(vovworld)- ພາຍຫລັງ 3 ປີແຫ່ງການຜັນຂະຫຍາຍແຜນຮ່າງສ້າງໂຄງປະກອບລັດວິສາຫະກິດເປັນຫຸ້ນສ່ວນ, ໃນຍອດຈຳນວນວິສາຫະກິດ 99 ແຫ່ງ ໄດ້ສຳເລັດການຫັນເປັນຫຸ້ນສ່ວນນັ້ນ, ມີວິສາຫະກິດ 44 ແຫ່ງແມ່ນຂຶ້ນກັບ ກະຊວງຄົມມະນາຄົມຂົນສົ່ງ. ຈຸດໝາຍຂອງກະຊວງຄົມມະນາຄົມຂົນສົ່ງຫວຽດນາມ ຮອດປີ 2015 ຈະຫັນລັດວິສາຫະກິດ 40 ແຫ່ງທີ່ຍັງເຫລືອເປັນຫຸ້ນສ່ວນ.
ຕາມແຜນຮ່າງສ້າງໂຄງປະກອບລັດວິສາຫະກິດ ຄືນໃຫມ່ ໄລຍະ 2011-2015 ຊື່ງໄດ້ຮັບການອະນຸມັດຈາກນາຍົກລັດຖະມົນຕີ, ທົ່ວປະເທດມີວິສາຫະກິດປະມານ 500 ແຫ່ງ ຕ້ອງດຳເນີນການຫັນເປັນຫຸ້ນສ່ວນ. ເຖິງຢ່າງໃດກໍຕາມ, ໃນ 3 ປີຜ່ານມາ, ວິວັດການຫັນວິສາຫະກິດເປັນຫຸ້ນສ່ວນແມ່ນຊັກຊ້າ. ເພາະສະນັ້ນ ໝາກຜົນການຫັນວິສາຫະກິດຂອງຂະແຫນງຄົມມະນາຄົມຂົນສົ່ງເປັນຫຸ້ນສ່ວນ
ແມ່ນມີຄວາມໝາຍທີ່ສຸດ. ໃນ 3 ປີຜ່ານມາ, ກະຊວງຄົມມະນາຄົມຂົນສົ່ງ ໄດ້ຖືການຫັນວິສາຫະກິດເປັນຫຸ້ນສ່ວນແມ່ນບາດກ້າວບຸກທະລຸເພື່ອໃຫ້ບັນດາວິສາຫະກິດ ປ່ຽນໃຫມ່ກົນໄກຄຸ້ມຄອງ, ລະດົມແຫລ່ງທຶນຈາກບັນດາຜູ້ຖືຫຸ້ນ, ຫລຸດຜ່ອນອັດຕາຫນີ້ສິນ, ຍົກສູງປະສິດທິຜົນການຜະລິດ, ດຳເນີນທຸລະກິດ. ດ້ວຍທິດນັ້ນ, ພຽງໃນປີ 2013, ກະຊວງຄົມມະນາຄົມຂົນສົ່ງ ໄດ້ຫັນລັດວິສາຫະກິດ 11 ແຫ່ງເປັນຫຸ້ນສ່ວນ, ກາງເດືອນ 2/2014, ນາຍົກລັດຖະມົນຕີຫວຽດນາມ ໄດ້ອະນຸມັດແຜນການຫັນບໍລິສັດໃຫຍ່ 9 ແຫ່ງໃນຈຳນວນ 10 ແຫ່ງ ທີ່ຂຶ້ນກັບກະຊວງຄົມມະນາຄົມຂົນສົ່ງເປັນຫຸ້ນສ່ວນ. ບົນໝາກຜົນທີ່ບັນລຸໄດ້ໃນເບື້ອງຕົ້ນນັ້ນ, ກະຊວງຄົມມະນາຄົມຂົນສົ່ງ ສືບຕໍ່ຍູ້ແຮງການຫັນບັນດາວິສາຫະກິດບໍ່ສັງກັດລັດຖືທຶນ 100% ເປັນຫຸ້ນສ່ວນ, ດຳເນີນລະບຽບການຫັນບໍລິສັດໃຫຍ່ 11 ແຫ່ງ, ວິສາຫະກິດ, ຫົວຫນ່ວຍພາລະກິດ ແລະ ວິສາຫະກິດຂົນສົ່ງທາງລົດໄຟລວມ 25 ແຫ່ງເປັນຫຸ້ນສ່ວນ. ທ່ານ ດີງລາທັງ, ລັດຖະມົນຕີກະຊວງຄົມມະນາຄົມຂົນສົ່ງ ຫວຽດນາມໃຫ້ຮູ້ວ່າ:
