ລາຍການທ່ອງທ່ຽວໝູ່ບ້ານບູຮານ ເຟືອກຕິກ

ວັນພະຫັດ ທີ 15 ມີນາ ຄ.ສ. 2012 | 15:57:27

ເຮືອນບູຮານຫລັງຫນຶ່ງ
ພາບ:internet

(vovworld)-  ໂດຍຫ່າງຈາກນະຄອນເຫ້ວໄປທາງທິດເໜືອປະມານ 40 ກິໂລດແມດ, ໝູ່ບ້ານບູຮານ ເຟືອກຕິກ ຕັ້ງຢູ່ລະຫວ່າງກາງສອງແຂວງ ເທ່ືອທຽນເຫ້ວ ແລະ ກວ໋າງຈີ້. ໝູ່ບ້ານແຫ່ງນີ້ ປຽບເໝືອນຫໍພິພິດທະພັນວັດທະນະທຳບ້ານນາຫວຽດນາມທີ່ມີຊີວິດຊີວາ, ຊຶ່ງໄດ້ຮັບການຮັກສາໄວ້ມາເປັນເວລານັບຮ້ອຍໆປີ. ດ້ວຍຄວາມງາມແບບປະຖົມປະຖານ ແລະ ສະຫງົບງຽບ, ເຟືອກຕິກ ແມ່ນໝູ່ບ້ານບູຮານແຫ່ງຫນຶ່ງ ທີ່ເຄີຍຕ້ອນຮັບນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ ແລະ ກາຍເປັນຈຸດນັດພົບທີ່ຂາດບໍ່ໄດ້ສຳລັບນັກທ່ອງທ່ຽວເມື່ອມາຢ້ຽມຢາມແຂວງເທື່ອທຽນເຫ້ວ. ໃນລາຍການທ່ອງທ່ຽວພາກນີ້ ພວກເຮົາຂໍແນະນຳ ໝູ່ບ້ານບູຮານ ເຟືອກຕິກ ຕັ້ງຢູ່ແຄມແມ່ນ້ຳ ໂອເລົາ.

ສິ່ງທີ່ສ້າງຄວາມປະທັບໃຈທຳອິດໃຫ້ແກ່ນັກທ່ອງທ່ຽວນັ້ນແມ່ນ ທິວທັດທຳມະຊາດທີ່ຂຽວສົດງົດງາມຂອງບັນດາເຂດສວນ ດ້ວຍບັນດາຕົ້ນໄມ້ໃຫຍ່ທີ່ມີອາຍຸກວ່າ 100 ປີຄືຕົ້ນດອກເໝີຍ, ຕົ້ນໝາກມີ້, ຕົ້ນຫູກວາງ… ເຊິ່ງຊາວບ້ານເຟືອກຕິກ ຍັງຄົງຮັກສາໄວ້ຄືດັ່ງຊັບສົມບັດອັນລຳ້ຄ່າຂອງຕົນຈົນຮອດປະຈຸບັນ, ຫລືຕົ້ນໝາກຈັນໃຫຍ່ຢູ່ປະຕູໂຂງຂອງໝູ່ບ້ານຊຶ່ງສອງຄົນອຸ້ມກໍ່ບໍ່ຈອດ.

“ຕົ້ນໝາກຈັນນີ້ມີອາຍຸກວ່າ 600 ປີແລ້ວ ແລະ ຢູ່ທ່າແມ່ນ້ຳຍັງມີຕົ້ນຫູກວາງທີ່ມີອາຍຸກວ່າ 2 ສັດຕະວັດ. ໝູ່ບ້ານແຫ່ງນີ້ຢູ່ອ້ອມຮອບແມ່ນ້ຳໂອເລົາ, ມີເນື້ອທີ່ດິນປະມານ 1 ຕາລາງກິໂລແມດ. ບັນດາປູຊະນີຍະສະຖານລ້ວນແຕ່ອ່ວາຍຫນ້າອອກສູ່ແມ່ນ້ຳເພື່ອສະແຫວງຫາໂຊກໄຊ.”

