(vovworld)- ໝາກລິ້ນຈີ່ໄດ້ສົ່ງໄປຂາຍຢູ່ ເອເມລິກາ, ອົດສະຕາລີ, ຝລັ່ງ, ມາເລເຊຍ ແລະ ປະເທດຈຳນວນຫນຶ່ງໃນໄລຍະຜ່ານມາ ນີ້ແມ່ນສັນຍານຕັ້ງຫນ້າໃຫ້ແກ່ສົ້ນອອກສຳລັບໝາກໄມ້ພິເສດບາງປະເພດຢູ່ຫວຽດນາມ. ນີ້ແມ່ນກາລະໂອກາດ, ແມ່ນບາດລ້ຽວໃຫຍ່ ແລະ ແມ່ນປະຖົມປັດໄຈເພື່ອໃຫ້ບັນດາຜະລິດຕະພັນກະເສດປະເພດອື່ນຂອງຫວຽດນາມ ຖືກສົ່ງໄປຂາຍຢູ່ຕະຫລາດໂລກ. ບົດຂຽນຂອງນັກຂ່າວ ຈູງຖຸຍ ດ້ວຍຫົວຂໍ້ວ່າ: ການສົ່ງອອກໝາກລິ້ນຈີ່ ແລະ ກາລະໂອກາດໃຫ້ແກ່ການສົ່ງອອກຜະລິດຕະພັນກະເສດຫວຽດນາມ.
 |
ຫວຽດນາມ ແມ່ນປະເທດມີຄວາມສາມາດບົ່ມຊ້ອນກ່ຽວກັບຜະລິດຕະພັນກະເສດ ແລະ ມີທ່າແຮງໃນການສົ່ງອອກໝາກໄມ້, ເຖິງຢ່າງໃດກໍຕາມ ຍ້ອນ ເຕັກໂນໂລຊີປູກຝັງ, ຮັກສາ ແລະ ໂຄສະນາຜະລິດຕະພັນຍັງຈຳກັດຢູ່ ສະນັ້ນ ບໍໍ່ທັນມີທີ່ຕັ້ງໃນຕະຫຼາດສາກົນ. ເພື່ອໃຫ້ບັນດາປະເພດໝາກໄມ້ຂອງຫວຽດນາມ ມີທີ່ຕັ້ງຢ່າງໝັ້ນຄົງໃນບັນດາຕະຫລາດນຳເຂົ້າຜະລິດຕະພັນທີ່ມີຄຸນນະພາບສູງ ແມ່ນຕ້ອງຮັບປະກັນດ້ານຫລັກອະນາໄມ, ຄວາມປອດໄພດ້ານສະບຽງອາຫານ, ທັງຈັດຕັ້ງການຜະລິດ, ວາງແຜນຜັງເຂດປູກສະເພາະດ້ວຍເນື້ອທີ່ກວ້າງໃຫຍ່ ແລະ ເປັນລະບົບ, ຮັບປະກັນຄຸນນະພາບ, ຕົ້ນກຳເນີດ. ທ່ານນາງ ຫງວຽນທິຮ່ວາງທູຍ, ຜູ້ຕາງຫນ້າດ້ານການຄ້າ ຫວຽດນາມ ປະຈຳອົດສະຕາລີ ຖືວ່າ:
“ເລື່ອງໝາກໄມ້ຫວຽດນນາມໄດ້ຮັບຫນັງສືອະນຸຍາດສົ່ງໄປຂາຍຢູ່ ອົດສະຕາລີ ໃນ ປະຈຸບັນ ແມ່ນມີຄວາມໝາຍສຳຄັນທີ່ສຸດ, ເພາະວ່າ ອົດສະຕາລີ ແມ່ນຫນຶ່ງໃນບັນດາປະເທດມີ ຂໍ້ກຳນົດກ່ຽວກັບການກວດກາໂລກລະບາດຢ່າງເຂັ້ມງວດທີ່ສຸດໃນໂລກ. ສຳລັບຫວຽດນາມ ເຂົາເຈົ້າຈະເຈລະຈາ ແລະ ເປີດປະຕູຂຳເຂົ້າໝາກໄມ້ແຕ່ລະປະເພດ, ຖ້າຫາກພວກເຮົາເຈລະຈາກ່ຽວກັບໝາກລິ້ນຈີ່ສຳເລັດຜົນຈະເປັນພື້ນຖານສ້າງຄວາມສະດວກໃຫ້ໝາກໄມ້ປະເພດອື່ນ. ເພື່ອສົ່ງໝາກໄມ້ໄປຂາຍຢູ່ ອົດສະຕາລີໄດ້ ຕ້ອງຕອບສະຫນອງໃຫ້ໄດ້ 5 ມາດຖານ: ເຂດປູກ, ຮາກຖານຫຸ້ມຫໍ່, ການຕິດສະແຕມຍີ່ຫໍ້, ສ່ອງລັງສີ ກໍຄືກວດກາໂລກລະບາດສຳລັບສິນຄ້າກ່ອນຈະສົ່ງອອກ.”
