ບຸນເຕັດປີນີ້ໄດ້ພັກການ 9 ມື້, ສະນັ້ນ ທຸກຄົນຈຶ່ງຍາດເວລາເພື່ອໄປຢື້ຢາມຖາມຂ່າວຍາດຕິພີ່ນ້ອງ ຫລື ໄປທ່ອງທ່ຽວ. ກ່ອນບຸນເຕັດ 3 - 4 ເດືອນ, ບັນດາບໍລິສັດທ່ອງທ່ຽວໄດ້ສ້າງຫລາຍລາຍການອັນດູດດື່ມເພື່ອດຶງດູດນັກທ່ອງທ່ຽວ. ແລະກອ່ນບຸນເຕັດເດືອນຫນຶ່ງ, ບັນດາບໍລິສັດທ່ອງທ່ຽວບໍ່ຮັບການສັ່ງຈອງຂອງແຂກທ່ອງທ່ຽວອີກ ຍ້ອນຈຳນວນນັກທ່ອງທ່ຽວໄດ້ຈອງລາຍການຫລາຍໂພດແລ້ວ.
ບຸນປີໃຫມ່ປະຈຳຊາດແມ່ນຈຸດເວລາທີ່ບັນດາບໍລິສັດທ່ອງທ່ຽວມີວຽກງານຫຼາຍທີ່ສຸດ. ບັນດາບໍລິສັດທີ່ມີຊື່ສຽງຄື: Saigontourist, Viettravel, Vitour .. ລ້ວນແຕ່ສ້າງບັນດາລາຍການທ່ອງທ່ຽວອັນດູດດື່ມ. ທ່ານ ຫງວຽນເທວີງ ຮອງຜູ້ອຳນວຍການບໍລິສັດທ່ອງທ່ຽວ Saigontourist ໃຫ້ຮູ້ວ່າ:
”ບຸນເຕັດໄດ້ພັກການເຖິງ 9 ມື້ ຈະແມ່ນກາລະໂອກາດເພື່ອໃຫ້ທາງບໍລິສັດດຳເນີນທຸລະກິດ. ແຜນການຮັບໃຊ້ໃນໂອກາດບຸນເຕັດຖືກສ້າງຂຶ້ນກ່ອນນີ້ 6 ເດືອນແລ້ວ. ປະຈຸບັນ ທາງບໍລິສັດຈະສ້າງບໍລິການຈຳນວນຫນຶ່ງຕື່ມອີກ ເພື່ອຮັບໃຊ້ໃຫ້ພະນັກງານ ພາລະກອນໃນທົ່ວສັງຄົມເມື່ອໄປທ່ອງທ່ຽວ ທັງແມ່ນການກະຕຸກຊຸກຍູ້ດຳເນີນທຸລະກິດ.”
ທ່ານ ຫງວຽນເທວີງ ໃຫ້ຮູ້ວ່າ: ບັນດາສະຖານທີ່ທ່ອງທ່ຽວຢູ່ພາຍໃນປະເທດ ຊຶ່ງນັກທ່ອງທ່ຽວມັກໄປໃນໂອກາດນີ້ ແມ່ນ ຍາຈາງ, ດາລາດ, ຟານທຽດ, ຮ່າໂນ້ຍ, ເຫ້ວ. ປີນີ້, ມີເວລາພັກການຫລາຍມື້, ນັກທ່ອງທ່ຽວຈະມີເງື່ອນໄຂເພື່ອເລືອກເຟັ້ນລາຍການທ່ອງທ່ຽວໃນເວລາຍາວກວ່າ.
“ນັກທ່ອງທ່ຽວມັກໄປທ່ອງທ່ຽວຫລາຍສຸດແມ່ນໃນຊຸມມື້ພາຍຫລັງວັນທີ 2 ເດືອນຈຽງຕາມຈັນທະປະຕິທິນ ຫວຽດນາມ ເພາະວ່າໂອກາດນີ້ຢູ່ພາກເຫນືອມີຫຼາຍງານບຸນ. ແລະ ຍ້ອນໄດ້ພັກການຫລາຍມື້ ນັກທ່ອງທ່ຽວກໍ່ມີເງື່ອນໄຂໄປທ່ອງທ່ຽວຢູ່ຕ່າງປະເທດ, ແລະ ຢູ່ໃກ້ແມ່ນບັນດາປະເທດອາຊີຕາເວັນອອກສຽງໃຕ້, ອາຊີເຫນືອ, ຈີນ, ສເກົາຫລີ, ຍີປຸ່ນ, ແລະ ໄກກວ່າແມ່ນອາເມລິກາ ຫລື ອົດສະຕາລີ. ມາຮອດປະຈຸບັນ ບັນດາລາຍການທ່ອງທ່ຽວໄປຍັງເອີລົບຍັງມີຢູ່ ແຕ່ໄປເຖິງອົດສະຕາລີ ແລະ ບັນດາປະເທດອາຊີຕາເວັນອອກແມ່ນເຕັມແລ້ວ.”
