ການໂອ້ລົມສົນທະນາລະຫວ່າງ ທ່ານນາຍົກລັດຖະມົນຕີ ສປປ ລາວ ແລະ ບັນດານັກທຸລະກິດ ຫວຽດນາມທີ່ພວມລົງທຶນຢູ່ລາວ

Dieu Hong -

ວັນພະຫັດ ທີ 27 ຕຸລາ ຄ.ສ. 2016 | 13:50:25

(vovworld) - ໃນອາທິດ, ລະບົບພາສາຕ່າງປະເທດແຫ່ງຊາດ, ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວ, ໂທລະສັບ 193 ສະບັບຈາກຫຼາຍປະເທດຝາກມາ. ໃນນັ້ນ, ພາກພາສາລາວ ໄດ້ຮັບອີແມວ, ໂທລະສັບ 4 ສະບັບຈາກທ່ານຜູ້ຟັງລາວ ແລະ ຫວຽດນາມ. ທ່ານຜູ້ຟັງໄດ້ສະແດງຄວາມເອົາໃຈໃສ່ເຖິງການພົວພັນຮ່ວມມື, ການເຄື່ອນໄຫວວັດທະນະທຳ, ເສດຖະກິດ, ການເມືອງລະຫວ່າງສອງປະເທດ ຫວຽດນາມ - ລາວ. ພິເສດ, ຜູ້ຟັງໄດ້ສົນໃຈຫຼາຍເຖິງການໂອ້ລົມສົນທະນາລະຫວ່າງ ທ່ານນາຍົກລັດຖະມົນຕີ ສປປ ລາວ ແລະ ບັນດານັກທຸລະກິດ ຫວຽດນາມທີ່ພວມລົງທຶນຢູ່ລາວ. ໃນລາຍການ “ໂອ້ລົມກັບເພື່ອນລາວ” ມື້ນີ້, ເຊີນທ່ານຜູ້ຟັງ, ຜູ້ອ່ານຮັບຟັງການຕອບຄຳຖາມກ່ຽວກັບບັນຫາດັ່ງກ່າວ.

ໃນອີແມວສົ່ງເຖິງລາຍການ, ເພື່ອນ ບົວທອງ ວັນລະສິນ, ຢູ່ແຂວງ ວຽງຈັນ ໄດ້ຂຽນວ່າ: “ການໂອ້ລົມສົນທະນາລະຫວ່າງທ່ານນາຍົກລັດຖະມົນຕີລາວ ທອງລຸນ ສີສຸລິດ ແລະ ບັນດາວິສາຫະກິດ ຫວຽດນາມ ທີ່ພວມລົງທຶນ, ດຳເນີນທຸລະກິດຢູ່ ສປປ ລາວ ແມ່ນສັນຍານທີ່ເປັນໜ້າຊື່ນຊົມໃຫ້ແແກ່ວິສາຫະກິດ ຫວຽດນາມ ທີ່ພວມດຳເນີນທຸລະກິດຢູ່ ລາວ ເວົ້າສະເພາະ ແລະ ວິສາຫະກິດ ຫວຽດນາມ ເວົ້າລວມ. ຜ່ານການໂອ້ລົມສົນທະນານີ້, ທ່ານນາຍົກລັດຖະມົນຕີລາວ ໄດ້ແກ້ໄຂໂດຍກົງບັນດາສິ່ງທີ່ຍັງຄົງຄ້າງ ເຊິ່ງວິສາຫະກິດພວມປະເຊີນໜ້າ ແລະ ພ້ອມກັນແກ້ໄຂບັນດາບັນຫານັ້ນ. ໂດຍແມ່ນນັກທຸລະກິດຜູ້ໜຶ່ງ, ຂ້າພະເຈົ້າຫວັງວ່າ ຈະມີການໂອ້ລົມສົນທະນາລະຫວ່າງການນຳພັກ, ລັດ ແລະ ວິສາຫະກິດຫຼາຍກ່ວາອີກ ເພື່ອໃຫ້ການພົວພັນຮ່ວມມືທາງດ້ານເສດຖະກິດລະຫວ່າງ 2 ປະເທດນັບມື້ນັບມີປະສິດທິຜົນກວ່າອີກ.”

