(VOVWORLD) -ນັບແຕ່ຕົ້ນປີ 2022 ມາຮອດປັດຈຸບັນ, ມີນັກສຶກສາ ກຳປູເຈຍ ແລະ ລາວ ທີ່ພວມຮ່ຳຮຽນຢູ່ ນະຄອນ ໂຮ່ຈີມິນ ກວ່າ 50 ຄົນ ທີ່ມີຄອບຄົວທີ 2 ຂອງຕົນ ເມື່ອບັນດາຄອບຄົວຊາວ ຫວຽດນາມ ຢູ່ 17 ເມືອງ, ນະຄອນ ຖູດຶກ ຂອງນະຄອນ ໂຮ່ຈີມິນ ຮັບເປັນລູກຮັກມາເບິ່ງແຍງດູແລ, ເພື່ອໃຫ້ພວກນ້ອງໄດ້ດຳລົງຊີວິດເໝືອນວ່າເປັນລູກຫຼານໃນຄອບຄົວຂອງຕົນ. ນີ້ກໍແມ່ນໜຶ່ງໃນບັນດາກິດຈະກຳທີ່ແທດຈິງ ເພື່ອແນໃສ່ສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ຫວຽດນາມ - ລາວ ຄົບຮອບ 60 ປີ ແລະ ວັນສ້າງຕັ້ງສາຍພົວພັນທາງການທູດ ຫວຽດນາມ - ກຳປູເຈຍ ຄົບຮອບ 55 ປີ.
Lun Leangchheng, ນັກສຶກສາ ກຳປູເຈຍ ປີທີ 3 ຢູ່ມະຫາວິທະຍາໄລ ໂຕນດຶກຖັງ ໄດ້ກາຍເປັນສະມາຊິກຜູ້ໜຶ່ງຂອງຄອບຄົວ ຫວຽດນາມ ຢູ່ນະຄອນ ໂຮ່ຈີມິນ. ແມ່່ຮັກຂອງນ້ອງແມ່ນປ້າ ເຈືອງຖຸ່ຍອວຽນ, ຮອງຜູ້ອຳນວຍການ ໂຮງຮຽນມັດທະຍົມຕອນຕົ້ນ ເວິນດົນ, ເມືອງ 4. ນ້ຳໃຈຄວາມຮັກແພງ, ການເອົາໃຈໃສ່ຈາກແມ່ຮັກ ໄດ້ເປັນແຫຼ່ງກຳລັງໜູນເພື່ອໃຫ້ Lun Leangchheng ຊອກຮູ້ກ່ຽວກັບປະເທດຊາດ, ປະຊາຊົນ ຫວຽດນາມ, ສຳຜັດໄດ້ເຖິງຈຸດຄ້າຍຄືກັນດ້ານວັດທະນະທຳຂອງ 2 ປະເທດ. ເມື່ອເວົ້າເຖິງແມ່ຮັກຂອງຕົນ, Leangchheng ແບ່ງປັນດ້ວຍຄວາມສຸກວ່າ:
“ນ້ອງໄດ້ແມ່ ອຽນ ຮັບມາລ້ຽງດູ ແລະ ເບິ່ງແຍງຄືລູກຄີງຂອງເພິ່ນ. ຍາມໃດເພິ່ນກໍເອົາໃຈໃສ່ຖາມຂ່າວ, ມີຄວາມຫຍຸ້ງຍາກຫຍັງເພິ່ນກໍຊ່ວຍ ນັບທັງດ້ານວັດຖຸ ແລະ ຈິດໃຈ. ນ້ອງມີຄວາມຮູ້ສຶກອົບອຸ່ນເມື່ອມີແມ່ຮັກຢູ່ຄຽງຂ້າງ ໃນເວລາທີ່ຢູ່ຫ່າງໄກຈາກບ້ານເກີດເມືອງນອນ. ນີ້ແມ່ນຄວາມໂຊກດີທີ່ສຸດສຳລັບນ້ອງ”.
 ນັກສຶກສາລາວ, ກຳປູເຈຍ ພ້ອມດ້ວຍພໍ່ຮັກແມ່ຮັກເຂົ້າຮ່ວມກິດຈະກຳສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ຫວຽດນາມ - ລາວ ຄົບຮອບ 60 ປີ ແລະ ວັນສ້າງຕັ້ງສາຍພົວພັນທາງການທູດ ຫວຽດນາມ - ກຳປູເຈຍ ຄົບຮອບ 55 ປີ. |
ສ່ວນສຳລັບ ດາວທິບ ທຽນເຫຼືອງສະຫວ່າງ, ນັກສຶກສາລາວ ທີ່ພວມຮຽນປະລິນຍາຕີຢູ່ຂະແໜງບໍລິຫານທຸລະກິດ, ມະຫາວິທະຍາໄລ ວັນລາງ, ນັບແຕ່ເມື່ອມາຮ່ວມດຳລົງຊີວິດກັບພໍ່ຮັກແມ່ຮັກ, ນາງກໍເວົ້າພາສາຫວຽດ ໄດ້ຢ່າງລ່ຽນໄຫຼດີ, ເງື່ອນໄຂ ແລະ ຄຸນນະພາບການຮຽນຂອງນາງກໍໄດ້ຮັບການປັບປຸງ. ດາວທິບ ແບ່ງປັນດ້ວຍຄວາມດີໃຈວ່າ:
“ພໍ່ຮັກແມ່ຮັກຂອງນ້ອງ ຮັກແພງນ້ອງຫຼາຍ, ຍາມໃດເພິ່ນກໍເບິ່ງແຍງດູແລສຸຂະພາບ, ການກິນການຢູ່ຢ່າງຄົບຖ້ວນ. ຢູ່ເຮືອນກໍມີຫ້ອງຢູ່ຕ່າງຫາກ, ສະນັ້ນ ກໍສະບາຍກວ່າຢູ່ຫໍພັກ, ການຮຽນກໍມີປະສິດທິຜົນກວ່າ”.
ເມື່ອໄດ້ຍິນລູກສາວຮັກໂອ້ລົມ, ປ້າ ໂດະລຽນງອກຫຼີ (ຢູ່ເທດສະບານ 2, ເມືອງ 6) ເລົ່າດ້ວຍຄວາມຍິ້ມແຍ້ມແຈ່ມໃສວ່າ: ດາວທິບ ແມ່ນໜຶ່ງໃນນັກສຶກສາລາວ 2 ຄົນ ທີ່ເພິ່ນໄດ້ຮັບມາເປັນລູກຮັກໃນປີນີ້. ກ່ອນນັ້ນ, ເພິ່ນໄດ້ຮັບລ້ຽງນັກສຶກສາ ລາວ ແລະ ກຳປູເຈຍ 8 ຄົນແລ້ວ. ປ້າ ຫຼີ ສະໝັກໃຈຮັບພວກນ້ອງມາລ້ຽງຍ້ອນວ່າ ຄອບຄົວມີ homestay ແລະ ມີລູກສາວສອງຄົນກໍພວມເປັນນັກສຶກສາເຊັ່ນດຽວກັນ:
“ເມື່ອລູກສາວຂອງຂ້າພະເຈົ້າ ໄປຮຽນຢູ່ໄກ, ຂ້າພະເຈົ້າ ກໍມີຄວາມເປັນຫ່ວງກັງວົນທີ່ສຸດ. ເພາະສະນັ້ນ, ເມື່ອເຫັນລູກຮັກມາຮຽນຢູ່ນີ້, ຂ້າພະເຈົ້າຢາກໃຫ້ພວກລູກມີພໍ່ມີແມ່ ແລະ ຮູ້ສຶກອົບອຸ່ນຄືຢູ່ລາວ. ນັ້ນກໍແມ່ນນ້ຳໃຈຂອງຄົນຫວຽດ”.
