Homestay Tam Nhung - Homestay ແຫ່ງທຳອິດຂອງບ້ານຫວ່າງແຟວ (ພາບ: Ngoc Anh)

ບ້ານ ຫວ່າງແຟວ ແມ່ນເຂດທີ່ມີຊາວເຜົ່າ ໄທ ຂາວ ດຳລົງຊີວິດມາແຕ່ດົນນານ. ຫວ່າງແຟວ ແມ່ນໜຶ່ງໃນ 11 ບ້ານທ່ອງທ່ຽວເຂດຊຸມຊົນທີ່ຈັບອົກຈັບໃຈຢູ່ແຂວງລາຍເຈົາ.

ໂດຍໄດ້ຮັບການບອກສອນ ແລະ ແນະນຳວິທີການປຸງແຕ່ງອາຫານເຍື່ອງຕ່າງໆທີ່ເປັນເອກະລັກສະເພາະຂອງເຜົ່າຕົນ ຈາກແມ່ຂອງຜົວເຊິ່ງແມ່ນນັກສິລະປະກອນ ອາຫານການກິນ ຊົນເຜົ່າ ໄທ - ແມ່ຫຼໍ່ທິໂດຍ໋, ເອື້ອຍ ຫຼໍ່ທິຍຸງ ພ້ອມດ້ວຍນ້ອງສາວຜົວຂອງຕົນ ແມ່ນ ຫຼໍ່ທິເຕິມ ໄດ້ຕັດສິນໃຈ startup ເຮັດການບໍລິການທ່ອງທ່ຽວ. ໃນເບື້ອງຕົ້ນ, ສອງເອື້ອຍນ້ອງໄດ້ເປີດຮ້ານອາຫານ ເຕິມຍຸງ ເພື່ອຮັບໃຊ້ການບໍລິການກິນດື່ມ. ຍ້ອນມີຄວາມສຸດຈິດສຸດໃຈກັບອາຊີບ, ມີຄວາມສະດຸ້ງໄວກັບຕະຫຼາດ, ອີກບໍ່ດົນ ສອງເອື້ອຍນ້ອງກໍສາມາດເປີດກວ້າງການດຳເນີນທຸລະກິດຂອງຕົນ, ສ້າງສະຖານທີ່ພັກເຊົ່າ ແລະ ການບໍລິການທ່ອງທ່ຽວ Homestay Tam Nhung ຂຶ້ນມາ. ນີ້ແມ່ນ Homestay ແຫ່ງທຳອິດຂອງບ້ານຫວ່າງແຟວ. ເອື້ອຍ ລໍ່ທິຍຸງ ໃຫ້ຮູ້ວ່າ:

“ຂ້າພະເຈົ້າ ເລີ່ມດຳເນີນທຸລະກິດນັບແຕ່ປີ 2019. ຂ້າພະເຈົ້າຫວັງວ່າ ຈະອະນຸລັກຮັກສາຄຸນຄ່າວັດທະນະທຳພື້ນເມືອງ, ອາຫານການກິນຂອງຊາວເຜົ່າຜູ້ໄທ. Homestay Tam Nhung ມີທັງໝົດ 8 ຫ້ອງ, ສາມາດຮັບໃຊ້ແຂກທ່ອງທ່ຽວຫຼາຍສຸດແມ່ນ 40 ຄົນ. ເມື່ອມາ Homestay Tam Nhung, ແຂກທ່ອງທ່ຽວບໍ່ພຽງແຕ່ໄດ້ຮັບປະທານອາຫານພື້ນເມືອງຂອງຊາວເຜົ່າຜູ້ໄທ ເທົ່ານັ້ນ, ຫາກຍັງໄດ້ເຊື່ອມຕົວເຂົ້າກັບວັດທະນະທຳທີ່ເປັນເອກະລັກສະເພາະຄື ຟ້ອນແຊ, ຟ້ອນສາບ, ການສະຫົວແບບຊາວເຜົ່າຜູ້ໄທ. ນອກຈາກນັ້ນແລ້ວ, ແຂກທ່ອງທ່ຽວຍັງສາມາດໄປຫາປາ, ແຕ່ງກິນພ້ອມກັບພະນັກງານຂອງ Homestay. ໄລຍະເດືອນ 10 ຫາເດືອນ 1 ໄລ່ຕາມຈັນທະປະຕິທິນ ແມ່ນຊ່ວງເວລາທີ່ແຂກມາຫຼາຍທີ່ສຸດ, ມີແຂກທ່ອງທ່ຽວຕ່າງປະເທດທີ່ມາຈາກ ອີຕາລີ, ຍີ່ປຸ່ນ. ຖ້າຄິດໄລ່ຄ່າກິນ ແລະ ຄ່າຫ້ອງລວມທັງໝົດແມ່ນ 250.000 ດົ່ງ/ວັນ/ຄົນ”.

