(vovworld)- Yangon ເມືອງຫລວງເກົ່າຂອງ ມຽນມາ ຫ່າງຈາກນະຄອນຫລວງ ຮ່າໂນ້ຍປະມານ 1 ຊົ່ວໂມງເຄິ່ງເມື່ອເດີນທາງດ້ວຍການຂີ່ຍົນ. Yangon ມີຊື່ສຽງດ້ວຍ ວັດຄຳ Shwedagon ກາຍເປັນສະຖານທີ່ທ່ອງທ່ຽວດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍໃນໄລຍະສອງສາມປີມານີ້. ໃນລາຍການຊາຍຄາອາຊຽນພາກນີ້ ພວກເຮົາຂໍແນະນຳ ວັດ Shwedagon ຂອງ Yangon. 

ວັດ Shwedagon  ພາບ:tourdulichmyanmar.vn

        ຍາມເຊົ້າຢູ່ Yangon ຕາມທາງຫລວງເຂົ້າໃຈໄປກາງນະຄອນ ການສັນຈອນຖືກຕິດຂັດເຕັມດ້ວຍລົດໂອໂຕເປັນຈຳນວນຫລວງຫລາຍ, ແຕ່ບໍ່ເຫັນມີລົດຈັກຄັນໃດເລີຍ. ຢູ່ສອງຟາກທາງ ແມ່ນບັນດາອາຄານເກົ່າແກ່ທີ່ໃຫຍ່ໂຕຊື່ງໄດ້ຮັບການປຸກສ້າງຕາມສະຖາປັດຕະຍະກຳຫົວເມືອງຂຶ້ນອັງກິດ ປະສົມປະສານກັບບັນດາກິດຈະກຳທັນສະໄຫມພວມໄດ້ຮັບການກໍ່ສ້າງ. ຕາມທາງຍ່າງ, ມີຜູ້ຊາຍຫລາຍຄົນນຸ່ງຜ້າສະຫລົງ longyis ແລະ ນຸ່ງເສື້ອເຊີດ, ປາກຄ້ຽວໝາກພວມຍ່າງໄປ. ແມ່ຍິງນຸ່ງສີ້ນດ້ວຍສີສັນຫລາກຫລາຍ, ແກ້ມສອງເບື້ອງ ແລະ ຫນ້າຜາກແມ່ນທາແປ້ງ Thanaka ສີເຫລືອງ, ໃສ່ເກີບແຕະ.  ເຖິງວ່າຫ່າງຈາກໃຈກາງນະຄອນ Yangon ປະມານ 5 ກີໂລແມັດ, ແຕ່ພົ້ນເດັ່ນຂຶ້ນໃນທ້ອງຟ້າສີຄາມແມ່ນທາດຄຳເຫລືອງປະກາຍຂອງວັດ Shwedagon, ແມ່ນຫນຶ່ງໃນບັນດາກິດຈະກຳສະຖາປັດຕະຍະກຳສາສະຫນາພຸດທີ່ສັກກະລະບູຊາ ແລະ ໃຫຍ່ໂຕມະໂຫຖານກວ່າໝູ່ຢູ່ ມຽນມາ. ເປັນຄັ້ງທຳອິດໄດ້ຊົມທາດຄຳໃຫຍ່ຄືແນວນີ້, ເອື້ອຍ ຮ່ວາງມີງເຟືອງ ນັກທ່ອງທ່ຽວມາຈາກຫວຽດນາມ ແບ່ງປັນວ່າ:

        “ເມື່ອເຫັນພະທາດຂ້າພະເຈົ້າຕົກສະເຫງີ້ຕໍ່ຄວາມສວຍງາມ ແລະ ໃຫຍ່ໂຕມະໂຫຖານ, ຜູ້ຂັບລົດ taxi ອະທິບາຍວ່າ, ຖ້າຢືນຢູ່ບໍ່ວ່າບ່ອນໃດໃນ yangon ກໍສາມາດຫລຽວເຫັນ ວັດຄຳ Shwedagon ໄດ້. ຍາມແລງຂອງມື້ໃດ, ແມ່ ແລະ ເມຍຂອງອ້າຍກໍເຂົ້າວັດເພື່ອຖະຫວາຍດອກໄມ້ ແລະທຳພິທີບູຊາ. ສະເພາະອ້າຍ ຊຸມມື້ທ້າຍອາທິດຈຶ່ງມີເວລາເຂົ້າວັດ.”

