(vovworld)- ກົມລົງທຶນຕ່າງປະເທດ ສັງກັດກະຊວງແຜນການ ແລະ ການລົງທຶນຫວຽດນາມ ຫາກໍ່ປະກາດຕົວເລກສະແດງໃຫ້ເຫັນວ່າ: ເງິນລົງທຶນໂດຍກົງຂອງຕ່າງປະເທດ(FDI) ເຂົ້າຫວຽດນາມໃນ 6 ເດືອນຕົ້ນປີ 2013 ໄດ້ມີສັນຍານຕັ້ງຫນ້າ. ບັນດາປັດໄຈພື້ນຖານຄື: ທຶນຈົດທະບຽນ, ທຶນຈາກການປ່ອຍເງິນ ແລະ ໂຄງປະກອບທຶນລ້ວນແຕ່ມີການຫັນປ່ຽນ ນັ້ນແມ່ນບັນດາຈຸດພົ້ນເດັ່ນໃນການດຶງດູດເງິນລົງທຶນຂອງຕ່າງປະເທດ.
ໃນ 6 ເດືອນຕົ້ນປີ, ກຸ່ມບໍລິສັດເອເລັກໂຕນິກ Samsung ຂອງ ສເກົາຫລີ ແມ່ນນັກລົງທຶນຕ່າງປະເທດຢືນອັນດັບຫນຶ່ງຢູ່ຫວຽດນາມ ດ້ວຍທຶນໝັ້ນໝາຍແກ່ການລົງທຶນຂຶ້ນເຖິງກວ່າ 3 ຕື້ USD. ໃນນັ້ນ 2 ຕື້ USD ແມ່ນລົງທຶນຢູ່ເຂດອຸດສາຫະກຳເຕັກໂລໂນຊີສູງປະສົມ Samsung ທີ່ເຂດອຸດສາຫະກຳ ອຽນບີ່ງ ແຂວງ ທາຍງວຽນ ແລະ 1 ຕື້ USD ແມ່ນທຶນເພີ່ມຂຶ້ນໃຫ້ແກ່ໂຄງການຢູ່ແຂວງ ບັກນີງ. ໂຄງການ Samsung ຢູ່ບັກນິງ ພຽງແມ່ນຫນຶ່ງໃນ 217 ໂຄງການທີ່ຈົດທະບຽນເພີ່ມທຶນໃນ 6 ເດືອນຕົ້ນປີ 2013, ຍົກຈຳນວນທຶນເປີດກວ້າງການຜະລິດຂອງບັນດາວິສາຫະກິດ FDI ຢູ່ ຫວຽດນາມ ເພີ່ມຂຶ້ນ 35,7% ເມື່ອທຽບໃສ່ໄລຍະດຽວກັນຂອງປີ 2012. ຈຳນວນທຶນຈົດທະບຽນລົງທຶນເພີ່ມຂຶ້ນຢ່າງແຮງແມ່ນຫນຶ່ງໃນບັນດາຈຸດພົ້ນເດັ່ນໃນການດຶງດູດທຶນ FDI ໃນ 6 ເດືອນຕົ້ນປີ, ຍ້ອນສະພາບແວດລ້ອມແຫ່ງການດຳເນີນທຸລະກິດຢ່າງສະດວກ, ບັນດາວິສາຫະກິດຈຶ່ງຄິດໄລ່ເຖິງການເປີດກວ້າງການຜະລິດດຳເນີນທຸລະກິດ ແລະ ຂໍອະນຸຍາດເພີ່ມທຶນ. ສິ່ງດັ່ງກ່າວກໍໝາຍຄວາມວ່າ ບັນດາວິສາຫະກິດ FDI ເຫັນໄດ້ວ່າ ສະພາບແວດລ້ອມແຫ່ງການລົງທຶນຢູ່ຫວຽດນາມ ແມ່ນສະດວກ. ທ່ານ ຫງວຽນມີນຟອງ, ຜູ້ຊ່ຽວຊານເສດຖະກິດ ຖືວ່າ:
“ທຶນຈົດທະບຽນເພີ່ມເຕີມ, ເພີ່ມຂຶ້ນ ສະແດງໃຫ້ເຫັນສັນຍານຕັ້ງຫນ້າ, ນັ້ນແມ່ນ ບັນດານັກລົງທຶນເຫັນໄດ້ຄວາມສະດວກ ແລະ ຢາກລົງທຶນຍາວນານຢູ່ ຫວຽດນາມ. ທຶນເພີ່ມເຕີມ ແລະ ເປີດກ້ວາງການຜະລິດເພີ່ມຂຶ້ນແມ່ນຄາດໝາຍຄຸນນະພາບຊື່ງຫວຽດນາມປາດຖະຫນາໃນການດຶງດູດທຶນ FDI”
ພາບປະກອບ:internet
|
ໃນ 6 ເດືອນຕົ້ນປີນີ້ ມີ 554 ໂຄງການລົງທຶນໂດຍກົງຂອງຕ່າງປະເທດໄດ້ຮັບຫນັງສືອະນຸຍາດລົງທຶນເຂົ້າຫວຽດນາມ ດ້ວຍຍອດຈຳນວນທຶນເພີ່ມຂຶ້ນ 3,7%. ເຖິງຢ່າງໃດກໍຕາມ, ສິ່ງເປັນຫນ້າເວົ້າເຖິງແມ່ນໂຄງປະກອບທຶນ. ເລື່ອງເພີ່ມທຶນ ສ່ວນຫລາຍສຸມໃສ່ຂົງເຂດອຸດສາຫະກຳປະດິດສ້າງ ແລະ ພະລັງງານແມ່ນສັນຍານຕັ້ງຫນ້າ. ບັນດາຕົວເລກໃຫ້ເຫັນວ່າ: ທຶນສະຫນອງໃຫມ່ ແລະ ເພີ່ມເຕີມເຂົ້າຂົງເຂດນີ້ແມ່ນກວມເກືອບ 90% ໃນຈຳນວນ 10 ຕື້ USD ທຶນຈົດທະບຽນຂອງຕ່າງປະເທດໃນ 6 ເດືອນຜ່ານມາ. ສິ່ງດັ່ງກ່າວສະແດງໃຫ້ເຫັນວ່າ ແຫລ່ງທຶນຕ່າງປະເທດໄດ້ ແລະ ພວມລົງທຶນເຂົ້າຂົງເຂດທີ່ຈຳເປັນ, ສ້າງການຈະເລີນເຕີບໂຕຢ່າງແທດຈິງ ແລະ ເພີ່ມຄວາມມຸ້ງຫວັງຕໍ່ການຮັກສາພື້ນຖານເສດຖະກິດຫວຽດນາມໃຫ້ເປັນປົກກະຕິ.
