(vovworld) – ຮູບພາບທ່ານຮອງປະທານຄະນະກຳມະການປະຊາຊົນເມືອງ Mấu Văn Phi ພ້ອມກັບລົດຈັກຄັນເກົ່າ ຜ່ານເສັ້ນທາງທີ່ປົກຄຸມໄປດ້ວຍຂີ້ຝຸ່ນເພື່ອໄປກວດ ແລະ ປິ່ນປົວພະຍາດໃຫ້ແກ່ຄົນທຸກຍາກ, ໃນນັ້ນສ່ວນຫຼາຍແມ່ນຊາວເຜົ່າ Raglay ໄດ້ກາຍເປັນຮູບພາບທີ່ລຶ້ງເຄີຍຢູ່ເມືອງ ແຄ໋ງວິ້ງ, ແຂວງ ແຄ໋ງຮ່ວາ. ໃນລາຍການປະເທດຊາດ ແລະ ຊາວຫວຽດນາມ ພາກນີ້, ເຊີນທ່ານຮັບຟັງບົດຂຽນຂອງ Thanh Tam - ນັກຂ່າວວິທະຍຸກະຈາຍສຽງຫວຽດນາມ ທີ່ມີຫົວຂໍ້ວ່າ ”Mau Van Phi - ຄວາມເອກອ້າງທະນົງໃຈຂອງຊາວເຜົ່າ Raglay”.
ທ່ານຮອງປະທານຄະນະກຳມະການປະຊາຊົນເມືອງ Mấu Văn Phi ພ້ອມກັບລົດຈັກຄັນເກົ່າ
(ພາບ: daklak.gov.vn)
Mau Van Phi ໄດ້ຮັບການກຳເນີດໃນຄອບຄົວທີ່ທຸກຍາກ, ເຊິ່ງລວມມີອ້າຍນ້ອງທັງໝົດ 5 ຄົນ, Phi ແມ່ນລູກຊາຍກົກ. ຍ້ອນຢາກຫຼຸດພົ້ນອອກຈາກຄວາມທຸກຍາກ ແລະ ປະຕິບັດຄວາມໄຝ່ຝັນຂອງຕົນແມ່ນກາຍເປັນທ່ານໝໍເພື່ອປິ່ນປົວພະຍາດໃຫ້ແກ່ຊາວບ້ານນັ້ນ. Phi ຕ້ອງໄປເກັບໝາກເຜັດໃນປ່າເພື່ອຂາຍຫາເງິນຊື້ປຶ້ມສໍໄປຮຽນ. ດ້ວຍຄວາມດຸໝັ່ນຮຳ່ຮຽນ ປີໃດ Phi ກໍ່ໄດ້ຮັບນາມມະຍົດວ່າແມ່ນນັກຮຽນເກັ່ງ ແລະ ລາວກໍ່ເສັງໄດ້ເຂົ້າມະຫາວິທະຍາໄລການແພດໄຕງວຽນ. ນັບແຕ່ນັ້ນ, Mau Van Phi ໄດ້ກາຍເປັນແບບຢ່າງກ່ຽວກັບຈິດໃຈຜ່ານຜ່າຄວາມຫຍຸ້ງຍາກ, ມັກຮຽນ, ທັງແມ່ນຄວາມເອກອ້າງທະນົງໃຈຂອງຊາວເຜົ່າ Raglay.
