ການຮ່ວມມືດ້ານການສຶກສາລະຫວ່າງບັນດາຄູ່ຮ່ວມມືຍີປຸ່ນກັບນະຄອນໂຮ່ຈິມິນໃນຊຸມປີທີ່ຜ່ານມາ ແມ່ນຈຸດທີ່ສະຫວ່າງສະໄຫວໃນການພົວພັນລະຫວ່າງ 2 ປະເທດ. ມີຫຼາຍລາຍການພົບປະແລກປ່ຽນນັກສຶກສາ, ຄູອາຈານພ້ອມກັບບັນດາໂຄງການສົມທົບກັນໜູນຊ່ວຍພັດທະນາການສຶກສາ, ບຳລຸງສ້າງວິຊາຊີບລະຫວ່າງ 2 ຝ່າຍ ແມ່ນພະຍານຫຼັກຖານທີ່ມີຊີວິດຊີວາກ່ຽວກັບການພັດທະນາການພົວພັນຮ່ວມມືດ້ານການສຶກສາຫວຽດນາມ-ຍີປຸ່ນຢູ່ນະຄອນໂຮ່ຈິມິນ.
ຫວຽດນາມ ແລະ ຍີປຸ່ນໄດ້ເຊັນສັນຍາຮ່ວມມືດ້ານການສຶກສາຫຼາຍສະບັບ |
ໃນ 2-3ປີມໍ່ໆມານີ້, ມີຫຼາຍກຸ່ມບໍລິສັດທີ່ມີອິດທິພົນຊື່ສຽງຂອງຍີປຸ່ນໄດ້ຜັນຂະຫຍາຍບັນດາໂຄງການຊຸກຍູ້ການພັດທະນາສະພາບແວດລ້ອມດ້ານການສຶກສາທັນສະໄໝ, ສະໜິດສະໜົມຢູ່ໂຮງຮຽນຫຼາຍແຫ່ງໃນບໍລິເວນນະຄອນໂຮ່ຈິມິນ. ພົ້ນເດັ່ນຂຶ້ນ ແມ່ນນັບແຕ່ປີ 2012, ກຸ່ມບໍລິສັດ Ajinomoto ໄດ້ໜູນຊ່ວຍໃຫ້ແກ່ພະແນກສຶກສາ-ກໍ່ສ້າງນະຄອນຜັນຂະຫຍາຍໂຄງການ “ຄາບເຂົ້າໃນໂຮງຮຽນ ” ແນໃສ່ປົວແປງທາງດ້ານໂພສະນາການໃຫ້ແກ່ນັກຮຽນຊັ້ນປະຖົມ. ໂດຍແມ່ນຫົວໜ່ວຍສຶກສາຊຶ່ງນະຄອນໄດ້ເລືອກເອົາເພື່ອປະຕິບັດຮູບແບບຕົວຢ່າງເຮືອນຄົວເຄິ່ງກິນນອນຕາມໂຄງການ “ຄາບເຂົ້າໃນໂຮງຮຽນ ”, ມາຮອດປະຈຸບັນ, ໂຮງຮຽນປະຖົມຈຶງຈັກທີ່ເມືອງ 11 ໄດ້ເສີມຂະຫຍາຍປະສິດທິຜົນຂອງໂຄງການນີ້ເປັນຢ່າງດີ. ທ່ານ ຟານວັນຈີ້ ຫົວໜ້າອຳນວຍການໂຮງຮຽນໃຫ້ຮູ້ວ່າ ດ້ວຍຈຳນວນເງິນອຸປະຖຳ 1,3 ຕື້ດົງຈາກບໍລິສັດ Ajinomoto ຫວຽດນາມ, ຮູບແບບຕົວຢ່າງເຮືອນຄົວເຄິ່ງກິນນອນໄດ້ຮັບການປະກອບພາຫະນະທີ່ທັນສະໄໝ. ທ່ານ ຟານວັນຈີ້ ຫົວໜ້າອຳນວຍການໂຮງຮຽນເວົ້າວ່າ