ມີສັນຍານຕັ້ງຫນ້າຫນຶ່ງອີກນັ້ນແມ່ນ ໃນສະພາບເສດຖະກິດທົ່ວໂລກພວມປະສົບກັບຄວາມຫຍຸ້ງຍາກ, ເລື່ອງບັນດານັກລົງທຶນຕ່າງປະເທດຍັງຍູ້ແຮງການປ່ອຍເງິນ, ຜັນຂະຫຍາຍບັນດາໂຄງການຢູ່ຫວຽດນາມ. ຄາດວ່າ 6 ເດືອນຜ່ານມາ, ຈຳນວນເງິນລົງທຶນ FDI ປະຕິບັດບັນລຸ 7,5 ຕຶ້ USD ເພີ່ມຂຶ້ນ 5,6% ເມື່ອທຽບໃສ່ໄລຍະດຽວກັນຂອງປີກາຍ. ໃນສະພາບພື້ນຖານເສດຖະກິດໂລກເວົ້າລວມພວມປະເຊີນຫນ້າກັບຄວາມຫຍຸ້ງຍາກຫລາຍຢ່າງ, ເລື່ອງບັນດານັກລົງທຶນຕ່າງປະເທດ ຍັງຄົງຮັກສາລະດັບລົງທຶນເຂົ້າຫວຽດນາມ ເປັນປົກກະຕິ ແລະ ເພີ່ມແຫລ່ງທຶນໃນໄລຍະຜ່ານມານັ້ນ ແມ່ນໝາກຜົນເປັນຫນ້າຊື່ນຊົມ. ນີ້ກໍໄດ້ຮັບຖືວ່າແມ່ນສັນຍານສຳຄັນສະແດງໃຫ້ເຫັນສະພາບແວດລ້ອມແຫ່ງການລົງທຶນຢູ່ຫວຽດນາມພວມເຂົ້າສູ່ສະພາບເປັນປົກກະຕິ. ທ່ານ ບູ່ຍກວາງວີງ, ລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ໃຫ້ຮູ້ວ່າ:
“ສະເພາະ 6 ເດືອນຕົ້ນປີ 2013, ກຸ່ມວິສາຫະກິດລົງທຶນຕ່າງປະເທດ ໄດ້ປະກອບ 66% ວົງເງິນສົ່ງອອກຂອງຫວຽດນາມ ແລະ ສ້າງວຽກເຮັດງານທຳໂດຍກົງໃຫ້ແກ່ຄົນງານ 2 ລ້ານຄົນ ແລະໃນໄລຍະຈະມາເຖິງ ອາດຈະເພີ່ມຂຶ້ນ 3 ລ້ານຄົນ. ສິ່ງດັ່ງກ່າວສະແດງໃຫ້ເຫັນວ່າ ນີ້ແມ່ນຂົງເຂດສຳຄັນໃນພື້ນຖານເສດຖະກິດ. ຄຽງຄູ່ກັນນັ້ນ ຍັງນຳມາເຊິ່ງເຕັກໂນໂລຊີໃຫມ່, ວິທີຄຸ້ມຄອງໃຫມ່ໃຫ້ແກ່ຫວຽດນາມ ແລະ ວິທີປ່ຽນໃຫມ່ໂຄງປະກອບເສດຖະກິດຂອງຫວຽດນາມຕາມທິດອຸດສາຫະກຳທັນສະໄຫມ.”
ມາຮອດປະຈຸບັນ, ຂົງເຂດລົງທຶນຂອງຕ່າງປະເທດພວມກວມອັດຕາສ່ວນສຳຄັນໃນໂຄງປະກອບເສດຖະກິດຫວຽດນາມ, ນັ້ນແມ່ນແຫລ່ງກຳລັງແຮງທີ່ຂາດບໍ່ໄດ້, ເປັນຕົ້ນໃນສະພາບໂລກພວມຖືກຊຸດໂຊມ ແລະ ຢູ່ ຫວຽດນາມ ພວມປະສົບຄວາມຫຍຸ້ງຍາກຄືປະຈຸບັນ. ຍອດຈຳນວນເງິນລົງທຶນໂດຍກົງຂອງຕ່າງປະເທດ FDI ຢູ່ ຫວຽດນາມ ໃນຊຸມປີມໍ່ໆມານີ້ ກວມປະມານ 1/4 ຍອດເງິນລົງທຶນທົ່ວສັງຄົມ ແລະ ກວ່າ 60% ມູນຄ່າການສົ່ງອອກຂອງຫວຽດນາມ. ແຫລ່ງເງິນລົງທຶນຂອງຕ່າງປະເທດເຂົ້າຫວຽດນາມ ພວມຟື້ນຕົວຢ່າງວ່ອງໄວ ແລະ ພວມປະກອບສ່ວນຫນູນຊ່ວຍໃຫ້ແກ່ການພັດທະນາເສດຖະກິດສັງຄົມຢູ່ ຫວຽດນາມ.