ອຳລາຄອບຄົວ, ຈາລາພູຜາປ່າໄມ້ແຄ໋ງວິ້ງ, Mau Van Phi ໄດ້ເດີນທາງໄປຍັງນະຄອນບວນມາທວດ, ແຂວງດັກລັກ ເພື່ອເຂົ້າຮຽນ. ອ້າຍດຸໝັ່ນຮຳ່ຮຽນທັງກາງເວັນ ແລະ ກາງຄືນ. ຍິ່ງຮຽນ Mau Van Phi ຍິ່ງເມົາມົວ ແລະ ຍິ່ງອີດູຊາວເຜົ່າໃນບ້ານຂອງຕົນກວ່າ. ອ້າຍໄດ້ເວົ້າຄວາມໃນໃຈສູ່ຟັງວ່າ:
”ໃນໄລຍະຮຳ່ຮຽນ, ເມື່ອກັບເມືອບ້ານແຕ່ລະເທື່ອ, ຂ້າພະເຈົ້າໄດ້ເຫັນປະຈັກຕາເດັກນ້ອຍຕາຍຍ້ອນບໍ່ໄດ້ຮັບການປິ່ນປົວພະຍາດຢ່າງທັນການ, ຫຼືເຫັນຫຼາຍຄົນເສຍຊີວິດຍ້ອນຄວາມຮູ້ຂອງພໍ່ແມ່ປະຊາຊົນກ່ຽວກັບພະຍາດຍັງຫຼ້າຫຼັງຢູ່. ສິ່ງດັ່ງກ່າວໄດ້ເປັນກຳລັງໜູນຊຸກຍູ້ຂ້າພະເຈົ້າຕ້ອງຮຽນໃຫ້ເກັ່ງ ເພື່ອມີຄວາມຮູ້ນຳມາຊ່ວຍເຫຼືອພໍ່ແມ່ປະຊາຊົນ”
ພາຍຫຼັງຮຽນຈົບມະຫາວິທະຍາໄລໃນເວລາ 7 ປີ, Mau Van Phi ໄດ້ຮຽນຕໍ່ພະແນກຫົວໃຈເສັ້ນເລືອດຢູ່ມະຫາວິທະຍາໄລການແພດເຫວ໋. ປີ 2001, ອ້າຍໄດ້ກັບເມືອສູນການແພດເມືອງແຄ໋ງວິ້ງ ເພື່ອເບິ່ງແຍງສຸຂະພາບໃຫ້ແກ່ພໍ່ແມ່ປະຊາຊົນໃນບ້ານຂອງຕົນ. ນອກຈາກກວດ ແລະ ປິ່ນປົວພະຍາດໃຫ້ແກ່ປະຊາຊົນໃນສູນການແພດເມືອງແລ້ວ, ທ່ານໝໍ Phi ຍັງໄປກວດພະຍາດໃຫ້ຜູ້ເຖົ້າແກ່ ແລະ ເດັກນ້ອຍຢູ່ໃນບ້ານອີກດ້ວຍ. ຍ້ອນມີຄວາມສຸດຈິດສຸດໃຈກັບວຽກງານການແພດ, ທ່ານຈຶ່ງໄດ້ຮັບຄວາມນັບຖື ແລະ ຮັກແພງຈາກເຈົ້າກົກເຈົ້າເຫຼົ່າຫຼາຍທ່ານໃນບ້ານ, ໃນນັ້ນມີທ່ານ Cao Sung ຢູ່ບ້ານຮ່ອນຢູ່, ຕາແສງ ແຄ໋ງນາມ.
ທ່ານຮອງປະທານຄະນະກຳມະການປະຊາຊົນເມືອງ
ປິ່ນປົວພະຍາດໃຫ້ປະຊາຊົນຢູ່ທີ່ຄອບຄົວ
(ພາບ: daklak.gov.vn) ”ເວລາໃດທ່ານ Mau Van Phi ກໍ່ເອົາໃຈໃສ່ເບິ່ງແຍງສຸຂະພາບໃຫ້ແກ່ພໍ່ແມ່ປະຊາຊົນໃນບ້ານຢ່າງສຸດຈິດສຸດໃຈ. ອ້າຍ Phi ໄດ້ຊ່ວຍໃຫ້ພວກຂ້າພະເຈົ້າເຂົ້າໃຈໄດ້ຫຼາຍສິ່ງຫຼາຍຢ່າງຄື: ກິນຢູ່ຄືແນວໃດເພື່ອຮັບປະກັນຫຼັກອະນາໄມ ແລະ ສຸຂະພາບໃຫ້ແກ່ຕົນ. ກ່ອນອື່ນໝົດ, ແມ່ນຕ້ອງຮູ້ວິທີກັນພະຍາດ, ບໍ່ເມີນເສຍຕໍ່ພະຍາດ, ຖ້າເມີນເສີຍຈະບໍ່ສາມາດປິ່ນປົວພະຍາດໄດ້”.
