(vovworld)- ການຢ້ຽມຢາມ ສປປ ລາວ ຂອງທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ຕາມຄຳເຊີນຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວ ບຸນຍັງ ວໍລະຈິດ ແຕ່ວັນທີ 24-26/11/2016 ໄດ້ປະສົບຜົນສຳເລັດຢ່າງຈົບງາມ. ການເຄື່ອນໄຫວຕ່າງໆໃນການຢ້ຽມຢາມ, ພິເສດແມ່ນການໂອ້ລົມຂອງທ່ານເລຂາທິການໃຫຍ່ ຫງວຽນຟູຈ້ອງ ຢູ່ ມະຫາວິທະຍາໄລແຫ່ງຊາດລາວ ໄດ້ສ້າງຄວາມປະທັບໃຈອັນເລິກເຊິ່ງໃນດວງໃຈຂອງວົງການໄວຫນຸ່ມລາວ ເວົ້າສະເພາະ ແລະ ປະຊາຊົນລາວ ເວົ້າລວມ.
ທ່ານເລຂາທິການໃຫຍ່ ຫງວຽນຟູຈ້ອງ
|
ທີ່ຫໍປະຊຸມຮູບວົງມົນດ້ວຍເນື້ອທີ່ກວ້າງກວ່າ 500 ຕາແມັດ ຢູ່ມະຫາວິທະຍາໄລແຫ່ງຊາດລາວ, ພະນັກງານຂັ້ນສູງ ສປປ ລາວ ພ້ອມກັບ ພະນັກງານ, ຄູອາຈານ, ນັກສຶກສາລາວກວ່າ 1.800 ຄົນໄດ້ເຂົ້າຮ່ວມການໂອ້ລົມຂອງທ່ານເລຂາທິການໃຫຍ່ ຫງວຽນຟູຈ້ອງ. ນີ້ເປັນຄັ້ງທຳອິດ ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ໂອ້ລົມອັນອົບອຸ່ນກັບຜູ້ຕາງຫນ້າໄວຫນຸ່ມລາວ. ເປີດສາກບົດກ່າວປາໄສ, ທ່ານ ເລຂາທິການໃຫຍ່ ຫງວຽນຟູຈ້ອງ ສະແດງຄວາມຂອບອົກຂອບໃຈຕໍ່ການຕ້ອນຮັບຢ່າງສະຫນິດສະຫນົມຂອງຄະນະອຳນວຍການໂຮງຮຽນ ແລະ ຄູອາຈານ, ນັກສຶກສາທັງໝົດ ກໍຄືບັນດາຜົນງານ, ການປ່ຽນແປງຂອງລາວໃນຊຸມປີມໍ່ໆມານີ້.
ເພື່ອນ ໄດມອນ ວິລະນົນ, ນັກສຶກສາລາວ ພວມຮ່ຳຮຽນຢູ່ ສະຖາບັນການປົກຄອງແຫ່ງຊາດ ທີ່ ສສ ຫວຽດນາມ ໃຫ້ຮູ້ວ່າ: ເຖິງວ່າ ຂ້າພະເຈົ້າໄດ້ຕິດຕາມການໂອ້ລົມ ຂອງທ່ານ ເລຂາທິການໃຫຍ່ ຫງວຽນຟູຈ້ອງ ທີ່ຖ່າຍທອດສົດທາງໂທລະພາບ ພຽງເກືອບ 1 ຊົ່ວໂມງ ກໍຕາມ ແຕ່ກໍມີຄວາມຮູ້ສຶກປະທັບໃຈທີ່ສຸດເມືື່ອໄດ້ຮັບຟັງບັນດາເລື່ອງສັ້ນກ່ຽວກັບອາລົມຈິດສະຫນິດຕິດພັນລະຫວ່າງປະທານໂຮ່ຈິມີນ ແລະ ສະເດັດເຈົ້າ ສຸພາ ນຸວົງ ເມື່ອ “ຢູ່ຮ່ວມກັນໃນ ຕຸບດຽວ, ກິນເຂົ້າກັບຜັກປ່ານຳກັນ, ພ້ອມກັນປູກຜັກ, ປູກມັນດ້າງເພີ່ມພູນຜະລິດຜົນ.”
