(vovworld)- ຫໍພິພິດທະພັນ ແລະ ປູຊະນີຍະສະຖານປະຫວັດສາດ 11 ແຫ່ງຢູ່ສິງກະໂປຫາກໍຕົກລົງເປີດປະຕູເພື່ອຮັບແຂກມາຢ້ຽມຊົມໂດຍບໍ່ເກັບຄ່າ. ສະພາມໍລະດົກແຫ່ງຊາດສິງກະໂປປາດຖາຫນາວ່າ, ດ້ວຍນະໂຍບາຍໃຫມ່ນີ້ຈະດຶງດູດປະຊາຊົນ ແລະ ແຂກຕ່າງປະເທດທີ່ອາໄສຍາວນານຢູ່ສິງກະໂປມາຊອກຮູ້ກ່ຽວກັບວັດທະນະທຳ, ປະຫວັດສາດສິງກະໂປ. ນີ້ແມ່ນສ່ວນຫນຶ່ງໃນຍຸດທະສາດຍົກສູງຄຸນນະພາບບັນດາຫໍພິພິດທະພັນຂອງສິງກະໂປ.
ຫໍພິພິດທະພັນແຫ່ງຊາດ ສິງກະໂປ
ພາບ:internet
|
ລາຍການເປີດປະຕູບັນດາຫໍພິພິດທະພັນນີ້ໂດຍມີການເຂົ້າຮ່ວມຂອງ ຫໍພິພິດທະພັນ ແລະ ປູຊະນີຍະສະຖານປະຫວັດສາດທີ່ລືຊື່ຂອງສິງກະໂປຫລາຍແຫ່ງຄື: ຫໍພິພິດທະພັນສີວິໄລ ອາຊີ, ຫໍພິພິດທະພັນແຫ່ງຊາດສິງກະໂປ, ຫໍພິພິດທະພັນສິລະປະ, ສູນມໍລະດົກມາເລເຊຍ. ພິເສດ ເມື່ອຕອບສະຫນອງບັນດາລາຍການ ລະດູແລ້ງໃຫ້ແກ່ເດັກນ້ອຍປີ 2013, ບັນດາ ຫໍພິພິດທະພັນດັ່ງກ່າວລ້ວນແຕ່ຈັດຕັ້ງການເຄື່ອນໄຫວລະຫລິ້ນຕ່າງໆເພື່ອສະຫງວນໃຫ້ແກ່ເດັກນ້ອຍຄື: ແຕ່ງອາຫານພື້ນເມືອງ Ang Ku Kueh, ທາສີ…. ເອື້ອຍ Hafiza Latif ໃຫ້ຮູ້ວ່າ ນີ້ແມ່ນໂອກາດເພື່ອໃຫ້ຄອບຄົວຂ້າພະເຈົ້າມາຊອກຮູ້ຕື່ມກ່ຽວກັບປະເທດຊາດ.
“ພວກຂ້າພະເຈົ້າແມ່ນຜູ້ເປັນພໍ່ເປັນແມ່ ແຕ່ບາງເທື່ອກໍບໍ່ເຂົ້າໃຈປານໃດກ່ຽວກັບສິງກະໂປ. ສະນັ້ນ ນີ້ແມ່ນໂອກາດທີ່ດີເພື່ອໃຫ້ພວກຂ້າພະເຈົ້າຊອກຮູ້ກ່ຽວກັບວັດທະນະທຳ, ປະຫວັດສາດ ເພື່ອ ສອນໃຫ້ລູກຫລານຂອງຕົນ. ເມື່ອມາຢ້ຽມຢາມ ຫໍພິພິດທະພັນ ພວກເດັກນ້ອຍດີໃຈຫລາຍເພາະວ່າຢູ່ທີ່ນີ້ຍັງຈັດການເຄື່ອນໄຫວລະຫລິ້ນຕ່າງສະຫງວນໃຫ້ແກ່ເດັກນ້ອຍ.”