ການໂອ້ລົມສົນທະນາລະຫວ່າງ ທ່ານນາຍົກລັດຖະມົນຕີ ສປປ ລາວ ແລະ ບັນດານັກທຸລະກິດ ຫວຽດນາມທີ່ພວມລົງທຶນຢູ່ລາວ - ảnh 1

ທ່ານນາຍົກລັດຖະມົນຕີລາວ ທອງລຸນ ສີສຸລິດ ທີ່ການໂອ້ລົມສົນທະນາ

ສ່ວນໃນອີແມວຂອງຕົນ, ເພື່ອນ ເຈີ່ນຮ່ວາງຫາຍ, ນັກສຶກສາພະແນກເສດຖະກິດ, ມະຫາວິທະຍາໄລແຫ່ງຊາດ ລາວ ໄດ້ຂຽນວ່າ: “ຂ້າພະເຈົ້າໄດ້ຮູ້ວ່າ, ໃນທ້າຍອາທິດຜ່ານມາ, ທ່ານນາຍົກລັດຖະມົນຕີລາວ ທອງລຸນ ສີສຸລິດ ໄດ້ມີການພົບປະ ແລະ ໂອ້ລົມສົນທະນາກັບບັນດາວິສາຫະກິດ ຫວຽດນາມ ທີ່ພວມລົງທຶນ, ດຳເນີນທຸລະກິດຢູ່ ລາວ, ແຕ່ຍ້ອນຄ້າງຄາກັບການເສັງ, ດັ່ງນັ້ນຂ້າພະເຈົ້າບໍ່ສາມາດຮັບຟັງຂ່າວລະອຽດໄດ້. ຜ່ານລາຍການ “ໂອ້ລົມກັບເພື່ອນລາວ” ຂ້າພະເຈົ້າຢາກໄດ້ຮັບຟັງເນື້ອໃນຕົ້ນຕໍໃນການໂອ້ລົມສົນທະນາສຳຄັນນີ້ໄດ້ບໍ່?”

ເຈົ້າ, ເພື່ອນ ເຈີ່ນຮ່ວາງຫາຍ ທີ່ຮັກແພງ, ຕອນຄ່ຳວັນທີ 21/10, ຢູ່ນະຄອນຫຼວງ ວຽງຈັນ, ທ່ານນາຍົກລັດຖະມົນຕີລາວ ທອງລຸນ ສີສຸລິດ ໄດ້ມີການພົບປະ, ໂອ້ລົມສົນທະນາກັບບັນດາວິສາຫະກິດ ຫວຽດນາມ ທີ່ພວມລົງທຶນ, ດຳເນີນທຸລະກິດຢູ່ ສປປ ລາວ ເພື່ອແນໃສ່ແກ້ໄຂບັນດາສິ່ງຍັງຄົງຄ້າງ, ຂໍ້ຕິດຂັດເພື່ອຊຸກຍູ້ການຮ່ວມມືຂອງບັນດາວິສາຫະກິດ ຫວຽດນາມ ລົງທຶນຢູ່ລາວ. ນີ້ເປັນຄັ້ງທຳອິດທີ່ທ່ານນາຍົກລັດຖະມົນຕີລາວ ທອງລຸນ ສີສຸລິດ ຈັດຕັ້ງການໂອ້ລົມສົນທະນາກັບບັນດາວິສາຫະກິດ ຫວຽດນາມ ທີ່ພວມລົງທຶນ, ດຳເນີນທຸລະກິດຢູ່ ສປປ ລາວ. ທີ່ການໂອ້ລົມສົນທະນາ, ວິສາຫະກິດ ຫວຽດນາມ ໄດ້ຊີ້ແຈ້ງບັນດາຄວາມຫຍຸ້ງຍາກ, ສິ່ງຄົງຄ້າງໃນວິວັດການລົງທຶນ ແລະ ດຳເນີນທຸລະກິດຢູ່ລາວ, ສຸມໃສ່ເຂົ້າ 6 ຫົວຂໍ້ລວມມີ: ລະບຽບການສະໜອງໃບອະນຸຍາດຄຸ້ມຄອງການລົງທຶນ ແລະ ການສະໜອງໃບອະນຸຍາດລົງທຶນ, ນະໂຍບາຍທີ່ດິນ ແລະ ບຸກເບີກໜ້າພຽງ, ການສົ່ງອອກນຳເຂົ້າສິນຄ້າ ການບໍລິການນຳເຂົ້າ, ສົ່ງອອກຊົ່ວຄາວ, ພາສີ, ຄ່າທຳນຽມທີ່ກ່ຽວຂ້ອງ ແລະ ບັນຫາສົ່ງຄືນພາສີ, ແຫຼ່ງຊັບພະຍາກອນມະນຸດ ແລະ ບັນຫາວີຊາໃຫ້ຄົນງານ, ສະພາບແວດລ້ອມແຫ່ງການລົງທຶນ. ເມື່ອເວົ້າເຖິງເລື່ອງສະໜອງທີ່ດິນປູກຕົ້ນໄມ້ອຸດສາຫະກຳຕື່ມອີກ, ທ່ານນາຍົກລັດຖະມົນຕີ ທອງລຸນ ສີສຸລິດ ໃຫ້ຮູ້ວ່າ: ລາວ ໄດ້ຢຸດຕິການສະໜອງທີ່ດິນປູກຕົ້ນຢາງພາລາ, ຍ້ອນລາຄາຕ່ຳ, ແຮງງານລາວ ກໍ່ບໍ່ພໍ ແລະ ໃນຕົວຈິງກອງທຶນທີ່ດິນຂອງລາວກໍ່ບໍ່ມີອີກ. ກ່ຽວກັບບັນຫາສະໜອງໃບອະນຸຍາດສຳຫຼວດ ແລະ ຂຸດຄົ້ນບໍ່ແຮ່, ທ່ານນາຍົກລັດຖະມົນຕີ ລາວ ໃຫ້ຮູ້ວ່າ ລັດຖະບານບໍ່ອະນຸຍາດຂຸດຄົ້ນບໍ່ແຮ່ແຫ່ງໃໝ່ຕື່ມອີກ, ຍ້ອນວ່າມັນກ່ຽວຂ້ອງເຖິງສິ່ງແວດລ້ອມ, ຄວາມປອດໄພ, ຊີວິດການເປັນຢູ່ຂອງປະຊາຊົນ… ກ່ຽວກັບຂົງເຂດສ້າງຄວາມສະດວກໃນການລົງທຶນ, ທ່ານນາຍົກລັດຖະມົນຕີລາວ ຢັ້ງຢືນວ່າ: ລັດຖະບານລາວ ຈະສືບຕ່ໍສ້າງເງື່ອນໄຂດີທີ່ສຸດໃຫ້ບັນດານັກລົງທຶນຕ່າງປະເທດເວົ້າລວມ, ກໍ່ຄືບັນດານັກລົງທຶນ ຫວຽດນາມ ຢູ່ລາວເວົ້າສະເພາະ, ພ້ອມທັງຈະຊີ້ນຳບັນດາກະຊວງ, ຄະນະ, ຂະແໜງການສົມທົບກັບບັນດາວິສາຫະກິດ ຫວຽດນາມ ພິຈາລະນາ ແກ້ໄຂຄວາມຫຍຸ້ງຍາກ, ຂໍ້ຄົງຄ້າງໃນແຕ່ລະຂົງເຂດ, ແຕ່ລະກໍລະນີລະອຽດ.