ເລື່ອງຕະຫລາດ ອາເມລິກາ ເປີດປະຕູນຳເຂົ້າໝາກໄມ້ສອງປະເພດຂອງຫວຽດນາມ ນັ້ນແມ່ນ ໝາກລິ້ນຈີ່ ແລະ ໝາກລຳໄຍ ພ້ອມກັບແຜນການສືບຕໍ່ສົ່ງບັນດາປະເພດໝາກໄມ້ພິເສດຄື: ໝາກນ້ຳນົມ, ໝາກມັງກອນ, ໝາກເງາະ, ໝາກລິ້ນຈີ່ ແລະ ໝາກມ່ວງໄປຂາຍຢູ່ບັນດາຕະຫລາດຄື: ອາເມລິກາ, ຍີ່ປຸ່ນ, ອົດສະຕາລີ, ນິວເຊີແລນ, ໄຕ້ຫວັນ(ຈີນ)ນັ້ນ ແມ່ນກາລະໂອກາດໃຫຍ່ເພື່ອສົ່ງອອກຜະລິດຕະພັນກະເສດຂອງຫວຽດນາມ ເຂົ້າຕະຫລາດໂລກ. ເຖິງຢ່າງໃດກໍຕາມ, ເພື່ອສົ່ງອອກໝາກໄມ້ຫລາຍປະເພດຂອງຫວຽດນາມ ອອກສູ່ຕະຫລາດໂລກ ຕ້ອງມີຍຸດທະສາດເປັນເຈົ້າການໃນການຈຳຫນ່າຍຜະລິດຕະພັນ, ເປັນເອກະພາບໃນການບໍລິຫານສົ່ງອອກ ແລະ ໂຄສະນາຜະລິດຕະພັນກະເສດຂອງຫວຽດນາມ ອອກສູ່ຕ່າງປະເທດ, ເປັນຕົ້ນແມ່ນບັນດາປະເທດຕ້ອງການສິນຄ້າທີ່ມີຄຸນນະພາບສູງ.
ໝາກລິ້ນຈີ່ຂອງຫວຽດນາມໄດ້ສົ່ງໄປຂາຍຢູ່ຫລາຍປະເທດ
ພາບ:baomoi.com
|
ຫນຶ່ງໃນບັນດາຄວາມຫຍຸ້ງຍາກທີ່ສຸດໃນປະຈຸບັນສຳລັບສົ້ນອອກຜະລິດຕະພັນກະເສດຂອງຫວຽດນາມ ນັ້ນແມ່ນຂອບຂະຫນາດຈັດຕັ້ງການຜະລິດນ້ອຍ, ກະແຈກກະຈາຍ, ກຳລັງຄວາມສາມາດຂອງວິສາຫະກິດຖືກຈຳກັດ ເຮັດໃຫ້ເລື່ອງຮັບປະກັນຄຸນນະພາບ, ຕະຫລາດເປັນປົກກະຕິແມ່ນຫຍຸ້ງຍາກ. ພ້ອມກັນນັ້ນ, ບັນດາວິສາຫະກິດສົ່ງອອກຜະລິດຕະພັນກະເສດຂອງຫວຽດນາມ ຍັງອ່ອນດ້ອຍໃນຂອດຮັກສາຫລັງການເກັບກູ້ ເຮັດໃຫ້ຜະລິດຕະພັນກະເສດບໍ່ທັນຮັບປະກັນຄຸນນະພາບຕາມຄວາມຮຽກຮ້ອງຕ້ອງການຂອງຄູ່ຮ່ວມມື. ຕໍ່ຫນ້າຄວາມຫຍຸ້ງຍາກນັ້ນ, ທ່ານຮ່ວາງຈູງ, ຮອງຫົວຫນ້າກົມປ້ອງກັນພືດ-ກະຊວງກະສິກຳ ແລະ ພັດທະນາຊົນນະບົດ ຫວຽດນາມໃຫ້ຮູ້ວ່າ:
“ໃນລະດູການໝາກລິ້ນຈີ່ຕໍ່ໄປ, ພິເສດ ປີ 2016, ຕາມການຊີ້ນຳຂອງລັດຖະມົນຕີວ່າການກະຊວງກະສິກຳ ແລະ ພັດທະນາຊົນນະບົດ, ກົມປ້ອງກັນພືດ ໄດ້ເຮັດວຽກກັບສູນສອ່ງລັງສີຂອງຮ່າໂນ້ຍ ເພື່ອຍົກລະດັບສູນສ່ອງລັງສີ ຊື່ງກະຊວງວິທະຍາສາດເຕັກໂນໂລຊີ ໄດ້ລົງທຶນດ້ວຍຈຳນວນເງິນປະມານ 20 ຕື້ດົງເພື່ອຍົກລະດັບຕ່ອງໂສ້ສ່ອງລັງສີ. ພ້ອມທັງເພີ່ມເຕີມບັນດາສາງເຢັນ ແລະ ບັນດາອຸປະກອນອື່ນໆອີກ.”