ເດືອນ 8/2005, ທ່ານໝໍ Mau Van Phi ໄດ້ຮັບການແຕ່ງຕັ້ງເປັນຮອງຜູ້ອຳນວຍການສູນການແພດເມືອງ ແຄ໋ງວິ້ງ, ທັງໄດ້ຮັບດຳລົງຕຳແໜ່ງເປັນຮອງປະທານເມືອງແຄ໋ງວິ້ງ ອີກ. ອ້າຍໄດ້ສະຫງວນເວລາສ່ວນຫຼາຍໃຫ້ແກ່ວຽກງານບໍລິຫານ, ແຕ່ເມື່ອມີເວລາວ່າງ, ອ້າຍກໍ່ທຳການປິ່ນປົວພະຍາດໃຫ້ແກ່ປະຊາຊົນ. ອ້າຍ Phi ແບ່ງປັນວ່າ:
”ນີ້ແມ່ນວຽກງານທີ່ຂ້າພະເຈົ້າເຄີຍເຮັດນອກໂມງລັດຖະການ. ຂ້າພະເຈົ້າຄິດວ່າ, ວຽກງານນີ້ແມ່ນຂົວເຊື່ອມຕໍ່ ເພື່ອທັງປະຕິບັດວິຊາສະເພາະ, ທັງກຳໄດ້ແນວຄິດຈິດໃຈ, ຄວາມມຸ້ງມາດປາຖະໜາຂອງພໍ່ແມ່ປະຊາຊົນ, ຈາກນັ້ນຈະມີຂໍ້ຕົກລົງທີ່ຖືກຕ້ອງກວ່າ”.
ຫີບຢາເຄື່ອນທີ່ຂອງທ່ານໝໍ Phi
(ພາບ: daklak.gov.vn)
ອ້າຍ Phi ແບ່ງປັນວ່າ ”ວຽກງານຂອງຮອງປະທານເມືອງກໍ່ລຳບາກແລ້ວ, ການໄປກວດ, ປິ່ນປົວພະຍາດໃຫ້ແກ່ປະຊາຊົນຍິ່ງລຳບາກກວ່າອີກ, ແຕ່ປະຊາຊົນຫຼາຍຄົນຍັງຂາດຄວາມຮູ້ກ່ຽວກັບການເບິ່ງແຍງສຸຂະພາບ, ແລະ ເຂົາເຈົ້າກໍ່ບໍ່ມີເງື່ອນໄຂອີກ, ດັ່ງນັ້ນຂ້າພະເຈົ້າຈຶ່ງໄປປິ່ນປົວພະຍາດໃຫ້ແກ່ຜູ້ທຸກຍາກ, ທັງນີ້ກໍ່ເພື່ອຮັກສາອາຊີບການແພດທີ່ໄດ້ຮັບການຮຳຮຽນໄວ້”. ອ້າຍເຄີຍຕັກເຕືອນພວກເພື່ອນໜຸ່ມໃນບ້ານວ່າ:
”ຂ້າພະເຈົ້າຄິດວ່າ ພວກເພື່ອນໜຸ່ມກ່ອນທີ່ກ້າວເຂົ້າສູ່ໂຮງຮຽນໃດຕ້ອງກຳນົດໃຫ້ໄດ້ 3 ອັນ. ທີໜຶ່ງແມ່ນເຮົາຮຽນເພື່ອໃຜ, ທີສອງແມ່ນຮຽນເພື່ອເຮັດຫຍັງ, ທີສາມແມ່ນຮຽນເພື່ອຮັບໃຊ້ໃຜ. ຂ້າພະເຈົ້າຄິດວ່າພຽງແຕ່ຮຽນຈຶ່ງນຳມາເຊິ່ງຄວາມຮູ້ຫຼາຍຢ່າງ, ແລະ ພຽງແຕ່ສູ້ຊົນຂ້າມຜ່ານຕົວເອງຈຶ່ງປະຕິບັດຄວາມໄຝ່ຝັນຂອງຕົນໄດ້”.
ໃນຖານະເປັນຮອງປະທານຄະນະກຳມະການປະຊາຊົນເມືອງ, ອ້າຍ Mau Van Phi ພວມມີຄວາມໄຝ່ຝັນຫຼາຍຢ່າງ, ດ້ວຍຄວາມປາຖະໜາຢາກປັບປຸງຊີວິກການເປັນຢູ່ຂອງຊາວຊົນເຜົ່າສ່ວນໜ້ອຍໃນເຂດພູດອຍ ແຄ໋ງວິ້ງ ໃຫ້ດີຂຶ້ນ. ແຕ່ອ້າຍກໍ່ຢືນຢັນຈະບໍ່ລືມຄວາມຮັບຜິດຊອບຂອງທ່ານໝໍຜູ້ໜຶ່ງທີ່ມີຕໍ່ຊົນເຜົ່າຢູ່ທີ່ນີ້.