ລາຄາລາຍການທ່ອງທ່ຽວຢູ່ພາຍໃນປະເທດ ລ້ວນແຕ່ເພີ່ມຂຶ້ນປະມານ 10% ຍ້ອນບໍລິສັດການບິນຫວຽດນາມໄດ້ເພີ່ມລາຄາປີ້ຍົນຂຶ້ນ. ເຖິງຢ່າງໃດກໍຕາມ, ການເພີ່ມລາຄາປີ້ຍົນນັ້ນ ກໍ່ບໍ່ເຮັດໃຫ້ຄວາມຕ້ອງການໄປທ່ອງທ່ຽວຂອງປະຊາຊົນຫລຸດລົງ.
ທ່ານນາງ ຫງວຽນທິບີກງອກ, ຮອງຜູ້ອຳນວຍການພະແນກວັດທະນະທຳ ກິລາ ແລະ ການທ່ອງທ່ຽວ ແຂວງເລີມດົ່ງໃຫ້ຮູ້ວ່າ: ປະຈຸບັນ ທົ່ວນະຄອນມີນັກທ່ອງທ່ຽວມາພັກຜ່ອນປະມານ 40.000 ຄົນ/ມື້. ໃນໂອກາດບຸນເຕັດ, ບັນດາໂຮງແຮມ, ເຮືອນພັກ ຢູ່ ດາລາດ ສາມາດຂາຍບໍລິການໄດ້ 90% . ນັກທ່ອງທ່ຽວມາດາລາດໃນໂອກາດນີ້ ຈະໄດ້ເຫັນປະຈັກຕາຄວາມສວຍສົດງົດງາມຂອງນະຄອນພູພຽງນີ້.
“ສິ່ງສຳຄັນທີ່ສຸດແມ່ນນັກທ່ອງທ່ຽວຍັງໄດ້ເຫັນປະຈັກຕາ Festival ດອກໄມ້ຢູ່. ພິເສດ, ປີນີ້ ອາກາດຢູ່ເລີມດົ່ງແມ່ນເອື້ອອຳນວຍຄວາມສະດວກ. ກົງກັບບຸນເຕັດ ແມ່ນຍາມດອກຄາຍພວມບານ. ທີສອງແມ່ນ ປະຈຸບັນຢູ່ດ່າລາດມີການບໍລິການທ່ອງທ່ຽວຫຼາຍຢ່າງທີ່ອຸດົມສົມບູນກວ່າ. ສິ່ງສຳຄັນໜຶ່ງອີກນັ້ນ ສະພາບແວດລ້ວມດ້ານທິວທັດທຳມະຊາດທີ່ສວຍງາມກໍ່ໄດ້ຮັບການຕົບແຕ່ງ,ປະດັບປະດາ ແລະ ອະນາໄມສິ່ງແວດລ້ອມເປັນຢ່າງດີ, .”
ຊາປາ
ຕາມທ່ານນາງງອກແລ້ວ, ນອກຈາກບັນດາສະຖານທີ່ທ່ອງທ່ຽວທີ່ຄຸ້ນເຄີຍຢູ່ ດາລາດແລ້ວ, ຈາກດາລາດ ນັກທ່ອງທ່ຽວຍັງສາມາດໄປຍັງບັນດາສະຖານທີ່ທ່ອງທ່ຽວໃຫຍ່ແຫ່ງອື່ນໆຂອງຫວຽດນາມຢ່າງສະດວກ.
