ຫວຽດນາມ ພວມບຳລຸງສ້າງ 22 ອາຊີບຕາມມາດຕະຖານສາກົນຢູ່ 45 ໂຮງຮຽນວິຊາຊີບຂັ້ນສູງໃນທົ່ວປະເທດ  (ພາບປະກອບ / hanoimoi)

ໃນປີ 2019, ບັນດາໂຮງຮຽນວິຊາຊີບຊັ້ນສູງ ໄດ້ຜັນຂະຫຍາຍການບຳລຸງສ້າງອາຊີບລະດັບຊັ້ນສູງຕາມ 22 ຫຼັກສູດ ໂດຍ ເຢຍລະມັນ ຖ່າຍທອດໃຫ້. ເພື່ອສືບຕໍ່ຍົກສູງຄຸນນະພາບແຫຼ່ງຊັບພະຍາກອນມະນຸດ ຮັບປະກັນໃຫ້ມີກຳລັງແກ່ງແຍ້ງຢ່າງພຽງພໍກັບແຫຼ່ງແຮງງານໃນ ອາຊຽນ ແລະ ໃນໂລກ, ນັບແຕ່ປີ 2020 ເປັນຕົ້ນໄປ ຈະບຳລຸງສ້າງຢ່າງກ້ວາງຂວາງຕາມ 12 ຫຼັກສູດທີ່ໄດ້ຮັບການຖ່າຍທອດຈາກ ອົດສະຕາລີ ແລະ 22 ຫຼັກສູດຈາກ ເຢຍລະມັນ.

        ທ່ານ ຟູງຊວັນຍະ, ລັດຖະມົນຕີກະຊວງສຶກສາ ແລະ ບຳລຸງສ້າງ ຫວຽດນາມ ໃຫ້ຮູ້ວ່າ: ທາງກະຊວງໄດ້ຂຶ້ນແຜນສ້າງວິທີການບຳລຸງສ້າງຕິດພັນພຶດຕິກຳຕົວຈິງກັບທິດສະດີ. ໄປຄຽງຄູ່ກັນນັ້ນ, ກະຊວງສຶກສາ ແລະ ບຳລຸງສ້າງກໍ່ໄດ້ສົມທົບກັບບັນດາກະຊວງ, ຂະແໜງການ ເພື່ອສັບຊ້ອນບັນດາຮາກຖານບຳລຸງສ້າງຄືນໃໝ່ ຕາມທິດຫັນເປັນມາດຕະຖານ. ກະຊວງຈະສົ່ງເສີມບັນດາແຫຼ່ງກຳລັງໃນສັງຄົມ ເພື່ອໃຫ້ວິສາຫະກິດສາມາດເຂົ້າຮ່ວມການບຳລຸງສ້າງ, ສ້າງລະບົບໝູນວຽນລະຫວ່າງຜູ້ຖືກບຳລຸງສ້າງ, ຜູ້ນຳໃຊ້, ໜູນຊ່ວຍເຊິ່ງກັນແລະກັນ ຕາມຂັ້ນຕອນການດັດປັບ. ທ່ານ ຟູງຊວັນຍະ, ລັດຖະມົນຕີກະຊວງສຶກສາ ແລະ ບຳລຸງສ້າງ ຫວຽດນາມ ໃຫ້ຮູ້ວ່າ:

“ໃນໄລຍະຈະມາເຖິງ ພວກຂ້າພະເຈົ້າຈະສືບຕໍ່ພ້ອມກັບບັນດາກະຊວງ, ຂະແໜງການ, ບັນດາຮາກຖານບຳລຸງສ້າງ, ສະຫະສະມາຄົມ, ວິສາຫະກິດ ປະກອບຄຳເຫັນ ເພື່ອກຳນົດທິດຫຼັກສູດບຳລຸງສ້າງ ເພື່ອສ້າງກຳລັງໜູນໃຫ້ແກ່ນັກສຶກສາ ແລະ ມີບັນດາແຫຼ່ງກຳລັງເຂົ້າຮ່ວມຕື່ມອີກ. ຈາກນັ້ນ ກ້າວໄປເຖິງການກວດກາ ເພື່ອຫັນຫຼັກສູດການບຳລຸງສ້າງໄປຕາມທິດມາດຕະຖານສາກົນ, ຫຼີກລ້ຽງສະພາບການບໍ່ຮັບຮອງເຊິ່ງກັນແລະກັນ.”

