(vovwordld) - ແຕ່ລະປີ ຫວຽດນາມ ຍັງຄົງນຳເຂົ້າກົນຈັກ, ອຸປະກອນທຸກປະເພດລວມມູນຄ່າປະມານ 20 ຕື້ USD, ໃນຂະນະນັ້ນ ມີອຸປະກອນບາງປະເພດຊຶ່ງບັນດາວິສາຫະກິດພາຍໃນປະເທດສາມາດຕອບສະຫນອງໄດ້. ໃນເງື່ອນໄຂການພັດທະນາຍັງປະສົບກັບຄວາມຫຍຸ້ງຍາກ, ແຕ່ຂະແຫນງກົນຈັກ ຫວຽດນາມ ພວມຍູ້ແຮງຍຸດທະສາດລົງທຶນ ເພື່ອມຸ່ງໄປເຖິງຈຸດໝາຍກາຍເປັນປະເທດອຸດສາຫະກຳໃນປີ 2020 ແລະ ຕອບສະຫນອງຄວາມຕ້ອງການແກ້ງແຍ້ງໃນເງື່ອນໄຂເຊື່ອມໂຍງເຂົ້າກັບເສດຖະກິດໂລກ.
ໂຮງງານຜະລິດກົນຈັກ Quang Trung
ພາບປະກອບ: internet
|
ປະຈຸບັນ ຢູ່ ຫວຽດນາມ ມີວິສາຫະກິດກົນຈັກປະມານ 3.100 ແຫ່ງ, ໃນນັ້ນ ມີ ລັດວິສາຫະກິດເກືອບ 450 ແຫ່ງ ແລະ ໂຮງຈັກຜະລິດເອກະຊົນ 156 ແຫ່ງ, ນອກນັ້ນຍັງມີຮາກຖານຜະລິດຂະຫນາດນ້ອຍນັບພັນໆແຫ່ງ. ເຖິງຢ່າງໃດກໍຕາມ ການຈັດແບ່ງວິສາຫະກິດກົນຈັກບໍ່ສະໝຳ່ສະເໝີ, ສ່ວນຫລາຍແມ່ນເຕົ້າໂຮມຢູູ່ບັນດານະຄອນໃຫຍ່ຄື: ຮ່າໂນ້ຍ, ນະຄອນໂຮ່ຈິມີນ ແລະ ຫາຍຟ່ອງ. ໃນນັ້ນ ມີ 50% ຮາກຖານຜະລິດ, ຕິດຕັ້ງ, ສ່ວນຍັງເຫລືອແມ່ນຮາກຖານສ້ອມແປງ. ຍອດເງິນລົງທຶນຂອງຕ່າງປະເທດ ຫລື FDI ເຂົ້າຂະແຫນງກົນຈັກປະມານ 2,1 ຕື້ USD, ໃນນັ້ນ 50% ແມ່ນສຸມໃສ່ຂົງເຂດປະກອບລົດໂອໂຕ, ລົດຈັກ ແລະ ສິນຄ້າໃຊ້ສອຍປະເພດອື່ນ. ນັບແຕ່ປີ 2002 ເປັນຕົ້ນໄປ, ຫວຽດນາມ ມີຍຸດທະສາດພັດທະນາຂະແຫນງກົນຈັກ ດ້ວຍຈຸດໝາຍແມ່ນຄ່ອຍໆຫັນມາປະກອບລົດໂອໂຕ, ລົດຈັກ ຢູ່ພາຍໃນປະເທດ ແລະ ບັນລຸການເຕີບໂຕ 50% ໃນປີ 2010. ເຖິງຢ່າງໃດກໍຕາມ, ມາຮອດປະຈຸບັນ ຍັງບໍ່ທັນບັນລຸຈຸດໝາຍທີ່ໄດ້ວາງອອກ. ນອກຈາກສາຍເຫດພາວະວິໄສ ຍ້ອນຜົນສະທ້ອນຈາກການຜັນແປຂອງເສດຖະກິດໂລກ, ສາຍເຫດຕົ້ນຕໍນັ້ນແມ່ນຍ້ອນວິສາຫະກິດຫລາຍແຫ່ງບໍ່ໄດ້ຮັບການລົງທຶນດ້ານທຶນຮອນ ແລະ ເຕັກໂນໂລຊີ ຢ່າງຖືກທິດ, ສະນັ້ນ ຍາກທີ່ຈະແກ້ງແຍ້ງກັບບັນດານັກປະມູນຕ່າງປະເທດໄດ້. ເພື່ອແກ້ໄຂຂໍ້ຈຳກັດດັ່ງກ່າວ, ໃນຊຸມປີມໍ່ໆມານີ້ ລັດຖະບານໄດ້ວາງອອກນະໂຍບາຍຕ່າງໆເພື່ອສ້າງເງື່ອນໄຂຊ່ວຍບັນດາວິສາຫະກິດກົນຈັກ ຫວຽດນາມ ສຸມໃສ່ພັດທະນາຂົງເຂດຈຸດສຸມຈຳນວນຫນຶ່ງ, ໃນນັ້ນໃຫ້ບຸລິມະສິດແກ່ການພັດທະນາບັນດາຂະແຫນງອຸດສາຫະກຳສຳຮອງ, ກົນຈັກຜະລິດອຸປະກອນປະກອບເຄື່ອງຈັກ. ໂຮງຜະລິດກົນຈັກ Quang Trung ຢູ່ ແຂວງ Ninh Binh ມີໄລຍະຫນຶ່ງແມ່ນນຳຫນ້າຂະແຫນງກົນຈັກ ຫວຽດນາມ, ທີ່ເຄີຍຜະລິດອຸປະກອນ 13 ປະເພດແທນໃຫ້ການນຳເຂົ້າ, ແຕ່ 2 ປີມານີ້ ຍ້ອນປະສົບກັບຄວາມຫຍຸ້ງຍາກ, ສະນັ້ນ ຜະລິດຕະພັນນັບພັນໂຕນຂອງໂຮງງານດັ່ງກ່າວຖືກຄ້າງສາງ. ໃນຂະນະລໍຖ້າບັນດານະໂຍບາຍໃຫມ່ຂອງລັດຖະບານ, ວິສາຫະກິດກົນຈັກແຫ່ງນີ້ໄດ້ເປັນເຈົ້າການເປີດທິດກ້າວເດີນສະເພາະ. ທ່ານ Nguyen Tang Cuong ຜູ້ອຳນວຍການໂຮງຜະລິດກົນຈັກ Quang Trung ແຂວງ Ninh Binh ໃຫ້ຮູ້້ວ່າ:
“ຖ້າຫາກປະຈຸບັນ ພວກຂ້າພະເຈົ້າພຽງອີງໃສ່ຕະຫລາດພາຍໃນປະເທດເທົ່ານັ້ນ ພວກຂ້າພະເຈົ້າຈະບໍ່ຄົງຕົວໄດ້, ສະນັ້ນ ພວກຂ້າພະເຈົ້າຈຶ່ງຄິດເຖິງເລື່ອງສົ່ງອອກຜະລິດຕະພັນຂອງຕົນ.”
ໃນສະພາບຄວາມຫຍຸ້ງຍາກ, ມີວິສາຫະກິດຫລາຍແຫ່ງໄດ້ເປັນເຈົ້າການເປັນນັກປະມູນສຳຮອງໃຫ້ແກ່ບັນດາຄູ່ຮ່ວມມືຕ່າງປະເທດ ຈາກວຽກງານທີ່ງ່າຍດາຍຄື: ປະກອບ, ຜະລິດຊິ້ນສ່ວນເຄື່ອງຈັກ…. ກ້າວໄປເຖິງການຜະລິດອຸປະກອນ, ຊິ້ນສ່ວນດ້ວຍລະດັບການຮ່ວມມືຫລາຍກວ່າເມື່ອທຽບກັບການຜະລິດສະຫນອງອຸປະກອນຄົບຊຸດ ໂດຍໄດ້ຮັບຄວາມໄວ້ເນື້ອເຊື່ອໃຈຈາກນັກປະມູນຕ່າງປະເທດຖ່າຍທອດເຕັກໂນໂລຊີ, ຈາກນັ້ນ ວິສາຫະກິດ ຫວຽດນາມ ຫລາຍແຫ່ງສາມາດປະຕິບັດບັນດາຂັ້ນຕອນທີ່ຍາກກວ່າ ແລະ ກາຍເປັນຄູ່ຮ່ວມມືປະຈຳເພື່ອເຂົ້າຮ່ວມລະບົບມູນຄ່າທົ່ວໂລກ. ຜ່ານວິວັດການນັ້ນ ກໍໄດ້ຊ່ວຍບັນດາວິສາຫະກິດກົນຈັກ ຫວຽດນາມ ເພີ່ມທະວີການຮ່ວມມື. ທ່ານ Nguyen Van Thu ປະທານສະຫະສະມາຄົມວິສາຫະກິດ ກົນຈັກ ຫວຽດນາມ ໃຫ້ຮູ້ວ່າ:
“ໃນໄລຍະ 5 ປີຜ່ານມາ, ວິສາຫະກິດຫລາຍແຫ່ງບັນລຸລະດັບການເຕີບໂຕແຕ່ 20 ຫາ 25% ແລະ ໃນສະພາບປະຈຸບັນ, ວິສາຫະກິດຫລາຍແຫ່ງໄດ້ລົງທຶນຈຳນວນເງິນນັບ 100 ຕຶ້ USD ເພື່ອຜະລິດຊິ້ນສ່ວນປະກອບເຄື່ອງກົນຈັກໃຫ້ແກ່ບັນດາບໍລິສັດຕ່າງປະເທດ ແລະ ໄດ້ຮັບຄວາມເຊື່ອໝັ້ນຈາກບັນດາບໍລິສັດຕ່າງປະເທດ, ຊ້ຳບໍ່ໜຳ ເຂົາເຈົ້າໄດ້ຖ່າຍທອດເຕັກໂນໂລຊີກົນຈັກ ແລ້ວຈ່ອງຊື້ສິນຄ້າໃຫ້ແກ່ບັນດາວິສາຫະກິດນີ້ ເພື່ອໃຫ້ເຂົາເຈົ້າສາມາດເປັນເຈົ້າການໃນວຽກງານຊຶ່ງບັນດາວິສາຫະກິດຕ່າງປະເທດຮັບຜິດຊອບກ່ອນນີ້. ຜ່ານນັ້ນ ວິສາຫະກິດຫລາຍແຫ່ງມີຄວາມກ້າວຫນ້າຢ່າງໝັ້ນແກ່ນ.”
