(vovworld) - ສູນພາສາ ແລະ ວັດທະນະທຳໄທ ຂຶ້ນກັບມະຫາວິທະຍາໄລຮ່າໂນ້ຍ ແມ່ນສູນສອນພາສາໄທໄລຍະສັ້ນທີ່ມີປະສິດທິຜົນ ຢູ່ຮ່າໂນ້ຍ. ນອກຈາກຫນ້າທີ່ຕົ້ນຕໍ ແມ່ນສອນພາສາໄທໃຫ້ພວກນອ້ງນັກສຶກສາພະແນກຕ່າງໆໃນໂຮງຮຽນ ແລະ ສອນພາສາໄທລະດັບ ABC ໃຫ້ແກ່ຜູ້ທີ່ມີຄວາມຕ້ອງການໃນສັງຄົມແລ້ວ, ສູນດັ່ງກ່າວຍັງສົ່ງເສີມຜັນຂະຫຍາຍບັນດາໂຄງການຮ່ວມມືລະຫວ່າງມະຫາວິທະຍາໄລຮ່າໂນ້ຍ ກັບບັນດາຄູ່ຮ່ວມມືໄທ. ຜ່ານນັ້ນ ປະກອບສ່ວນຊຸກຍູ້ການພົວພັນຮ່ວມມືດ້ານສຶກສາລະຫວ່າງສອງປະເທດ ຫວຽດນາມ ແລະ ໄທ.
ໂດຍໄດ້ຮັບການສ້າງຕັ້ງຂຶ້ນເມື່ອເດືອນ 2/2009, ສູນພາສາ ແລະ ວັດທະນະທຳໄທ ເຄື່ອນໄຫວຕາມທິດນຳ: ພາສາແມ່ນຂົວຕໍ່ປະກອບສ່ວນເພີ່ມພູນຄູນສ້າງການພົວພັນມິດຕະພາບແລະການຮ່ວມມື ຫວຽດນາມ - ໄທ. ສູນດັ່ງກ່າວເຄື່ອນນໄຫວດ້ວຍການຫນູນຊ່ວຍຂອງ 2 ອົງການຕົ້ນຕໍຄື: ກົມຮ່ວມມືພັດທະນາສາກົນ ສັງກັດກະຊວງການຕ່າງປະເທດໄທ TICA ແລະສະຖານທູດໄທປະຈຳຮ່າໂນ້ຍ. ທ່ານ ເຈີນວັນຮ່ວານ, ຜູ້ອຳນວຍການສູນພາສາ ແລະ ວັດທະນະທຳໄທ ໃຫ້ຮູ້ວ່າ:
“ ກ່ອນທີ່ສ້າງຕັ້ງສູນພາສາ ແລະ ວັດທະນະທຳໄທ, ປີ 2008 TICA ໄດ້ມີແຜນການຊ່ວຍມະຫາວິທະຍາໄລຮ່າໂນ້ຍ ສ້າງຕັ້ງສູນ ແລະ ແຜນການນີ້ໄດ້ຮັບການປະຕິບັດ ຢ່າງຄົບຖ້ວນ ແລະ ມີປະສິດທິຜົນ. TICA ໄດ້ສົ່ງຜູ້ຊ່ຽວຊານມາຊ່ວຍໂຮງຮຽນຮຽບຮຽງຫລັກສູດສອນພາສາໄທ, ສົ່ງຜູ້ຊ່ຽວຊານມາສຳຫລວດຕີລາຄາເລື່ອງສິດສອນ ແລະ ຮ່ຳຮຽນພາສາໄທ ກໍ່ຄືຈັດຕັ້ງໃຫ້ຄູສອນໃນສູນໄປທັດສະນະສຶກສາດ້ານວິຊາສະເພາະຢູ່ໄທໃນໂອກາດພັກແລ້ງ ”
ນອກນັ້ນ TICA ຍັງສະຫນອງທຶນສຶກສາບຳລຸງສ້າງປະລິຍາໂທສະເພາະພາສາໄທໃຫ້ແກ່ຄູສອນ 2 ຄົນໃນໂຮງຮຽນ ແລະ ສະຫນອງທຶນສຶກສາໃຫ້ນັກສຶກສາດີເດັ່ນກວ່າໝູຊຸດລະ 10 ຄົນ ໄປບຳລຸງໄລຍະ 4 ສັບປະດາຢູ່ໄທ. ມາຮອດປະຈຸບັນ, ມີ ນັກສຶກສາ 40 ຄົນ ໃນ 4 ຊຸດຮຽນ ໄດ້ຮັບທຶນສຶກສາຂອງ TICA. ດ້ວຍການສົມທົບລະຫວ່າງການຮຽນພາສາໃນໂຮງຮຽນ ກັບການຝຶກຫັດຕົວຈິງຜ່ານຮູບການ Homestay, ຊຸດຮຽນດັ່ງກ່າວບໍ່ພຽງແຕ່ຊ່ວຍນັກສຶກສາຍົກສູງລະດັບພາສາໄທຢ່າງເຫັນໄດ້ຊັດເທົ່ານັ້ນ ຫາກຍັງສ້າງຄວາມປະທັບໃຈທີ່ດີກ່ຽວກັບຊີວິດ ແລະ ວັດທະນະທຳຂອງໄທໃຫ້ແກ່ເຂົາເຈົ້າອີກດ້ວຍ. ເພື່ອນ ຫງວຽນບ໋າວແຄງ, ຫນຶ່ງໃນຈຳນວນນັກສຶກສາດີເດັ່ນ 10 ຄົນ ຫາກໍກັບເມືອພາຍຫລັງເຂົ້າຮ່ວມຊຸດບຳລຸງ ຢູ່ ມະຫາວິທະຍາໄລ ສີນະຄາຣີນວິໂຣດ ຕາມທຶນສຶກສາບຳລູງພາສາໄທຂອງ TICA ແບ່ງປັນວ່າ:
“ ອະນຸສອນທີ່ເປັນຫນ້າຈື່ຈຳທີ່ສຸດ ນັ້ນແມ່ນ 3 ມື້ທີ່ພວກນ້ອງເຂົ້າຮ່ວມລາຍການ homestay ຢູ່ແຂວງ ສະມຸດສົງການ. ພວກນ້ອງໄດ້ດຳລົງຊີວິດຮ່ວມກັບຊາວໄທ, ໄດ້ໄປປູກປ່າປ້ອງກັນ, ຕອນຄ່ຳໄດ້ໄປແຫ່ທຽນໃນວັນບຸນເຂົ້າພັນສາຂອງໄທ. ”
ບັນດານັກສຶກສາຢູ່ສູນພາສາ ແລະ ວັດທະນະທຳໄທ ທີ່ຮ່າໂນ້ຍ
ພາບ:trungtamngonnguvanhoathai
|
ໃນວິວັດການສອນ ແລະ ຮຽນພາສາໄທຢູ່ສູນດັ່ງກ່າວ, ບັນດາຄູສອນ ແລະ ນັກສຶກສາໄດ້ຮັບຄວາມເອົາໃຈໃສ່ ແລະ ການຫນູນຊ່ວຍເປັນປະຈຳຈາກສະຖານທູດ ໄທປະຈຳຫວຽດນາມຢູ່ຮ່າໂນ້ຍ. ໃນສົກຮຽນ 2012-2013 ສະຖານທູດໄທໄດ້ອຸປະຖຳໃຫ້ແກ່ສູນພາສາ ແລະ ວັດທະນະທຳ ຄອມພິວເຕີ, ຫນັງສືພິມວາລະສານ ແລະ ເອກະສານຮັບໃຊ້ການສິດສອນ ແລະ ຄົ້ນຄ້ວາກ່ຽວກັບພາສາໄທ. ນອກນັ້ນ ສະຖານທູດໄທ ຍັງແມ່ນຂົວເຊື່ອມຕໍ່ລະຫວ່າງສູນກັບບັນດາອົງການ, ກະຊວງ, ຂະແຫນງການຂອງໄທ, ຊ່ວຍມະຫາວິທະຍາໄລຫລາຍແຫ່ງຂອງໄທຮູ້ຈັກເຖິງສູນ. ຍ້ອນມີການຫນູນຊ່ວຍດັ່ງກ່າວ, ສູນພາສາ ແລະ ວັດທະນະທຳໄທ ໄດ້ລົງນາມໃນບົດບັນທຶກຊ່ວຍຈຳກ່ຽວກັບການຮ່ວມມືກັບມະຫາວິທະຍາໄລ 10 ແຫ່ງຄື: ມະຫາວິທະຍາໄລມະຫາສາຣະຄາມ, ສີນະຄາຣີນວິໂຄດ,ທຳມະຊາດ, ບັນດາມະຫາວິທະຍາໄລດັ່ງກ່າວໄດ້ສົ່ງນັກສຶກສາມາຮຽນຢູ່ມະຫາວິທະຍາໄລ ຮ່າໂນ້ຍ ແລະ ຈັດຕັ້ງການເຄື່ອນໄຫວພົບປະແລກປ່ຽນກັບນັກສຶກສາຂອງສູນເປັນປະຈຳ. ທ່ານນາງ ເຈີນເກີມຕູ, ອາຈານສອນພາສາໄທ ແລະ ພະນັກງານຫລັກແຫລ່ງຂອງສູນໃຫ້ຮູ້ວ່າ:
