(vovworld) - ດ້ວຍປູຊະນີຍະສະຖານເກືອບ 30 ແຫ່ງ ແລະ ໝູ່ບ້ານອາຊີບທີ່ລືຊື່ຫລາຍແຫ່ງ, ແຕ່ດົນນານມາແລ້ວ, ຫນອງໂຮ່ໄຕ ຢູ່ ນະຄອນ ຮ່າໂນ້ຍ ໄດ້ກາຍເປັນຈຸດນັດພົບທີ່ຂາດບໍ່ໄດ້ຂອງນັກທ່ອງທ່ຽວຢູ່ພາຍໃນ ແລະ ຕ່າງປະເທດເມື່ອມາຢ້ຽມຢາມ ຮ່າໂນ້ຍ. ເພື່ອຕອບສະຫນອງຄວາມຕ້ອງການໄປຢ້ຽມຊົມຫນອງໂຮ່ໄຕ, ບໍລິສັດທ່ອງທ່ຽວ TLC ໂຮ່ໄຕ ຫາກໍ່ນຳລາຍການທ່ອງທ່ຽວດ້ວຍລົດໄຟຟ້າແລ່ນອ້ອມຫນອງໂຮ່ໄຕ, ນີ້ໄດ້ຮັບຖືວ່າແມ່ນຮູບການບໍລິການໃຫມ່ເພື່ອດຶງດູດນັກທ່ອງທ່ຽວຄົ້ນຫາບັນດາທັດສະນີຍະພາບ, ທິວທັດທຳມະຊາດຢູ່ອ້ອມຫນອງໂຮ່ໄຕ. ໃນລາຍການທ່ອງທ່ຽວຫວຽດນາມພາກນີ້ ເຊີນທ່ານຮັບຟັງບົດສາລະຄະດີແນະນຳລາຍການທ່ອງທ່ຽວຄົ້ນຫາ ຫນອງໂຮ່ໄຕ.
ລົດໄຟຟ້າແລ່ນອ້ອມຫນອງ ໂຮ່ໄຕ
ພາບ: internet
|
ໂດຍໄດ້ນຳເຂົ້າເຄື່ອນໄຫວຢ່າງເປັນທາງການເມື່ອເດືອນ 3/2012, ລາຍການທ່ອງທ່ຽວວັດທະນະທຳ, ປະຫວັດສາດ ໂຮ່ໄຕ ດ້ວຍລົດໄຟຟ້າແລ່ນຜ່ານເສັ້ນທາງແຄມ ຫນອງໂຮ່ໄຕ ທີ່ມີຄວາມຍາວເກືອບ 18 ກິໂລແມດ, ນັກທ່ອງທ່ຽວຈະໄດ້ເຂົ້າຮ່ວມບັນດາລາຍການບໍລິການຄື: ຊົມທິວທັດທຳມະຊາດຢູ່ ຫນອງໂຮ່ໄຕ, ຄົ້ນຫາ ຫນອງໂຮ່ໄຕ, ສີສັນຄວາມງາມຂອງທັດຊະນີຍະພາບຫນອງໂຮ່ໄຕ. ແຕ່ລະລາຍການຈະນຳນັກທ່ອງທ່ຽວຢ້ຽມຊົມທິວທັດທຳມະຊາດຢູ່ ຫນອງໂຮ່ໄຕ, ບັນດາເຂດປູຊະນີຍະສະຖານທີ່ລືຊື່ຄື: ຫໍໂຮ່ໄຕ, ວັດ ຕ໋າວແຊກ, ວັດເຈີນກວັກ, ວິຫານ ກວານແທ໋ນ... ແລະ ໄປຜ່ານປູຊະນີຍະສະຖານອື່ນເກືອບ 20 ແຫ່ງ, ນອກນັ້ນໄດ້ຮັບປະທານອາຫານພິເສດຫຼາຍເຍື່ອງຂອງໂຮ່ໄຕຄື: ເຂົ້າປຸ້ນຫອຍ, ເຂົ້າຫນົມກຸ້ງ. ອີງຕາມແຕ່ລະລາຍການ, ເວລາເຂົ້າຮ່ວມລາຍການຈະແກ່ຍາວແຕ່ 1 - 2 ຊົ່ວໂມງ ໂດຍມີບ່ອນຮັບນັກທ່ອງທ່ຽວ ແລະ ຂາຍປີ້ 10 ບ່ອນ, ລາຄາປີ້ຈາກ 50.000 - 80.000 ດົ່ງ (VND)/ຄົນ, ລາຍການທ່ອງທ່ຽວຈະເລີ່ມຕົ້ນແຕ່ 8 ໂມງ 30 ນາທີ່ໃນຕອນເຊົ້າຂອງທຸກວັນ
