(vovworld) - ບັນດາຜົນງານທີ່ບັນລຸໄດ້ໃນປີ 2013 ສະແດງໃຫ້ເຫັນວ່າ ພື້ນຖານເສດຖະກິດ ຫວຽດນາມ ມີສັນຍານຟື້ນຕົວ, ໝັ້ນໝາຍ ຕະຫຼາດ ດຳເນີນທຸລະກິດໃນປີ 2014 ຈະດີກ່ວາ. ໃນສານຕົ້ນປີໃໝ່ຂອງທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ກໍ່ໄດ້ສະແດງຄວາມຕັດສິນໃຈດຳເນີນການປະຕິຮູບຢ່າງແຮງ ແລະ ຈຳເປັນເພື່ອສ້າງທ່າບືນຕົວຂຶ້ນໃຫ້ ວິສາຫະກິດເວົ້າສະເພາະ ແລະ ພື້ນຖານເສດຖະກິດ ຫວຽດນາມ ເວົ້າລວມ. ບັນນາທິການວິທະຍຸກະຈາຍສຽງ ຫວຽດນາມ ຫງວຽນຮັ່ງ ມີບົດຂຽນດ້ວຍຫົວຂໍ້ວ່າ: ປີ 2014 - ວິສາຫະກິດມີຄວາມເຊື່ອມໝັ້ນຕໍ່ຕະຫຼາດຫຼາຍກ່ວາ, ເຊີນທ່ານຕິດຕາມຮັບຟັງ.
ພາບປະກອບ
ໝາກຜົນແຫ່ງການສຳຫຼວດວິສາຫະກິດ 700 ແຫ່ງທີ່ພວມເຄື່ອນໄຫວ ຂອງຫ້ອງການການຄ້າ ແລະ ອຸດສາຫະກຳ ຫວຽດນາມ ໃຫ້ເຫັນວ່າ: ຈຸດພົ້ນເດັ່ນແມ່ນບັນດາວິສາຫະກິດສຳຜັດກັບແຫຼ່ງຂ່າວກ່ຽວກັບຕະຫຼາດ ແລະ ເຕັກໂນໂລຢີໄດ້ດີກ່ວາເກົ່າ. ພິເສດ, ວິສາຫະກິດດີໃຈພໍສົມຄວນກ່ຽວກັບເງື່ອນໄຂຄົມມະນາຄົມ, ພື້ນຖານໂຄງລ່າງ ແລະ ບັນດາການປະຕິຮູບດ້ານການບໍລິຫານຮັບໃຊ້ວິສາຫະກິດຂອງບັນດາອົງການທີ່ມີໜ້າທີ່ຮັບຜິດຊອບ. ກ່ຽວກັບແງ່ຫວັງແຫ່ງການເຄື່ອນໄຫວຂອງບັນດາວິສາຫະກິດໃນປີ 2014, ທ່ານນາງ ດ່ວານທິກວຽນ, ສະຖາບັນພັດທະນາວິສາຫະກິດ, ຫ້ອງການການຄ້າ ແລະ ອຸດສາຫະກຳ ຫວຽດນາມ, ໃຫ້ຮູ້ວ່າ:
“ຈຳນວນວິສາຫະກິດຕົກລົງເປີດກ້ວາງການຜະລິດ ດຳເນີນທຸລະກິດກວມເຖິງ 42,5% ນີ້ແມ່ນສັນຍານເປັນໜ້າຊື່ນຊົມ. ສາຍເຫດຕົ້ນຕໍ່ແມ່ນວິສາຫະກິດຄາດຄະເນວ່າ: ແງ່ຫວັງເສດຖະກິດຈະສະດວກກ່ວາ. ການຄາດຄະເນຂອງບັນດາວິສາຫະກິດກໍ່ເໝາະສົມກັບການຄາດຄະເນຂອງບັນດານັກຊ່ຽວຊານດ້ານເສດຖະກິດກ່ຽວກັບສະພາບເສດຖະກິດໂລກ ແລະ ສະພາບເສດຖະກິດ ຫວຽດນາມ ປີ 2014 ຈະມີສະຖຽນລະພາບກ່ວາ ແລະ ຄ່ອຍໆໄດ້ຮັບການປັບປຸງ.”
ໃນປີ 2013, ຈຳນວນສິນຄ້າຄ້າງສາງຂອງວິສາຫະກິດຫລຸດລົງຫຼາຍພໍສົມຄວນ, ວິສາຫະກິດຫຼາຍແຫ່ງໄດ້ສຳຜັດກັບແຫຼ່ງທຶນເພື່ອຟື້ນຟູການຜະລິດ ດຳເນີນທຸລະກິດ. ບັນດານະໂຍບາຍໜູນຊ່ວຍວິສາຫະກິດແກ້ໄຂຄວາມຫຍຸ້ງຍາກໃນການຜະລິດ ດຳເນີນທຸລະກິດ, ບັນດານະໂຍບາຍ ຫລຸດຜ່ອນ, ແກ່ຍາວເວລາເກັບພາສີ ໄດ້ຮັບການຕີລາຄາວ່າເປັນການກະທົບທີ່ຕັ້ງໜ້າເຖິງປະຊາຄົມວິສາຫະກິດ. ທ່ານນາງ ຫວໍທິລ໋ວຽນ, ຮອງຫົວໜ້າຄະນະປະຕິຮູບ ແລະ ພັດທະນາວິສາຫະກິດ, ສະຖາບັນຄົ້ນຄ້ວາຄຸ້ມຄອງເສດຖະກິດສູນກາງ, ຖືວ່າ:
“ປີ 2013, ລັດຖະບານມານະພະຍາຍາມໃນການຜັນຂະຫຍາຍບັນດາມາດຕະການແກ້ໄຂຄວາມຫຍຸ້ງຍາກໃນການຜະລິດໃຫ້ແກ່ການດຳເນີນທຸລະກິດດ້ວຍຫຼາຍມາດຕະການທີ່ແຕກຕ່າງກັນກ່ຽວກັບຜົນສະທ້ອນຂອງການແກ່ຍາວເວລາເກັບອາກອນລາຍຮັບວິສາດະກິດ. ການຄາດຄະເນທີ່ເຕັມໄປດ້ວຍຄວາມປະເອີບໃຈຂອງວິສາຫະກິດກ່ຽວກັບປີ 2014 ແມ່ນມີຫຼັກຖານ ເມື່ອລັດຖະບານສືບຕໍ່ຊີ້ນຳບັນດາກະຊວງ, ຂະແໜງການ, ທ້ອງຖີ່ນຕ້ອງມີມາດຕະການຕ່າງໆເພື່ອສືບຕໍ່ປັບປຸງສະພາບແວດລ້ອມແຫ່ງການດຳເນີນທຸລະກິດ, ແກ້ໄຂຄວາມຫຍຸ້ງຍາກໃຫ້ວິສາຫະກິດ.”
