(vovworld)- ເຮືອນພັບ ທີ່ຫາກໍ່ປະກາດຢູ່ ຟິລີບປີນ. ແມ່ນເຮືອນທີ່ມີໂຄງຮ່າງດ້ວຍເຫລັກ ທັງມີລັກສະນະຖາວອນ, ທັງສ້າງຄວາມສະດວກສະບາຍໃນການນຳໃຊ້, ແຕ່ລາຄ່າກໍ່ສ້າງພັດຕຳ່, ບໍ່ພຽງແຕ່ຕອບສະຫນອງຄວາມຕ້ອງການຂອງປະຊາຊົນຜູ້ທີ່ມີເຮືອນຊານຖືກພາຍຸ Haiyan ທຳລາຍເທົ່ານັ້ນ, ຫາກຍັງສະແດງໃຫ້ເຫັນມາດຕະການ ຮັບມືກັບໄພທຳມະຊາດຂອງມະນຸດອີກດ້ວຍ.
ເຮືອນພັບ ຢູ່ ຟິລີບປີນ
|
ຕາມຕົວເລກສະຖິຕິຂອງ ສປຊ ແລ້ວ: ມີຊາວຟິລິບປີນ ກວ່າ 4 ລ້ານຄົນບໍ່ມີ ເຮືອນຊານຍ້ອນຖືກພາຍຸ Haiyan ເຊິ່ງແມ່ນພາຍຸຮ້າຍແຮງກວ່າໝູ່ໃນໂລກ ທຳລາຍໃນປີກາຍນີ້. ອັນໄດ້ກໍ່ກຳລັງດັນໃຫ້ແກ່ງົບປະມານຂອງ ຟິລິບປີນ. ເພື່ອຊ່ວຍປະຊາຊົນກັບຄືນສູ່ຊີວິດປົກກະຕິໂດຍໄວ ພ້ອມທັງຫລຸດຜ່ອນຄວາມຫຍຸ້ງຍາກໃຫ້ແກ່ລັດຖະບານ, ນັກທຸລະກິດ Rogelio Santos Jr ຊື່ງແມ່ນຊາວອາເມລິກາ ເຊື້ອຊາດ ຟິລິບປີນ ໄດ້ອອກແບບເຮືອນທີ່ມີໂຄງຮ່າງດ້ວຍເຫຼັກ. ທ່ານ Rogelio Santos Jr ແບ່ງປັນກ່ຽວກັບຈຸດພິເສດຂອງເຮືອນແບບນີ້ວ່າ:
“ຈຸດພິເສດຂອງເຮືອນພັບ ແມ່ນຕອບສະຫນອງຄວາມຮຽກຮ້ອງຕ້ອງການໃນການຮັບມືກັບໄພພິບັດຢ່າງວອ່ງໄວ. ຍ້ອນມີໂຄງຮ່າງດ້ວຍເຫລັກກ້າຖາວອນ, ມັນໄດ້ສ້າງຄວາມອຸ່ນອ່ຽນໃຈໃຫ້ແກ່ປະຊາຊົນເມື່ອອາໄສຢູ່ໃນເຮືອນຫລັງນີ້.”