ສຽງເພື່ອນ ໄດມອນ
ເມື່ອໂອ້ລົມກັບພະນັກງານ, ຄູອາຈານ ແລະ ນັກສຶກສາຢູ່ ມະຫາວິທະຍາໄລແຫ່ງຊາດລາວ, ທ່ານເລຂາທິການໃຫຍ່ ຫງວຽນຟູຈ້ອງສະແດງຄວາມຂອບອົກຂອບໃຈພະນັກງານ, ຄູອາຈານ ແລະ ນັກສຶກສາມະຫາວິທະຍາໄລແຫ່ງຊາດລາວ ໄດ້ມີຄວາມເອົາໃຈໃສ່ກ່ຽວກັບທຸກດ້ານເພື່ອເບິ່ງແຍງ, ບຳລຸງສ້າງນັກສຶກສາຫວຽດນາມ ລຸ້ນຕ່າງໆ ໃນທຸກດ້ານ ແລະ ປາດຖະຫນາວ່າ ການຮ່ວມມືດ້ານການສຶກສາບຳລຸງສ້າງ ແມ່ນຂົງເຂດສຳຄັນຍິ່ງໃນການພົວພັນລະຫວ່າງສອງປະເທດ ທີ່ນັບມື້ນັບມີປະສິດທິຜົນສູງກວ່າ, ຕອບສະຫນອງຄວາມຮຽກຮ້ອງຕ້ອງການ ແລະ ຄວາມມຸ້ງມາດປາດຖະຫນາຂອງສອງພັກ, ສອງລັດ ແລະ ປະຊາຊົນສອງປະເທດ. ເອື້ອຍຄູ ລັນນີ ຊື່ງແມ່ນອາຈານ ສອນພາສາຫວຽດ ຢູ່ ມະຫາວິທະຍາໄລແຫ່ງຊາດລາວ ເວົ້າວ່າ:
ສຽງເພື່ອນ ລັນນີ
ຄວາມປະທັບໃຈຢ່າງເລິກເຊິ່ງໃນການໂອ້ລົມຂອງທ່ານເລຂາທິການໃຫຍ່ ຫງວຽນຟູຈ້ອງ ທີ່ມະຫາວິທະຍາໄລແຫ່ງຊາດລາວ, ທ່ານນາງ ທອງມີ ດວນສັກດາ, ຮອງຫົວຫນ້າຫ້ອງການທີ່ປຶກສາດ້ານ ການສຶກສາ ວັດທະນະທຳ ສະຖານທູດລາວ ປະຈຳ ຫວຽດນາມໃຫ້ຮູ້ວ່າ:
ສຽງທ່ານນາງ
ການໂອ້ລົມຂອງທ່ານເລຂາທິການໃຫຍ່ ຫງວຽນຟູຈ້ອງ ທີ່ມະຫາວິທະຍາໄລແຫ່ງຊາດ ລາວ ໄດ້ສ້າງຄວາມປະທັບໃຈໃຫ້ແກ່ຜູ້ຟັງ, ພິເສດ ແມ່ນລຸ້ນຫນຸ່ມຂອງສອງປະເທດ. ໃນການໂອ້ລົມນັ້ນ, ທ່ານເລຂາທິການໃຫຍ່ ຫງວຽນຟູຈ້ອງ ຊີ້ແຈ້ງວ່າ: ໃນສະພາບການໂລກພວມຜັນແປໄປຢ່າງສັບສົນຄືປະຈຸບັນ, ການພົວພັນສາມັກຄີແບບພິເສດລະຫວ່າງ ຫວຽດນາມ ແລະລາວ ນັບມື້ນັບມີຄວາມສຳຄັນຍິ່ງກວ່າເວລາໃດໝົດສຳລັບສອງປະເທດ; ຂ້າພະເຈົ້າມີຄວາມເຊື່ອໝັ້ນວ່າ ລຸ້ນຫນຸ່ມສອງປະເທດປະຈຸບັນ ແລະ ລຸ້ນຫລັງ ຍາມໃດກໍເຄົາລົບ, ຮັກສາ ແລະ ສືບຕໍ່ເສີມຂະຫຍາຍຊັບສົມບັດອັນລ້ຳຄ່າຂອງສາຍພົວພັນບໍລິສຸດຜຸດຜ່ອງລະຫວ່າງຫວຽດນາມ ແລະລາວ.