(vovworld)- ຫວຽດນາມ ແລະ ອິນໂດເນເຊຍ ໄດ້ສ້າງຕັ້ງສາຍພົວພັນທາງການທູດເມື່ອເດືອນ 12 ປີ 1955. ນັບແຕ່ນັ້ນມາຮອດປະຈຸບັນ, ສາຍພົວພັນນີ້ ໄດ້ຮັບການພັດທະນາຢ່າງບໍ່ຢຸດຢັ້ງ ແລະ ບັນລຸຜົນງານຕັ້ງຫນ້າຫລາຍຢ່າງ. ປີ 2015, ສອງປະເທດ ຈະຈັດຕັ້ງການເຄື່ອນໄຫວຫລາຍຢ່າງເພື່ອສະເຫລີມສະຫລອງ 60 ປີແຫ່ງວັນສ້າງຕັ້ງສາຍພົວພັນທາງການທູດສອງຝ່າຍ, ເປີດສາກເຫດການນີ້ແມ່ນການເສັງອອກແບບ ໂລໂກ ຫວຽດນາມ - ອິນໂດເນເຊຍ.
ໂລໂກຫວຽດນາມ - ອິນໂດເນເຊຍ ແລະ ຜູ້ອອກແບບ
ພາບ:laodong.com.vn
|
ນັບແຕ່ເດືອນ 8 ປີ 2014, ສະຖານທູດ ອິນໂດເນເຊຍ ປະຈຳ ຮ່າໂນ້ຍ ໄດ້ສົມທົບກັບສະຖານກົງສູນໃຫຍ່ປະເທດນີ້ ຢູ່ນະຄອນໂຮ່ຈິມີນ, ສະຖານທູດຫວຽດນາມ ປະຈຳອິນໂດເນເຊຍ ແລະ ໂຮງຮຽນວິຈິດສິນ ຮ່າໂນ້ຍ ຈັດຕັ້ງການເສັງ ອອກແບບ ໂລໂກ ສະເຫລີມສະຫລອງ 60 ປີແຫ່ງວັນສ້າງສາຍພົວພັນສອງຝ່າຍລະຫວ່າງສອງປະເທດ. ທ່ານ Dedi Cahyadi Irianto, ເລຂາທີຫນຶ່ງສະຖານທູດອິນໂດເນເຊຍ ປະຈຳຫວຽດນາມ, ສະມາຊິກຄະນະຈັດຕັ້ງການເສັງດັ່ງກ່າວໃຫ້ຮູ້ວ່າ:
“ພວກຂ້າພະເຈົ້າຈັດຕັ້ງການເສັງນີ້ ດ້ວຍຈຸດປະສົງເພື່ອຂ່ຳນັບຮັບຕ້ອນບັນດາການເຄື່ອນໄຫວສະເຫລີມສະຫລອງ 60 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງ ອິນໂດເນເຊຍ - ຫວຽດນາມ. ໃນປີ 2015, ພວກຂ້າພະເຈົ້າກຳນົດ ຈະມີການເຄື່ອນໄຫວບາງຢ່າງຕ້ອງນຳໃຊ້ໂລໂກສອງປະເທດ. ສະນັ້ນ, ພວກຂ້າພະເຈົ້າໄດ້ແລກປ່ຽນ, ສ້າງເງື່ອນໄຂເພື່ອໃຫ້ລຸ້ນຫນຸ່ມ ຫວຽດນາມ ແລະ ອິນໂດເນເຊຍ ອອກແບບໂລໂກ ແລະ ສົ່ງເຖິງຄະນະຈັດຕັ້ງການເສັງໃນຄັ້ງນີ້.”
