(vovworld)- ປີ 2012 ຜ່ານມາແມ່ນປີທີ່ພື້ນຖານເສດຖະກິດ ຫວຽດນາມ ປະສົບກັບຄວາມຫຍຸ້ງຍາກຫລາຍຢ່າງ. ເຖິງຢ່າງໃດກໍຕາມ, ຂົງເຂດກະສິກຳຍັງຄົງແມ່ນຫນຶ່ງໃນບັນດາຈຸດພົ້ນເດັ່ນໃນຂະນະທີ່ການສົ່ງອອກຜະລິດຕະພັນກະເສດບັນລຸລະດັບສະຖິຕິໃຫມ່ຕື່ມອີກ, ນຳ ຫວຽດນາມ ຢືນອັນດັບແຖວໜ້າຂອງໂລກ ກ່ຽວກັບການສົ່ງອອກເຂົ້າສານ, ກາເຟ. ແຕ່ສິ່ງທີ່ມີຄວາມໝາຍກວ່ານັ້ນ, ແມ່ນໃນຄວາມຫຍຸ້ງຍາກ ກະສິກຳໄດ້ກາຍເປັນບ່ອນອີງທີ່ໝັ້ນແກ່ນເພື່ອໃຫ້ພື້ນຖານເສດຖະກິດຂອງປະເທດຊາດຜ່ານຜ່າໄລຍະຫຍຸ້ງຍາກ.
ໃນປີຜ່ານມາ, ຍ້ອນຖືກຜົນກະທົບຈາກວິກິດການເສດຖະກິດໂລກ, ຕະຫລາດຖືກຮັດແຄບ, ລາຄາສິນຄ້າບາງປະເພດຖືກຫລຸດລົງຢ່າງແຮງ, ແຕ່ການຜະລິດກະສິກຳເວົ້າລວມຍັງຄົງຮັກສາລະດັບຈະເລີນເຕີບໂຕດີພໍສົມຄວນ ແລະ ປະກອບສ່ວນສຳຄັນໃຫ້ແກ່ການສົ່ງອອກຂອງທັງປະເທດ. ໄລ່ໝົດປີ 2012, ຍອດວົງເງິນສົ່ງອອກກະສິກຳບັນລຸ 27,54 ຕື້ USD (ເພີ່ມຂຶ້ນ 9,7% ເມື່ອທຽບໃສ່ປີ 2011). ໃນຂະນະນັ້ນ, ວົງເງິນສົ່ງອອກບັນດາປະເພດສິນຄ້າຄື: ວັດສະດຸກໍ່ສ້າງ, ຝຸ່ນເຄມີຮັບໃຊ້ການຜະລິດກະສິກຳບັນລຸ 16,94 ຕື້ USD (ເພີ່ມຂຶ້ນ 5%). ເປັນອັນວ່າ ສະເພາະຂະແຫນງກະສິກຳສົ່ງອອກເກີນດຸນເຖິງ 10,6 ຕຶ້ USD. ໃນຈຳນວນປະເພດສິນຄ້າກະສິກຳສົ່ງອອກ, ມີເຖິງ 7 ປະເພດບັນລຸວົງເງິນສົ່ງອອກ 1 ຕື້ USD ຂຶ້ນໄປ ນັ້ນແມ່ນ: ເຂົ້າສານ, ກາເຟ, ຢາງພາລາ, ເຄື່ອງເຟນີເຈີ, ໝາກມ່ວງຫິມະພານ, ມັນຕົ້ນ ແລະ ສິນໃນນ້ຳ. ພິເສດ, ການສົ່ງອອກເຂົ້າສານບັນລຸສະຖິຕິໃຫມ່ ດ້ວຍ 8,1 ລ້ານໂຕນ (ເພີ່ມຂຶ້ນ 13,9%), ມູນຄ່າເກັບມາໄດ້ແມ່ນ 3,7 ຕື້ USD, ນຳ ຫວຽດນາມ ຢືນອັນດັບຫນຶ່ງຂອງໂລກກ່ຽວກັບການສົ່ງອອກເຂົ້າສານ. ເມື່ອເວົ້າເຖິງບັນດາຜົນງານຂອງກະສິກຳ, ເປັນຕົ້ນແມ່ນການສົ່ງອອກເຂົ້າສານຂອງຫວຽດນາມ ໃນໄລຍະຜ່ານມາ, ທ່ານ ຫງວຽນງອກຈີງອກ, ຜູ້ຊ່ຽວຊານກົມ ປູກຝັງ ຂຶ້ນກັບກະຊວງກະສິກຳ ແລະ ພັດທະນາຊົນນະບົດ ຫວຽດນາມ ຖືວ່າ:
“ ຫວຽດນາມ ທັງມີຍຸດທະສາດກໍ່ສ້າງຕະຫລາດ, ທັງມີການຫັນປ່ຽນແນວພັນປູກຢ່າງແຂງແຮງ ເພື່ອຍົກສູງຄຸນນະພາບຂອງເຂົ້າສານ, ສະນັ້ນ ຕອບສະຫນອງຄວາມຕ້ອງການທີ່ມີຫຼາຍຮູບຫຼາບແບບຂອງຕະຫລາດໂລກໄດ້.”
ພາບປະກອບ:internet
|
ປີ 2012 ກໍໄດ້ຮັບຖືວ່າ ແມ່ນປີມີບາດກ້າວບຸກທະລຸໃຫຍ່ເມື່ອແຜນນະໂຍບາຍພັດທະນາບັນດາຮູບແບບທົ່ງນາຂະໜາດໃຫຍ່ ໂດຍກະຊວງກະສິກຳ ແລະ ພັດທະນາຊົນນະບົດ ຫວຽດນາມ ປຸກລະດົມ ໄດ້ເສີມຂະຫຍາຍຢ່າງມີປະສິດທິຜົນໃນເບື້ອງຕົ້ນ ແລະ ໄດ້ຮັບການຜັນຂະຫຍາຍຢ່າງເລິກເຊິ່ງ, ກວ້າງຂວາງໃນທົ່ວປະເທດ. ພ້ອມກັບການພັດທະນາຮູບແບບທົ່ງນາຂະໜາດໃຫຍ່, ເລ່ືອງສະຫລຸບຂະບວນການກໍ່ສ້າງຊົນນະບົດໃຫມ່ ດ້ວຍບັນດາມາດຕະການຕັ້ງຫນ້າ ກ່ຽວກັບການລົງທຶນພື້ນຖານໂຄງລ່າງ, ດຳເນີນການວາງແຜນສັງລວມ, ສົມທົບກັນລະຫວ່າງບັນດານັກວິທະຍາສາດ, ວິສາຫະກິດ ແລະ ຊາວກະສິກອນ ເພື່ອນຳໃຊ້ກົນຈັກເຂົ້າໃນການຜະລິດກະສີກຳ, ສ້າງເຄື່ອງໝາຍຜະລິດຕະພັນກະເສດ ສົມທົບກັບການເປີດກວ້າງຕະຫລາດຈຳຫນ່າຍ ແລະ ສົ່ງອອກ ພວມແມ່ນທິດໃຫມ່ໃນການເປີດກວ້າງການຜະລິດ ແລະ ສົ່ງອອກ. ໃນປີຜ່ານມາ, ກະຊວງກະສິກຳ ແລະ ພັດທະນາຊົນນະບົດ ສືບຕໍ່ປະຕິບັດແຜນຮ່າງສອນວິຊາຊີບໃຫ້ແກ່ຊາວກະສິກອນ ຊຶ່ງລັດຖະບານໄດ້ວາງອອກນັບແຕ່ປີ 2010 ດ້ວຍຈຸດປະສົງ ແຕ່ລະປີ ສອນວິຊາຊີບໃຫ້ແກ່ຊາວກະສິກອນໃຫ້ໄດ້ 1.000.000 ລ້ານຄົນ. ແຜນຮ່າງດັ່ງກ່າວໄດ້ ແລະ ພວມປະກອບສ່ວນຢ່າງຕັ້ງຫນ້າ, ສ້າງການຫັນປ່ຽນໃນການຊຸກຍູ້ການຜະລິດ ແລະ ການສົ່ງອອກບັນດາຜະລິດຕະພັນກະເສດຢ່າງໝັ້ນຄົງ.
