(vovworld)- ຫ່າງຈາກ ທາງທິດເຫນືອ ນະຄອນຫລວງ ວຽງຈັນ ປະມານກວ່າ 400 ກິໂລແມັດ, ຫລວງພະບາງ ແມ່ນສະຖານທີ່ຂາດບໍ່ໄດ້ເມື່ອນັກທ່ອງທ່ຽວມາຢ້ຽມຢາມປະເທດລ້ານຊ້າງ. ປີ 1995, ຫລວງພະບາງ ໄດ້ຮັບການຮັບຮອງຈາກອົງການ UNESCO ວ່າແມ່ນເມືອງມໍລະດົກໂລກ. ເພື່ອຮັກສາບັນດາຄຸນຄ່າທີ່ໄດ້ຮັບການຮັບຮອງຈາກອົງການ UNESCO ແລະ ສືບຕໍ່ດຶງດູດນັກທ່ອງທ່ຽວມາຢ້ຽມຢາມຫລາຍກວ່ານັ້ນ, ນະຄອນ ຫລວງພະບາງ ພວມມຸ້ງໄປເຖິງການກໍ່ສ້າງຕົວເມືອງແຫ່ງການທ່ອງທ່ຽວປອດຄວັນຢາສູບ. ດ້ວຍການປະຕິບັດ ສະຖານທີ່ທ່ອງທ່ຽວປອດຄວັນຢາສູບ ແລະ ໄດ້ຮັບການຊົມເຊີຍຈາກນັກທ່ອງທ່ຽວຄືແນວໃດ.
|
ບໍ່ວ່າຢູ່ສະຖານທີ່ທ່ອງທ່ຽວແຫ່ງໃດໃນເມືອງຫລວງພະບາງ, ນັກທ່ອງທ່ຽວກໍຈະພົບເຫັນປ້າຍຫ້າມ ສູບຢາຢູ່ບັນດາເຂດປູຊະນີຍະສະຖານ ຊື່ງຂຽນເປັນ 2 ພາສາຄື: ອັງກິດ ແລະ ລາວ ພ້ອມກັບຮູບຫ້າມສູບຢາ ຕິດຢູ່ສະຖານທີ່ທ່ອງທ່ຽວຫລາຍແຫ່ງໃນຕົວເມືອງ. ນອກນັ້ນ, ຢູ່ໃນຮ້ານອາຫານຕ່າງໆກໍໄດ້ຕິດສັນຍາລັກຫ້າມສູບຢາ. ຢູ່ເຂດທີ່ມີປ້າຍຫ້າມສູບຢານີ້, ນັບທັງນັກທ່ອງທ່ຽວ ແລະ ຊາວທ້ອງຖິ່ນລວ້ນແຕ່ບໍ່ໄດ້ສູບຢາ. ນັ້ນແມ່ນຫນຶ່ງໃນບັນດາສາຍເຫດຊື່ງ ອ້າຍ Graig Huitt, ນັກທ່ອງທ່ຽວມາຈາກ ການາດາ ແລະ ຄອບຄົວຕັດສິນໃຈໄປຢ້ຽມຢາມ ແລະ ຄົ້ນຫາຄວາມງາມຂອງເມືອງຫລວງພະບາງ, ຊື່ງໄດ້ຮັບການຮັບຮອງວ່າເປັນມໍລະດົກຂອງໂລກ.
“ຂ້າພະເຈົ້າເຫັນວ່າ ເລື່ອງຜັນຂະຫຍາຍການຫ້າມສູບຢາແມ່ນດີທີ່ສຸດ ພິເສດ ເມື່ອຂ້າພະເຈົ້າໄປທ່ອງທ່ຽວກັບຄອບຄົວ. ຂ້າພະເຈົ້າສາມາດເຂົ້າຮ້ານອາຫານດື່ມຈອກກາເຟ ແຕ່ບໍ່ມີຜູ້ໃດສູບຢາ. ນັ້ນແມ່ນສິ່ງດີເລີດເມື່ອທຽບໃສ່ ໂຕກຽວ, ຊື່ງແມ່ນສະຖານທີ່ມີຫລາຍຄົນອາດຈະສູບຢາຢູ່ທົ່ວທຸກບ່ອນ.”