ວັດ Shwedagon ໄດ້ຮັບການກໍ່ສ້າງເປັນຄັ້ງທຳອິດໃນລະຫວ່າງສັດຕະວັດທີ 6 – 10, ຢູ່ໂນນພູ Singuttara ທີ່ສັກກະລະບູຊາ. ໃນເນື້ອທີ່ 50.000 ຕາແມັດ, ວັດແຫ່ງນີ້ມີຍອດທາດດ້ວຍຄວາມສູງ 98 ແມັດ,  ຟອກດ້ວຍຄຳຈາກສັດຕະວັດນີ້ໄປສູ່ສັດຕະວັດອື່ນ ແລະ ຄຳທີ່ເອົາມາຟອກທາດນັ້ນແມ່ນຂອງປະຊາຊົນມາຖະຫວາຍ. ມຽນມາ ມີພົນລະເມືອງກວ່າ 4 ລ້ານຄົນ, ໃນນັ້ນເກືອບ 84% ແມ່ນເຊື່ອຖືສາສະຫນາພຸດ. ເຖິງວ່າໄດ້ຜ່ານການຜັນແປຫລາຍຢ່າງຂອງປະຫວັດສາດກໍຕາມ, ແຕ່ວັດ Shwedagon ຍັງຄົງໄດ້ຮັບການຮັກສາ ແລະ ບູລະນະປະຕິສັງຂອນຈາກປະຊາຊົນເປັນປະຈຳ. ພ້ອມກັນນັ້ນ ອຳນາດການປົກຄອງນະຄອນ Yanggon ກໍໄດ້ກຳນົດວ່າ, ບັນດາອາຄານຢູ່ທີ່ນີ້ບໍ່ໄດ້ກໍ່ສ້າງເກີນຄວາມສູງຂອງວັດ Shwedagon ທີ່ສັກກະລະບູຊານີ້.

Shwedagon ມີ 4 ປະຕູເຂົ້າອອກ ແລະ ຖືກຕັ້ງຢູ່ 4 ທິດ. ເມື່ອເຂົ້າວັດ  ຜູ້ໃດກໍຕ້ອງປົດເກີບໃສ່ຖົງແລ້ວຖືໄປນຳ ແລະ ແປງເຄື່ອງນຸ່ງໃຫ້ເປັນລະບຽບກ່ອນທີ່ເຂົ້າວັດ. ສີຂຽວຂອງບັນດາຕົ້ນໄມ້ໃຫຍ່ໃນບໍລິເວນວັດ ຍິ່ງເຮັດໃຫ້ສີເຫລືອງເຫລື້ອມຂອງວັດພົ້ນເດັ່ນຂຶ້ນ. ໃຊ້ເວລາປະມານ 10 ນາທີທ່ານຈຶ່ງຂຶ້ນໄປຮອດປະສາດຕົ້ນຕໍ  ໄດ້, ຢູ່ສອງຟາກທາງຂຶ້ນໄປແມ່ນຮ້ານຂາຍເຄື່ອງບູຊາມີກີ່ນຫອມດອກໄມ້ ແລະ ໄມ້ເກດສະຫນາໄປທົ່ວບໍລິເວນ. ວັດຕົ້ນຕໍແມ່ນຟອກຄຳດ້ວຍສະຖາປັດຕະຍະກຳທີ່ລະອຽດລະອໍຄ່ອຍໆປະກົດຕົວຂຶ້ນສູງຈາກຫນ້າດິນປະມານ 6,4 ແມັດ, ພົ້ນເດັ່ນກວ່າເມື່ອທຽບໃສ່ທາດຢູ່ອ້ອມຂ້າງ. ຢູ່ອ້ອມທາດຕົ້ນຕໍມີ 4 ທາດນ້ອຍກວ່າ ແລະ ຕັ້ງຢູ່ 4 ທິດ ແລະ ທາດນ້ອຍກວ່າ 60 ທາດຢູ່ກະແຈກກະຈາຍ. ເສັ້ນທາງເຂົ້າວັດຖືກປູດ້ວຍ ພົມເພື່ອໃຫ້ນັກທ່ອງທ່ຽວເຂົ້າຢ້ຽມຊົມວັດຫລີກລ້ຽງຄວາມຮ້ອນຈາກແສງແດດກະທົບໃສ່ຫີນ.