ຢູ່ໃຕ້ຮົ່ມໄມ້ໃຫຍ່ທີ່ເກົ່າຫລາຍຮ້ອຍປີນັ້ນແມ່ນເຂດເຮືອນເຣື່ອງບູຮານທີ່ຄັບຄາຫນາແຫນ້ນກວ່າຢູ່ເມືອງຫລວງເກົ່າເຫ້ວ. ທັງໝູ່ບ້ານມີເຮືອນ 117 ຫລັງ, ໃນນັ້ນເຮືອນເຣື່ອງມີເຖິງ 37 ຫລັງແມ່ນທີ່ມີອາຍຸກວ່າ 100 ປີ, ພ້ອມກັບຫໍບູຊາຂອງວົງຕະກູນ, ແລະວິຫານ 12 ແຫ່ງ ທີ່ຍັງຄົງໄດ້ຮັບການຮັກສາໄວ້ຢູ່. ມີເຮືອນເຣື່ອງ 12 ຫລັງແມ່ນຊັບສິນອັນລ້ຳຄ່າ ມີມາກ່ອນນີ້ແຕ່ 150 - 200 ປີ, ທຸກສິ່ງທຸກຢ່າງໃນເຮືອນລ້ວນແຕ່ແກະສະຫລັກຢ່າງຄ່ອງແຄ້ວ, ລະອຽດລະອໍຄືບັນດາກິດຈະກຳສະຖາປັດຕະຍາກຳທີ່ເຮັດດ້ວຍໄມ້ໃນພະລາຊະວົງຫງວຽນ. ດ້ວຍບັນດາຄຸນຄ່າພິເສດນັ້ນ ຈຶ່ງເຮັດໃຫ້ເຟືອກຕິກ ກາຍເປັນຈຸດນັດພົບອັນດູດດື່ມສຳລັບນັກທ່ອງທ່ຽວຢູ່ພາຍໃນ ແລະ ຕ່າງປະເທດ. ນາງ ບູ່ຍທິຫາຍກວຽນ ພະນັງານຢູ່ບໍລິສັດທ່ອງທ່ຽວ Quehuong ຈຳກັດ ໃຫ້ຮູ້ວ່າ: ທາງບໍລິສັດໄດ້ນຳໝູ່ບ້ານບູຮານ ເຟືອກຕິກ ເຂົ້າໃນລາຍການທ່ອງທ່ຽວຂອງບໍລິສັດ ນັບແຕ່ປີ 2009ແລ້ວ.

“ໃນເບື້ອງຕົ້ນ, ນັກທ່ອງທ່ຽວຈຳນວນຫນຶ່ງຢາກໄປຢ້ຽມຢາມເຮືອນບູຮານ, ເພື່ອສັງເກດແບບແຜນດຳລົງຊີວິດຂອງປະຊາຊົນຢູ່ເຂດນີ້ເປັນຄືແນວໃດ. ສະນັ້ນ ພວກຂ້າພະເຈົ້າຈຶ່ງຈັດໃຫ້ແຂກທ່ອງທ່ຽວມາພັກຜ່ອນຢູ່ຮ່ວມກັບປະຊາຊົນໃນເຮືອນບູຮານ ໂດຍອີງໃສ່ພື້ນຖານດ້ານວັດຖຸທີ່ມີຢູ່ແລ້ວ, ພວກຂ້າພະເຈົ້າໄດ້ລົງທຶນຕື່ມອີກເພື່ອກໍ່ສ້າງກິດຈະກຳຍ່ອຍ ກໍ່ຄືພື້ນຖານດ້ານວັດຖຸຈຳນວນໜຶ່ງເພື່ອຕອບສະໜອງຄວາມຕ້ອງການຂອງນັກທ່ອງທ່ຽວ. ສ່ວນຫລາຍນັກທ່ອງທ່ຽວມີຄວາມເພິ່ງພໍໃຈຕໍ່ຮູບແບບການທ່ອງທ່ຽວນີ້.”