ທີ່ກອງປະຊຸມສະຫລຸບວຽກງານຊີ້ນຳ, ບໍລິຫານປີ 2012 ແລະ ວາງອອກໂຄງການຈຸດສຸມປີ 2013 ທີ່ຫາກໍ່ດຳເນີນຢູ່ ຮ່າໂນ້ຍ, ທ່ານ ກາວດຶກຟາດ ລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ຖືວ່າ: ໃນສະພາບຫຍຸ້ງຍາກລວມຂອງພື້ນຖານເສດຖະກິດ, ເລື່ອງຮັດກຸມສິນເຊື່ອ, ການຜັນແປຂອງຕະຫລາດຜະລິດຕະພັນກະເສດບໍ່ອຳນວຍຄວາມສະດວກ, ສິນຄ້າຫລາຍປະເພດຖືກຕົກລາຄາ, ໃນຂະນະໄພທຳມະຊາດເກິດຂຶ້ນຢ່າງຜິດປົກກະຕິນັ້ນ, ບັນດາຜົນງານເຊິ່ງຂະແຫນງກະສິກຳ ຫວຽດນາມ ບັນລຸໄດ້ ແມ່ນມີຄວາມໝາຍຫຼາຍຢ່າງ . ບັນດາຜົນງານດັ່ງກ່າວ ໄດ້ປະກອບສ່ວນສຳຄັນເຂົ້າໃນການຄວບຄຸມໄພເງິນເຟີ້.
ໂດຍກຳນົດວ່າຜະລິດຕະພັນກະເສດ ແມ່ນປະເພດສິນຄ້ານຳມາເຊິ່ງວົງເງິນສົ່ງອອກສູງ ແລະ ຊ່ວຍເຮັດໃຫ້ຜະລິດຕະພັນກະເສດ ຫວຽດນາມ ຮັກສາໄດ້ທີ່ຕັ້ງແກ້ງແຍ້ງໃນການສົ່ງອອກ, ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ກໍສະເຫນີກົນໄກລົງທຶນຢ່າງເໝາະສົມ ເພື່ອໃຫ້ພື້ນຖານກະສິກຳພັດທະນາແບບຍືນຍົງ, ເປັນຕົ້ນແມ່ນສ້າງຜະລິດຕະພັນກະເສດທີ່ມີເຄື່ອງໝາຍການຄ້າແຫ່ງຊາດ. ທ່ານ ກາວດືກຟາດ, ລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າສົມທົບກັບບັນດາອົງການສາກົນເພື່ອສ້າງບັນດາຂັ້ນຕອນເຕັກນິກ, ໃນນັ້ນ ວິສາຫະກິດພ້ອມກັບລັດຫນູນຊ່ວຍຊາວກະສິກອນຜະລິດຕາມຂັ້ນຕອນດ້ານເຕັກນິກ ຮັບປະກັນຄວາມປອດໄພ, ສະມັດຕະພາບ, ຄຸນນະພາບສູງກວ່າ, ເປີດທິດໃຫມ່ໃຫ້ແກ່ບັນດາວິສາຫະກິດເກັບຊື້, ຈຳຫນ່າຍສິນຄ້າ…”
ປີ 2012 ໄດ້ຜ່ານໄປແລ້ວ, ໃນສະພາບປະສົບກັບຄວາມຫຍຸ້ງຍາກຫລາຍຢ່າງ, ແຕ່ວົງເງິນການສົ່ງອອກຍັງຄົງປະກອບ 27,54 ຕື້ USD ໃນຍອດວົງເງິນສົ່ງອອກຂອງທັງປະເທດ 114,6 ຕື້ USD, ນີ້ແມ່ນໝາກຜົນດີພໍສົມຄວນ. ບັນດາຜົນງານທີ່ ຂະແຫນງກະສິກຳ ຫວຽດນາມ ບັນລຸໄດ້ ໃນປີ 2012 ຈະເປັນກຳລັງຫນູນສຳຄັນເພື່ອໃຫ້ກະສິກຳ, ຊົນນະບົດ ແລະ ຊາວກະສິກອນ ບັນລຸບາດກ້າວພັດທະນາໃຫມ່.