ໃນຂະນະທີ່ນັກທ່ອງທ່ຽວພວມຕົກສະເຫງີ້ຕໍ່ຄວາມສວຍງາມຂອງວັດແຫ່ງນີ້ ພິເສດພະທາດໄດ້ຕິດຫີນປະເສີດ ແລະ ເພັດເປັນຈຳນວນຫລວງຫລາຍ, ສ່ວນຊາວ Yangon ພັດນັ່ງເທິງພື້ນຫີນຮ້ອນກົ້ມຫົວຍໍມືນົບບູຊາພະພຸດທະຮູບ 8 ອົງ ເຊິ່ງເປັນສັນຍາລັກໃຫ້ 7 ມື້ໃນອາທິດຖືກຕັ້ງຢູ່ອ້ອມຕົວພະທາດ. ສະເພາະວັນພຸດ ແມ່ນວັນຢູ່ກາງອາທິດ ສະນັ້ນໄດ້ແບ່ງພະພູດທະຮູບເປັນສອງຕອນ , ຕອນເຊົ້າ ແລະຕອນແລງ. ຕາມທັດສະນະຂອງ ປະຊາຊົນ ມຽນມາແລ້ວ, ການຫົດສົງໃຫ້ພະພຸດທະຮູບແມ່ນມີຄວາມໝາຍນຳມາເຊິ່ງຄວາມໂຊກດີໃຫ້ຕົນເອງ.

ພະພຸດທະຮູບມີຄວາມສູງເຖິງຫລັງຄາເຮືອນ ແລະ ໄດ້ຟອກຄຳ, ມີຄວາມສັກສິດ ຖືກຕັ້ງຢູ່ໃຈກາງເຂດສວດມົນ. ຫ່າງຈາກນັ້ນປະມານ 2 ແມັດ, ມີນັກບວດຜູ້ຫນຶ່ງພວມເທດສະຫນາ. ເບື້ອງຫລັງແມ່ນພຸດທະສາສະນີກະຊົນນັບສີບໆຄົນພວມນັ່ງນົບພາວະນາ ແລະ ເວົ້າຄືນຄຳເທດສະຫນານັ້ນ. ສ່ວນກຸ່ມພຸດທະສາສະນີກະຊົນອື່ນພວມກວາດພະທາດພາຍໃຕ້ແສງແດດຮ້ອນ. ເອື້ອຍເຟືອງ ນັກທ່ອງທ່ຽວມາຈາກຫວຽດນາມ ແບ່ງປັນວ່າ:

“ສຽງລະຄັງໃນວັດເຮັດໃຫ້ຂ້າພະເຈົ້າຮູ້ສຶກສະຫງົບສຸກ. ເມື່ອຍ່າງຢ້ຽມຊົມວັດ ຮູ້ສຶກເມື່ອຍແລ້ວ ກໍສາມາດນັ່ງພັກຜ່ອນຢູ່ທາດລະຄັງນີ້. ຊາວມຽນມາ ແມ່ນຜູ້ສະຫນິດສະຫນົມ ແລະ ຮັກແພງແຂກຄົນທີ່ສຸດ. ເມື່ອນັ່ງພັກຜ່ອນ ເຂົາເຈົ້າເຊີນຂ້າພະເຈົ້າດືມຊານຳຄອບຄົວຂອງເຂົາເຈົ້ານຳ ອີກ. ຢູ່ ວັດ Shwedagon ຂ້າພະເຈົ້າຮູ້ສຶກວ່າ ທຸກຄົນຄືໄດ້ຫຍັບມໍ່ໃກ້ກັນກວ່າ, ທັງໝົດກໍລ້ວນແຕ່ມຸ້ງໄປເຖິງສິ່ງດີງາມ.”

ເມື່ອຮອດຍາມແລງ, ຊາວທ້ອງຖິ່ນເຂົ້າວັດນັບມື້ນັບຫລາຍຂຶ້ນ. ໄຟແສງສີໃນ ວັດ Shwedagon ພວມແຈ້ງສະຫວ່າງຂຶ້ນ ພິເສດແມ່ນສີເຫລືອງເຫລື້ອມຂອງທາດ. ຄວາມງາມຂອງ ວັດ Shwedagon ແລະ ຄວາມຮັກແພງແຂກຄົນຂອງປະຊາຊົນຢູ່ທີ່ນີ້ ໄດ້ສ້າງຄວາມປະທັບໃຈຢ່າງເລິກເຊິ່ງຕໍ່ນັກທ່ອງທ່ຽວ.