(vovworld)- ໃນ 60 ປີຜ່ານມາ, ການພົວພັນທາງການທູດ ລະຫວ່າງຫວຽດນາມ ແລະ ອິນໂດເນເຊຍ ໄດ້ພັດທະນາຢ່າງບໍ່ຢຸດຢັ້ງ ແລະ ຍົກຂຶ້ນສູ່ລະດັບການພົວພັນຄູ່ຮ່ວມມືຍຸດທະສາດ, ໃນນັ້ນມີການປະກອບສ່ວນບໍ່ແມ່ນຫນ້ອຍຂອງສະມາຄົມມິດຕະພາບ ຫວຽດນາມ - ອິນໂດເນເຊຍ. ມຸ່ງໄປເຖິງການສະເຫລີມສະຫລອງ 60 ປີ ແຫ່ງວັນສ້າງຕັ້ງສາຍພົວພັນທາງການທູດ ຫວຽດນາມ -ອິນໂດເນເຊຍ (30/12/1955-30/12/2015), ກອງປະຊຸມໃຫຍ່ຜູ້ແທນ ຄັ້ງທີ 3 ສະມາຄົມມິດຕະພາບ ຫວຽດນາມ -ອິນໂດເນເຊຍ ຫາກໍດຳເນີນໄປຢູ່ ຮ່າໂນ້ຍ ໄດ້ກຳນົດຫນ້າທີ່ຈຸດສຸມ ແມ່ນເພີ່ມທະວີຄວາມເຂົ້າໃຈ, ນ້ຳໃຈມິດຕະພາບ ແລະ ການພົວພັນແລກປ່ຽນລະຫວ່າງປະຊາຊົນສອງປະເທດ ຜ່ານບັນດາພາຫະນະສື່ມວນຊົນຫລາຍຮູບການ.
ທ່ານຫງວຽນດັງຕຽນຜູ້ອຳນວຍຫານໃຫຍ່ ວິທະຍຸກະຈາຍສຽງຫວຽດນາມ
ແລະມອບຂອງຂວັນໃຫ້ທ່ານMayerfar, ເອກອັກຄະລັດຖະທູດ
ອິນໂດເນເຊຍ ປະຈຳ ຫວຽດນາມ
ພາບ:vov
|
ສະມາຊິກຄະນະບໍລິຫານງານສະມາຄົມມິດຕະພາບ ຫວຽດນາມ -ອິນໂດເນເຊຍ ອາຍຸການໃຫມ່ 2015-2020 17 ຄົນ ໄດ້ຮັບການເລືອກຕັ້ງແມ່ນບັນດາຜູ້ສຸດຈິດສຸດໃຈ, ມີຄວາມຮັກແພງປະເທດຊາດ ແລະ ຊາວອິນໂດເນເຊຍ ໄດ້ຈັດການປະຊຸມ, ຂຶ້ນແຜນການຈັດຕັ້ງການເຄື່ອນໄຫວຫລາຍຢ່າງທີ່ມີຫົວຄິດປະດິດສ້າງ, ປ່ຽນໃຫມ່, ເພີ່ມທະວີການພົວພັນແລກປ່ຽນລະຫວ່າງສອງປະເທດ. ປະທານສະມາຄົມ ແມ່ນທ່ານ ຫງວຽນດັງຕຽນ, ຜູ້ອຳນວຍຫານໃຫຍ່ ວິທະຍຸກະຈາຍສຽງຫວຽດນາມ, ຊື່ງແມ່ນອົງການສື່ສານໃຫຍ່ຂອງຫວຽດນາມ ແລະ ມີທີ່ຕັ້ງສຳຄັນໃນພາກພື້ນ ອາຊີຕາເວັນອອກສ່ຽງໃຕ້ ເປັນການເຊື່ອມຕໍ່ຢ່າງມີປະສິດທິຜົນຜ່ານພາຫະນະສື່ມວນຊົນ. ທ່ານ ຫງວຽນດັງຕຽນ ແບ່ງປັນວ່າ:
“ຫວຽດນາມ ແລະ ອິນໂດເນເຊຍ ມີສາຍພົວພັນກ່ຽວກັບປະຫວັດສາດ, ວັດທະນະທຳແມ່ນຄ້າຍຄືກັນ. ພິເສດ ໃນການພັດທະນາທາງດານທູດ, ປີນີ້ ມຸ່ງໄປເຖິງການສະເຫລີມສະຫລອງ 60 ປີແຫ່ງວັນສ້າງຕັ້ງການພົວພັນທາງການທູດລະຫວ່າງຫວຽດນາມ ແລະ ອິນໂດເນເຊຍ, ພວກຂ້າພະເຈົ້າ ໄດ້ກຳນົດຫນ້າທີ່ຈຸດສຸມແມ່ນຊຸກຍູ້ການພົວພັນມິດຕະພາບນັບມື້ນັບພັດທະນາ ແລະ ການພັດທະນານັ້ນ ນັບມື້ນັບເຂົ້າສູ່ລວງເລິກ, ມີປະສິດທິຜົນກວ່າ. ໄລຍະຈະມາເຖິງ, ພວກຂ້າພະເຈົ້າຈະຊຸກຍູ້ບາງລາຍການພົວພັນແລກປ່ຽນວັດທະນະທຳທີ່ເປັນມູນເຊື້ອຄື: ຈັດຕັ້ງພິທີສະເຫລີມສະຫລອງ 60 ປີແຫ່ງວັນສ້າງຕັ້ງການພົວພັນທາງການທູດ, ການພົວພັນແລກປ່ຽນການຮ່ວມມືລະຫວ່າງ ວິທະຍຸກະຈາຍສຽງຫວຽດນາມ ແລະ ວິທະຍຸກະຈາຍສຽງແຫ່ງຊາດ ອິນໂດເນເຊຍ.”
ສືບທອດ ແລະ ເສີມຂະຫຍາຍບັນດາມູນເຊື້ອ ແລະ ການເຄື່ອນໄຫວໃນຕະຫລອດ 10 ປີຜ່ານມາ, ສະມາຄົມມິດຕະພາບ ຫວຽດນາມ -ອິນໂດເນເຊຍ ອາຍຸການ 3 ມີຄຳໝັ້ນສັນຍາ ຈະສືບຕໍ່ຮັກສາບັນດາການເຄື່ອນໄຫວໂຄສະນາ, ແນະນຳຂໍ້ມູນຂ່າວສານໃຫ້ປະຊາຊົນທຸກຊັ້ນວັນນະ ກ່ຽວກັບປະຫວັດສາດ, ປະເທດຊາດ ແລະ ຊາວ ຫວຽດນາມ -ອິນໂດເນເຊຍ, ກ່ຽວກັບການພົວພັນມິດຕະພາບທີ່ເປັນມູນເຊື້ອກໍຄືການຮ່ວມມືຫລາຍດ້ານລະຫວ່າງສອງປະເທດ, ຫນູນຊ່ວຍ, ເປັນຂົວຕໍ່ຊຸກຍູ້ບັນດາຂົງເຂດເສດຖະກິດ, ວັດທະນະທຳ, ວິທະຍາສາດ, ສາທາລະນະສຸກ ແລະ ຊອກຫາບັນດາການເຄື່ອນໄຫວຢ່າງມີຫົວຄິດປະດິດສ້າງກວ່າ ເພື່ອພັດທະນານ້ຳໃຈມິດຕະພາບ ແລະ ຄວາມເຂົ້າອົກເຂົ້າໃຈລະຫວ່າງປະຊາຊົນ, ປັບປຸງ ແລະ ພັດທະນາສາຍພົວພັນມິດຕະພາບ ແລະ ການຮ່ວມມືຫລາຍດ້ານ. ໂດຍໄດ້ຮັບການສ້າງຕັ້ງເມື່ອວັນທີ 19/5/2005, ສະມາຄົມມິດຕະພາບ ຫວຽດນາມ -ອິນໂດເນເຊຍ ກາຍເປັນ ອົງການສຳຄັນໃນການພົວພັນລະຫວ່າງສອງປະເທດ.
ທ່ານ Mayerfar, ເອກອັກຄະລັດຖະທູດ ອິນໂດເນເຊຍ ປະຈຳ ຫວຽດນາມ ຖືວ່າ : ບົດບາດຂອງສະມາຄົມມິດຕະພາບຫວຽດນາມ - ອິນໂດເນເຊຍ ແມ່ນສຳຄັນທີ່ສຸດ, ແມ່ນສິ່ງທີ່ຂາດບໍ່ໄດ້ໃນການພົວພັນຮ່ວມມືລະຫວ່າງສອງຊາດ.