“ບົນພື້ນຖານບັນດາໝາກຜົນຂອງວຽກງານຫັນວິສາຫະກິດເປັນຫຸ້ນສ່ວນ, ສ້າງໂຄງປະກອບວິສາຫະກິດຄືນໃຫມ່ທີ່ບັນລຸໄດ້ໃນ 3 ປີຜ່ານມາ, ພວກຂ້າພະເຈົ້າຈະສືບຕໍ່ປະຕິບັດການຊີ້ນຳຂອງລັດຖະບານ,ນາຍົກລັດຖະມົນຕີກ່ຽວກັບການສັບຊ້ອນ, ປ່ຽນໃຫມ່ ແລະ ຫັນວິສາຫະກິດເປັນຫຸ້ນສ່ວນຢ່າງຂ້ຽວຂາດກວ່າ. ພວກຂ້າພະເຈົ້າຈະຕັດສິນໃຈສຳເລັດຫນ້າທີ່ຫັນບັນດາວິສາຫະກິດທີ່ຍັງເຫລືອເປັນຫຸ່ນສ່ວນໃນປີ 2014-2015. ອາດຈະເວົ້າໄດ້ວ່າ ສຳລັບບັນດາລັດວິສາຫະກິດທີ່ຂຶ້ນກັບກະຊວງຄົມມະນາຄົມຂົນສົ່ງ ຊຶ່ງລັດບໍ່ຈຳເປັນຖືຫຸ້ນ ແນ່ນອນວ່າຈະບໍ່ມີລັດວິສາຫະກິດອີກ ຫາກຫັນເປັນຫຸ້ນສ່ວນໝົດ.”
ກອງປະຊຸມຜັນຂະຫຍາຍຫນ້າທີ່ສ້າງໂຄງປະກອບລັດ
ວິສາຫະກິດຄືນໃຫມ່
ພາບ:baodautu.vn
|
ຕາມແຜນການແລ້ວ, ໃນໄຕມາດ 1/2014, ກະຊວງຄົມມະນາຄົມຂົນສົ່ງ ຕ້ອງຫັນບໍລິສັດໃຫຍ່ 10 ແຫ່ງເປັນຫຸ້ນສ່ວນ, ຫລັງຈາກນັ້ນ ສືບຕໍ່ຫັນວິສາຫະກິດ, ຫົວຫນ່ວຍພາລະກິດ 40 ແຫ່ງເປັນຫຸ້ນສ່ວນ. ຂອບຂະຫນາດຂອງ Vietnam Airlines ພາຍຫລັງສ້າງໂຄງປະກອບຄືນໃຫມ່ ຈະລວມມີ: ບໍລິສັດແມ່ ນັ້ນແມ່ນ ບໍລິສັດໃຫຍ່ການບິນ ຫວຽດນາມ ແລະ ບໍລິສັດລູກ 15 ແຫ່ງ, ບໍລິສັດຮ່ວມທຸລະກິດ 12 ແຫ່ງ. ດ້ວຍການຫັນວິສາຫະກິດເປັນຫຸ້ນສ່ວນນັ້ນ, Vietnam Airlines ວາງຈຸດໝາຍຈະປັບປຸງການເຄື່ອນໄຫວດຳເນີນທຸລະກິດຂອງຕົນໃຫ້ດີພໍສົມຄວນ ເພື່ອຮອດປີ 2015 ກາຍເປັນບໍລິສັດການບິນທີ່ກ້າວຫນ້າ, ມີຂອບຂະຫນາດໃຫຍ່ທີ 3 ຂອງພາກພື້ນ ດ້ວຍຄຸນນະພາບຂອງບັນດາບໍລິການບັນລຸມາດຕະຖານສາກົນ. ໂດຍກຳນົດວ່າ ການຫັນວິສາຫະກິດເປັນຫຸ້ນສ່ວນແມ່ນທ່າອ່ຽງໃນວິວັດທະນາການເຊື່ອມໂຍງເຂົ້າກັບເສດຖະກິດໂລກ, ຮຽກຮ້ອງຄວາມຕັດສິນໃຈຈາກການນຳກະຊວງຕະຫລອດຮອດການນຳວິສາຫະກິດ, ທ່ານລັດຖະມົນຕີ ດີງລາທັງ ຊີ້ແຈງວ່າ:
“ພວກຂ້າພະເຈົ້າໄດ້ຈັດແບ່ງວຽກງານໃຫ້ບັນດາສະຫາຍຮອງລັດຖະມົນຕີ ຊີ້ນຳໂດຍກົງບັນດາວິສາຫະກິດຫັນເປັນຫຸ້ນສ່ວນ. ແລະ ຖ້າຫາກບັນດາວິສາຫະກິດບໍ່ປະຕິບັດການເຫັນເປັນຫຸ້ນສ່ວນສຳເລັດ, ກ່ອນອື່ນໝົດຄວາມຮັບຜິດຊອບແມ່ນຂຶ້ນກັບບັນດາສະຫາຍຮອງລັດຖະມົນຕີ. ສ່ວນວິສາຫະກິດບໍ່ສຳເລັດການຫັນເປັນຫຸ້ນສ່ວນ, ທ່ານປະທານສະພາບໍລິຫານ ແລະ ຜູ້ອຳນວຍການໃຫຍ່ຖືກສັບຊ້ອນໄປຮັບຫນ້າທີ່ເຮັດວຽກງານອື່ນ.”
