(vovworld) - ຮ່າໂນ້ຍແມ່ນຫນຶ່ງໃນບັນດາຈຸດນັດພົບອັນດູດດື່ມຂອງແຂກທ່ອງທ່ຽວສາກົນ. ສຳລັບເຂົາເຈົ້າແລ້ວ ໂຮງແຮມບໍ່ພຽງແຕ່ແມ່ນບ່ອນພັກຜ່ອນເທົ່ານັ້ນ ຫາກຍັງແມ່ນບ່ອນສະແດງໃຫ້ເຫັນສີສັນວັດທະນະທຳຂອງທ້ອງຖິ່ນອີກດ້ວຍ. ສະນັ້ນ ບັນດາບໍລິສັດດຳເນີນທຸລະກິດໂຮງແຮມ ຍາມໃດກໍຢາກຍົກສູງຄຸນນະພາບເພື່ອຕອບສະຫນອງຄວາມຕ້ອງການຂອງແຂກທ່ອງທ່ຽວ ເພື່ອໃຫ້ເຂົາເຈົ້າມີໄລຍະເວລາພັກຜ່ອນຢ່ອນອາລົມຄືດັ່ງຄວາມຫວັງ ຢູ່ ນະຄອນຫລວງນັບພັນປີນີ້.
ຮ່າໂນ້ຍ ແມ່ນຫນຶ່ງໃນບັນດານະຄອນໃຫຍ່ຂອງຫວຽດນາມ ມີລະບົບໂຮງແຮມຫລາຍພໍສົມຄວນ ແລະ ອັດຕາຈຳນວນຫ້ອງພັກເຊົາ ສາມາດຕອບສະຫນອງໄດ້ຄວາມຕ້ອງການຂອງນັກທ່ອງທ່ຽວຢ່າງພຽງພໍ. ປະຈຸບັນ ນະຄອນຫລວງ ຮ່າໂນ້ຍມີສະຖານທີ່ພັກເຊົາ 1.750 ແຫ່ງ ດ້ວຍຈຳນວນຫ້ອງພັກເກືອບ 55.500 ຫ້ອງ,ໃນນັ້ນ ປະມານ 240 ໂຮງແຮມຖືກຈັດອັນດັບແຕ່ 1 ດາວເຖິງ 5 ດາວ. ທ່ານນາງ ເລມາຍແຄງ, ຮອງຫົວຫນ້າກົມໂຮງແຮມ- ສັງກັດກົມໃຫຍ່ການທ່ອງທ່ຽວ ຫວຽດນາມ ໃຫ້ຮູ້ວ່າ:
“ມາຮອດປະຈຸບັນ, ຢູ່ບໍລິເວນນະຄອນຫລວງ ຮ່າໂນ້ຍ ມີສະຖານທີ່ພັກເຊົາ 47 ແຫ່ງຖືກຈັດອັນດັບແຕ່ 3 ດາວຂຶ້ນໄປ. ບັນດາໂຮງແຮມນີ້ ນັກທ່ອງທ່ຽວສາກົນກວມສ່ວນຫລາຍ ແລະ ຈຳນວນໂຮງແຮມເຫລົ່ານີ້ສາມາດຮັບໃຊ້ນັກທ່ອງທ່ຽວເປັນຢ່າງດີ. ຄຽງຄູ່ກັບການຮັບໃຊ້ນັກທ່ອງທ່ຽວແລ້ວ ບັນດາໂຮງແຮມດັ່ງກ່າວຍັງຮັບໃຊ້ກອງປະຊຸມໃຫຍ່ພາຍໃນປະເທດ ແລະ ສາກົນອີກດ້ວຍ. ນອກນັ້ນ ໃນໄລຍະຜ່ານມາ, ບັນດາໂຮງແຮມເຫລົ່ານີ້ ຍັງປະກອບສ່ວນເຂົ້າໃນການຕ້ອນຮັບຜູ້ແທນຂັ້ນສູງ ຈາກບັນດາປະເທດມາ ຫວຽດນາມ ເວົ້າລວມ ແລະ ຮ່າໂນ້ຍ ເວົ້າສະເພາະ.”
