ໂກນດ໋າວ ຂຶ້ນກັບແຂວງ ບ່າເຣ້ຍ ຫວູງເຕົາ ມີແຄມຝັ່ງທະເລຍາວຢຽດ ປະມານ 200 ກິໂລແມດ ດ້ວຍຫາດຊາຍທະເລສວຍງາມ, ຮົກເຮື້ອເປົ່າຫວ່າງ, ນ້ຳຂຽວສະອາດນັບສິບໆແຫ່ງຄື: ອານຫ໋າຍ, ເດີ່ມເຈົາ, ຫລໍ່ໂວຍ, ຊວ໋ຍ ເອີດ, ຮ່ອນບ່າ ... ຍາມໃດກໍນຳມາຊຶ່ງຄວາມປະທັບໃຈແລະ ສິ່ງໃຫມ່ອ່ຽມໃຫ້ແກ່ແຂກທ່ອງທ່ຽວ.
“ໂກນດ໋າວ ມີເນື້ອທີ່ດິນ 76 ຕາລາງກິໂລແມດ. ພວກເຮົາພວມຢືນຢູ່ທີ່ຕັ້ງຂອງເກາະຫນ່ວຍໃຫຍ່ກວ່າໝູ່ຢູ່ທີ່ນີ້. ເກາະແຫ່ງນີ້ມີຮູບຊົງເໝືອນກັບໂຕໝີ, ເບື້ອງຫລັງແມ່ນຕິດກັບດິນຕໍ່ແຜ່ນ, ເບື້ອງຫນ້າແມ່ນມູ້ງໄປສູ່ທະເລຕາເວັນອອກ. ເສັ້ນທາງທີ່ພວກເຮົາພວມເດີນ ແມ່ນທາງເສັ້ນຫຼັກພຽງຫນຶ່ງດຽວຂອງ ໂກນດ໋າວ ຈາກສະຫນາມບິນໄປເຖິງເຂດໃຈກາງມີຄວາມຍາວປະມານ 15 ກິໂລແມດ. ຢູ່ ກົນດ໋າວ ບໍ່ມີ ຮ້ານອາຫານຊີ້ນສັດປ່າ ເພາະວ່າ ປ່າຢູ່ທີ່ນີ້ແມ່ນນອນໃນເຂດປ່າສະຫງວນແຫ່ງຊາດ ໂກນດ໋າວ. ເບື້ອງຊ້າຍ ແມ່ນທະເລ. ມາຢາມ ໂກນດ໋າວ ໃນຊ່ວງໄລຍະແຕ່ເດືອນ 3 ເຖິງເດືອນ 6, ທະເລ ໂກນດ໋າວ ປຽບເໝືອນຫນອງນ້ຳແຫ່ງໜຶ່ງ.“
ເມື່ອເດີນທາງເຖິງ ໂກນດາວ ຜູ້ໃດກໍ່ຮູ້ສຶກປະທັບໃຈຕໍ່ຄວາມງາມແບບຮົກເຮື້ອເປົ່າຫວ່າງ ແລະ ສະຫງົບງຽບຢູ່ແຫ່ງນີ້. ເມື່ອໄດ້ຮັບຄຳແນະນຳຂອງຜູ້ນຳທ່ຽວໃນເວລານັ່ງເທິງລົດໂອໂຕບົນເສັ້ນທາງຈາກສະຫນາມບິນເຖິງໂຮງແຮມນັ້ນ, ນັກທ່ອງທ່ຽວຍິ່ງຢາກໄດ້ຄົ້ນຫາໂກນດ໋າວໃນທັນທີ. ໂກນດ໋າວ ແມ່ນໝູ່ເກາະແຫ່ງຫນຶ່ງ ດ້ວຍບັນດາເກາະໃຫຍ່ນ້ອຍ 16 ຫນ່ວຍ, ເກາະໃຫຍ່ແມ່ນ ໂກນເຊີນ ຫລືເອີ້ນວ່າ ໂກນດ໋າວ, ຕັ້ງຫ່າງຈາກແຄມທະເລໄປທາງທິດຕາເວັນອອກສຽງເຫນືອຂອງເຂດດິນຕໍ່ແຜ່ນປະມານ 117 ກິໂລແມດ. ມາຮອດປະຈຸບັນ ໂກນດ໋າວ ຍັງຄົງແມ່ນສະຖານທີ່ ຊຶ່ງເຮັດໃຫ້ຊາວຫວຽດນາມສ່ວນຫຼາຍເມື່ອເຕື້ອງກໍ່ລ້ວນແຕ່ຮູ້ສຶກເຈັບແສບ. ໃນຕະ ຫລອດໄລຍະ 113 ປີ, ເກາະແຫ່ງນີ້ໄດ້ກາຍເປັນລະບົບຄຸກທີ່ເຄັ່ງຄັດ ໂດຍພວກລ່າເມືອງຂຶ້ນຝລັ່ງກໍ່ສ້າງຂຶ້ນເມື່ອປີ 1862 ແລະ ຫລັງຈາກນັ້ນ ກອງທັບອາເມລິກາ ໄດ້ຮັບເອົາແລະຄຸ້ມຄອງເພື່ອກັກຂັງບັນດານັກຮົບປະຕິວັດຈົນເຖິງສະໄໝຫວຽດນາມໄດ້ຮັບການປົດປ່ອຍຢ່າງສົມບູນເມື່ອປີ 1975. ໃນຊຸມປີມໍ່ໆມານີ້, ນັກທ່ອງທ່ຽວຫລາຍຄະນະໄດ້ມາຢ້ຽມຊົມສິ່ງທີ່ຍັງຄົງຮັກສາໄວ້ຂອງຄຸກຕ່າງໆໃນສະໄໝສົງຄາມ ແລະ ຢູ່ທີ່ນີ້ໄດ້ກາຍເປັນຫໍພິພິດທະ ພັນປະຫວັດສາດ. ທ່ານນາງ ຟ້າມທິຕາມ, ຮອງຫົວຫນ້າຄະນະຄຸ້ມຄອງເຂດປູຊະນິຍະສະຖານ ໂກນດ໋າວ ໃຫ້ຮູ້ວ່າ:
“ຢູ່ ໂກນດ໋າວ ມີ 2 ຮູບການທ່ອງທ່ຽວ ນັ້ນແມ່ນເຂດປູຊະນິຍະສະຖານປະຫວັດສາດ ແລະ ທ່ອງທ່ຽວຊີວະພາບ. ປະຈຸບັນ, ຄະນະຄຸ້ມຄອງໄດ້ຮັບຫນ້າທີ່ສຳຄັນ ນັ້ນແມ່ນເສີມຂະຫຍາຍ ແລະ ຮັກສາຄຸນຄ່າຂອງເຂດປູຊະນິຍະສະຖານ ດ້ວຍຮ່ອງຮອຍປະຫວັດສາດ 22 ແຫ່ງ. ແຕ່ລະປີ ວຽກງານບູລະນະປະຕິສັງຂອນເຂດປູຊະນິຍະ ສະຖານ ລ້ວນແຕ່ໄດ້ຮັບຄວາມເອົາໃຈໃສ່ຈາກອຳນາດການປົກຄອງທຸກຂັ້ນ.“
ອະດິດຕະການ ພ້ອມກັບໄລຍະທາງທ່ີຫ່າງໄກ ໄດ້ເຮັດໃຫ້ ໂກນດ໋າວ ຖືກຕັດແຍກອອກຈາກບັນດາເຂດຕົວເມືອງທ່ອງທ່ຽວທີ່ຄັບຄາຫນາແຫນ້ນ ຄື: ຍາຈາງ ຫລື ດາຫນັງ ແລະ ກາຍເປັນຫນຶ່ງໃນບັນດາສະຖານທີ່ທຳມະຊາດ ທີ່ຍັງຄົງຮົກເຮື້ອເປົ່າຫວ່າງກວ່າໝູ່ ຢູ່ອາຊີຕາເວັນອອກສຽງໃຕ້. ແຕ່ຍ້ອນຄວາມຮົກເຮື້ອເປົ່າຫວ່າງນັ້ນເອງ ຈຶ່ງເຮັດໃຫ້ໂກນດ໋າວວັນນີ້ ສາມາດດຶງດູດນັກທ່ອງທ່ຽວມາຢ້ຽມຊົມ ແລະ ພັກຜ່ອນບຳລຸງສຸຂະພາບນັບໝື່ນເທື່ອຄົນ. ເສັ້ນທາງໄປຍັງ ໂກນດ໋າວ ໃນປະຈຸບັນໄດ້ມີຄວາມສະດວກກວ່າ ດ້ວຍບັນດາຖ້ຽວບິນໂດຍກົງໄປກັບໃນມື້ ຈາກນະຄອນ ໂຮ່ຈິມີນ ຫລື ຈາກຮ່າໂນ້ຍ.