ເພື່ອຕອບສະໜອງຄວາມຕ້ອງການບຳລຸງສ້າງແຫຼ່ງຊັບພະຍາກອນທີ່ມີຄຸນນະພາບສູງຕາມມາດຕະຖານສາກົນ, ເໝາະສົມກັບລະດັບຄວາມຮູ້ຂອງບັນດາປະເທດພາຍໃນພາກພື້ນ ແລະ ໃນໂລກ, ກົມໃຫຍ່ການສຶກສາອາຊີບ ຫວຽດນາມ ໄດ້ຜັນຂະຫຍາຍປະຕິບັດແຜນການ “ຖ່າຍທອດບັນດາຫຼັກສູດ; ບຳລຸງສ້າງ, ຝຶກອົບຮົມໃຫ້ຄູອາຈານ ແລະ ພະນັກງານຄຸ້ມຄອງການສອນອາຊີບ; ການບຳລຸງສ້າງທົດລອງບັນດາອາຊີບຈຸດສຸມລະດັບພາກພື້ນ ອາຊຽນ, ສາກົນ” ຂອງນາຍົກລັດຖະມົນຕີ.

ຄາດວ່າ ຮອດປີ 2030 ຈະມີຊາວຜູ້ອອກແຮງງານປະມານ 6 ລ້ານຄົນມີຄວາມຕ້ອງການຢາກບຳລຸງສ້າງອາຊີບກະສິກຳ (ພາບ: baodansinh.vn )

ປະຈຸບັນ, ຈຳນວນຜູ້ອອກແຮງງານໃນຂົງເຂດກະສິກຳກວມເອົາກ່ວາ 67% ຍອດຈຳນວນແຮງງານທົ່ວປະເທດ. ແຕ່ລະປີ, ຄາດໝາຍສ້າງວຽກເຮັດງານທຳໃໝ່ ໃຫ້ກຳລັງແຮງງານຢູ່ຊົນນະບົດສະເລ່ຍແມ່ນເພີ່ມຂຶ້ນແຕ່ 4 – 5%. ເຖິງຢ່າງໃດກໍ່ຕາມ, ວຽກງານບຳລຸງສ້າງອາຊີບຢູ່ບາງບ່ອນໃນໄລຍະຜ່ານມາ ຍັງບໍ່ທັນຕິດແທດກັບສະພາບຕົວຈິງໃນການຜະລິດກະສິກຳ. ທ່ານ ດ່າວວັນຕ໊ຽນ, ຫົວໜ້າກົມບຳລຸງສ້າງປະຈຳ, ກົມໃຫຍ່ການສຶກສາອາຊີບ, ກະຊວງແຮງງານ, ທະຫານເສຍອົງຄະ ແລະ ສັງຄົມ ຫວຽດນາມ ໃຫ້ຮູ້ວ່າ:

 “ການບຳລຸງສ້າງຕ້ອງຕິດພັນກັບການກຳເນີດ ແລະ ເຕີບໃຫຍ່. ໝາຍຄວາມວ່າ ຈະຮຽນກ່ຽວກັບເນື້ອໃນຫຍັງແດ່ ແລະ ນຳໃຊ້ໄດ້ໃນທັນທີ. ຈັດຕັ້ງການບຳລຸງສ້າງໂດຍກົງຢູ່ບ່ອນເຮັດວຽກ, ບ່ອນຜະລິດ. ຕົວຢ່າງຄືໃນການຜະລິດກະສິກຳ, ຂັ້ນຕອນພູນດິນ ນັ້ນຕ້ອງແນະນຳກ່ຽວກັບການພູນດິນ, ຂັ້ນຕອນການກ້າແນວພັນກໍ່ແນະນຳພຽງແຕ່ແນວພັນເທົ່ານັ້ນ ຫລັງຈາກນັ້ນ ໃຫ້ເຂົາເຈົ້າລົງມືເຮັດເອງ.”