ໂຮມແຮມHilton Opera
ພາບ: internet
|
ບັນດາໂຮງແຮມໃຫຍ່ລະດັບ 5 ດາວ ຫລື 4 ດາວ ຖືກຕັ້ງຢູ່ໃນສະຖານທີສວຍງາມ, ຢູ່ໃຈກາງນະຄອນຫລວງ ຄື ໂຮມແຮມ Deawoo, Hilton Opera, Horison, Melia, Nikko, Sheraton, Metropole, ບ໋າວເຊີນ, ກົງດວານ (ກຳມະບານ) ແລະອື່ນ. ເຖິງຢ່າງໃດກໍຕາມ, ເພື່ອຮັກສາ ແລະດຶງດູດແຂກທ່ອງທ່ຽວມາພັກ, ບັນດາໂຮງແຮມລ້ວນແຕ່ມີຍຸດທະສາດພັດທະນາສະເພາະ. ຕົວຢ່າງ ຄືໂຮງແຮມ 5 ດາວສາກົນ Sofitel Plaza ດ້ວຍພື້ນຖານດ້ານວັດຖຸດີ, ຕັ້ງຢູ່ແຄມຫນອງ ໂຮ່ໄຕທີ່ສວຍງາມໃນໃຈກາງນະຄອນຫລວງຮ່າໂນ້ຍ, Sofitel Plaza ດຶງດູດແຂກທ່ອງທ່ຽວ ທີ່ມາຈາກ ເອີລົບ ເປັນຈຳນວນຫລາຍພໍສົມຄວນ, ໃນຂະນະທີ່ແຂກທ່ອງທ່ຽວເອີລົບແມ່ນແຂກທ່ອງທ່ຽວທີ່ມີການເລືອກເຟັ້ນສະຖານທີ່ພັກເຊົາດ້ວຍເງື່ອນໄຂຮຽກຮ້ອງສູງ. ເພື່ອສືບຕໍ່ຍົກສູງຄຸນນະພາບ ແລະ ຮັກສາອິດທິພົນຊື່ສຽງ, Sofitel Plaza ຍັງສືບຕໍສ້ອມແປງ, ຍົກລະດັບຫ້ອງພັກ, ຮ້ານບັນເທິງ ແລະ ອົມຮົມກິລິຍາມາລະຍາດໃນການບໍລິການຂອງພາລະກອນ. ທ່ານ Ove Sandstrom - general manager Sofitel Palaza ຮ່າໂນ້ຍ ໃຫ້ຮູ້ວ່າ:
“ປະຈຸບັນ ຢູ່ເອີລົບ ຫລາຍຄົນກໍຮູ້ຈັກເຖິງ Sofitel ຮ່າໂນ້ຍ. ເພື່ອຍົກສູງຄຸນນະພາບການຮັບໃຊ້, ພວກຂ້າພະເຈົ້າພະຍາຍາມກ້າວເດີນໃຫ້ທັນກັບທ່າອ່ຽງທັນສະໄຫມ, ພົ້ນເດັ່ນຄືຮ້ານບັນເທິງນີ້. ສະນັ້ນ ພວກຂ້າພະເຈົ້າຍົກຄຸນນະພາບຜະລິດຕະພັນຂອງໂຮມແຮມເປັນປະຈຳ. ພວກຂ້າພະເຈົ້າກໍວາງອອກມາດຖານໃຫມ່ ເພື່ອຮັບປະກັນຄຸນນະພາບການບໍລິການ ພ້ອມທັງດຳເນີນບັນດາໂຄງການບຳລຸງສ້າງພາລະກອນໃຫມ່.“
ຄຽງຂ້າງບັນດາໂຮງແຮມຕັ້ງຢູ່ໃຈກາງນະຄອນຫລວງ ຮ່າໂນ້ຍ, ບັນດາໂຮງແຮມຕັ້ງຢູ່ຄຸ້ມເມືອງເກົ່າກໍມີທ່າໄດ້ປຽບສະເພາະ. ໂດຍຕັ້ງຢູ່ໃກ້ກັບບັນດາສະຖານທີທ່ອງທ່ຽວ ແລະ ສາມາດຍາງເຂົ້າເຂດໃຈກາງນະຄອນຫລວງ ຮ່າໂນ້ຍໄດ້, ບັນດາໂຮງແຮມນີ້ພວມກາຍເປັນຈຸດນັດພົບອັນດູດດື່ມສຳລັບແຂກທ່ອງທ່ຽວຕ່າງປະເທດ. ນອກນັ້ນ ບັນດາໂຮງແຮມໃນຄຸ້ມເມືອງເກົ່າ ພວມຊອກຫາຫລາຍຮູບການເພື່ອຢັ້ງຢືນຄຸນນະພາບ ແລະ ເຄື່ອງໝາຍການຄ້າຂອງຕົນ. ໂຮງແຮມ Silk Path ຕັ້ງຢູ່ ສະຖານທີ່ສວຍງາມ, ສະດວກໃນຄຸ້ມເມືອງເກົ່າຮ່າໂນ້ຍ ແລະ ໄດ້ຮັບການອອກແບບທັນສະໄຫມ ແຕ່ຍັງຄົງຮັກສາສີສັນວັດທະນະທຳຂອງຝ່າຍ ອາຊີຕາເວັນອອກ. ທ່ານນາງ ຫງວຽນແທງທູ໋ຍ ຫົວຫນ້າຫ້ອງການດຳເນີນທຸລະກິດ ໂຮງແຮມ Silk Path ໃຫ້ຮູ້ວ່າ:
“ພວກຂ້າພະເຈົ້າມີບັນດາໂຄງການບຳລຸງສ້າງພາລະກອນເປັນປະຈຳ ເພື່ອຊ່ວຍໃຫ້ເຂົາເຈົ້າມີຄວາມເຂົ້າໃຈກ່ຽວກັບດ້ານວັດທະນະທຳກວ່າ, ຍົກສູງລະດັບວິຊາການກໍ່ຄືຄວາມສາມາດເວົ້າພາສາອັງກິດກັບແຂກທ່ອງທ່ຽວໄດ້ ເພື່ອຮັບໃຊ້ບໍລິການໃຫ້ດີກວ່າ ໂດຍອີງໃສ່ພື້ນຖານວັດທະນະທຳຂອງເຂົາເຈົ້າ. ພວກຂ້າພະເຈົ້າກໍຢາກນຳມາຊຶ່ງຄວາມຮູ້ສຶກຄືດັ່ງຢູ່ບ້ານຂອງຕົນໃຫ້ແກ່ແຂກທ່ອງທ່ຽວ, ຄືກຳລັງໂອ້ລົມກັບຍາດຕິພີ່ນ້ອງ, ກັບເພື່ອນມິດແທ້ໆ ຫາກບໍ່ແມ່ນເຂົາເຈົ້າພວມໄປປະຕິບັດງານ, ນັ້ນແມ່ນສິ່ງທີ່ພວກຂ້າພະເຈົ້າຢາກນຳມາໃຫ້ແຂກທ່ອງທ່ຽວ.“
ໂຮມແຮມ Metropole
ພາບ: internet
|
ລາຄາກໍ່ແມ່ນບັນຫາຊຶ່ງແຂກທ່ອງທ່ຽວສົນໃຈ ສະນັ້ນບັນດາໂຮງແຮມຢູ່ ຮ່າໂນ້ຍ ລ້ວນແຕ່ມີຮູບການຕ່າງໆເພື່ອດຶງດູດແຂກທ່ອງທ່ຽວ. ແຕ່ລະປີໂຮງແຮມກຳມະບານ ຕ້ອນຮັບແຂກທ່ອງທ່ຽວສາກົນ ປະມານ 45 % ຈຳນວນແຂກທ່ອງທ່ຽວທັງໝົດ. ທ່ານນາງ ຫງວຽນທິຫ໋າຍນິງ, ຮອງຜູ້ອຳນວຍການໃຫຍ່ ໂຮງແຮມກຳມະບານໃຫ້ຮູ້ວ່າ:
“ສຳລັບຕະຫລາດຂອງໂຮງແຮມກຳມະບານ ຫວຽດນາມ, ຍາມໃດ ພວກຂ້າພະເຈົ້າ ກໍນຳໃຊ້ລະດັບລາຄາມີລັກສະນະໄຫວພິບ ໃຫ້ແກ່ແຕ່ລະເປົ້າໝາຍແຂກທ່ອງທ່ຽວ ແລະແຕ່ລະຕະຫລາດ. ສຳລັບແຂກທ່ອງທ່ຽວສາກົນ ລະດັບລາຄາກໍມີການປັບປ່ຽນ, ປະຈຸບັນ ປະມານ 65 USD/ຄືນ ສ່ວນສຳລັບຄະນະແຂກທ່ອງທ່ຽວຫລາຍຄົນ ແລະ ໄລຍະເວລາພັກເຊົາດົນ, ພວກຂ້າພະເຈົ້າຈະມີກົນໄກທີ່ພິເສດ..“
ໃນ 6 ເດືອນຕົ້ນປີ 2012, ຮ່າໂນ້ຍ ຕ້ອນຮັບນັກທ່ອງທ່ຽວກວ່າ 8,3 ລ້ານເທື່ອຄົນ, ໃນນັ້ນ ນັກທ່ອງທ່ຽວສາກົນຄາດວ່າບັນລຸ 1,03 ລ້ານເທື່ອຄົນ, ເພື່ອຕອບສະຫນອງຄວາມຕ້ອງການນັບມື້ນັບສູງຂອງນັກທ່ອງທ່ຽວເມື່ອມາຢ້ຽມຢາມນະຄອນຫລວງ ຮ່າໂນ້ຍ, ໃນຊຸມປີມໍ່ໆມານີ້ ການບໍລິການບອ່ນພັກເຊົາ ໃນນະຄອນຫລວງ ຮ່າໂນ້ຍນັບມື້ນັບເພີ່ມຂຶ້ນ. ຄຽງຂ້າງນັ້ນ ບັນຫາຍົກສູງຄຸນນະພາບການບໍລິການກໍ່ໄດ້ຮັບຄວາມເອົາໃຈໃສ່ຈາກຫລາຍໂຮງແຮມ, ສິ່ງດັ່ງກ່າວໄດ້ຊ່ວຍໃຫ້ການທ່ອງທ່ຽວ ຮ່າໂນ້ຍ ສ້າງຄວາມປະທັບໃຈ ແລະ ແມ່ນຈຸດນັດພົບອັນດູດດື່ມສຳລັບນັກທ່ອງທ່ຽວສາກົນ./.