ທີ່ກອງປະຊຸມຜັນຂະຫຍາຍຫນ້າທີ່ສ້າງໂຄງປະກອບລັດວິສາຫະກິດຄືນໃຫມ່ ຊື່ງຫາກໍດຳເນີນໄປຢູ່ ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ຕີລາຄາສູງການເຂົ້າຮ່ວມຢ່າງຕັ້ງຫນ້າຂອງກະຊວງຄົມມະນາຄົມຂົນສົ່ງ ໃນການປະຕິບັດຫັນວິສາຫະກິດເປັນຫຸ້ນສ່ວນ. ເຫັນດີເຫັນພ້ອມກັບການເຊີດຊູຄວາມຮັບຜິດຊອບຂອງຫົວຫນ້າໃນການຍູ້ແຮງການສ້າງໂຄງປະກອບວິສາຫະກິດຄືນໃຫມ່, ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈ້ງວ່າ:
“ລັດຖະມົນຕີ, ປະທານຄະນະກຳມະການປະຊາຊົນແຂວງແຕ່ລະທ່ານ ຕ້ອງເຊີດຊູຄວາມຮັບຜິດຊອບ, ເພາະນີ້ແມ່ນຫນ້າທີ່ຂອງພັກ, ລັດ ສະນັ້ນຕ້ອງມີຄວາມຮັບຜິດຊອບ ແລະ ຕ້ອງຮັກສາຂໍ້ກຳນົດກົດລະບຽບ. ລະບອບນະໂຍບາຍໄດ້ຮັບການສ້າງແລ້ວ, ປະຈຸບັນ ສິ່ງສຳຄັນແມ່ນບັນຫາຄວາມຮັບຜິດຊອບ, ເປັນຕົ້ນແມ່ນຄວາມຮັບຜິດຊອບຂອງຜູ້ນຳຫນ້າ, ຈາກນັ້ນ ສ້າງຄວາມເປັນເອກະພາບ, ຄວາມຕັດສິນໃຈປະຕິບັດ ແລະ ນີ້ແມ່ນມາດຕະການມີຄວາມໝາຍຕັດສິນຊີ້ຂາດ.”
ທ່ານນາຍົກລັດຖະມົນຕີ ຫງວຽນເຕີນຢູງ ໃຫ້ຮູ້ວ່າ: ລັດຖະບານ ຈະປະກາດໃຊ້ມະຕິກ່ຽວກັບບາງມາດຕະການຍູ້ແຮງການສັບຊ້ອນ, ຫັນວິສາຫະກິດເປັນຫຸ້ນສ່ວນ ແລະ ຖອນຄືນແຫ່ລງທຶນຮອນຂອງລັດຢູ່ວິສາຫະກິດ ໄລຍະ 2013-2015, ຄຳສັ່ງຂອງນາຍົກລັດຖະມົນຕີ ກ່ຽວກັບການຍູ້ແຮງການສ້າງໂຄງປະກອບລັດວິສາຫະກິດຄືນໃຫມ່ຮອດປີ 2015 ແລະ ຂໍ້ຕົກລົງຂອງນາຍົກລັດຖະມົນຕີ ກ່ຽວກັບການປະກາດໃຊ້ມາດຖານ, ບັນຊີລາຍຊື່ຈັດແບ່ງປະເພດລັດວິສາຫະກິດ. ນີ້ແມ່ນພື້ນຖານດ້ານກົດໝາຍ ດ້ວຍບັນດາກົນໄກ, ນະໂຍບາຍສະດວກກວ່າ ແນໃສ່ແກ້ໄຂຂໍ້ຕິດຂັດເພື່ອສືບຕໍ່ປະຕິບັດຢ່າງມີປະສິດທິຜົນບໍ່ພຽງແຕ່ກ່ຽວກັບຈຳນວນ ຫາກນັບທັງຄຸນນະພາບການສ້າງໂຄງປະກອບລັດວິສາຫະກິດຄືນໃຫມ່ໃນໄລຍະຈະມາເຖິງ.