“ໃນການພົວພັນລະຫວ່າງສອງປະເທດ, ການພົວພັນລະຫວ່າງປະຊາຊົນແມ່ນສຳຄັນທີ່ສຸດ. ພາຍໃຕ້ການຊີ້ນຳຂອງສະຫະສະມາຄົມມິດຕະພາບ ຫວຽດນາມ. ສະມາຄົມ ມິດຕະພາບ ຫວຽດນາມ ອິນໂດເນເຊຍ ມີບົດບາດເປັນຂົວຕໍ່ປະຊາຊົນລະຫວ່າງສອງປະເທດ. ສະມາຄົມ ໄດ້ຕັ້ງຫນ້າຈັດຕັ້ງການພົບປະ, ເວທີປາໄສປະຊາຊົນ, ລາຍການສະແດງສິລະປະເປັນຫລາຍຄັ້ງ. ຜ່ານນັ້ນ ສ້າງເງື່ອນໄຂໃຫ້ປະຊາຊົນສອງປະເທດພົບປະແລກປ່ຽນ, ຮ່ວມມືໃນຫລາຍຂົງເຂດ.”
ໂດຍເຫັນໄດ້ປະສິດທິຜົນຈາກການເຄື່ອນໄຫວຂອງສະມາຄົມມິດຕະພາບຫວຽດນາມ - ອິນໂດເນເຊ, ຝ່າຍ ອິນໂດເນເຊຍ ຕົກລົງສ້າງຕັ້ງສະມາຄົມມິດຕະພາບ ອິນໂດເນເຊຍ ຫວຽດນາມ. ທ່ານ ຫງວຽນດັງຕຽນ ຜູ້ອຳນວຍການໃຫຍ່ ວິທະຍຸກະຈາຍສຽງຫວຽດນາມ ໃຫ້ຮູ້ວ່າ:
“ສະມາຄົມມິດຕະພາບ ອິນໂດເນເຊຍ ຫວຽດນາມ ໄດ້ຮັບການສ້າງຕັ້ງຂຶ້ນ ໂດຍທ່ານ Budiasa Sastrawinata, ຜູ້ອຳນວຍການໃຫຍ່ ກຸ່ມບໍລິສັດ Ciputra, ຊື່ງແມ່ນກຸ່ມບໍລິສັດມີການເຄື່ອນໄຫວລົງທຶນຢູ່ຫວຽດນາມມາເປັນເວລາ 20 ປີ ໄດ້ເລືອກຕັ້ງເປັນປະທານ. ດ້ວຍທ່າພັດທະນາສະດວກຄືແນວນັ້ນ, ຂ້າພະເຈົ້າເຊື່ອໝັ້ນວ່າ ການພົວພັນລະຫວ່າງສະມາຄົມມິດຕະພາບ 2 ປະເທດ ຈະນັບມື້ນັບພັດທະນາ ແລະ ຈະສົມທົບກັນຈັດຕັ້ງບັນດາການເຄື່ອນໄຫວແທດຈິງ ເພື່ອຊຸກຍູ້ການພົວພັນລະຫວ່າງປະຊາຊົນສອງປະເທດ, ຈາກນັ້ນ ພັດທະນາບັນດາຂົງເຂດອື່ນຄື: ເສດຖະກິດ, ວັດທະນະທຳ ແລະ ສື່ສານ.”
ໃນບັນຍາກາດກະກຽມສະເຫລີມສະຫລອງ 60 ປີແຫ່ງວັນສ້າງຕັ້ງການພົວພັນທາງການທູດ ລະຫວ່າງສອງປະເທດ ແລະ ສ້າງຕັ້ງປະຊາຄົມອາຊຽນໃນທ້າຍປີນີ້, ພວກເຮົາເຊື່ອໝັ້ນວ່າ ສະມາຄົມມິດຕະພາບຫວຽດນາມ ອິນໂດເນເຊຍ ແລະ ສະມາຄົມມິດຕະພາບ ອິນໂດເນເຊຍ ຫວຽດນາມ ຈະມີບາດກ້າວພັດທະນາກວ່າ ໃນໄລຍະຕໍ່ໄປ.