸນແຮງຂອງຂະບວນການພຸດທະສາດສະຫນາ, ສ່ວນ ວັດ ຕືຮຽວ ແມ່ນທັດສະນີຍະພາບຮັກສາດ້ານ ວັດທະນະທຳ ແລະ ປະຫວັດສາດຂອງກຸງເກົ່າເຫ້ວ. ວັດຕືຮຽວ ຖືກຕັ້ງຢູ່ ຕາແສງ ຖູຍຊວນ ນະຄອນເຫ້ວ. ນີ້ແມ່ນຫນຶ່ງໃນບັນດາວັດບູຮານໃຫຍ່ ແລະ ຈຸດທີ່ເປັນເອກະລັກສະເພາະຂອງວັດແຫ່ງນີ້ ບໍ່ແມ່ນດ້ານສະຖາປັດຕະຍະກຳ ຫາກແມ່ນບັນດາສຸສານ ແລະ ເຂດບູຊານາຍພົນເຮືອ ເລວັນຢວຽດ ແລະ ສຸສານເສນາອາມາດໃນບໍລິເວນວັດ. ຊ່າງພາບ ແທ່ງກົງ ໃຫ້ຮູ້ວ່າ:
“ວັດ ຕືຮຽວ ແມ່ນວັດທີ່ມີຊື່ສຽງ. ໃນປະຫວັດຄວາມເປັນມາ ວັດຕືຮຽວ ແມ່ນສະຫງວນໃຫ້ແກ່ເສນາອາມາດດຳລົງຊີວິດ ພາຍຫລັງອອກຈາກພະລາຊະວັງ. ປະຈຸບັນ ມີພຽງແຕ່ນັກບວດ ແລະ ຜູ້ເຝົ້າຮັກສາວັດ, ພິເສດ ແມ່ນບັນດານັກບວດຫນຸ່ມເຂົ້າວັດ ເພື່ອຝືກຝົນຫລໍ່ຫລອມຕົນເອງ. ສະນັ້ນ ເມື່ອທ່ານມານີ້ ຈະພົບເຫັນນັກບວດຫນຸ່ມຫລາຍຄົນ. ແລະຈຸດພິເສດ ນັກບວດຢູ່ວັດນີ້ ເຄີຍຫລິ້ນກິລາ, ເຕະບານ, ເຕະດອກຂົນໄກ່. ສະນັ້ນບັນຍາກາດຢູ່ທີ່ນີ້ແມ່ນຟົດຟື້ນກວ່າ ວັດອື່ນ.”
ວັດຕືຮຽວ ໄດ້ຮັບການກໍ່ສ້າງຕາມຮູບແບບເດີມ ດ້ວຍ 3 ຫ້ອງໃຫຍ່ ແລະ 2 ຫ້ອງນ້ອຍ. ດ້ານຫນ້າຂອງວັດ ແມ່ນບູຊາພະພຸດທະເຈົ້າ, ດ້ານຫລັງ ແມ່ນບູຊາບັນພະບູລຸດ. ຢູ່ຕໍ່ຫນ້າປະຕູເຂົ້າວັດ ມີທາດ 3 ຊັ້ນ ໄດ້ຮັບການກໍ່ສ້າງເມື່ອປີ 1896. ປະຕູເຂົ້າວັດແມ່ນກໍ່ສ້າງຕາມຮູບກົ່ງມີສອງສັ້ນ ມີຫລັງຄາມຸງ ແລະ ຢູ່ຕໍ່ຫນ້າເສັ້ນທາງປູດ້ວຍດີຈີ່ເມື່ອເຂົ້າຫໍໂຮງ ມີຫນອງ ລ້ຽງປາໂຊ ແລະ ປູກ ດອກບົວ. ດ້ວຍທີ່ຕັ້ງສະດວກ, ສະຫງົບງຽບ ແລະ ບໍ່ຫ່າງໄກກັບນະຄອນເຫ້ວ ປານໃດ ສະນັ້ນ ຢູ່ທີ່ນີ້ ແມ່ນບ່ອນເຕົ້າ ໂຮມ ຂອງຊາວຫນຸ່ມ ເຫ້ວ ໃນຊຸມມື້ພັກຮຽນ, ພັກການ. ວັດຕືຮຽວ ແມ່ນຫນຶ່ງໃນບັນດາວັດບູຮານ ທີ່ຕ້ອນຮັບນັກທ່ອງທ່ຽວພາຍໃນ ແລະ ຕ່າງປະເທດ ມາຢ້ຽມຢາມຫລາຍກວ່າໝູ່. ທ່ານນາງ ຕວຽດມາຍ ນັກທ່ອງທ່ຽວ ມາຈາກ ນະຄອນ ໂຮ່ຈິມີນ ໃຫ້ຮູ້ວ່າ:
“ສຳລັບຜູ້ອາຍຸສູງຄືພວກຂ້າພະເຈົ້າ ມາຢ້ຽມຢາມວັດ ເພື່ອໃຫ້ຈິດໃຈສະຫວາດສະເຫວີຍກວ່າ. ດ້ວຍຄວາມສະຫງົບງຽບຢູ່ທີ່ນີ້ ກໍຊ່ວຍບັນເທົາຄວາມອິດເມື່ອຍຍ້ອນວຽກງານໃນຊີວິດປະຈຳວັນ ແລະ ເຮັດໃຫ້ຄວາມສັບສົນວຸ້ນວາຍ, ຄວາມເປັນຫ່ວງເປັນໄຍໃນຄອບຄົວ ແລະ ສັງຄົມສູນຫາຍໄປ.”
ດ້ວຍສະຖາປັດຕະຍະກຳເປັນເອກະລັກສະເພາະ ຍ້ອນມີການປະສົມປະສານລະຫວ່າງສະຖາປັດຕະຍະກຳພະລາຊະວັງ ກັບສະຖາປັດຕະຍະກຳພື້ນເມືອງ ພ້ອມກັບບັນຍາກາດສະຫງົບງຽບ, ທິວທັດທຳມະຊາດສວຍງາມ ສະນັ້ນ ບັນດາວັດວາອາຮາມຢູ່ ເຫ້ວ ຍາມໃດກໍແມ່ນສະຖານທີ່ດຶງດູດນັກທ່ອງທ່ຽວມາຢ້ຽມຢາມນັບມື້ນັບຫລາຍ.