(vovworld)- ຜ່ານຜ່າຄວາມຫຍຸ້ງຍາກໃນຊຸມເດືອນຕົ້ນປີ 2012, ບັນດາຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳສົ່ງອອກຂອງຫວຽດນາມພວມຟື້ນຕົວເທື່ອລະກ້າວ ແລະ ບັນລຸໝາກຜົນຫລາຍພໍສົມຄວນ. ໃນນັ້ນ ຜະລິດຕະພັນກະເສດສົ່ງອອກບາງປະເພດທີ່ບັນລຸມູນຄ່າກວ່າ 1 ຕື້ USD ລວມມີ: ສິນໃນນ້ຳ, ເຂົ້າສານ, ກາເຟ, ເຄື່ອງເຟີນີເຈີ, ຢາງພາລາ, ໝາກມ່ວງຫິມະພານ.
ສິນໃນນ້ຳສົ່ງອອກບັນລຸລະດັບສູງໃນ 9 ເດືອນຕົ້ນປີ 2012
ພາບ:vietnam.vn
|
ຕາມຕົວເລກຂອງກະຊວງກະສິກຳ ແລະ ພັດທະນາຊົນນະບົດ ຫວຽດນາມແລ້ວ, ວົງເງິນສົ່ງອອກຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳ ຂອງຫວຽດນາມ ໃນ 9 ເດືອນຜ່ານມາບັນລຸໄດ້ 20,4 ຕື້ USD, ເພີ່ມຂຶ້ນກວ່າ 10% ເມື່ອທຽບໃສ່ໄລຍະດຽວກັນຂອງປີກາຍ. ຫນ້າສົນໃຈແມ່ນ ໃນສະພາບການສົ່ງອອກລວມຂອງທົ່ວປະເທດ, ຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳຍັງຄົງຮັກສາລະດັບສົ່ງອອກເປັນປົກກະຕິ ແລະ ມີທ່າອ່ຽງເພີ່ມຂຶ້ນອີກ. ປະຈຸບັນ, ສິນໃນນ້ຳສົ່ງອອກບັນລຸລະດັບສູງສຸດ, ໃນ 9 ເດືອນຕົ້ນປີບັນລຸ 4,5 ຕື້ USD, ເພີ່ມຂຶ້ນປະມານ 3,5 % ເມື່ອທຽບໃສ່ໄລຍະດຽວກັນຂອງປີກາຍ. ເຂົ້າສານສົ່ງອອກ 6,2 ລ້ານໂຕນ, ບັນລຸມູນຄ່າ 2,78 ຕື້ USD. ເພື່ອບັນລຸໄດ້ໝາກຜົນດັ່ງກ່າວແມ່ນຍ້ອນມີນະໂຍບາຍຫນູນຊ່ວຍຊາວກະສິກອນ, ດ້ວຍຈຸດໝາຍພັດທະນາກະສິກຳແບບຍືນຍົງ, ລັດຖະບານໄດ້ມີແຜນນະໂຍບາຍກໍ່ສ້າງລະບົບສາງສາມາດບັນຈຸເຂົ້າສານໄດ້ 4 ລ້ານໂຕນ ແລະ ຖືວ່າ ນີ້ແມ່ນວຽກງານທີ່ຈຳເປັນສຳລັບບັນດາວິສາຫະກິດສົ່ງອອກ ເພື່ອໃຫ້ຫວຽດນາມ ກາຍເປັນປະເທດສົ່ງອອກແບບອາຊີບ ທ່ານນາງ Bui Thi Thanh Tam ຮອງຜູ້ອຳນວຍການບໍລິສັດທັນຍາຫານພາກເຫນືອ ຫວຽດນາມ ໃຫ້ຮູ້ວ່າ:
“ບັນດາປະເທດຄື ລັດເຊຍ, ອິນເດຍ ແລະ ມ້ຽນມາ ໄດ້ມີນະໂຍບາຍຢຸດຕິການສົ່ງອອກຊົ່ວຄາວ ເພື່ອເພີ່ມລະດັບສະສົມພາຍໃນປະເທດ ແລະ ຮັກສາລາຄາທັນຍາຫານພາຍໃນປະເທດໃຫ້ເປັນປົກກະຕິ. ນີ້ແມ່ນສິ່ງທີ່ພວກເຮົາຕ້ອງຄິດໄລ່ເຖິງ, ບໍ່ຄວນຟ້າວຝັ່ງຂາຍເຂົ້າສານດ້ວຍລາຄາຕ່ຳ ຫາກຈຳເປັນຕ້ອງເພີ່ມທະວີການສະສົມຊົ່ວຄາວ, ເມື່ອຮອດເວລາເໝາະສົມຈຶ່ງຂາຍ ເຮັດຄືແນວນັ້ນທັງເພີ່ມລາຍຮັບທັງຮັບປະກັນຜົນປະໂຫຍດໃຫ້ແກ່ພໍ່ແມ່ຊາວກະສິກອນ.”