ເຮືອນເຣື່ອງຢູ່ ໝູ່ບ້ານບູຮານ ເຟືອກຕິກ ສ່ວນຫລາຍຖືກກໍ່ສ້າງໃນບັນດາເຂດສວນທີ່ມີເນື້ອທີ່ກວ້າງປະມານ 1.000 - 1.500 ຕາລາງແມດ, ມີຕົ້ນໄມ້ໃຫຍ່ທີ່ຂຽວອຸມທຸ່ມ. ນາງ ກວຽນ ໃຫ້ຮູ້ວ່າ:

“ແຂກທ່ອງທ່ຽວມາແຫ່ງນີ້, ກ່ອນອື່ນໝົດເຂົາເຈົ້າຍ່າງເລາະຫລິ້ນອ້ອມໝູ່ບ້ານເພື່ອສັງເກດ, ຮັບຟັງສຽງໄກ່ຂັນ. ນັກທ່ອງທ່ຽວສ່ວນຫຼາຍຂອງບໍລິສັດຂ້າພະເຈົ້າແມ່ນມາຈາກເອີລົບ. ເຂົາເຈົ້າເຄີຍດຳລົງຊີວິດຢູ່ບັນດາເຂດຕົວເມືອງທີ່ມີບັນຍາກາດອຶກກະທຶກຄຶກໂຄມ, ສະນັ້ນ, ເມື່ອມາຢາມໝູ່ບ້ານບູຮານເຟືອກຕິກ ເຂົາເຈົ້າຈຶ່ງຮູ້ສຶກໄດ້ຄວາມສະຫງົບງຽບ, ຄວາມໃກ້ຊິດສະຫນິດສະໜົມຂອງຊາວບ້ານ ພ້ອມດ້ວຍທິວທັດທີ່ສວຍງາມຂອງໝູ່ບ້ານ ອັນໄດ້ສ້າງຄວາມປະທັບໃຈໃຫ້ແກ່ເຂົາເຈົ້າ.”

ໄປຢ້ຽມຢາມ ໝູ່ບ້ານບູຮານ ເຟືອກຕິກ ຕ້ອງເສຍເວລາມື້ຫນຶ່ງ ແລະ ເພື່ອຮູ້ລະອຽດກວ່າກ່ຽວກັບຊີວິດການເປັນຢູ່ຂອງປະຊາຊົນແຫ່ງນີ້, ນັກທ່ອງທ່ຽວຫລາຍຄົນໄດ້ນອນຄ້າງຄືນຢູ່ເຮືອນເຣື່ອງນີ້ຄືນຫນຶ່ງ. ທ່ານນາງ ກວຽນ ໃຫ້ຮູ້ວ່າ: ລາຍຈ່າຍໃຫ້ແກ່ນັກທ່ອງທ່ຽວຄະນະໜຶ່ງມາຢ້ຽມຊົມ ແລະ ກິນ, ຢູ່ ພັກເຊົາໃນໝູ່ບ້ານບູຮານ ເຟືອກ ຕິກ ແມ່ນບໍ່ຫລາຍປານໃດ.

ລາຍການທ່ອງທ່ຽວໝູ່ບ້ານບູຮານ ເຟືອກຕິກ - ảnh 2

ຫໍບູຮານ ແລະ ຕົ້ນໝາກຈັນມີອາຍຸ 500 ປີ
ພາບ:internet

“ຄະນະນັກທ່ອງທ່ຽວມີປະມານ 20 ຄົນຂຶ້ນໄປ, ລາຍຈ່າຍໃຫ້ແກ່ການບໍລິການຢູ່ກັບທີ່ແມ່ນປະມານ 300.000 ດົ່ງ/ຄົນ ໂດຍບໍ່ລວມຄ່າເດີນທາງ. ຊາວບ້ານບູຮານຈະແຕ່ງກິນເອງໃຫ້ນັກທ່ອງທ່ຽວ. ໝູ່ບ້ານບູຮານນີ້ ຍັງຄົງຮັກສາຈຸດທີ່ເກົ່າແກ່ດັ້ງເດີມໄວ້ໄດ້ ແລະ ແມ່ນຫນຶ່ງໃນໝູ່ບ້ານບູຮານ 3 ແຫ່ງຂອງຫວຽດນາມ.”