ດ້ວຍຄວາມເອົາໃຈໃສ່, ການລົງທຶນຂອງລັດ, ຜະລິດຕະພັນກະເສດຂອງຫວຽດນາມ, ໃນນັ້ນ ມີໝາກລິ້ນຈີ່ ຈະມີຫລາຍກາລະໂອກາດເພື່ອແຊກຊືມເຂົ້າຕະຫລາດໂລກ. ເຖິງຢ່າງໃດກໍຕາມ, ເພື່ອໃຫ້ຜະລິດຕະພັນກະເສດຂອງຫວຽດນາມ ເຊື່ອມໂຍງເຂົ້າຕະຫຼາດໂລກ, ວິສາຫະກິດຄວນຍົກສູງຄຸນນະພາບຜະລິດຕະພັນ, ເພີ່ມທະວີການໂຄສະນາຜະລິດຕະພັນ ແລະ ສ້າງເຄື່ອງໝາຍການຄ້າສະເພາະໃຫ້ຜະລິດຕະພັນຢູ່ຕະຫລາດພາຍໃນປະເທດ ແລະ ສາກົນ. ພ້ອມກັນນັ້ນ ຍູ້ແຮງການແລກປ່ຽນຂໍ້ມູນຂ່າວສານລະຫວ່າງຊາວກະສິກອນ, ວິສາຫະກິດກັບຕະຫລາດ. ທ່ານ ເຈີນຕວນແອງ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າຫວຽດນາມ ຖືວ່າ: ຄວາມຫຍຸ້ງຍາກໃນປະຈຸບັນ ແມ່ນສ້າງພາບພົດໃຫ້ຜະລິດຕະພັນກະເສດຫວຽດນາມ.
“ຄຽງຄູ່ກັບການແກ້ງແຍ້ງກັບບັນດາຜະລິດຕະພັນໝາກລິ້ນຈີ່ຂອງປະເທດອື່ນ, ຄວນສືບຕໍ່ບັນດາມາດຕະການໂຄສະນາ ແລະ ສ້າງເຄື່ອງໝາຍການຄ້າ. ພວກຂ້າພະເຈົ້າເຊື່ອໝັ້ນວ່າ ບັນດາວິສາຫະກິດຈະມີເງື່ອນໄຂເພື່ອສ້າງເຄື່ອງໝາຍການຄ້າ ແລະ ພັດທະນາບັນດາຕະຫລາດດັ່ງກ່າວແບບຍືນຍົງ. ເຖິງຢ່າງໃດກໍຕາມ, ຄວາມໝັ້ນຄົງຂອງປະລິມານການຜະລິດ, ຄຸນນະພາບຜະລິດຕະພັນ ແລະ ບັນດາຂັ້ນຕອນເພື່ອຮັບປະກັນຄວາມຮຽກຮ້ອງຕ້ອງການຂອງຮົ້ວກີດຂວາງດ້ານເຕັກນິກຂອງຕະຫລາດດັ່ງກ່າວ ແມ່ນປັດໄຈຕັດສິນຊີ້ຂາດເພື່ອຮັບປະກັນໃຫ້ວິສາຫະກິດ ແລະ ບັນດາຜະລິດຕະພັນຂອງພວກເຮົາສາມາດພັດທະນາຢູ່ບັນດາຕະຫລາດເອີລົບ - ອາຟຼິກາ ແລະ ອົດສະຕາລີ.”
ຫວ່າງແລ້ວນີ້, ກະຊວງວິທະຍາສາດ ແລະ ເຕັກໂນໂລຊີ, ສະພາມະຫາບັນດີດ ວິທະຍາສາດ ແລະ ເຕັກໂນໂລຊີ ຫວຽດນາມ ພ້ອມກັບ 3 ແຂວງ ຄື: ຫາຍເຢືອງ, ກວ໋າງນີງ ແລະ ບັກຢາງ ໄດ້ລົງນາມໃນບົດບັນທຶກຊ່ວຍຈຳກັບຜູ້ຕາງຫນ້າ 6 ປະເທດໃນໂລກ ເພື່ຳໃຫ້ໝາກລິ້ນຈີ່ ຫວຽດນາມ ບັນລຸມາດຖານສົ່ງອອກແຕ່ 50.000-100.000 ໂຕນ/ປີ. ນີ້ແມ່ນສັນຍານຕັ້ງຫນ້າຕື່ມອີກສຳລັບໝາກລິ້ນຈີ່ເວົ້າສະເພາະ ແລະ ຜະລິດຕະພັນກະເສດຂອງຫວຽດນາມ ເວົ້າລວມ. ເພື່ອໃຫ້ບັນດາຜະລິດຕະພັນກະເສດຂອງຫວຽດນາມ ແຊກຊືມເຂົ້າຕະຫລາດໂລກສຳເລັດຜົນ, ຕອງມີການຮ່ວມສຳພັນຢ່າງຄົບຊຸດລະຫວ່າງຜູ້ຜະລິດ, ວິສາຫະກິດ ແລະ ບັນດາການພົວພັນຄ້າຂາຍໃນການເຊື່ອມຕໍ່, ຊອກຫາສົ້ນອອກໃຫ້ແກ່ຜະລິດຕະພັນ.