ຕາມບັນດາຜູ້ຊ່ຽວຊານດ້ານເສດຖະກິດແລ້ວ, ການສົ່ງອອກ ຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳໃນໄລຍະຜ່ານມາເຕີບໂຕ ໄດ້ສ່ອງແສງໃຫ້ເຫັນຄວາມສາມາດຮັບມື ແລະ ກຳລັງແກ້ງແຍ້ງຂອງຂະແຫນງກະສິກຳ ຫວຽດນາມໃນສະພາບເສດຖະກິດໂລກພວມຊຸດໂຊມ. ເຖິງຢ່າງໃດກໍຕາມ, ໃນສະພາບຕະຫລາດສົ່ງອອກຢູ່ໂລກພວມຜັນແປໄປຢ່າງສັບສົນຍາກທີ່ຈະຄາດຄະເນໄດ້ນັ້ນ, ເປັນຕົ້ນແມ່ນໃນຊຸມເດືອນທີ່ຍັງເຫລືອຂອງປີນີ້, ໄດ້ຮຽກຮ້ອງໃຫ້ບັນດາວິສາຫະກິດຄວນສືບຕໍ່ກຳໄດ້ກາລະໂອກາດ, ພິເສດຕ້ອງມີນະໂຍບາຍຫນູນຊ່ວຍຊຸກຍູ້ການຜະລິດ, ສ້າງປະຖົມປັດໄຈເພື່ອໃຫ້ການສົ່ງອອກໝ້ັນຄົງ. ທີ່ວາລະປະຊຸມປະຈຳເດືອນ 9 ຂອງລັດຖະບານຜ່ານມາ, ທ່ານນາຍົກລັດຖະມົນຕີ Nguyen Tan Dung ຊີ້ແຈງວ່າ:
“ປະຈຸບັນ ລາຄາທັນຍາຫານເພີ່ມຂຶ້ນ, ມີຕະຫລາດຈຳຫນ່າຍ, ການສົ່ງອອກພວມບັນລຸໝາກຜົນດີ, ສະມັດຕະພາບທັນຍາຫານເພີ່ມຂຶ້ນໃນແຕ່ລະປີ, ລະດູການຈະມາເຖິງຖ້າຫາກພວກເຮົາຫນູນຊ່ວຍດ້ານທຶນຮອນໃຫ້ແກ່ຊາວກະສິກອນເປັນຢ່າງດີ ຂ້າພະເຈົ້າເຊື່ອໝັ້ນວ່າ ລະດູການຕໍ່ໄປກໍ່ຈະໄດ້ຮັບຜົນດີ. ທີສອງ ທ່າໄດ້ປຽບຂອງຊາວກະສິກອນນັ້ນແມ່ນ ສິນໃນນ້ຳ, ສົ່ງອອກປາຈາ, ບາຊາ ແລະ ລ້ຽງກຸ້ງ, ປະຈຸບັນ ຕະຫລາດຈຳຫນ່າຍມີຄວາມສະດວກ, ການສົ່ງອອກເຕີບໂຕຢ່າງແຮງ ສະນັ້ນ ພວກເຮົາຄວນຊຸກຍູ້ທຸກດ້ານ, ພິເສດແມ່ນບັນດາຂົງເຂດສົ່ງອອກທີ່ພວກເຮົາພວມມີທ່າໄດ້ປຽບ. ພວກເຮົາກໍຄວນຍູ້ແຮງການປຸງແຕ່ງເພື່ອຍົກສູງຄຸນຄ່າການສົ່ງອອກ.”
ຫວຽດນາມ ແມ່ນປະເທດສົ່ງອອກກາເຟຫລາຍກວ່າໝູ່ໃນໂລກ
ພາບ: internet
|
ຕາມກະຊວງອຸດສາຫະກຳ ແລະ ການຄ້າ ຫວຽດນາມ ແລ້ວ,ໃນ 9 ເດືອນຂອງປີ 2012, ຍອດວົງເງິນສົ່ງອອກລວມຂອງທັງປະເທດແມ່ນ 83,78 ຕື້ USD, ເປັນຫນ້າສົນໃຈແມ່ນລະດັບການສົ່ງອອກເພີ່ມຂຶ້ນສູງກວ່າລະດັບການນຳເຂົ້າ ແລະ ຫວຽດນາມໄດ້ສົ່ງອອກສິນຄ້າເກີນດູນປະມານ 34 ລ້ານ USD.ໃນນັ້ນ ຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳສົ່ງອອກ ໄດ້ປະກອບສ່ວນຫລາຍພໍສົມຄວນເຂົ້າໃນລະດັບການສົ່ງອອກລວມ.