ຕາມຕົວເລກຂອງສະຫະສະມາຄົມບັນດານັກລົງທຶນ ຫວຽດນາມ ຢູ່ລາວ, ແຫຼ່ງເງິນລົງທຶນ FDI ຂອງ ຫວຽດນາມ ເຂົ້າລາວ ເພີ່ມຂຶ້ນຢ່າງຕໍ່ເນື່ອງໃນໄລຍະ 2011 – 2015 ນັບທັງດ້ານຈຳນວນໂຄງການ ແລະ ຍອດທຶນຈົດທະບຽນ. ຮອດເດືອນ 9/2016, ຫວຽດນາມ ມີ 266 ໂຄງການໄດ້ຮັບໃບອະນຸຍາດລົງທຶນຢູ່ລາວຈາກກະຊວງແຜນການ ແລະ ການລົງທຶນ ດ້ວຍຍອດທຶນຈົດທະບຽນແມ່ນ 5,1 ຕື້ USD ຫຼາຍທົບ 1,3 ເທົ່າກ່ຽວກັບຈຳນວນໂຄງການ ແລະ ທົບ 1,26 ເທົ່າກ່ຽວກັບຍອດເງິນລົງທຶນເມື່ອທຽບໃສ່ປີ 2011, ຢືນອັນດັບທີ 3 ໃນຈຳນວນປະເທດລົງທຶນເຂົ້າລາວ ແລະ ລາວ ຢືນອັນດັບທີ 1 ໃນຈຳນວນ 64 ປະເທດ ແລະ ເຂດແຄ້ວນມີການເຄື່ອນໄຫວລົງທຶນຂອງບັນດາວິສາຫະກິດ ຫວຽດນາມ, ບັນດາວິສາຫະກິດ ຫວຽດນາມໄດ້ເຄື່ອນໄຫວລົງທຶນຢູ່ 16/18 ແຂວງ, ນະຄອນຂອງລາວ.

ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການ ໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດ ມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການຂອງພວກເຮົາໄດ້ເລີຍ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ,ຮ່າໂນ້ຍ. ຫຼື ໂທລະສັບມາໂດຍກົງກໍ່ໄດ້ ຕາມເບີໂທ 0084.438.256.631 ຫຼື ອີແມວlaovov5@gmail.com. ທ່ານຜູ້ຟັງກໍ່ສາມາດ Comment ໃນເວັບໄຊ vovworld.vn ຂອງພວກເຮົາ.