ການສະແດງສິລະປະທີ່ເປັນເອກະລັກຂອງເຜົ່າຜູ້ໄທ ຢູ່ Homestay Tam Nhung ເພື່ອຮັບໃຊ້ແຂກທ່ອງທ່ຽວ (ພາບ: Ngoc Anh)

ໂດຍປະຕິບັດແຜນຮ່າງຮູບແບບແມ່ຍິງ startup ຂອງແຂວງລາຍເຈົາ, ເມືອງຟອງໂຖ ໄດ້ຊີ້ນຳບັນດາຕາແສງສ້າງຮູບແບບແມ່ຍິງ startup ຕິດພັນກັບເງື່ອນໄຂຕົວຈິງຂອງແຕ່ລະທ້ອງຖິ່ນ. ໄລ່ມາຮອດປັດຈຸບັນ, ມີຮູບແບບແມ່ຍິງ startup ປະສົບຜົນສຳເລັດຈາກການຜະລິດກະສິກຳ, ປຸງແຕ່ງຜະລິດຕະພັນກະເສດ, ຜະລິດເຄື່ອງຫັດຖະກຳ, ເປີດຮ້ານອາຫານ, ການບໍລິການທ່ອງທ່ຽວ, Homestay… ອຳນາດການປົກຄອງທ້ອງຖິ່ນ ໄດ້ເອົາໃຈໃສ່ເປັນພິເສດ, ສົ່ງເສີມແມ່ຍິງ startup ດຳເນີນທຸລະກິດການບໍລິການທ່ອງທ່ຽວ. ທ່ານນາງ ມາຍທິຮົ່ງຊິມ, ຮອງປະທານຄະນະກຳມະການປະຊາຊົນເມືອງ ຟອງໂຖ ໃຫ້ຮູ້ວ່າ:

“ປັດຈຸບັນ, ຮູບແບບ Homestay ພວມໄດ້ເປີດກວ້າງໃນບໍລິເວນເມືອງ ຟອງໂຖ. ທາງເມືອງ ໄດ້ເອົາໃຈໃສ່ໜູນຊ່ວຍ ແລະ ສ້າງເງື່ອນໄຂສະດວກໃຫ້ແມ່ຍິງພັດທະນາເສດຖະກິດຄອບຄົວ ແລະ ສ້າງວຽກເຮັດງານທຳໃຫ້ແກ່ແມ່ຍິງໃນເມືອງ ຜ່ານການເຮັດຮູບແບບ Homestay ນີ້. ຜ່ານນັ້ນ, ກໍປະກອບສ່ວນສ້າງຄວາມສະເໝີພາບລະຫວ່າງຍິງ - ຊາຍ, ເອື້ອຍນ້ອງແມ່ຍິງກໍສູ້ຊົນບືນຕົວຂຶ້ນລົບລ້າງຄວາມອຶດຫິວຫຼຸດຜ່ອນຄວາມທຸກຍາກ. ບັນດາຮູບແບບ Homestay ຍັງຮັກສາໄດ້ສີສັນວັດທະນະທຳ ແລະ ສະຖາປັດຕະຍາກຳທີ່ເປັນມູນເຊື້ອ ແລະ ເອກະລັກຂອງແຕ່ລະເຜົ່າໄວ້ໄດ້ເໝືອນເດີມ”.

