ອິດສະຣາແອັນ ບຸກໂຈມຕີໂຮງໝໍ Kamal Adwan ແບບກະທັນຫັນ (ພາບ: AFP)

        ໃນທ້າຍອາທິດຜ່ານມາ, ບັນດາອົງການມະນຸດສະທຳ ແລະ ສາທາລະນະສຸກຂອງສະຫະປະຊາຊາດໄດ້ກ່າວເຕືອນວ່າ, ທາງທິດເໜືອເຂດ ກາຊາ ພວມຢືນຢູ່ຕໍ່ໜ້າໄພພິບັດດ້ານມະນຸດສະທຳຢ່າງຮ້າຍແຮງ, ເມື່ອຈຳນວນປະຊາກອນທັງໝົດຢູ່ເຂດນີ້ຕ້ອງປະເຊີນໜ້າກັບຄວາມສ່ຽງເສຍຊີວິດ ຍ້ອນການບຸກໂຈມຕີຢ່າງດຸເດືອດຂອງກອງທັບ ອິດສະຣາແອັນ ແລະ ຖືກປີດລ້ອມເປັນຫຼາຍມື້ໃນເງື່ອນໄຂດຳລົງຊີວິດທີ່ນັບມື້ນັບຊົ່ວຮ້າຍລົງ.

        ໃນບົດລາຍງານທີ່ປະກາດໃນວັນທີ 26 ຕຸລາ, ຫ້ອງການສະຫະປະຊາຊາດກ່ຽວກັບການປະສານງານບັນດາບັນຫາມະນຸດສະທຳ (OCHA) ໃຫ້ຮູ້ວ່າ, ເກືອບທັງໝົດລະບົບສາທາລະນະສຸກ ພ້ອມກັບບ່ອນລີ້ໄພຢູ່ທາງທິດເໜືອເຂດ ກາຊາ ຖືກທຳລາຍ, ພາໄປເຖິງຄວາມສ່ຽງທີ່ວ່າ ເຂດນີ້ຈະບໍ່ມີສາມັນຊົນ ປາແລັດສະຕິນ ອີກ.

ຄວາມສ່ຽງບໍ່ມີສາມັນຊົນ ປາແລັດສະຕິນ

        ເມື່ອແຈ້ງກ່ຽວກັບສະພາບການມະນຸດສະທຳຢູ່ທາງທິດເໜືອເຂດ ກາຊາ, ທ່ານນາງ Joyce Msuya, ຜູ້ຮັກສາການຮອງເລຂາທິການໃຫຍ່ຮັບຜິດຊອບບັນດາບັນຫາມະນຸດສະທຳ ແລະ ປະສານງານການໜູນຊ່ວຍສຸກເສີນຂອງ OCHA, ໃຫ້ຮູ້ວ່າ ໂຮງໝໍເກືອບທັງໝົດຢູ່ໃນເຂດດັ່ງກ່າວຖືກບຸກໂຈມຕີ ແລະ ພະນັກງານການແພດຖືກຈັບຕົວ. ບັນດາບ່ອນລີ້ໄພຖືກທຳລາຍ ແລະ ຖືກຈູດເຜົາ. ຕາມແຫຼ່ງຂ່າວຈຳນວນໜຶ່ງຈາກສະຫະປະຊາຊາດ, ປະຈຸບັນ, ມີສາມັນຊົນ ປາແລັດສະຕິນປະມານ 100.000 ຄົນພວມຖືກປິດລ້ອມຢູ່ໃນເຂດນ້ອຍແຄບ, ໃນເງື່ອນໄຂທີ່ບໍ່ໄດ້ຮັບທັນຍາຫານ ແລະ ບໍລິການ ການແພດທີ່ຈຳເປັນ.

        ວັນທີ 27 ຕຸລາ, ອົງການອະນາໄມໂລກ (WHO) ກໍ່ຢັ້ງຢືນສະພາບການຮ້າຍແຮງໃນປະຈຸບັນຢູ່ທາງທິດເໜືອເຂດ ກາຊາ, ເມື່ອໃຫ້ຮູ້ວ່າ Kamal Adwan ໂຮງໝໍແຫ່ງສຸດທ້າຍ ທີ່ຍັງເຄື່ອນໄຫວຢູ່ທາງທິດເໜືອເຂດ ກາຊາ, ຕ້ອງປະເຊີນໜ້າກັບສະພາບຂາດອຸປະກອນ, ໂດຍສະເພາະແມ່ນພາຍຫຼັງບັນດາກຳລັງ ອິດສະຣາແອັນ ບຸກໂຈມຕີໂຮງໝໍແຫ່ງນີ້ແບບກະທັນຫັນໃນວັນທີ 25 ຕຸລາ. ນີ້ແມ່ນບ່ອນທີ່ພວມປິ່ນປົວໃຫ້ແກ່ຄົນເຈັບປະມານ 600 ຄົນ, ໃນຂະນະທີ່ພາລະກອນການແພດຫຼາຍຄົນ ແລະ ບັນດາປະຊາຊົນກໍ່ພວມຫຼົບໄພຢູ່ຮາກຖານນີ້. ທ່ານ Khaled Khiari, ຜູ້ຊ່ວຍວຽກເລຂາທິການໃຫຍ່ສະຫະປະຊາຊາດກ່ຽວກັບຕາເວັນອອກກາງ, ອາຊີ ແລະ ປາຊີຟິກ, ໄດ້ຍົກອອກຄຳກ່າວເຕືອນໃນວັນທີ 28 ຕຸລາ ໃນວາລະປະຊຸມຂອງສະພາຄວາມໝັ້ນຄົງສະຫະປະຊາຊາດກ່ຽວກັບຕາເວັນອອກກາງ ວ່າ:

        “ເລື່ອງໂຈະໄລຍະສຸດທ້າຍຂອງບັ້ນສັກວັກຊິນກັນພະຍາດເປ້ຍລ່ອຍຢູ່ທາງທິດເໜືອເຂດ ກາຊາ ເຮັດໃຫ້ຊີວິດອິນຊີຂອງເດັກນ້ອຍນັບພັນຄົນຖືກນາບຂູ່. ເງື່ອນໄຂດຳລົງຊີວິດຢູ່ທາງທິດເໜືອເຂດ ກາຊາ, ພິເສດແມ່ນອ້ອມເຂດ Jabalya, Beit Lahiya ແລະ Beit Hanoun ພວມນັບມື້ນັບບໍ່ສາມາດອົດທົນໄດ້ອີກ”.

ຫຼາຍຄົນປະເຊີນໜ້າກັບສະພາບເສຍຊີວິດວິດຍ້ອນອຶດຫິວ (ພາບ: KT)

        ຕາມວົງການນັກສັງເກດການແລ້ວ, ສິ່ງຮ້າຍແຮງທີ່ສຸດສຳລັບທາງທິດເໜືອເຂດ ກາຊາ ແມ່ນບັນດາການຜັນແປໃນປະຈຸບັນຊີ້ໃຫ້ເຫັນວ່າ, ມີບັນດາການຄິດໄລ່ຈາກຝ່າຍ ອິດສະຣາແອັນ ກ່ຽວກັບການແບ່ງແຍກເຂດນີ້ກັບສ່ວນທີ່ຍັງເຫຼືອຂອງເຂດ ກາຊາ, ບັງຄັບໃຫ້ສາມັນຊົນ ປາແລັດສະຕິນ ຕ້ອງປະລະເຂດນີ້ຕະຫຼອດການ, ຜ່ານນັ້ນ, ກໍ່ສ້າງເຂດປ້ອງກັນຄວາມໝັ້ນຄົງໃໝ່ໃຫ້ແກ່ ອິດສະຣາແອັນ. ທ່ານ Volker Turk, ຂ້າຫຼວງໃຫຍ່ສະຫະປະຊາຊາດກ່ຽວກັບສິດທິມະນຸດ, ກ່າວເຕືອນວ່າ:

        “ເລື່ອງເຂົ້າເຖິງທາງທິດເໜືອເຂດ ກາຊາ ໃນປະຈຸບັນແມ່ນຖືກຈຳກັດທີ່ສຸດ. ເກືອບຄືວ່າບໍ່ມີບັ້ນຊ່ວຍເຫຼືອຄັ້ງໃດເຂົ້າເຂດນີ້ໄດ້ໃນຫຼາຍອາທິດຜ່ານມາ ຍ້ອນບັນດາຄຳສັ່ງຈຳກັດບໍ່ສອດຄ່ອງກັບກົດໝາຍ, ເຮັດໃຫ້ຫຼາຍຄົນປະເຊີນໜ້າກັບສະພາບເສຍຊີວິດວິດຍ້ອນອຶດຫິວ. ການຕິດຕໍ່ກັບພາຍນອກກໍ່ຖືກຈຳກັດທີ່ສຸດ, ສະພາບການຢູ່ທາງທິດເໜືອເຂດ ກາຊາ ຊົ່ວຮ້າຍລົງໃນແຕ່ລະມື້ ຕາມແບບບໍ່ສາມາດຄາດຄິດໄດ້ ແລະ ບັນດານະໂຍບາຍ ແລະ ວິທີການປະພຶດຂອງອຳນາດການປົກຄອງ ອິດສະຣາແອັນ ມີຄວາມສ່ຽງກວາດລ້າງຊາວ ປາແລັດສະຕິນ ໃຫ້ອອກຈາກເຂດນີ້ຈົນໝົດກ້ຽງ”.