“ ບັນດາມະຫາວິທະຍາໄລໄທ ໄດ້ສົ່ງນັກສຶກສາມາຄົ້ນຄ້ວາຢູ່ສູນ, ແຕ່ລະປີ ມີນັກຮຽນ 2-4 ຄົນມາຮຽນ. ພວກຂ້າພະເຈົ້າ ແນະນຳໃຫ້ພວກນ້ອງວຽກງານສິດສອນ, ສ້າງຫລັກສູດສິດສອນເພື່ອຍົກສູງຄວາມສາມາດໃນການສິດສອນໃຫ້ແກ່ພວກນ້ອງ, ສ້າງກາລະໂອກາດໃຫ້ພວກນ້ອງຖອດຖອນບົດຮຽນຈາກໂຮງຮຽນຂອງຫວຽດນາມ”
ນັກສຶກສາເຂົ້າຮ່ວມການປູກຕົ້ນໄມ້
ພາບ:internet
|
ບັນດາໂຄງການຮ່ວມມືລະຫວ່າງສູນກັບບັນດາຄູ່ຮ່ວມມືໄທ ລ້ວນແຕ່ນຳມາເຊິ່ງປະສິດທິຜົນ. ເຖິງວ່າ ໄດ້ຮຽນພາສາໄທໃນເວລາພຽງ 8 ເດືອນເທົ່ານັ້ນ ແຕ່ບັນດານັກສຶກສາລ້ວນແຕ່ສາມາດເວົ້າພາສາໄທຢ່າງຫລ່ຽນໄຫລ. ຍິ່ງກວ່ານັ້ນ ນັກສຶກສາຫລາຍຄົນຍັງຊອກຫາໄດ້ກາລະໂອກາດເຮັດວຽກຢູ່ໄທ. ມີນັກສຶກສາຈຳນວນຫນຶ່ງເມື່ອຮຽນຈົບຈາກສູນໄດ້ຮັບເປັນຄູສອນພາສາຫວຽດຢູ່ບັນດາມະຫາວິທະຍາໄລຂອງໄທຄື:ນາເຣສວນ, ຣາດຈະເພັດ ບາງຄົນໄດ້ຮັບເຂົ້າເຮັດວຽກຢູ່ບັນດາບໍລິສັດຂອງໄທຢູ່ຫວຽດນາມ. ບັນດາຊຸດຮຽນພາສາໄທໄລຍະສັ້ນລະດັບ ABC ຂອງສູນພາສາ ແລະ ວັດທະນະທຳໄທ ກໍໄດ້ດຶງດູດວົງການນັກທຸລະກິດທີ່ມີຄູ່ຮ່ວມມືຢູ່ໄທ, ພາລະກອນບັນດາບໍລິສັດໄທຢູ່ຮ່າໂນ້ຍ, ຜູ້ນຳທ່ຽວຫລືເພື່ອນຫນຸ່ມທີ່ຢາກໄປຮຽນຢູ່ໄທເປັນຈຳນວນຫລວງຫລາຍ. ມາຮອດປະຈຸບັນ, ສູນໄດ້ຈັດຕັ້ງ 6 ຊຸດຮຽນສຳເລັດຜົນ.
ດ້ວຍບັນດາໝາກຜົນທີ່ບັນລຸໄດ້ໃນ 4 ປີຜ່ານມາ, ສູນພາສາ ແລະ ວັດທະນະທຳໄທ ໄດ້ປະກອບສ່ວນນຳພາສາ ແລະ ວັດທະນະທຳໄທໃກ້ຊິດກັບຊາວຫວຽດນາມ ຈາກນັ້ນ ຊ່ວຍເພີ່ມທະວີຄວາມເຂົ້າໃຈເຊິ່ງກັນ ແລະກັນ ລະຫວ່າງປະຊາຊົນສອງປະເທດໃນສະພາບລັດຖະບານຫວຽດນາມ ແລະ ໄທ ຫາກໍ່ຖະແຫລງຍົກການພົວພັນລະຫວ່າງສອງປະເທດຂຶ້ນເປັນຄູ່ຮ່ວມມືຍຸດທະສາດ.