ເຮືອນແບບໃຫມ່ນີ້ ລວມມີ ລະບົບໂຄງຮ່າງເຫລັກກ້າ ດ້ວຍບັນດາຝາເຮືອນທີ່ໄດ້ຮັບການອອກແບບກ່ອນ ແລະ ສາມາດພັບເຂົ້າຢ່າງງາຍດ່າຍ. ເມື່ອມີຄວາມຕອ້ງການນຳໃຊ້ເຮືອນແບບນີ້, ປະຊາຊົນພຽງແຕ່ເສຍເວລາ 5 ນາທີ ກໍ່ສາມາດຕິດຕັ້ງສຳເລັດໄດ້. ປະຈຸບັນ, ເຮືອນພັບມີ 2 ແບບ, ແບບຫນຶ່ງມີເນື້ອທີ່ 11 ຕາລາງແມັດ ແລະ ແບບຫນຶ່ງກວ້າງກວ່າ ດ້ວຍເນື້ອທີ 26 ຕາລາງແມັດ. ທັງສອງແບບ ລ້ວນແຕ່ມີເພດານສູງປະມານ 2,5 ແມັດ. ພາຍຫລັງພັບເຂົ້າ ເຮືອນແບບນີ້ມີຄວາມສູງພຽງ 0.5 ແມັດເທົ່ານັ້ນ, ອັນໄດ້ສ້າງຄວາມສະດວກໃຫ້ແກ່ການຍົກຍ້າຍເຮືອນຢູ່. ນອກນັ້ນ, ເຮືອນແບບນີ້ຍັງນຳໃຊ້ຢ່າງງາຍດ່າຍ, ລາຄາກໍ່ສ້າງຕ່ຳ ແລະ ບໍ່ກໍ່ມົນລະພິດເຖິງສິ່ງແວດລ້ອມ. ປະຈຸບັນ ຝາເຮືອນມີ 3 ປະເພດເພື່ອໃຫ້ປະຊາຊົນເລືອກເຟັ້ນ ນັ້ນແມ່ນ: ຝາເຮືອນຜະລິດດ້ວຍໄມ້ໄຜ່, ໄມ້ອັດ ແລະ ພະລາຕິກ. ເຮືອນແບບນີ້ມີຫລາຍປ່ອງຢ້ຽມຮັບປະກັນຄວາມປອດໂປ່ງ. ເຖິງວ່າໄດ້ຮັບການອອກແບບເພື່ອຮັບມືກັບໄພທຳມະຊາດກໍຕາມ, ແຕ່ເຮືອນແບບນີ້ກໍ່ສາມາດກາຍເປັນເຮືອນຖາວອນ ເມື່ອຖອກເບຕົງໃສ່ພື້ນເຮືອນໄດ້. ທ່ານ Royal Pineda, ນັກອອກແບບທີ່ມີຊື່ສຽງໄດ້ຕີລາຄາວ່າ:
“ເຮືອນພັບ ມີຄຸນນະພາບດີທີ່ສຸດໃນໄລຍະຮັບມືກັບໄພທຳມະຊາດ. ນອກນັ້ນ, ເມື່ອໄພທຳມະຊາດຜ່ານໄປແລ້ວ. ຜູ້ນຳໃຊ້ກໍ່ສາມາດຍົກລະດັບຄຸນນະພາບເຮືອນແບບນີ້ຂຶ້ນໄດ້”
ປະຈຸບັນ, ເຮືອນພັບ 15 ຫລັງທຳອິດ ໄດ້ຮັບການຕິດຕັ້ງທົດລອງຢູ່ຕົວເມືອງ Estaccia, ແຂວງ Iloilo ເພື່ອຮັບເອົາຄຳເຫັນປະກອບຂອງປະຊາຊົນ ແນໃສ່ດັດແປງເຮືອນແບບນີ້ ໃຫ້ເໝາະສົມກັບຈຸດປະສົງຕ່າງໆໃນການນຳໃຊ້. ຕາມທ່ານ Rogelio Santos ແລ້ວ, ນີ້ແມ່ນເຮືອນທີ່ເໝາະສົມກັບການຜະລິດເປັນຈຳນວນຫລາຍ ແລະ ປະຈຸບັນໄດ້ມີກວ່າ 5000 ໃບສັ່ງຊື້ເຮືອນແບບນີ້ແລ້ວ. ສິ່ງດັ່ງກ່າວສະແດງໃຫ້ເຫັນຫົວຄິດປະດິດສ້າງທີ່ອຸດົມສົມບູນຂອງມະນຸດໃນການຮັບມືກັບໄພທຳມະຊາດ.