ສຳລັບທ່ານນາງ Karen ແລະ ຜົວ ຊື່ງແມ່ນນັກທ່ອງທ່ຽວມາຈາກ ອັງກິດແລ້ວ, ການຢ້ຽມຢາມ ເມືອງຫລວງຄັ້ງນີ້ໄດ້ສ້າງອະນຸສອນຫລາຍຢ່າງໃຫ້ທ່ານນາງ. ເພາະວ່າ ບໍ່ພຽງແຕ່ຄວາມສວຍງາມຢູ່ສະຖານທີ່ທ່ອງທ່ຽວຫລາຍແຫ່ງເທົ່ານັ້ນ ຫາກ ທ່ານນາງ ແລະ ຜົວ ກໍບໍ່ຖືກຜົນສະທ້ອນຈາກຄວັນຢາສູບ. ເຖິງຢ່າງໃດກໍຕາມ, ທ່ານນາງ Karen ຖືວ່າ ອຳນາດການປົກຄອງ ຫລວງພະບາງ ຄວນມີສະຖານທີ່ສະຫງວນສະເພາະໃຫ້ແກ່ບັນດານັກທ່ອງທ່ຽວຜູ້ທີ່ສູບຢາ.
“ເມື່ອມາຢ້ຽມຢາມ ເມືອງຫລວງ ຂ້າພະເຈົ້າພົບເຫັນມີປ້າຍຫ້າມສູບຢາຫລາຍສົມຄວນ ແລະ ຂ້າພະເຈົ້າຖືວ່າ ນີ້ແມ່ນສິ່ງດີທີ່ສຸດ. ເມື່ອໄປກິນເຂົ້າເຊົ້າ ຂ້າພະເຈົ້າບໍ່ມັກຜູ້ສູບຢາຢູ່ອ້ອມຂ້າງປ່ອຍຄວັນໃສ່ຫນ້າ. ແຕ່ຢູ່ ລອນດອນ ມີບາງເຂດອະນຸຍາດໃຫ້ສູບຢາ ແລະຜູ້ມັກສູບຢາພາກັນມານັ້ນເພື່ອສູບຢາ.”
ອ້າຍ ຕ້າກວາງດົງ, ນັກທ່ອງທ່ຽວມາຈາກຫວຽດນາມ ໃຫ້ຮູ້ວ່າ: ທິວທັດທຳມະຊາດຢູ່ຫລວງພະບາງ ຍາມໃດກໍດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ ພິເສດເຂົາເຈົ້າຈະຮູ້ສຶກປະທັບໃຈກວ່າເມື່ອຕົວເມືອງນີ້ປອດຄວັນຢາສູບ.
“ຂ້າພະເຈົ້າຖືວ່າ ບັນດາຄວາມມານະພະຍາຍາມເພື່ອຊ່ວຍໃຫ້ ຫລວງພະບາງກາຍເປັນຕົວເມືອງແຫ່ງການທ່ອງທ່ຽວປອດຄວັນຢາສູບແມ່ນຈຳເປັນທີ່ສຸດ ເພາະວ່າ ບໍ່ສູບຢາກໍເປັນການປະກອບສ່ວນຮັກສາສິ່ງແວດລ້ອມ, ຮັກສາສຸຂະພາບໃຫ້ແກ່ນັກທ່ອງທ່ຽວ ແລະ ຊາວທ້ອງຖິ່ນ. ແລະ ນີ້ແມ່ນສິ່ງທີ່ຖືກຕ້ອງຕາມຄາດໝາຍດຶງດູດນັກທ່ອງທ່ຽວ, ແນ່ນອນວ່າ ຫລວງພະບາງ ຈະປະສົບຜົນສຳເລັດໃນການໂຄສະນາແມ່ນຕົວເມືອງແຫ່ງການທ່ອງທ່ຽວປອດຄວັນຢາສູບ, ພ້ອມກັບສິ່ງທີ່ ຫລວງພະບາງ ຍາດມາໄດ້ຄື: ສະຖານທີ່ທ່ອງທ່ຽວໄມຕິຈິດ, ຊາວທ້ອງຖິ່ນມີຄວາມສະຫນິດສະຫນົມກັບນັກທ່ອງທ່ຽວຕ່າງປະເທດ, ພື້ນຖານໂຄງລ່າງນັບມື້ນັບໄດ້ຮັບການຍົກລະດັບຂຶ້ນ. ດ້ວຍເຄື່ອງໝາຍ ແມ່ນຕົວເມືອງປອດຄວັນຢາສູບ, ຂ້າພະເຈົ້າມີຄວາມເຊື່ອໝັ້ນວ່າ ຫລວງພະບາງ ຈະມີນັກທ່ອງທ່ຽວມາຢ້ຽມຢາມນັບມື້ນັບຫລາຍກວ່າ ແລະ ກາຍເປັນສະຖານທີ່ທ່ອງທ່ຽວ ດູດດື່ມໃນແຜນທີ່ທ່ອງທ່ຽວໂລກກໍຄືຂອງລາວເວົ້າລວມ.”
