(vovworld)-ເມື່ອເວົ້າເຖິງເຕັກໂນໂລຊີຂໍ້ມູນຂ່າວສານ, ຫລາຍຄົນຈະຄິດວ່າ ຂົງເຂດນີ້ພຽງແຕ່ເໝາະສົມກັບໄວຫນຸ່ມທີ່ມີຫົວຄິດປະດິດສ້າງ, ຂະຫຍັນຂັນເຄື່ອນ ແລະ ຢາກຊອກຮູ້, ຄົ້ນຫາສິ່ງທີ່ໃຫມ່ອ່ຽມ. ເຖິງຢ່າງໃດກໍຕາມ, ວັນບຸນເຕັກໂນໂລຊີຂໍ້ມູນຂ່າວສານທີ່ຖືກຈັດຂຶ້ນຢູ່ ເຂດ Tampines, ສິງກະໂປ ໃນຕົ້ນເດືອນ 3/2014 ໄດ້ດຶງດູດຜູ້ອາຍຸສູງນັບຮ້ອຍໆຄົນເຂົ້າຮ່ວມ. ເຫດການນີ້ ບໍ່ພຽງແຕ່ຊ່ວຍຜູ້ອາຍຸສູງມີໂອກາດສຳພັດກັບການໝູນໃຊ້ເຕັກໂນໂລຊີໃນປະຈຸບັນເທົ່ານັ້ນ ຫາກຍັງສ້າງຄວາມສະຫນິດຕິດພັນລະຫວ່າງບັນດາລຸ້ນຄົນ ແລະ ເຊີດຊູຈິດໃຈ“ຮຳ່ຮຽນຕະຫລອດຊີວິດ” ອີກດ້ວຍ.
ວັນບຸນເຕັກໂນໂລຊີຂໍ້ມູນຂ່າວສານ ຖືດຈັດຂຶ້ນຢູ່ໂຮງຮຽນ 15 ແຫ່ງ ຂຶ້ນກັບເຂດ Tampines ສິງກະໂປ. ວັນບຸນປີນີ້ ລວມມີການເຄື່ອນໄຫວຫລາຍຢ່າງຄື:ກອງປະຊຸມສຳມະນາແນະນຳບັນດາລາຍການໝູນໃຊ້ເຕັກໂນໂລຊີຂໍ້ມູນຂ່າວສານ, ແນະນຳການຝືກຫັດວິທີນຳໃຊ້ຄອມພິວເຕີໃຫ້ແກ່ຜູ້ອາຍຸສູງ. ປ້າ Doris Poon ອາຍຸ 55 ປີ, ເປັນແມ່ເຮືອນ ໄດ້ແບ່ງປັນວ່າ:
“ປະຈຸບັນ ຂ້າພະເຈົ້າຮູ້ຈັກວິທີນຳໃຊ້ອິນເຕີແນັດແລ້ວ. ຂ້າພະເຈົ້າກໍຮູ້ຈັກວິທີເຂົ້າ Facebook, ຖ່າຍຮູບ ແລ້ວນຳເອົາຮູບຂຶ້ນ Facebook ອີກດ້ວຍ.”
ພາບປະກອບ:internet
|
ວັນບຸນເຕັກໂນໂລຊີຂໍ້ມູນຂ່າວສານ Tampines ໂດຍແມ່ນອົງການພັດທະນາ Infocomm ຂອງສິງກະໂປ ສົມທົບກັບສະພາຜູ້ອາຍຸສູງ ແລະ ຄະນະກຳມະການຜູ້ອາຍຸສູງເຂດ Tampines ຈັດຕັ້ງ. ໂດຍໄດ້ຮັບການສ້າງຕັ້ງຂຶ້ນເມື່ອປີ 2010, ວັນບຸນເຕັກໂນໂລຊີຂໍ້ມູນຂ່າວສານ ໄດ້ຫນູນຊ່ວຍໃຫ້ຜູ້ອາຍຸສູງ 1950 ຄົນ ຮຽນບັນດາວິທີນຳໃຊ້ຄອມພິວເຕີຄື: ວິທີເຂົ້າອິນເຕີແນັດ ແລະ ການ ຫລິ້ນເກັມອອນໄລ.