ພາຍຫຼັງ 2 ເດືອນແຫ່ງການປຸກລະດົມການເສັງ, ເຖິງວ່າມາດຖານທັງໝົດກ່ຽວກັບຄວາມໝາຍ, ຄວາມງາມ, ການປະສານສົມທົບຢ່າງກົມກຽວລະຫວ່າງສີສັນວັດທະນະທຳຂອງສອງປະເທດບໍ່ແມ່ນສິ່ງງ່າຍດາຍກໍ່ຕາມ, ແຕ່ຄະນະຈັດຕັ້ງໄດ້ຮັບບົດເສັງກວ່າ 40 ບົດ, ໃນນັ້ນ, ສ່ວນຫລາຍແມ່ນຂອງບັນດານັກອອກແບບຫນຸ່ມຫວຽດນາມ.. ສະຫລຸບການເສັງ, ໂລໂກ ຂອງເພື່ອນຫງວຽນດືກຕວານ, ອາຍຸ 26 ປີ, ເຊື່ງແມ່ນນັກອອກແບບຂອງ ບໍລິສັດ Vietfair ຢູ່ ຮ່າໂນ້ຍ ຍາດໄດ້ລາງວັນຂອງການເສັງ. ໂລໂກຂອງ ອ້າຍຕວານ ແມ່ນຮູບພາບກຳປັ່ນສີແດງມີສັນຍາລັກລວມຂອງ ອາຊຽນ ພວມກ້າວເຂົ້າສູ່ອະນາຄົດ, ມີ 2 ເສົາສະເພົາແມ່ນທຸງຊາດ ຫວຽດນາມ ແລະ ທຸງຊາດ ອິນໂດເນເຊຍ. ບັນດາຮູບພາບນັ້ນ ໄດ້ສ້າງຄວາມປະທັບໃຈຢ່າງເລິກເຊິ່ງໃຫ້ແກ່ຜູ້ຊົມທັງໝົດ ແລະ ບັນດາສະມາຊິກໃນຄະນະຈັດຕັ້ງຄື ທ່ານ Dedi Cahyadi Irianto.
“ມີຫລາຍຄົນເຂົ້າຮ່ວມການເສັງອອກແບບໂລໂກ, ແຕ່ໂລໂກຂອງ ອ້າຍຕວານ ໄດ້ສົ່ງສານມີຄວາມໝາຍທີ່ສຸດສຳລັບພວກຂ້າພະເຈົ້າ ເພາະວ່າ ໂລໂກນີ້ແມ່ນກຳປັ່ນມີ 2 ສະເພົາແມ່ນທຸງຊາດຫວຽດນາມ ແລະ ທຸງຊາດ ອິນໂດເນເຊຍ. ນອກນັ້ນ ໂລໂກ ຍັງມີສັນຍາລັກຂອງ ອາຊຽນ ແລະ ສິ່ງດັ່ງກ່າວສະແດງໃຫ້ເຫັນວ່າ ບໍ່ພຽງແຕ່ມີການຮ່ວມມືສອງຝ່າຍ ລະຫວ່າງ ອິນໂດເນເຊຍ ແລະ ຫວຽດນາມເທົ່ານັ້ນ ຫາກພວກເຮົາຢາກພ້ອມກັນກ້າວໄປເຖິງພາຍພາກຫນ້າ, ມຸ່ງໄປເຖິງຈຸດໝາຍ “ພ້ອມກັນພັດທະນາ”, ພ້ອມກັນກ້າວໄປເຖິງກຳປັ່ນຮ່ວມ ອາຊຽນ”
ແບ່ງປັນກ່ຽວກັບການອອກແບບ ໂລໂກ ຂອງຕົນ, ເພື່ອນ ຫງວຽນດືກຕວານ ໃຫ້ຮູ້ວ່າ: ອ້າຍໄດ້ຍາດເວລາຫລາຍສົມຄວນເພື່ອຊອກຮູ້ກ່ຽວກັບບັນດາຈຸດທີ່ເປັນເອກະລັກສະເພາະຂອງສອງປະເທດ ເພື່ອສາມາດຍົກອອກວິທີເໝາະສົມທີ່ສຸດ. ເຖິງວ່າ ພາຍຫລັງມີແນວຄວາມຄິດແລ້ວກໍຕາມ ຕວານໃຊ້ເວລາກວ່າ 2 ມື້ ເພື່ອສຳເລັດຜະລິດຕະພັນຂອງຕົນ.
“ໂລໂກມີບັນດາປັດໄຈ ແລະ ຄວາມໝາຍທີ່ຈຳເປັນຢ່າງຄົບຖ້ວນ. ທຳອິດນ້ອງຄິດເຖິງບັນດາຈຸດຄ້າຍຄືກັນຂອງສອງປະເທດ. ອິນໂດເນເຊຍ ແມ່ນປະເທດມີເກາະນັບໆໝື່ນແຫ່ງ ແລະ ມີແຄມທະເລຍາວຢຽດ ແລະ ຫວຽດນາມ ກໍເຊັ່ນດຽວກັນ. ຈາກນັ້ນ ນ້ອງຄິດເຖິງຮູບພາບກຳປັ່ນເປັນຕົ້ນ. ກຳປັ່ນນັ້ນ ຈະແມ່ນກຳປັ່ນຂອງ ອາຊຽນ ແຕ່ມີຈຸດສະເພາະນັ້ນແມ່ນທຸງຊາດຂອງສອງປະເທດ ອິນໂດເນເຊຍ ແລະ ຫວຽດນາມ. ຮູບພາບດອກຕະເວັນເບື້ອງຫລັງແມ່ນສະແດງໃຫ້ເຫັນສັນຍາລັກໃຫ້ແກ່ບັນດາປະເທດ ອາຊີຕາເວັນອອກ ແລະ ມີຄວາມໝາຍສັກກະລະບູຊາ.”