ຈາກສວນສະໜຸກ ໂຮໄຕ, ລົດໄຟຟ້າຈະຂົນສົ່ງນັກທ່ອງທ່ຽວໄປຕາມເສັ້ນທາງແຄມ ຫນອງໂຮ່ໄຕ. ບຶງດອກບົວຄອ່ຍໆປະກົດຂື້ນໃນສາຍຕາຂອງນັກທ່ອງທ່ຽວ. ດ້ວຍກິ່ນດອກບົວທີ່ຫອມຫວນພ້ອມກັບອາກາດທີ່ປອດໂປ່ງ ແລະ ເຢັນສະບາຍຢູ່ໜອງ ໂຮ່ໄຕ ໄດ້ເຮັດໃຫ້ນັກທ່ອງທ່ຽວຮູ້ສຶກສະບາຍໃຈ. ນະທີ່ນີ້, ນັກທ່ອງທ່ຽວບໍ່ພຽງແຕ່ໄດ້ຊອກຮູ້ກ່ຽວກັບສິລະປະການເອືອບຊາດອກບົວເທົ່ານັ້ນ ຫາກຍັງໄດ້ຮັບປະທານອາຫານທີ່ເປັນເອກະລັກສະເພາະຂອງເຂດ ຮ່າແທ່ນ ຫມາຍເຖິງຮ່າໂນ້ຍ ແລະ ເຂດທົ່ງພຽງພາກເຫນືອ ຫວຽດນາມ ໃນຮ້ານອາຫານທີ່ມີຊື່ວ່າ ດອກບົວຢູ່ແຄມ ຫນອງໂຮ່ໄຕ ອີກດ້ວຍ. ເອື້ອຍ ຫງວຽນທິຮ່ວຽນ ຜູ້ທີ່ໄດ້ກຳເນີດ ແລະ ເຕີບໃຫຍ່ຢູ່ ນະຄອນຫລວງ ຮ່າໂນ້ຍມາເປັນເວລາເກືອບ 30 ປີ ແລ້ວ ໃຫ້ຮູ້ວ່າ: ເຖິງວ່າຂ້າພະເຈົ້າດຳລົງຊີວິດຢູ່ຮ່າໂນ້ຍມາແຕ່ດົນນານແລ້ວ ແຕ່ມື້ນີ້ໄດ້ເຂົ້າຮ່ວມລາຍການຄົ້ນຫາ ຫນອງໂຮ່ໄຕ, ຂ້າພະເຈົ້າເອງຍັງພົບເຫັນຫຼາຍສິ່ງຫຼາຍຢ່າງທີ່ໃຫມ່ອ່ຽມດ້ວຍຄວາມຮູ້ສຶກທີ່ແຕກຕ່າງກັນ.
“ຂ້າພະເຈົ້າດີໃຈຫລາຍເມື່ອໄດ້ເຂົ້າຮ່ວມລາຍການທ່ອງທ່ຽວອ້ອມ ຫນອງໂຮ່ໄຕ ດ້ວຍລົດໄຟຟ້າ. ຕາມຂ້າພະເຈົ້າແລ້ວ ນີ້ແມ່ນໂອກາດທີ່ດີເພື່ອໃຫ້ນະຄອນຫລວງຮ່າໂນ້ຍ ແລະ ປະເທດຫວຽດນາມ ແນະນຳບັນດາຈຸດວັດທະນະທຳທີ່ເປັນເອກະລັກສະເພາະຂອງຕົນໃຫ້ນັກທ່ອງທ່ຽວພາຍໃນ ແລະ ຕ່າງປະເທດ ກໍຄືຂະຫຍາຍຮູບການທ່ອງທ່ຽວນີ້. ແລະ ນີ້ກໍແມ່ນກາລະໂອກາດເພື່ອໃຫ້ຊາວ ຫວຽດ ນາມ ຊອກຮູ້ກ່ຽວກັບມູນເຊື້ອ, ວັດທະນະທຳ, ປະຫວັດສາດຂອງຊາດຕົນ ແລະ ເຂົ້າໃຈຕື່ມກ່ຽວກັບປະເທດຫວຽດນາມ.”
ຫນອງດອກບົວ ຢູ່ ຫນອງ ໂຮ່ໄຕ
ພາບ: internet
|
ທ່ານນາງ ເຢືອງທິແອນຕວຽດ, ຮອງຜູ້ອຳນວຍການໃຫຍ່ບໍລິສັດ TLC ໂຮ່ໄຕ ໃຫ້ຮູ້ວ່າ: ທາງບໍລິສັດໄດ້ສ້າງສະຖານທີ່ຮັບນັກທ່ອງທ່ຽວ 31 ບ່ອນ ຕາມເສັ້ນທາງທີ່ມີຄວາມຍາວກວ່າ 18,6 ກິໂລແມດຢູ່ແຄມຫນອງໂຮ່ໄຕ ພ້ອມກັບບ່ອນຂາຍປີ້ 10 ແຫ່ງ ເຊິ່ງໄດ້ຮັບການອອກແບບທັນສະໄຫມ ດ້ວຍການປະກອບອຸປະກອນທີ່ຄົບຊຸດ ນີ້ກໍແມ່ນສະຖານທີ່ຫນູນຊ່ວຍ, ສະຫນອງຂໍ້ມູນຂ່າວສານທີ່ກ່ຽວຂ້ອງເຖິງການທ່ອງທ່ຽວໂດຍບໍ່ເສຍຄ່າໃຫ້ແກ່ນັກທ່ອງທ່ຽວ.