ໃນມື້ທຳອິດເປີດປະຕູ, ບັນດາ ຫໍພິພິດທະພັນ, ເຂດປູຊະນີຍະສະຖານປະຫວັດສາດໄດ້ຕ້ອນຮັບແຂກມາຢ້ຽມຊົມ 10.000 ເທື່ອຄົນ, ເພີ່ມຂຶ້ນກວ່າ 2000 ເທື່ອຄົນເມື່ອທຽບໃສ່ລະດັບສະເລ່ຍຂອງແຕ່ລະມື້. ອ້າຍ Kovitam Thilag ເຊື້ອຊາດອິນເດຍ ດຳລົງຊີວິດຢູ່ສິງກະໂປເປັນເວລາ 8 ປີ ແລ້ວໄດ້ແບ່ງປັນວ່າ:
“ນີ້ແມ່ນກາລະໂອກາດເພື່ອໃຫ້ລູກຂອງຕົນ, ພໍ່ແມ່ຂອງຕົນໄດ້ຊອກຮູ້ກ່ຽວກັບສິງກະໂປ, ກ່ຽວກັບປະຫວັດສາດຂອງປະເທດນີ້. ສິ່ງດັ່ງກ່າວມີຄວາມໝາຍທີ່ສຸດ.”
ໃນ 10 ປີຜ່ານມາ, ຈຳນວນແຂກເຂົ້າຢ້ຽມຊົມບັນດາ ຫໍພິພິດທະພັນສິງກະໂປໄດ້ເພີ່ມຂຶ້ນທົບ 3 ເທົ່າ
ພາບ: internet
|
ນັບແຕ່ເມື່ອລາຍການເປີດປະຕູໂດຍບໍ່ເກັບຄ່າ ໄດ້ຮັບການປະຕິບັດຢູ່ຫໍພິພິດທະພັນ, ຈຳນວນຜູ້ເຂົ້າຫນ້າເວັບ, ຮຽກຮ້ອງສະຫນອງຂໍ້ມູນຂ່າວສານກ່ຽວກັບບັນດາລາຍການຢ້ຽມຊົມຢູ່ ຫໍພິພິດທະພັນແຫ່ງຊາດ ສິງກະໂປ ໄດ້ເພີ່ມຂຶ້ນ 20%. ເປັນທີ່ຈະແຈ້ງແລ້ວວ່າ ລາຍການດັ່ງກ່າວໄດ້ປະກອບສ່ວນສົ່ງເສີມປະຊາຊົນຊອກຮູ້ກ່ຽວກັບປະຫວັດສາດ, ວັດທະນະທຳຂອງສິງກະໂປ ຜ່ານນັ້ນຮັກສາສີສັນຊາດ. ສິງກະໂປພວມມຸ່ງໄປເຖິງການສ້າງ ຫໍພິພິດທະພັນ ບໍ່ພຽງແຕ່ແມ່ນສະຖານທີ່ວາງສະແດງບັນດາວັດຖຸພັນ ຮັບໃຊ້ການຄົ້ນຄ້ວາເທົ່ານັ້ນ ຫາກຍັງແມ່ນສະຖານທີ່ລະຫລິ້ນຢ່ອນອາລົມຂອງເດັກນ້ອຍອີກດ້ວຍ. ໃນໄລຍະຈະມາເຖິງ, ບັນດາ ຫໍພິພິດທະພັນສິງປະໂປສືບຕໍ່ຊອກຫາການປະດິດສ້າງໃຫມ່, ກ້າວໄປເຖິງການເຊື່ອມໂຍງກັບບັນດາຫໍພິພິດທະພັນ ສາກົນ. ທ່ານນາງ Cheryl Koh ຜູ້ອຳນວຍການອົງການສື່ສານ, ສັງກັດສະພາມໍລະດົກແຫ່ງຊາດສິງກະໂປໃຫ້ຮູ້ວ່າ:
“ຄວາມຈິງ, ຫໍພິພິດທະພັນ ແມ່ນສະຖານທີ່ພົວພັນຕິດຕໍ່, ພວກຂ້າພະເຈົ້າພວມສ້າງຫໍພິພິດທະພັນກາຍເປັນແຫ່ງທີ່ດູດດື່ມກວ່າ ດ້ວຍວິທີສັບຊ້ອນ, ຈັດວາງ, ນຳໃຊ້ບັນດາວັດຖຸພັນຢ່າງມີປະສິດທິຜົນ ແລະ ການອອກແບບລາຍການເຄື່ອນໄຫວໃຫ້ເໝາະສົມກວ່າ.”