ມີຮູບພາບພົ້ນເດັ່ນແລະ ສ້າງຄວາມປະທັບໃຈຫລາຍຢ່າງ, ແຕ່ເຖິງຢ່າງໃດກໍຕາມ, ຜູ້ຊົມພຽງຮູ້ສຶກຄວາມໝາຍເລິກເຊິ່ງຂອງໂລໂກນີ້ ພາຍຫລັງການອະທິບາຍຂອງ ຕວານ ແລະ ຄຳແນະນຳຂອງຄະນະຈັດຕັ້ງ. ໂລໂກຂອງ ຕວານ ຈະຕິດພັນກັບທຸກເຫດການການເມືອງ, ການທູດ, ວັດທະນະທຳ, ການພົວພັນແລກປ່ຽນລະຫວ່າງ ຫວຽດນາມ ແລະ ອິນໂດເນເຊຍ ໃນປີນີ້ ຄືດັ່ງຄຳເວົ້າຂອງທ່ານ Mayerfas, ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ.
“ສຳລັບ ໂລໂກ ນີ້, ພວກຂ້າພະເຈົ້າຖືວ່າ ທຸກການເຄື່ອນໄຫວສະເຫລີມສະຫລອງລະຫວ່າງສອງປະເທດພວກເຮົາ ລ້ອນແຕ່ຕິດກັບໂລໂກດັ່ງກ່າວ. ຄວາມໝາຍຂອງໂລໂກນີ້ນັ້ນແມ່ນ ພວກເຮົາຈະຮ່ວມມືນຳກັນ, ກາຍເປັນຄູ່ຮ່ວມມືຂອງກັນເພື່ອພ້ອມກັນບັນລຸບັນດາຄາດໝາຍຂອງສອງປະເທດພວກເຮົາໃນທຸກຂົງເຂດ ເພື່ອຄວາມວັດທະນາຖາວອນຂອງປະຊາຊົນສອງປະເທດ.”
ທ່ານMayerfas, ເອກອັກຄະລັດຖະທູດ ອິນໂດເນເຊຍ
ປະຈຳຫວຽດນາມ
ພາບ:dangcongsan.vn
|
ດ້ວຍພົນລະເມືອງປະມານ 350 ລ້ານຄົນ, ກວມກວ່າ 50% ຍອດຈຳນວນພົນລະເມືອງ ອາຊຽນ, ຫວຽດນາມ ແລະ ອິນໂດເນເຊຍ ແມ່ນສອງປະເທດບ້ານໃກ້ເຮືອນຄຽງເຕັມໄປດ້ວຍຄວາມສາມາດບົ່ມຊ້ອນໃນພາກພື້ນ. ດ້ວຍສະຖຽນລະພາບດ້ານເສດຖະກິດ, ການເມືອງ, ສັງຄົມນັ້ນ. ອິນໂດເນເຊຍ ແລະ ຫວຽດນາມ ແມ່ນປະເທດພວມພົ້ນເດັ່ນຂຶ້ນຄືສູນການຄ້າ, ການລົງທຶນຂອງທັງພາກພື້ນ ສິ່ງດັ່ງກ່າວຈະສ້າງເງື່ອນໄຂສະດວກໃຫ້ສອງປະເທດຫຍັບມໍ່ໃກ້ກັນກວ່າ, ພິເສດ ເມື່ອປະຊາຄົມ ອາຊຽນ ໄດ້ຮັບການສ້າງຕັ້ງຂຶ້ນໃນທ້າຍປີນີ້. ນັ້ນບໍ່ພຽງແຕ່ແມ່ນຄວາມສາມາດບົ່ມຊ້ອນເທົ່ານັ້ນ ຫາກຍັງແມ່ນຄວາມມຸ່ງມາດປາດຖະຫນາຂອງປະຊາຊົນສອງປະເທດ, ຄືດັ່ງບັນດາສິ່ງສະແດງໃຫ້ເຫັນຢ່າງຈະແຈ້ງຜ່ານຮູບໂລໂກສະເຫລີມສະຫລອງ 60 ປີແຫ່ງວັນສ້າງຕັ້ງການພົວພັນທາງການທູດສອງຝ່າຍລະຫວ່າງ ຫວຽດນາມ ແລະ ອິນໂດເນເຊຍ.