ເຂົ້າຮ່ວມລາຍການນີ້, ຜູ້ອາຍຸສູງແຕ່ລະຄົນຈະໄດ້ຮັບການແນະນຳວິທີນຳໃຊ້ຄອມພິວເຕີ ຈາກນັກຮຽນຜູ້ຫນຶ່ງ. ສິ່ງດັ່ງກ່າວໄດ້ຊ່ວຍໃຫ້ຄົນລຸ້ນຕ່າງໆຢູ່ສິງກະໂປ ມີຄວາມໃກ້ຊິດຕິດແທດກວ່າ. ເພື່ອນ Toh Yan Liem ແບ່ງປັນວ່າ:
“ ຫລານຮູ້ສຶກວ່າ ຕົນເອງ ໄດ້ຮຽນສິ່ງໃດຫນຶ່ງທີ່ໃຫມ່ອ່ຽມ. ມີຫລາຍຄົນຄິດວ່າ ເປັນການຍາກໃນການແນະນຳໃຫ້ຜູ້ອາຍຸສູງຫລືຈະເສຍເວລາຫລາຍ. ແຕ່ຄວາມຈິງ ແລ້ວ ພວກເຮົາ ມີພຽງຄວາມອົດທົນແມ່ນຈະຊ່ວຍເຫລືອເຂົາເຈົ້າໄດ້. ຫລານຈະພະຍາຍາມກາຍເປັນຄູສອນດີ.”
ການພັດທະນາເຕັກໂນໂລຊີຂໍ້ມູນຂ່າວສານຢ່າງວ່ອງໄວໄດ້ເຮັດໃຫ້ຜູ້ອາຍຸສູງບໍ່ໄປທັນກັບການພັດທະນາ. ເຖິງຢ່າງໃດກໍຕາມ, ວັນບຸນເຕັກໂນໂລຊີຂໍ້ມູນຂ່າວສານ ໄດ້ເຮັດໃຫ້ຜູ້ອາຍຸສູງມີຄວາມປິຕິຊົມຊື່ນກວ່າ ເມື່ອໄດ້ຄົ້ນຫາເຕັກໂນໂລຊີ, ຕິດຕໍ່ພົວພັນກັບໝູ່ເພື່ອນຜ່ານເຄືອຂ່າຍອີນເຕີແນັດ ຫລືເຂົ້າຫລິ້ນເກັມທາງອອນໄລ. ຍິ່ງກວ່າເວລາໃດໝົດ, ຜ່ານລາຍການນີ້, ຜູ້ອາຍຸສູງ ພວມປຸກລຸກຈິດໃຈຮຳ່ຮຽນຕະຫລອດຊີວິດໃຫ້ລຸ້ນຫນຸ່ມ ສິງກະໂປ. ທ່ານ Heng Swee Keat, ທີ່ປຶກສາຄະນະຈັດຕັ້ງເຫດການໃຫ້ຮູ້ວ່າ:
“ພວກເຮົາຕ້ອງສ້າງກາລະໂອກາດຫລາຍຢ່າງເພື່ອໃຫ້ຜູ້ອາຍຸສູງມີວິຖີຊີວິດແບບຂະຫຍັນຂັນເຄື່ອນ ແລະ ມີສຸຂະພາບແຂງແຮງກວ່າ. ພວກເຮົາຄວນສ່ົງເສີມຊາວສິງກະໂປທຸກຄົນ, ບໍ່ວ່າອາຍຸຫລາຍປານໃດ ແລະ ລະດັບຄວາມຮູ້ແນວໃດ ສືບຕໍ່ຮຳ່ຮຽນ ແລະ ຄົ້ນຫາໂລກ. ຕາມວິທີນີ້, ພວກເຮົາຈະມີສັງຄົມທີ່ຟົດຟື້ນກວ່າ ແລະ ພົນລະເມືອງມີຊີວິດອີ່ມໜຳສຳລານ ແລະ ມີຄວາມໝາຍກວ່າ.”
ສິງກະໂປ ແມ່ນປະເທດຫນຶ່ງ ຍາມໃດກໍຂາດແຄນແຫລ່ງຄົນງານ, ພວມແມ່ນປະເທດມີຈຳນວນພົນລະເມືອງອາຍຸສູງກວມສ່ວນຫລາຍ. ສະນັ້ນ ບັນດາລາຍການຄື ວັນບຸນເຕັກໂນໂລຊີຂໍ້ມູນຂ່າວສານ ບໍ່ພຽງແຕ່ນຳມາເຊິ່ງຄວາມປິຕິຊົມຊ່ືນໃຫ້ແກ່ຜູ້ອາຍຸສູງເທົ່ານັ້ນ ຫາກຍັງປະກອບສ່ວນເຮັດສ້າງແບບແຜນການດຳລົງຊີວິດຢ່າງສົດໃສຢູ່ປະເທດສິງກະໂປອີກດ້ວຍ.