 ການມອບຂອງຂວັນປີໃໝ່ໃຫ້ແກ່ນັກສຶກສາ ລາວ ແລະ ກຳປູເຈຍ (ພາບ:TTXVN) |
ໄປຄຽງຄູ່ກັບການຂົນຂວາຍບັນດາຄອບຄົວ ຮັບນັກສຶກສາລາວ ແລະ ກຳປູເຈຍ ມາລ້ຽງ ແລະ ເບິ່ງແຍງແລ້ວ, ນະຄອນ ໂຮ່ຈີມິນ ຍັງຈັດຫຼາຍກິດຈະກຳທີ່ມີຄວາມໝາຍຄື: ວັນບຸນຄອບຄົວ ຫວຽດ - ລາວ - ກຳປູເຈຍ; ການນຳນະຄອນລົງຢ້ຽມຢາມ, ລະດົມກຳລັງໃຈຕໍ່ບັນດາຄອບຄົວພໍ່ຮັກແມ່ຮັກ ແລະ ນັກສຶກສາລາວ, ກຳປູເຈຍ;… ບັນດາເມືອງ ແລະ ນະຄອນ ຖູດຶກ ກໍໄດ້ສົມທົບກັນຄຸ້ມຄອງ, ລະດົມກຳລັງໃຈ, ສ້າງເງື່ອນໄຂໃຫ້ນັກສຶກສາລາວ, ກຳປູເຈຍ ໄດ້ເຂົ້າຮ່ວມການເຄື່ອນໄຫວວົງຄະນະຍາດ, ຜ່ານນັ້ນກໍໂຄສະນາ, ເຜີຍແຜ່, ສຶກສາ ເຮັດໃຫ້ນັກສຶກສາລາວ ແລະ ກຳປູເຈຍ ຄວາມເຂົ້າໃຈກ່ຽວກັບປະເທດຊາດ, ປະຊາຊົນ, ວັດທະນະທຳ, ປະຫວັດສາດ ຫວຽດນາມ ກໍຄືມູນເຊື້ອສາຍພົວພັນສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ຫວຽດນາມ - ລາວ ແລະ ຫວຽດນາມ - ກຳປູເຈຍ ຫຼາຍກວ່າອີກ.
Ath Sreyneang, ນັກສຶກສາ ກຳປູເຈຍ ພວມຮ່ຳຮຽນຢູ່ ນະຄອນ ໂຮ່ຈີມິນ ມີຄວາມຕື້ນຕັນໃຈຕໍ່ຄວາມເອົາໃຈໃສ່ຂອງພໍ່ຮັກແມ່ຮັກ.
“ເມື່ອເປັນລູກຮັກຂອງເພິ່ນ, ນ້ອງຮູ້ສຶກມີຄວາມສຸກຫຼາຍ ຍ້ອນວ່າ ເຖິງວ່າເຮົາຢູ່ຫ່າງໄກຈາກບ້ານເກີດເມືອງນອນກໍ່ຕາມ ແຕ່ຍາມໃດກໍມີຍາດພີ່ນ້ອງຢູ່ຄຽງຂ້າງເບິ່ງແຍງດູແລນ້ອງ, ຊ່ວຍເຫຼືອນ້ອງຍາມປະສົບກັບຄວາມຫຍຸ້ງຍາກ”.
ຍັງມີຫຼາຍໂຄງການ, ກິດຈະກຳທີ່ມີຄວາມໝາຍ, ບໍ່ພຽງແຕ່ໄດ້ສ້າງຄວາມຜູກພັນລະຫວ່າງນັກສຶກສາລາວ, ກຳປູເຈຍ ກັບປະຊາຊົນ ຫວຽດນາມ ເທົ່ານັ້ນ, ຫາກຍັງສະແດງໃຫ້ເຫັນຄວາມເອົາໃຈໃສ່, ການເບິ່ງແຍງຂອງຄະນະພັກ, ອຳນາດການປົກຄອງນະຄອນ ໂຮ່ຈີມິນ ທີ່ມີຕໍ່ເຂົາເຈົ້າ ໃນໄລຍະທີ່ຮ່ຳຮຽນ, ດຳລົງຊີວິດຢູ່ດິນແດນແຫ່ງນີ້. ຜ່ານການເຄື່ອນໄຫວພົບປະແລກປ່ຽນປະຊາຊົນ ແມ່ນເພື່ອແນໃສ່ເພີ່ມທະວີຄວາມເຂົ້າໃຈເຊິ່ງກັນ ແລະ ກັນ ກ່ຽວກັບປະເທດຊາດ, ປະຊາຊົນ, ວັດທະນະທຳ, ປະຫວັດສາດຫຼາຍກວ່າອີກ. ຈາກນັ້ນ ກໍປະກອບສ່ວນເຂົ້າໃນການເພີ່ມພູນຄູນສ້າງ, ຮັດແໜ້ນຄວາມສາມັກຄີ, ສາຍພົວພັນມິດຕະພາບແບບພິເສດລະຫວ່າງສາມປະເທດບ້ານໃກ້ເຮືອນຄຽງ ຫວຽດນາມ - ລາວ - ກຳປູເຈຍ ຕື່ມອີກ./.