ກອງປະຊຸມສະໄໝສາມັນເທື່ອທີ 8, ສະພາແຫ່ງຊາດ ຫວຽດນາມ ຊຸດທີ 15 (ພາບ: quochoi.vn)

        ທີ່ກອງປະຊຸມສະໄໝສາມັນເທື່ອທີ 8, ສະພາແຫ່ງຊາດ ຫວຽດນາມ ຊຸດທີ 15, ຕີລາຄາໝາກຜົນການປະຕິບັດແຜນການພັດທະນາເສດຖະກິດ, ສັງຄົມປີ 2024, ຄາດຄະເນແຜນການພັດທະນາເສດຖະກິດ - ສັງຄົມໃນປີ 2025, ບັນດາສະມາຊິກສະພາແຫ່ງຊາດຢືນຢັນວ່າ ສະພາບການເສດຖະກິດ ຫວຽດນາມ ນັບແຕ່ຕົ້ນປີມາຮອດປະຈຸບັນມີສັນຍານຕັ້ງໜ້າຫຼາຍຢ່າງ. ເຖິງຢ່າງໃດກໍ່ຕາມ, ເພື່ອໃຫ້ເສດຖະກິດບັນລຸລະດັບການເຕີບໂຕແບບຍືນຍົງ, ມີສະຖຽນລະພາບ, ຕ້ອງເຫັນແຈ້ງບັນດາສິ່ງທ້າທາຍ ເພື່ອຈາກນັ້ນຈະມີບັນດາມາດຕະການແກ້ໄຂໃຫ້ເໝາະສົມ, ປະຕິບັດສຳເລັດເປົ້າໝາຍພັດທະນາເສດຖະກິດໃນປີ 2024 ແລະ ສ້າງທ່ວງທ່າໃຫ້ແກ່ຊຸມປີຕໍ່ໆໄປ.

        ນັບແຕ່ຕົ້ນປີມາຮອດປະຈຸບັນ, ໃນສະພາບທົ່ວໂລກຂາດຄວາມສະຖຽນລະພາບ, ຜົນສະທ້ອນຢ່າງໜັກໜ່ວງຈາກໄພທຳມະຊາດ, ພາຍຸນ້ຳຖ້ວມຢູ່ພາຍໃນປະເທດ, ແຕ່ເສດຖະກິດ ຫວຽດນາມ ຍັງບັນລຸໝາກຜົນຕັ້ງໜ້າຫຼາຍຢ່າງ. ການເຕີບໂຕ GDP ໃນ 9 ເດືອນບັນລຸ 6,82%; ຄາດວ່າທັງປີບັນລຸ 6,8-7%, ສູງກວ່າຄາດໝາຍທີ່ສະພາແຫ່ງຊາດໄດ້ມອບໝາຍໃຫ້ແມ່ນ 6 – 6,5%, ນອນໃນຈຳນວນປະເທດມີລະດັບການເຕີບໂຕສູງຢູ່ພາກພື້ນ ແລະ ໃນໂລກ ແລະ ໄດ້ຮັບການຕີລາຄາສູງຈາກບັນດາອົງການຈັດຕັ້ງສາກົນໃຫຍ່, ມີອິດທິພົນຊື່ສຽງ.

ບຸກທະລຸຢ່າງແຮງກ່ຽວກັບລະບອບລະບຽບການ, ແກ້ໄຂຄວາມຫຍຸ້ງຍາກ, ຂໍ້ຕິດຂັດໃຫ້ແກ່ວິສາຫະກິດ

        ຫວຽດນາມ ພົ້ນເດັ່ນຂຶ້ນດ້ວຍຫຼາຍຈຸດພົ້ນເດັ່ນ, ຄື: ດັດຊະນີນະວັດຕະກຳທົ່ວໂລກຫຍັບຂຶ້ນ 4 ຂັ້ນ, ດັດຊະນີຄວາມຜາສຸກຫຍັບຂຶ້ນ 11 ຂັ້ນ, ດັດຊະນີລັດຖະບານເອເລັກໂຕນິກຫຍັບຂຶ້ນ 15 ຂັ້ນ, ພິເສດ, ດັດຊະນີຄວາມປອດໄພທາງເຄືອຂ່າຍອິນເຕີເນັດເລື່ອນຂຶ້ນ 8 ຂັ້ນ, ຢືນອັນດັບທີ 17/194 ປະເທດ. ເຖິງຢ່າງໃດກໍ່ຕາມ, ບັນດາສະມາຊິກສະພາແຫ່ງຊາດຖືວ່າ, ຫວຽດນາມ ຍັງປະເຊີນໜ້າກັບສິ່ງທ້າທາຍຫຼາຍຢ່າງເພື່ອຊຸກຍູ້ການປະຕິບັດເປົ້າໝາຍການເຕີບໂຕເສດຖະກິດ, ສ້າງຄວາມສະຖຽນລະພາບສັງຄົມ. ທ່ານນາງ ດັ້ງບິກງອັກ, ສະມາຊິກສະພາແຫ່ງຊາດແຂວງ ຮ່ວາບິ່ງ, ຖືວ່າ:

ທ່ານນາງ ດັ້ງບິກງອັກ, ສະມາຊິກສະພາແຫ່ງຊາດແຂວງ ຮ່ວາບິ່ງ (ພາບ: quochoi.vn)

        “ສະພາແຫ່ງຊາດ, ລັດຖະບານ ສືບຕໍ່ປ່ຽນແປງໃໝ່ຢ່າງແຮງໃນວຽກງານກໍ່ສ້າງ, ເຮັດໃຫ້ສົມບູນແບບ ແລະ ການປະຕິບັດກົດໝາຍ. ຕີລາຄາຄຸນນະພາບ, ສະພາບການບັນດານະໂຍບາຍທີ່ໄດ້ປະກາດໃຊ້ຢ່າງເປັນປະຈຳ ເພື່ອມີການດັດປັບຢ່າງທັນການ. ພິເສດ, ຕ້ອງມີກົນໄກກວດກາຕີລາຄາຄວາມຮັບຜິດຊອບຂອງອົງການຈັດຕັ້ງ, ສ່ວນບຸກຄົນຢ່າງຈະແຈ້ງໃນການປະກາດໃຊ້ບັນດາເອກະສານນິຕິກຳທີ່ບໍ່ສອດຄ່ອງກັບສະພາບຕົວຈິງຂອງຊີວິດ, ກີດຂວາງການພັດທະນາເສດຖະກິດ - ສັງຄົມ.”

        ໂດຍມີຄວາມເຫັນດີຕໍ່ບັນດາໜ້າທີ່, ມາດຕະການແກ້ໄຂຕົ້ນຕໍຂອງລັດຖະບານໃນປີ 2025, ທ່ານ ຈິ່ງລາມຊິງ, ສະມາຊິກສະພາແຫ່ງຊາດແຂວງ ອານຢາງ, ສະເໜີຕໍ່ລັດຖະບານຕ້ອງສືບຕໍ່ກວດກາ, ມີມາດຕະການແກ້ໄຂຢ່າງຄົບຊຸດ, ສ້າງບາດກ້າວບຸກທະລຸເພື່ອສ້າງກຳລັງໜູນຊຸກຍູ້ວິສາຫະກິດຢູ່ພາຍໃນປະເທດ, ນັກທຸລະກີດ startup.

        “ການສົ່ງອອກຂອງພາກພື້ນທີ່ມີເງິນລົງທຶນໂດຍກົງຈາກຕ່າງປະເທດ (FDI) ບັນລຸອັດຕາສູງ ຊີ້ໃຫ້ເຫັນວ່າ ບັນດາວິສາຫະກິດນີ້ທຳມາຫາກິນໄດ້ເປັນຢ່າງດີ, ບົນພື້ນຖານບັນດາກົນໄກ, ນະໂຍບາຍບຸລິມະສິດຂອງລັດ. ເຖິງຢ່າງໃດກໍ່ຕາມ, ບັນດາວິສາຫະກິດພາຍໃນປະເທດຍັງປະສົບກັບຄວາມຫຍຸ້ງຍາກຫຼາຍຢ່າງ. ສະເໜີຕໍ່ລັດຖະບານສືບຕໍ່ໜູນຊ່ວຍດ້ານນະໂຍບາຍ, ເພື່ອໜູນຊ່ວຍບັນດາພາກສ່ວນເສດຖະກິດຢູ່ພາຍໃນປະເທດແກ້ໄຂຄວາມຫຍຸ້ງຍາກ”.

ກຳນົດແຈ້ງກຳລັງໜູນຂອງການເຕີບໂຕ

        ເພື່ອຊຸກຍູ້ການເຕີບໂຕພື້ນຖານເສດຖະກິດແບບຍືນຍົງ, ມີສະມາຊິກສະພາແຫ່ງຊາດຫຼາຍທ່ານສະແດງຄວາມປະທັບໃຈເມື່ອລັດຖະບານໄດ້ກຳນົດແຈ້ງການກຳນົດທິດເສດຖະກິດສີຂຽວ, ແມ່ນໂອກາດບຸກທະລຸ ແລະ ແມ່ນທິດກ້າວເດີນໃຫ້ແກ່ ຫວຽດນາມ. ທ່ານນາງ ເລດ່າວອານຊວັນ, ສະມາຊິກສະພາແຫ່ງຊາດແຂວງ ຝູອຽນ, ສະເໜີວ່າ:

ທ່ານນາງ ເລດ່າວອານຊວັນ, ສະມາຊິກສະພາແຫ່ງຊາດແຂວງ ຝູອຽນ (ພາບ: quochoi.vn)

        “ເສີມຂະຫຍາຍບົດບາດນຳໜ້າ, ນຳພາຂອງລັດໃນການຫັນເປັນສີຂຽວ. ຂ້າພະເຈົ້າສະເໜີຕ້ອງປະກາດໃຊ້ບັນດາຂໍ້ກຳນົດນີ້ໂດຍໄວໃນປີ 2025, ເບື້ອງຕົ້ນແມ່ນໃຫ້ບຸລິມະສິດການສ້າງຂໍ້ກຳນົດກ່ຽວກັບອັດຕາລາຍຈ່າຍໃຫ້ແກ່ການຈັດຊື້ສາທາລະນະສີຂຽວໃນລາຍຈ່າຍການຈັດຊື້, ໃຫ້ບຸລິມະສິດຜັນຂະຫຍາຍໝວດຜະລິດຕະພັນສີຂຽວຄືດັ່ງອັດຕາສ່ວນທີ່ບັງຄັບ, ຊຸກຍູ້ການບໍລິໂພກສີຂຽວນັບແຕ່ຂັ້ນທ້ອງຖິ່ນ”

        ບັນດາສະມາຊິກສະພາແຫ່ງຊາດກໍ່ສະເໜີລັດຖະບານວ່າ, ພ້ອມກັບການສຸມໃສ່ບັນດາກຳລັງໜູນເຕີບໂຕທີ່ເປັນມູນເຊື້ອ, ພ້ອມກັນນັ້ນກໍ່ຕ້ອງຍູ້ແຮງການປະຕິບັດບັນດາກຳລັງໜູນເຕີບໂຕໃໝ່, ຄື: ວິທະຍາສາດ, ເຕັກໂນໂລຊີ, ນະວັດຕະກຳ, ການຫັນເປັນດີຈີຕອນ, ຫັນເປັນສີຂຽວ. ທ່ານນາງ ເຈິ່ງທິເວິນ, ສະມາຊິກສະພາແຫ່ງຊາດແຂວງ ບັກນິງ, ຊີ້ແຈ້ງວ່າ:

        “ຂ້າພະເຈົ້າເຫັນດີຕໍ່ບັນດາໝວດໜ້າທີ່, ມາດຕະການຂອງລັດຖະບານ. ໃນນັ້ນ, ມີເລື່ອງໃຫ້ບຸລິມະສິດເຮັດໃໝ່ບັນດາກຳລັງໜູນການເຕີບໂຕທີ່ເປັນມູນເຊື້ອ ແລະ ຊຸກຍູ້ກຳລັງໜູນໃໝ່ຢ່າງແຮງ. ເພື່ອປະກອບສ່ວນປະຕິບັດມາດຕະການແກ້ໄຂດັ່ງກ່າວໃຫ້ມີປະສິດທິຜົນ, ຂ້າພະເຈົ້າສະເໜີຕ້ອງກຳນົດແຈ້ງ 1 ໃນຈຳນວນ 3 ຂອດບຸກທະລຸຍຸດທະສາດ ທີ່ສວມບົດບາດເປັນກຸນແຈຂອງການພັດທະນາ, ປະຕິບັດເປົ້າໝາຍນຳ ຫວຽດນາມ ໃຫ້ກາຍເປັນປະເທດມີລາຍຮັບສູງໃນປີ 2045”.

        ຕາມບັນດາສະມາຊິກສະພາແຫ່ງຊາດແລ້ວ, ເລື່ອງລັດຖະບານສືບຕໍ່ກວດກາ, ກຳນົດແຈ້ງ, ຄົບຖ້ວນບັນດາຈຸດອຸດຕັນເພື່ອແກ້ໄຂ, ແກ້ໄຂຢ່າງທັນການ, ເຖິງຖອງ, ກຳນົດແຈ້ງບັນດາກຳລັງໜູນການເຕີບໂຕໃນຊຸມເດືອນທີ່ຍັງເຫຼືອຂອງປີ 2024 ແລະ ທັງປີ 2025 ແມ່ນປັດໄຈສຳຄັນເພື່ອໃຫ້ ຫວຽດນາມ ບັນລຸ ແລະ ລືນກາຍບັນດາເປົ້າໝາຍທີ່ສະພາແຫ່ງຊາດມອບໝາຍໃຫ້, ນຳເສດຖະກິດພັດທະນາແບບຍືນຍົງ.