ຈາກສະພາບຕົວຈິງນັ້ນ, ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໄດ້ສົມທົບກັບກະຊວງແຮງງານ, ທະຫານເສຍອົງຄະ ແລະ ສັງຄົມ ຫວຽດນາມ ສ້າງແຜນການບຳລຸງສ້າງອາຊີບກະສິກຳໃຫ້ແກ່ແຮງງານຊົນນະບົດປະຕິບັດບັນດາລາຍການ, ໂຄງການຈຸດສຸມໃນໄລຍະ 2021 – 2030 ດ້ວຍເນື້ອໃນທີ່ເໝາະສົມກັບຄວາມຮຽກຮ້ອງຕ້ອງການພຶດຕິກຳຕົວຈິງກ່ຽວກັບການຜະລິດກະສິກຳ, ພິເສດແມ່ນໃຫ້ບຸລິມະສິດບັນດາຫຼັກສູດບຳລຸງສ້າງກ່ຽວກັບ startup, ກະສິກຳເຕັກໂນໂລຊີສູງ ແລະ ກະສິກຳດີຈີຕອນ. ທ່ານ ເຈິ່ນແທງນາມ, ຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ເນັ້ນໜັກວ່າ:

“ກຳນົດທິດໃຫ້ແກ່ໄລຍະຫລັງປີ 2020, ພວກຂ້າພະເຈົ້າຢາກຮັບເອົາຄຳເຫັນຈາກບັນດານັກວິທະຍາສາດ, ບັນດາອົງການຈັດຕັ້ງສາກົນ ເພື່ອກຳນົດທິດໃຫ້ຫຼັກສູດບຳລຸງສ້າງ. ໄປຄຽງຄູ່ກັນນັ້ນ ຕໍ່ໜ້າຄວາມກົດດັນຂອງຕະຫລາດໂລກ, ພິເສດແມ່ນການປະຕິບັດບັນດາສັນຍາການຄ້າ ຮຽກຮ້ອງຄຸນນະພາບຂອງຜະລິດຕະພັນຄືແນວໃດ ແລະ ສ້າງໂຄງປະກອບອາຊີບກະສິກຳຄືນໃໝ່ຄືແນວໃດ. ປະຕິບັດໃຫ້ຖືກຕ້ອງຕາມການສ້າງໂຄງປະກອບຂະແໜງກະສິກຳຄືນໃໝ່ ເພື່ອຍົກສູງຄຸນຄ່າ  ແລະ ນີ້ແມ່ນຜົນກະທົບຢ່າງໃຫຍ່ຫລວງຕໍ່ການບຳລຸງກໍ່ສ້າງອາຊີບໃນໄລຍະຈະມາເຖິງ. ”

ຄາດວ່າ ຮອດປີ 2030 ຈະມີຊາວຜູ້ອອກແຮງງານປະມານ 6 ລ້ານຄົນມີຄວາມຕ້ອງການຢາກບຳລຸງສ້າງອາຊີບກະສິກຳ. ສະນັ້ນ, ການເພີ່ມທະວີການຮ່ວມມືໃນວຽກງານບຳລຸງສ້າງອາຊີບ, ພິເສດແມ່ນບຳລຸງສ້າງອາຊີບໃຫ້ແກ່ແຮງງານທີ່ຢູ່ເຂດຊົນນະບົດ ຈະປະກອບສ່ວນຍົກສູງຄຸນນະພາບຜະລິດຕະພັນກະສິກຳ ແລະ ຍົກສູງລາຍຮັບໃຫ້ແກ່ປະຊາຊົນ, ແກ້ໄຂຈຳນວນແຮງງານໜຸ່ມວ່າງງານໄດ້ເປັນຢ່າງດີກ່ວາ./.