“ແຕ່ລະມື້ມີ 5 - 6 ຖ້ຽວບິນ ຈາກນະຄອນ ໂຮ່ຈິມີນ ເຖິງໂກນດ໋າວໃນ ວັນຈັນ, ວັນພຸດ ວັນສຸກ ແລະ ວັນອາທິດ . ນອກຈາກການເດີນທາງດ້ວຍທາງອາກາດແລ້ວ ນັກທ່ອງທ່ຽວອາດຈະເດີນທາງດ້ວຍກຳປັ່ນທະເລຈາກບ່າເຣ້ຍ ຫວູງເຕົາ ເຊິ່ງສາມາດຂົນສົ່ງຜູ້ໂດຍສານໄດ້ປະມານ 200 ຄົນ, ເວລາເດີນທາງແມ່ນເລີ່ມແຕ່ 5 ໂມງແລງຂອງມື້ກ່ອນ ຈົນເຖິງ 6 ເຊົ້າຂອງມື້ຕໍ່ມາກໍຈະໄປຮອດ.“
ຜູ້ໃດເດີນທາງໄປເຖິງ ໂກນດ໋າວ ກໍລ້ວນແຕ່ມີຄວາມແປກປະຫລາດໃຈຕໍຄວາມງາມ, ຄວາມສະອາດສົດໃສ. ນ້ຳທະເລກໍໃສສະອາດ. ບັນດາໂຮງແຮມຢູ່ ໂກນດ໋າວ ລ້ວນແຕ່ອ່ວາຍຫນ້າໄປທາງທະເລ. ຍ້ອນຢູ່ຫ່າງໄກຈາກເຂດດິນຕໍ່ແຜ່ນ, ເລື່ອງຂົນສົ່ງວັດຖຸອຸປະກອນແມ່ນຫຍຸ້ງຍາກຫລາຍ ສະນັ້ນຄ່າເຊົ່າຫ້ອງພັກຢູ່ທ່ີນີ້ແມ່ນແພງກວ່າເມື່ອທຽບໃສ່ຢູ່ເຂດດິນຕໍ່ແຜ່ນຄື: ແຕ່ 40 - 4000 ໂດລາສະຫະລັດ/ມື້. ນັກທ່ອງທ່ຽວສາມາດໄປຢ້ຽມຊົມບັນດາສະຖານທີ່ຊຶ່ງໄດ້ຮັບຖືວ່າ ແມ່ນສິ່ງທີ່ມີຄ່າຂອງເກາະແຫ່ງນີ້. ສວນສາທາລະນະແຫ່ງຊາດ ໂກນດ໋າວ ເຄີຍຈັດຕັ້ງບັນດາລາຍການທ່ອງທ່ຽວພະຈົນໄພມີຜູ້ນຳທ່ຽວພາທາງຈາກປ່າເຂດຮ້ອນ ແລະ ໄປເຖິງບັນດາຫາຍຊາຍທະເລຫ່າງໄກຄື ອ່າວເດີ່ມແຈ ຊຶ່ງແມ່ນເຂດອ່າວນ້ອຍ, ນ້ຳເລິກ, ແມ່ນບອ່ນຢູ່ອາໃສຂອງ ຫອຍທະເລປະເພດຕ່າງໆ ເຊັ່ນ ຫອຍແຄງ, ຫອຍກີ້, ແໝງ. . .
ນອກນັ້ນ ຍັງມີບັນດາລາຍການທ່ອງທ່ຽວໃຕ້ທ້ອງມະຫາສະມຸດດ້ວຍການດຳນ້ຳ. ຫລືເຂົ້າຮ່ວມລາຍການຂື້ນພູເຂົາເຂົ້າປ່່າດົງ, ຄົ້ນຫາບັນດາສັດສາວາສິ່ງເຊິ່ງພຽງແຕ່ມີຢູ່ ໂກນດ໋າວ ເທົ່ານັ້ນ.
“ນີ້ແມ່ນບ່ອນລີ້ຊ້ອນແລະຫາກິນຂອງໂຕລີງຫາງຍາວ ຢູ່ ໂກນດ໋າວ. ໃນໄລຍະມໍ່ໆມານີ້ ໂຕລີງປະເພດນີ້ ໄດ້ຮັບການແຜ່ພັນຢ່າງວອ່ງໄວ. ຢູ່ທີ່ນີ້ ຍັງແມ່ນບ່ອນອາໄສແລະຫາກິນຂອງນົກກາງແກ, ໂຕກະຮອກ ໂກນດ໋າວ. “
ຢູ່ ໂກນດ໋າວ ບໍ່ມີການບໍລິການລົດແທກຊີ, ສະນັ້ນ ວິທີພະຈົນໄພເກາະ ແຫ່ງນີ້ ດີທີ່ສຸດ ນັ້ນແມ່ນຈ້າງລົດຈັກດ້ວຍລາຄາ 10 ໂດລາສະຫະລັດ/ມື້. ທິວທັດທຳມະ ຊາດຢູ່ທີ່ນີ້ສວຍງາມຫລາຍ, ອາກາດກກໍ່ປອດໂປ່ງ ບໍ່ມີຂີ້ຟຸ່ນ, ພຽງແຕ່ມີສາຍລົມເຢັນພັດຜ່ານ, ສຽງຄຶ້ນທະເລ ປະສານກັບ ສຽງນົກຮ້ອງທີ່ຫນ້າອອນຊອນອີ່ຫຼີ. ທັງໝົດເຫຼົ່ານັ້ນໄດ້ສ້າງຄວາມປະທັບໃຈຢ່າງຍິ່ງໃຫ້ແກ່ນັກທ່ອງທ່ຽວ.
ລານແອງ