ນັກທ່ອງທ່ຽວຫລາຍຄົນຖືວ່າ ເລື່ອງ ນະຄອນຫລວງພະບາງ ຫ້າມສູບຢາຢູ່ບັນດາເຂດປູຊະນີຍະສະຖານ ແລະ ສະຖານທີ່ສາທາລະນະ ຈະປະກອບສ່ວນຊ່ວຍອະນຸລັກຮັກສາບັນດາຄຸນຄ່າຊື່ງໄດ້ຮັບການຮັບຮອງຈາກ UNESCO. ສະນັ້ນ ເລື່ອງຫ້າມສູບຢາຈະບໍ່ຫລຸດຜ່ອນຈຳນວນນັກທ່ອງທ່ຽວມາຢ້ຽມຢາມເມືອງຫລວງນີ້. ເອື້ອຍ Tinky Keeton ນັກທ່ອງທ່ຽວມາຈາກ ອາຟຼິກາ ຖືວ່າ:
“ຂ້າພະເຈົ້າຄິດວ່າ ເລື່ອງຫ້າມສູບຢາ ຈະເຮັດໃຫ້ນັກທ່ອງທ່ຽວຈຳນວນຫນຶ່ງຄິດໄລ່ຊັ່ງຊາເມື່ອມາຢ້ຽມຢາມຫລວງພະບາງ. ແຕ່ຖ້າເພື່ອນຢາກຢ້ຽມຢາມຕົວເມືອງທີ່ສວຍງາມນີ້ ທ່ານຈະບໍ່ໄດ້ສູບຢາໃນໄລຍະອັນສັ້ນໆ ຫລືມາຢ້ຽມຢາມບັນດາສະຖານທີ່ອະນຸຍາດໃຫ້ສູບຢາ.”
ອຳນາດການປົກຄອງ ຫລວງພະບາງ ໃຫ້ຮູ້ວ່າ: ນັບແຕ່ເມື່ອໄດ້ຮັບການຮັບຮອງວ່າເປັນມໍລະດົກໂລກຈາກ UNESCO, ຈຳນວນນັກທ່ອງທ່ຽວ ມາຢ້ຽມຢາມເມືອງຫລວງ ນັບມື້ນັບເພີ່ມຂຶ້ນ. ດ້ວຍບັນດາວຽກງານພວມໄດ້ຮັບການຜັນຂະຫຍາຍ ແລະ ການສະຫນັບສະຫນູນຂອງນັກທ່ອງທ່ຽວ, ແນ່ນອນວ່າ ນະຄອນຫລວງພະບາງ ຈະກາຍເປັນຕົວເມືອງປອດຄວັນຢາສູບ. ສິ່ງນີ້ ຈະດຶງດູດນັກທ່ອງທ່ຽວພາຍໃນ ແລະ ຕ່າງປະເທດມາຢ້ຽມຢາມ ເມືອງຫລວງພະບາງນັບມື້ນັບຫລາຍ.