“ຕົວຢ່າງເຮືອນຄົວນີ້ ປະກອບສ່ວນຮັບປະກັນບັນຫາສຸຂະອະນາໄມດ້ານສະບຽງອາຫານເວົ້າລວມ ກໍຄືນຳໃຊ້ສະພາບແວດລ້ອມ ແລະ ຫຼຸດຜ່ອນບັນດາຂັ້ນຕອນໃນວຽກງານຂອງພາລະກອນໃນເຮືອນຄົວ. ປະກອບສ່ວນນຳຄາບເຂົ້າກິນທີ່ແຊບນົວ ແລະ ມີຄຸນະພາບໃຫ້ແກ່ນັກຮຽນ ”
ຢູ່ຂັ້ນຮຽນທີ່ສູງກ່ວານັ້ນ, ການຮ່ວມມືດ້ານການສຶກສາລະຫວ່າງບັນດາຄູ່ຮ່ວມມືຍີປຸ່ນກັບນະຄອນໂຮ່ຈິມິນ ໄດ້ສະແດງອອກຜ່ານບັນດາໂຄງການຮ່ວມມືໃນການບຳລຸງສ້າງ, ຖ່າຍທອດເຕັກໂນໂລຢີ. ຫຼາຍປີທີ່ຜ່ານມາ, ມະຫາວິທະຍາໄລ ກະສີກຳ-ປ່າໄມ້ນະຄອນໂຮ່ຈິມິນໄດ້ຮ່ວມມືກັບໂຮງຮຽນ, ສະຖາບັນກວ່າ 20 ແຫ່ງຂອງຍີປຸ່ນ, ໃນນັ້ນມີບັນດາໂຮງຮຽນລົງເລິກຂະແໜງກະສີກຳຂອງຍີປຸ່ນເຊັ່ນ: Kobe, Kyushu,Osaka, Hiroshima, Kanazawa. ໃນຂະນະນັ້ນ, ມະຫາວິທະຍາໄລ ຮວາແຊນ ໄດ້ຜັນຂະຫຍາຍຫຼາຍໂຄງການແລກປ່ຽນນັກສຶກສາກັບຍີປຸ່ນ. ມາຮອດປະຈຸບັນ, ມີນັກສຶກສາເກືອບ 75 ຄົນຂອງ 2 ປະເທດໄດ້ຮ່ຳຮຽນ, ພົວພັນແລກປ່ຽນ, ຜ່ານການດຳລົງຊີວິດຕົວຈິງຢູ່ທັງຫວຽດນາມ ແລະ ຍີປຸ່ນ. ທ່ານນາງ ດິງແອງລານ ຮັບຜິດຊອບວຽກງານປະຊາສຳພັນ ແລະ ສື່ມວນຊົນ ມະຫາວິທະຍາໄລ ຮວາແຊນ ໃຫ້ຮູ້ວ່າ :
“ ການແລກປ່ຽນທາງດ້ານວັດທະນະທຳ ແລະ ການສຶກສາແມ່ນພື້ນຖານເພື່ອຊ່ວຍພັດທະນາສາຍພົວພັນລະຫວ່າງ 2 ປະເທດ. ບັນດານັກສຶກສາ ພາຍຫຼັງທີ່ຮຽນຈົບຈາກໂຮງຮຽນແຫ່ງນີ້ ຈະໄປເຮັດວຽກຢູ່ບັນດາບໍລິສັດ, ອົງການສຳນັກງານຕ່າງໆ, ແຕ່ເຂົາເຈົ້າແມ່ນບັນດາປັດໄຈທີ່ສຳຄັນເພື່ອຮັດແໜ້ນສາຍພົວພັນຮ່ວມມືລະຫວ່າງຫວຽດນາມ-ຍີປຸ່ນ ”
ການບຳລຸງສ້າງວິຊາຊີບ ກໍແມ່ນຂົງເຂດຮ່ວມມືທີ່ບັນລຸປະສິດທິຜົນທີ່ດີລະຫວ່າງ 2 ຝ່າຍ. ທ່ານ ເຈີນແທງຫາຍ ອະທິການບໍດີ ໂຮງຮຽນວິທະຍາໄລ ວ້ຽນດົງ ໃຫ້ຮູ້ວ່າທາງໂຮງຮຽນໄດ້ຮ່ວມສຳພັນກັບໂຮງຮຽນວິທະຍາໄລ ໂອໂຕ Naknihon ຂອງຍີປຸ່ນນັບແຕ່ປີ 2014. ໃນເດືອນ 4/2017 