ຄວາມເຄັ່ງຕຶງລະຫວ່າງ ອິດສະຣາແອັນ - ສະຫະປະຊາຊາດ ເພີ່ມຂຶ້ນ

        ບັນດາຄວາມມານະພະຍາຍາມຂອງປະຊາຄົມສາກົນໃນເລື່ອງກໍ່ຄວາມດັນຕໍ່ບັນດາຝ່າຍ, ພິເສດແມ່ນສຳລັບລັດຖະບານ ອິດສະຣາແອັນ, ເພື່ອຮັບມືກັບສະພາບການມະນຸດສະທຳຢູ່ທາງທິດເໜືອເຂດ ກາຊາ ຍິ່ງນັບມື້ນັບຫຍຸ້ງຍາກຂຶ້ນຕື່ມ ເມື່ອ ວັນທີ 28 ຕຸລາ, ສະພາແຫ່ງຊາດ ອິດສະຣາແອັນ ໄດ້ປ່ອນບັດຮັບຮອງເອົາຮ່າງກົດໝາຍວ່າດ້ວຍການເກືອດຫ້າມອົງການກູ້ໄພກູ້ຊີບ ແລະ ວຽກເຮັດງານທຳຂອງສະຫະປະຊາຊາດ ສະຫງວນໃຫ້ຊາວລີ້ໄພ ປາແລັດສະຕິນ (UNRWA) ເຄື່ອນໄຫວໃນຜືນແຜ່ນດິນຂອງ ອິດສະຣາແອັນ. ຂໍ້ຕົກລົງນີ້ຂອງ ອິດສະຣາແອັນ ບໍ່ພຽງແຕ່ສືບຕໍ່ເຮັດໃຫ້ເພີ່ມຄວາມເຄັ່ງຕຶງລະຫວ່າງປະເທດນີ້ກັບສະຫະປະຊາຊາດ, ໃນຂະນະທີ່ກ່ອນໜ້ານັ້ນ ອິດສະຣາແອັນ ເຄີຍຖະແຫຼງວ່າ ຖືທ່ານເລຂາທິການໃຫຍ່ສະຫະປະຊາຊາດ Antonio Guterres ແມ່ນຜູ້ທີ່ “ບໍ່ໄດ້ຮັບການຕ້ອນຮັບ” (persona non grata) ແລະ ຫ້າມເຂົ້າເມືອງປະເທດນີ້ເທົ່ານັ້ນ, ຫາກຍັງສ້າງສິ່ງທ້າທາຍຢ່າງໃຫຍ່ຫຼວງຕໍ່ກັບບັນດາພັນທະມິດຂອງ ອິດສະຣາແອັນ ອີກດ້ວຍ. ທ່ານ Mathew Miller, ໂຄສົກກະຊວງການຕ່າງປະເທດ ອາເມລິກາ, ໃຫ້ຮູ້ວ່າ:

        “ພວກຂ້າພະເຈົ້າເດັດດ່ຽວຄັດຄ້ານບໍ່ວ່າຄວາມມານະພະຍາຍາມໃດເພື່ອປິດລ້ອມ, ປະໃຫ້ສາມັນຊົນຖືກອຶດຫິວ, ແບ່ງແຍກທາງພາກເໜືອເຂດ ກາຊາ ກັບສ່ວນທີ່ຍັງເຫຼືອຂອງເຂດ ກາຊາ. ພວກຂ້າພະເຈົ້າກໍ່ໄດ້ຊີ້ແຈ້ງກັບ ອິດສະຣາແອັນ ວ່າ, ພວກຂ້າພະເຈົ້າຢາກໃຫ້ເຄື່ອງອຸປະຖຳມະນຸດສະທຳໄດ້ໄປເຖິງສາມັນຊົນ ແລະ ສາມັນຊົນໄດ້ຮັບການປົກປ້ອງ”.

        ມີຫຼາຍປະເທດ ແລະ ອົງການຈັດຕັ້ງສາກົນອື່ນກໍ່ຕຳໜິຕິຕຽນຂໍ້ຕົກລົງເກືອດຫ້າມ UNRWA ຂອງສະພາແຫ່ງຊາດ ອິດສະຣາແອັນ, ຖືວ່າ ການກະທຳນີ້ໄດ້ສ້າງສິ່ງທີ່ອັນຕະລາຍ, ໄປຝືນກັບເນື້ອໃນຈິດໃຈຂອງກົດບັດສະຫະປະຊາຊາດ ແລະ ເຮັດໃຫ້ສາມັນຊົນ ປາແລັດສະຕິນ ເຈັບລ້ຳລະກຳໃຈຕື່ມອີກ, ພິເສດແມ່ນຢູ່ເຂດ ກາຊາ. ສ່ວນຝ່າຍ UNRWA, ທ່ານ Adnan Abu Hasna, ທີ່ປຶກສາດ້ານສື່ສານຂອງອົງການນີ້ຖະແຫຼງວ່າ, ຂໍ້ຕົກລົງເກືອດຫ້າມອົງການມະນຸດສະທຳຂອງສະຫະປະຊາຊາດ ເຄື່ອນໄຫວໃນຜືນແຜ່ນດິນຂອງ ອິດສະຣາແອັນ ກໍ່ໝາຍຄວາມວ່າແມ່ນການລົ້ມລະລາຍຂອງວິວັດທະນາການມະນຸດສະທຳທັງໝົດຢູ່ເຂດ ກາຊາ.