“ ຢູ່ ດາລາດ, ນັກທ່ອງທ່ຽວອາດຈະໄປແຂວງ ແຄງຮ່ວາ, ຍາຈາງ ຫລື ບີ່ນທ້ວນ, ຜ່ານ ໝູຍແນ. ນັ້ນແມ່ນບັນດາລາຍການທ່ອງທ່ຽວຮ່ວມສຳພັນຂອງພວກຂ້າພະເຈົ້າ. ຫລືນັກທ່ອງທ່ຽວສາມາດໄປທາງຍົນ ໄປຍັງ ດາຫນັງ ຫລື ນະຄອນໂຮ່ຈິມີນ, ຮ່າໂນ້ຍ. ບາງບໍລິສັດທ່ອງທ່ຽວ ກໍ່ໄດ້ສ້າງບັນດາລາຍການທ່ອງທ່ຽວທ່ີເປັນເອກະລັກສະເພາະ.“
ສ່ວນບັນດາລາຍການທ່ອງທ່ຽວ ຢູ່ ພາກເຫນືອ, ແຂວງ ລ່າວກາຍ ຍັງຄົງແມ່ນສະຖານທີ່ຊຶ່ງຜູ້ນິຍົມໄປທ່ອງທ່ຽວຢາກເລືອກເຟັ້ນກວ່າໝູ່. ທ່ານນາງ ຮ່ວາງທິເວື້ອງ, ຮອງຫົວຫນ້າຫ້ອງວິຊາການທ່ອງທ່ຽວ ໃຫ້ຮູ້ວ່າ: ຈຳນວນນັກທ່ອງທ່ຽວໄປຢ້ຽມຢາມ ລາວກາຍໃນໂອກາດບຸນເຕັດເພີ່ມຂຶ້ນປະມານ 20% ເມື່ອທຽບໃສ່ປີກາຍ.
“ ບຸນເຕັດປີນີ້ ພະນັກງານ ພາລະກອນໄດ້ພັກການຫລາຍມື້ ສະນັ້ນ ພວກຂ້າພະເຈົ້າກໍໄດ້ຈັດການບໍລິການທ່ອງທ່ຽວດ້ວຍຫຼາຍຮູບການເພື່ອຮັບໃຊ້ນັກທ່ອງທ່ຽວ. ງານບຸນປະເພນີຈະໄດ້ຮັບການຟື້ນຟູຄືນໃຫມ່. ມາຮອດປະຈຸບັນ ນັກທ່ອງທ່ຽວໄດ້ສັ່ງຈອງບ່ອນພັກຢູ່ລາວກາຍເປັນຈຳນວນຫລວງຫລາຍແລ້ວ.”
ນັກທ່ອງທ່ຽວກໍ່ມັກໄປຢ້ຽມຢາມ ຊາປາ ແລະ ບັກຮ່າ. ທ່ານນາງ ຮ່ວາງທິເວື້ອງ ຖືວ່າ ຖ້າຜູ້ໃດມີໂອກາດໄປຊາປາ, ບັກຮ່າເທື່ອຫນຶ່ງໃນໂອກາດບຸນເຕັດນີ້ ກໍ່ລ້ວນແຕ່ຢາກຕ່າວກັບມາຢ້ຽມຢາມອີກ.
“ເມື່ອລະດູບານໃຫມ່ວຽນມາ, ທິວທັດທຳມະຊາດຢູ່ ຊາປາ ແມ່ນສວຍງາມທີ່ສຸດ, ດອກໄມ້ພວມເບັ່ງບານ, ຕົ້ນໄມ້ໃບຫຍ້າກໍ່ພວມອອກໜໍ່ຈໍ່ດອກ. ສ່ວນຢູ່ບັກຮ່າ ໄດ້ຮັບຖືວ່າແມ່ນເຂດພູພຽງຂາວ, ເພາະວ່າຢູ່ບັກຮ່າຍາມນີ້ ເຕັມໄປດ້ວຍດອກໝາກໝັ້ນທີ່ຂາວກະຈ້າ. ນີ້ແມ່ນສະຖານທີ່ທ່ອງທ່ຽວສອງແຫ່ງຊຶ່ງນັກທອ່ງທ່ຽວມັກເລືອກເຟັ້ນຫລາຍສຸດ.”
ເປີດສາກປີໃຫມ່ແມ່ນການໄປທ່ອງທ່ຽວພ້ອມກັບຄອບຄົວ ນັ້ນຈະແມ່ນຂອງຂວັນທາງດ້ານຈິດໃຈອັນລ້ຳຄ່າ. ຫວັງວ່າ ໝົດທຸກຄົນຈະຍາດເວລາເພື່ອໄປຕ້ອນຮັບລະດູບານໃຫມ່ຢູ່ທົ່ວທຸກແຖບຖິ່ນຂອງປະເທດຊາດ./
ລານແອງ