“ຍາມໃດຂ້າພະເຈົ້າກໍຢາກໄປທ່ຽວຊົມ ຫນອງໂຮ່ໄຕ ເພາະວ່າຢູ່ທີ່ນີ້ມີອາກາດປອດໂປ່ງ, ພິເສດແມ່ນມີກິ່ນຫອມຫວນຂອງດອກບົວ, ເຊິ່ງຢູ່ບ່ອນອື່ນພັດບໍ່ມີ. ພວກເຮົາອາດຈະໄປທ່ຽວຊົມໃນຕອນເຊົ້າ, ຕອນບ່າຍ ຫລືຕອນຄ່ຳ ກໍ່ໄດ້. ຍາມໃດ ຫນອງໂຮ່ໄຕ ກໍສວຍງາມ ພິເສດໃນຕອນຄ່ຳ ເສັ້ນທາງ ຫນອງໂຮ່ໄຕ ງາມທີ່ສຸດ.”
ພາບປະກອບ: internet |
ທ່ານ ຫງວຽນຢູຍອວ໋ນ ຜູ້ອຳນວຍການບໍລິສັດ TLC ໂຮ່ໄຕ ໃຫ້ຮູ້ວ່າ: ເພື່ອຕອບສະຫນອງຄວາມຕ້ອງການທີ່ນັບມື້ນັບສູງກ່ຽວກັບເທັກໂນໂລຊີຮັບປະກັນ ຄວາມສະອາດ, ບໍລິສັດຂ້າພະເຈົ້າໄດ້ຜັນຂະຫຍາຍຮູບການທ່ອງທ່ຽວຂຽວ - ທ່ອງທ່ຽວວັດທະນະທຳປະຫວັດສາດໂຮ່ໄຕ ດ້ວຍລົດໄຟຟ້າ ຊຶ່ງແມ່ນພາຫະນະທີ່ບໍ່ສົ່ງຜົນສະທ້ອນເຖິງສິ່ງແວດລ້ອມເຊິ່ງພວມນຳໃຊ້ຢ່າງຫລວງຫລາຍຢູ່ໃນໂລກ ແລະ ໄດ້ຮັບຖືວ່າແມ່ນພາຫະນະທີ່ຂາດບໍ່ໄດ້ຢູ່ບັນດາປະເທດມີພື້ນຖານເສດຖະກິດພັດທະນາ ແລະ ທັນສະໄຫມ.
“ໃນວິວັດການຊອກຮູ້, ຄົ້ນຄ້ວາໂຄງການນີ້, ພວກຂ້າພະເຈົ້າໄດ້ຊອກຮູ້ບັນດາຈຸດວັດທະນະທຳສະເພາະຂອງໂຮ່ໄຕ, ພິເສດ ແມ່ນຊອກຮູ້ກ່ຽວກັບບັນດາໝູ່ບ້ານອາຊີບ, ອາຫານຂອງໂຮ່ໄຕແຕ່ໄລຍະກ່ອນມາຮອດປະຈຸບັນ. ຫນຶ່ງໃນບັນດາຈຸດວັດທະນະທຳຂອງໂຮ່ໄຕ ຊຶ່ງຫລາຍຄົນບໍ່ທັນຮູ້ເຖິງ ນັ້ນແມ່ນວິທິເອືອບຊາດອກບົວໂຮ່ໄຕ ແລະ ຜະລິດເຫລົ້າດອກບົວ.”
ໃນຕະຫລອດລາຍການທ່ອງທ່ຽວ, ນັກທ່ອງທ່ຽວໄດ້ຮັບຊົມ ຊອກຫາວັດວາອາຮາມທີ່ລືຊື່ຢູ່ອ້ອມຂ້າງຫນອງໂຮ່ໄຕ 21 ແຫ່ງ. ຢູ່ເສັ້ນທາງ ແທນນຽນ (ແປ່ວ່າ ຊາວຫນຸ່ມ), ແມ່ນເສັ້ນທາງລະຫວ່າງຫນອງໂຮ່ໄຕ ແລະ ໜອງຈຸກແບກ, ນັກທ່ອງທ່ຽວສາມາດໄປຢ້ຽມຊົມວິຫານ ເກົ໋າຍີ, ວັດເຈີນກວັກ, ຕໍ່ມາແມ່ນສາລາ ອຽນຟູ໋, ວັດກີມລຽນ, ວິຫານກີມງືວ, ......
ພາຍຫລັງການເດີນທາງໃນເວລາ ກວ່າ 1 ຊົ່ວໂມງ ນັກທ່ອງທ່ຽວຈະໄດ້ເຈືອຈານເຂົ້າກັບບັນຍາກາດທີ່ປອດໂປ່ງເຢັນສະບາຍຢູ່ຫນອງໂຮ່ໄຕ ເພື່ອພັກຜ່ອນຢ່ອນອາລົມພາຍຫລັງເຮັດວຽກຢ່າງອິດເມື່ອຍໃນຫລາຍມື້ ໃນທ່າມກາງບັນຍາກາດອຶກກະທຶກຢູ່ນະຄອນຫລວງ ຮ່າໂນ້ຍ.