ໃນ 10 ປີຜ່ານມາ, ຈຳນວນແຂກເຂົ້າຢ້ຽມຊົມບັນດາ ຫໍພິພິດທະພັນສິງກະໂປໄດ້ເພີ່ມຂຶ້ນທົບ 3 ເທົ່າ, ຈາກ 1,1 ລ້ານເທ່ືອຄົນໃນປີ 2003 ຂຶ້ນເຖິງ 2,8 ເທື່ອຄົນໃນປີ 2012. ມີ ຫໍພິພິດທະພັນຫລາຍແຫ່ງ ໄດ້ກາຍເປັນຈຸດນັດພົບຂາດບໍ່ໄດ້ຂອງນັກທ່ອງທ່ຽວຕ່າງປະເທດເມື່ອມາຢ້ຽມຢາມສິງກະໂປ. ຫນຶ່ງໃນຈຳນວນ ຫໍພິພິດທະພັນດັ່ງກ່າວແມ່ນ ຫໍພິພິດທະພັນແຫ່ງຊາດສິງກະໂປ, ຊື່ງແມ່ນ ຫໍພິພິດທະພັນໃຫຍ່ກວ່າໝູ່ ແລະ ຖືກກໍ່ສ້າງມາແຕ່ດົນນານກວ່າໝູ່ຂອງປະເທດສິງກະໂປ. ຫໍພິພິດທະພັນແຫ່ງນີ້ຍັງຮັກສາວັດຖຸພັນອັນລ້ຳຄ່າຂອງຊາດ 11 ຢ່າງ, ໃນນັ້ນ ມີສີລາປະຫວັດສາດທີ່ມີມາແຕ່ສັດຕະວັດທີ 13. ນອກນັ້ນ ຜູ້ນິຍົມສິລະປະລ້ວນແຕ່ມາຢ້ຽມຢາມ ຫໍພິພິດທະພັນສິລະປະສິງກະໂປເພື່ອໄດ້ຮັບຊົມບັນດາຜົນການປະດິດແຕ່ງມາຈາກ 130 ປະເທດໃນໂລກ. ເພື່ອຍົກສູງຄຸນນະພາບຂອງບັນດາຫໍພິພິດທະພັນ ແລະ ດຶງດູດແຂກທ່ອງທ່ຽວມາຢ້ຽມຊົມ, ລັດຖະບານສິງກະໂປຈະຫັກເງິນປະມານ 62 ລ້ານໂດລາສິງກະໂປໃນງົບປະມານປີ 2013 ເພື່ອເກັບຊື້ ແລະ ອະນຸລັກຮັກສາບັນດາຜົນຜະລິດຕະພັນສິລະປະ, ວັດຖຸພັນໃນ 5 ປີຈະມາເຖິງ. ສະນັ້ນ ບັນດາ ຫໍພິພິດທະພັນພວມຕັ້ງຫນ້າຮຽບຮຽງວັດຖຸພັນຕ່າງໆທີ່ກ່ຽວຂ້ອງເຖິງສິງກະໂປຄື: ຜະລິດຕະພັນສິລະປະ, ອຸປະກອນສ່ວນບຸກຄົນ.