Homestay Tam Nhung ໄດ້ສ້າງວຽກເຮັດງານທຳໃຫ້ແກ່ແຮງງານຍິງຢູ່ທ້ອງຖິ່ນ. ປັດຈຸບັນ, Homestay ນີ້ມີເອື້ອຍນ້ອງເຮັດ 4 ຄົນ, ດ້ວຍຄ່າແຮງງານ ໄລ່ເປັນມື້, ມື້ໃດແຂກຫຼາຍແມ່ນ 500.000 ດົ່ງ ສ່ວນມື້ທຳມະດາແມ່ນ 300.000 ດົ່ງ. ປີ 2021, Homestay Tam Nhung ກໍໄດ້ທົດລອງເປີດຮັບໃຊ້ການບໍລິການຕ່ຳຫູກແພໄໝ, ເຮັດເຄື່ອງທີ່ລະນຶກໃຫ້ແກ່ແຂກທ່ອງທ່ຽວ ແລະ ໃຫ້ແຂກທ່ອງທ່ຽວໄດ້ສຳຜັດກັບວິວັດທະນາການເຮັດຜະລິດຕະພັນໜຶ່ງ.

ສອງເອື້ອຍນ້ອງ ເຕິມ, ຍຸງ ເປັນຜູ້ປະຈັນບານໃນການເຮັດ Homestay ຢູ່ບ້ານທ່ອງທ່ຽວ ຫວ່າງແຟວ. ໂດຍຮຽນຕາມຮູບແບບ Homestay ເຕິມຍຸງ, ພໍ່ແມ່ໃນບ້ານກໍໄດ້ເປີດ Homestay ຕື່ມອີກ ແລະ ຮ່ວມສຳພັນນຳກັນຢ່າງແໜ້ນແຟ້ນ. ເອື້ອຍ ຫຼໍ່ທິເຕິມ ໃຫ້ຮູ້ວ່າ:

“ປັດຈຸບັນ, ຢູ່ໃນບ້ານມີ 5 ຄອບຄົວພ້ອມກັນເຮັດ ແລະ ໄດ້ຮ່ວມສຳພັນນຳກັນ. ໄລຍະຈະມາເຖິງ, ພວກຂ້າພະເຈົ້າຢາກສ້າງຕັ້ງສະຫະກອນ ເຕິນຍຸງ. ປັດຈຸບັນ, ມີຜະລິດຕະພັນ 3 ຢ່າງຂອງຄອບຄົວຂ້າພະເຈົ້າໄດ້ຮັບການຮັບຮອງວ່າ ເປັນຜະລິດຕະພັນ OCOP  ລະດັບ 3 ດາວຄື ຊີ້ນແຫ້ງ ເຕິມຍຸງ, ໄສ້ອົ່ວໝູເຕິມຍຸງ ແລະ ຊີ້ນຢ້າງເຕິມຍຸງ. ແຂກທ່ອງທ່ຽວມານີ້ ກໍມີຄວາມເພິ່ງພໍໃຈກັບທັດສະນີຍະພາບທຳມະຊາດທີ່ປອດໂປ່ງ, ເຢັນສະບາຍ, ໄດ້ຮັບປະທານອາຫານຕ່າງໆທີ່ແຊບຊ້ອຍ ແລະ ໄດ້ຮັບຊົມບັນດາວາດຟ້ອນທີ່ເປັນເອກະລັກສະເພາະ ໂດຍພໍ່ແມ່ພີ່ນ້ອງໃນບ້ານສະແດງ”.

        ປັດຈຸບັນ, ຢູ່ບ້ານ ຫວ່າງແຟວ, Homestay ເຕິມຍຸງ ໄດ້ເປີດ 2 ສາຂາ, ສາຂາທີ 1 ຮັບໃຊ້ການບໍລິການກິນດື່ມ, ພັກຜ່ອນ ແລະ ສາຂາທີ 2 ແມ່ນຮ້ານກາເຟ ເຕິມຍຸງ. ເຈົ້າຂອງ Homestay Tam Nhung ພວມສົ່ງເສີມການເປີດຮ້ານອາຫານອີກແຫ່ງໜຶ່ງຢູ່ນະຄອນ ລາຍເຈົາ. ຮູບແບບ Homestay Tam Nhung ແມ່ນແບບຢ່າງດີເດັ່ນໃນການ startup ດ້ານການບໍລິການທ່ອງທ່ຽວຢູ່ ຫວ່າງແຟວ.