ໂຮງຮຽນວິທະຍາໄລ ວ້ຽນດົງ ຈະສົ່ງຄູອາຈານໃນຂະແໜງລົດໂອໂຕໄປຝຶກຫັດກ່ຽວກັບລົດໂອໂຕແລ່ນດ້ວຍໄຟຟ້າ, ລົດໂອໂຕ Hybrib ຢູ່ໂຮງຮຽນວິທະຍາໄລໂອໂຕ Naknihon. ແລະ ກໍໃນປີນີ້, ມີນັກສືກສາຈຳນວນໜຶ່ງຢູ່ ໂຮງຮຽນວິທະຍາໄລ ວ້ຽນດົງ ຖືກສົ່ງໄປບຳລຸງສ້າງຢູ່ໃນໂຮງຮຽນວິທະຍາໄລ ໂອໂຕ Naknihon ເປັນໄລຍະ ປີເຄິ່ງເພື່ອຮັບເອົາໃບປະກາດສະນິຍະບັດວິສາວະກອນລົດໂອໂຕທົ່ວໂລກ. ນອກຈາກການຮ່ວມມືກັບໂຮງຮຽນວິທະຍາໄລ ໂອໂຕ Naknihon ແລ້ວ, ໃນປະຈຸບັນ, ໂຮງຮຽນວິທະຍາໄລ ວ້ຽນດົງຍັງຍູ້ແຮງການຮ່ວມມືເພື່ອບຳລຸງສ້າງໃນຂະແໜງກໍ່ສ້າງ, ກົນຈັກ...ກັບບັນດາຄູ່ຮ່ວມມືຍີປຸ່ນ. ຕາມທ່ານ ເຈີນແທງຫາຍ ອະທິການບໍດີ ໂຮງຮຽນວິທະຍາໄລ ວ້ຽນດົງແລ້ວ, ການຮ່ວມມືດ້ານການສຶກສາກັບຍີປຸ່ນ ສາມາດເຮັດໃຫ້ປ່ຽນແປງລະດັບຄວາມຮັບຮູ້ກໍຄືວິທີການສອນ ການຮຽນອີກດ້ວຍ, ທ່ານກ່າວວ່າ :
“ ພວກຂ້າພະເຈົ້າໄດ້ເລືອກເຟັ້ນບັນດາວິຊາຮຽນແບບກະທັດລັດກ່ວາ, ບັນດາວິຊາຮຽນນັ້ນ ກໍໃກ້ຊິດຕິດແທດກັບຄວາມຮຽກຮ້ອງຕ້ອງການໃນຕົວຈິງ ແລະ ຄ້າຍຄືກັບມາດຕະຖານສາກົນ. ທີ 2 ແມ່ນພວກນັກສຶກສາ ກໍມີການປ່ຽນແປງວິທີການສັງເກດສຳລັບບັນດາຂະແໜງອາຊີບທີ່ໄດ້ຮັບການບຳລຸງສ້າງ ອັນໄດ້ສ້າງບັນຍາກາດທີ່ຫ້າວຫັນໃນການຮ່ຳຮຽນ ”
ການຮ່ວມມືດ້ານການສຶກສາລະຫວ່າງບັນດາຄູ່ຮ່ວມມືຍີປຸ່ນກັບນະຄອນໂຮ່ຈິມິນ ໄດ້ນຳມາເຊິ່ງປະສິດທິຜົນທີ່ດີ, ຊ່ວຍຂະແໜງສຶກສານະຄອນສ້າງໃຫ້ມີບັນດາຮູບແບບທັນສະໄໝເພື່ອຍົກສູງຄຸນນະພາບການສຶກສາເມື່ອລະກ້າວຕາມມາດຕະຖານພາກພື້ນ ແລະ ສາກົນ. ຍິ່ງກ່ວານັ້ນ, ການຮ່ວມມືນີ້ພວມປະກອບສ່ວນສຳຄັນເຂົ້າໃນການປັບປຸງການພົວພັນ 2 ຝ່າຍຫວຽດນາມ-ຍີປຸ່ນຊຶ່ງໄດ້ຮັບການສ້າງຕັ້ງຂຶ້ນນັບແຕ່ໄລຍະເວລາກວ່າ 40 ປີມານີ້.