ພາບປະກອບ: internet
|
ເພື່ອຫນູນຊ່ວຍບັນດາວິສາຫະກິດ, ລັດຖະບານຍັງວາງອອກຫລາຍມາດຕະການລະອຽດຄື: ສ້າງກົນໄກກ່ຽວກັບໃບສັ່ງຊື້ສິນຄ້າ, ມີນະໂຍບາຍບຸລິມະສິດກ່ຽວກັບການກູ້ຢືມທຶນ, ຫນູນຊ່ວຍກຸ່ມວິສາຫະກິດກົນຈັກເອກະຊົນຫັນໄປສູ່ໄລຍະພັດທະນາໃຫມ່. ທ່ານ Do Huu Hao ອະດີດລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ:
“ໃນນະໂຍບາຍຂອງນາຍົກລັດຖະມົນຕີ ກໍ່ນຳໃຊ້ໃນກໍລະນີພິເສດ ນັ້ນແມ່ນການບົ່ງຕົວປະມູນ, ນີ້ໄດ້ຮັບຖືວ່າແມ່ນຜົນສຳເລັດ. ຕົວຢ່າງ: ບົ່ງຕົວ ການປະມູນໃຫ້ແກ່ ກິດຈະກຳບາງແຫ່ງ, ໃນນັ້ນ ມີກິດຈະກຳໄຟຟ້າ ເຊີນລາ, ສະນັ້ນ ບັນດາວິສາຫະກິດພາຍໃນປະເທດສາມາດປະຕິບັດໄດ້. ວິສາຫະກິດສ່ວນຫລາຍມີແຫລ່ງທຶນ, ເຕັກໂລໂລຊີຈຳກັດ ສະນັ້ນ ຫາກບໍ່ມີນະໂຍບາຍລະອຽດ ໂຄງການປະມູນສ່ວນຫລາຍຈະຕົກໃນມືຂອງບັນດານັກປະມູນຕ່າງປະເທດ.”
ຍຸດທະສາດການລົງທຶນພັດທະນາຂອງຂະແຫນງກົນຈັກ ຫວຽດນາມ ໃນຊຸມປີຈະມາເຖິງ ຈະສຸມໃສ່ເຂົ້າໃນການພັດທະນາ 8 ໝວດຜະລິດຕະພັນຕົ້ນຕໍ ຊື່ງລວມມີ: ອຸປະກອນ, ກົນຈັກຂະແຫນງກະສິກຳ, ຍານພາຫະນະຄົມມະນາຄົມ, ກົນຈັກຮັບໃຊ້ຂະແຫນງກໍ່ສ້າງ, ຕໍ່ກຳປັ່ນ ແລະ ເຄື່ອງອຸປະກອນໄຟຟ້າ ... ຄຽງຄູ່ກັບນະໂຍບາຍບຸລິມະສິດກູ້ຢືມທຶນ, ລັດຖະບານ ກໍມີແຜນນະໂຍບາຍເພີ່ມທະວີການສະຫນອງອຸປະກອນກົນຈັກຜະລິດຢູ່ພາຍໃນປະເທດໃຫ້ແກ່ບັນດາໂຮງງານຜະລິດຊີມັງ, ລະບົບຂົວ, ທ່າກຳປັ່ນ, ບັນດາກິດຈະກຳກໍ່ສ້າງ ຊຶ່ງກົນຈັກພາຍໃນປະເທດສາມາດຕອບສະຫນອງໄດ້. ບັນດາການກຳນົດທິດລະອຽດບໍ່ພຽງແຕ່ສ້າງຕະຫລາດໃຫ້ແກ່ຜະລິດຕະພັນກົນຈັກເທົ່ານັ້ນ ຫາກຍັງສ້າງກາລະໂອກາດໃຫ້ແກ່ຂະແຫນງກົນຈັກຫວຽດນາມ ພັດທະນາແບບຍືນຍົງອີກດ້ວຍ.