ພາບປະກອບ
ໃນສະພາບພື້ນຖານເສດຖະກິດ ຫວຽດນາມ ແລະ ໂລກມີຄວາມຫຍຸ້ງຍາກຫຼາຍຢ່າງໃນປີ 2014 ນັ້ນ, ບັນດາວິສາຫະກິດເອງໄດ້ກຳນົດວ່າຕ້ອງມີຍຸດທະສາດດຳເນີນທຸລະກິດ ແລະ ມີລາຍການເຄື່ອນໄຫວລະອຽດເພື່ອສືບຕໍ່ພັດທະນາ. ປັດໄຈສຳຄັນທີ່ສຸດນັ້ນແມ່ນປະຕິບັດການປ່ຽນໃໝ່ບຸກຄະລາກອນ, ສຸມໃສ່ສຳຜັດກຳລັງຄວາມສາມາດສຳຜັດ ແລະ ເປີດກ້ວາງຕະຫຼາດ, ປະຕິບັດວິວັດການສ້າງໂຄງປະກອບວິສາຫະກິດຄືນໃໝ່ຢ່າງແຮງ, ຈາກນັ້ນ, ສ້າງປະຖົມປັດໄຈກ່ຽວກັບການຫລຸດລາຄາຜະລິດຕະພັນ. . . ຄຽງຄູ່ກັນນັ້ນ, ປະຊາຄົມວິສາຫະກິດກໍ່ຫວັງວ່າ ລັດຖະບານນຳໃຊ້ບັນດາມາດຕະການແຂງແຮງກ່ວາໃນການປະຕິຮູບເສດຖະກິດ ເພື່ອສ້າງສະພາບແວດລ້ອມໃຫ້ວິສາຫະກິດພັດທະນາ. ທ່ານ ຮ່ານແມ້ງຕ໋ຽນ, ປະທານສະມາຄົມບັນດານັກບໍລິຫານວິສາຫະກິດ ຫວຽດນາມ, ສະເໜີວ່າ:
“ລັດຖະບານຄວນນຳໃຊ້ບັນດາມາດຕະການສ້າງໂຄງປະກອບຄືນໃໝ່ ເພື່ອໃຫ້ວິສາຫະກິດມີຄວາມເຊື່ອໝັ້ນຕໍ່ສະພາບແວດລ້ອມແຫ່ງການລົງທຶນແລະດຳເນີນທຸລະກິດ. ບັນດາບັນຫາກ່ຽວຂ້ອງເຖິງການຍົກສູງມູນຄ່າຜະລິດຕະພັນກໍຕ້ອງໄດ້ຮັບການນຳໃຊ້ເພື່ອສ້າງກຳລັງໜູນ,ສ້າງຄວາມໄວ້ເນື້ອເຊື່ອໃຈເພື່ອໃຫ້ວິສາຫະກິດສຶບຕໍ່ພັດທະນາແລະຜ່ານຜ່າຄວາມຫຍຸ້ງຍາກ.”
ໃນຊຸມວັນຕົ້ນປີ 2014, ສານຂອງທ່ານນາຍົກລັດຖະມົນຕີຫງວຽນເຕີນຢູ້ງຢັ້ງ ຄວາມຕັດສິນໃຈຂອງລັດຖະບານ ໃນການປະຕິບັດບັນດາການປະຕິຮູບຢ່າງແຮງ ແລະ ຈຳເປັນຢູ່ຫວຽດນາມ. ນັ້ນແມ່ນປະຕິຮູບກ່ຽວກັບລະບົບລະບຽບກົດໝາຍ, ສະພາບແວດລ້ອມແຫ່ງການລົງທຶນ, ປະຕິຮູບບັນດາລັດວິສາຫະກິດ,ຊຸກຍູ້ການພັດທະນາຂອງບັນດາວິສາຫະກິດໃນພາກສ່ວນເສດຖະກິດຕ່າງໆ ແລະສູມໃສ່ເຂົ້າໃນການສ້າງໂຄງປະກອບກະສິກຳຄືນໃໝ່. ຄວາມຕັດສິນໃຈຂອງລັດຖະບານຍິ່ງເຮັດໃຫ້ປະຊາຄົມວິສາຫະກິດມີຄວາມໄວ້ເນື້ອເຊື່ອໃຈຕື່ມອີກເພື່ອສືບຕໍ່ພັດທະນາໃນປີ 2014 ນີ້.