ເລື່ອງຕ້ອນຮັບນັກທ່ອງທ່ຽວມາຢ້ຽມຢາມໝູ່ບ້ານຂອງຕົນ, ພັກຜ່ອນໃນເຮືອນຂອງຕົນ ແລະ ກາຍເປັນຜູ້ນຳທ່ຽວນັ້ນ ຍັງຄົງແມ່ນວຽກງານ ທີ່ໃຫມ່ອ່ຽມສຳລັບຊາວ ໝູ່ບ້ານບູຮານ ເຟືອກຕິກ. ທ່ານເລຈ້ອງຢ໋ຽນ ເຈົ້າຂອງເຮືອນບູຮານຫລັງຫນຶ່ງ ມີຄວາມເອກອ້າງທະນົງໃຈເພື່ອໄດ້ຕ້ອນຮັບນັກທ່ອງທ່ຽວຫລາຍຄົນມາຢ້ຽມຢາມ.

“ເຮືອນຫລັງນີ້ແມ່ນມໍລະດົກທີ່ພໍ່ເຖົ້າປະໄວ້ໃຫ້ໄດ້ 78 ປີແລ້ວ. ປີ 1980 ພວກຂ້າພະເຈົ້າກໍສ້ອມແປງສ່ວນຫນຶ່ງ. ຊາວບ້ານເຟືອກຕິກ ມີຄວາມຮັກແພງແຂກຄົນຫລາຍ ແລະ ຢາກໂຄສະນາໃຫ້ທຸກຄົນຮູ້ຈັກເຖິງສິ່ງຕ່າງໆຊຶ່ງໝູ່ບ້ານອື່ນບໍ່ມີ. ບໍ່ ສະເພາະແຕ່ເຄື່ອງປັ້ນດິນເຜົາເທົ່ານັ້ນ ຫາກສິ່ງທີ່ເປັນເອກະລັກສະເພາະຂອງ ໝູ່ບ້ານບູຮານ ເຟືອກຕິກ ຄື, ສວນ, ຕົ້ນໄມ້ໃຫຍ່, ແບບແຜນດຳລົງຊີວິດຂອງຊາວບ້ານ. ສິ່ງດັ່ງກ່າວໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວ.”

ມາຢ້ຽມຢາມ ໝູ່ບ້ານບູຮານ ເຟືອກຕິກ ນັກທ່ອງທ່ຽວຍັງໄດ້ຮັບຊົມວິທີຜະລິດເຄື່ອງປັ້ນດິນເຜົາແບບຫັດຖະກຳຂອງຊາວໝູ່ບ້ານນີ້ອີກດ້ວຍ. ແລະ ຖ້າຫາກນັກທ່ອງທ່ຽວຢາກເຮັດທົດລອງເຄື່ອງປັ້ນດິນເຜົາກໍຈະໄດ້ຮັບການແນະນຳຢ່າງລະອຽດ. ສະນັ້ນ ອາດເວົ້າໄດ້ວ່າ ລາຍການທ່ອງທ່ຽວ ໝູ່ບ້ານບູຮານ ເຟືອກຕິກ ໃນມື້ຫນຶ່ງຈະແມ່ນບັນດາອະນຸສອນທີ່ບໍ່ອາດຫລົງລືມໄດ້ສຳລັບນັກທ່ອງທ່ຽວເມື່ອມາຢ້ຽມຢາມກຸງເກົ່າເຫ້ວ.

ນັກຂ່າວ: ລານແອງ