(vovworld)- ເມື່ອລົງທຶນເຂົ້າໃນຂົງເຂດເຕັກໂນໂລຊີຂໍ້ມູນຂ່າວສານ ຢູ່ ຫວຽດນາມ ບໍລິສັດຕ່າງປະເທດຫລາຍແຫ່ງ ລ້ວນແຕ່ໃຫ້ຂໍ້ສັງເກດວ່າ: ແຫລ່ງຊັບພະຍາກອນມະນຸດນັບມື້ນັບອຸດົມສົມບູນ, ລະດັບຄວາມຮູ້ຂອງເຂົາເຈົ້ານັບມື້ນັບໄດ້ຮັບການຍົກສູງຂຶ້ນ ແລະ ມີຫລາຍນະໂຍບາຍບູລິມະສິດ. ໃນໄລຍະມໍ່ໆມານີ້, ຫວຽດນາມ ແມ່ນສະຖານທີ່ດຶງດູດນັກລົງທຶນຕ່າງປະເທດເປັນຈຳນວນຫລວງຫລາຍ, ພິເສດໃນຂົງເຂດເຕັກໂນໂລຊີຂໍ້ມູນຂ່າວສານ ຊຶ່ງແມ່ນຂະແຫນງຫນຶ່ງທີ່ພວມມີຄວາມສາມາດບົ່ມຊ້ອນພັດທະນາຢ່າງແຂງແຮງ.
ໃນຊຸມປີມໍ່ໆມານີ້ ແຫລ່ງເງິນລົງທຶນຂອງຕ່າງປະເທດ (FDI) ເຂົ້າຫວຽດນາມ ໄດ້ມີການຫັນທິດເຂົ້າໃນຂົງເຂດເຕັກໂນໂລຊີສູງ, ໃນນັ້ນມີເຕັກໂນໂລຊີຂໍ້ມູນຂ່າວສານ. ຍີ່ປຸ່ນ ແມ່ນປະເທດມີຫລາຍໂຄງການ ແລະ ຜັນຂະຫຍາຍບັນດາໂຄງການລົງທຶນເຂົ້າໃນຂົງເຂດດັ່ງກ່າວໂດຍໄວ. ມີກຸ່ມບໍລິສັດ, ວິສາຫະກິດໃຫຍ່ຂອງຍີ່ປຸ່ນຄື: Sanyo, Matsushita, Sony, Fujitsu, Toshiba, Panasonic, Nidec ໄດ້ກໍ່ສ້າງໂຮງງານຜະລິດດ້ວຍເຕັກໂນໂລຊີທັນສະໄຫມ ແລະ ປະຈຸບັນ ສືບຕໍ່ສະຫນອງທຶນຕື່ມອີກເພື່ອເປີດກວ້າງການລົງທຶນ ດ້ວຍຂອບຂະຫນາດນັບມື້ນັບໃຫຍ່ຫລວງກວ່າ.ຖັດມາແມ່ນກະແສທຶນ FDI ຈາກອາເມລິກາ ແລະ ບັນດາປະເທດເອີລົບ. ບັນດາກຸ່ມບໍລິສັດເຕັກໂນໂລຊີຄື: Intel, IBM ຂອງອາເມລິກາ, Cap Gemini ແລະ Accenture ຂອງຝລັ່ງ ມີໂຄງການຜະລິດແລ້ວ ຫລືພວມຊອກຫາກາລະໂອກາດລົງທຶນກໍ່ສ້າງບັນດາສູນຄົ້ນຄ້ວາ ແລະ ພັດທະນາ ຢູ່ ຫວຽດນາມ. ປີ 2011 ແລະ ຕົ້ນປີ 2012, ເສດຖະກິດໂລກມີທ່າຊຸດໂຊມ, ສະນັ້ນ ແຫລ່ງທຶນ FDI ເຂົ້າຫວຽດນາມ ບໍ່ຫຼາຍປານໃດ. ແຕ່ ຂົງເຂດເຕັກໂນໂລຊີຂໍ້ມູນຂ່າວສານພັດມີບາດກ້າວພັດທະນາຢ່າງແຂງແຮງ. ແຫລ່ງທຶນ FDI ລົງທຶນເຂົ້າຂົງເຂດນີ້ຍັງຄົງເພີ່ມ ຂຶ້ນ, IDG Venture, Rebate Networks ແລະ Ru net Global ໄດ້ລົງທຶນກວ່າ 60 ລ້ານ USD ເຂົ້າ ຂົງເຂດເຕັກໂນໂລຊີຂໍ້ມູນຂ່າວສານ ຢູ່ ຫວຽດນາມ. ທ່ານ Lam Nguyen Hai Long ຮອງຜູ້ອຳນວຍການບໍລິສັດພັດທະນາຊອບແວ Quang Trung ນະຄອນ ໂຮ່ຈິມິນ ໄດ້ໃຫ້ຂໍ້ສັງເກດວ່າ:
“ນັບແຕ່ເດືອນ 1/2011 ມາຮອດປະຈຸບັນ, ພວກຂ້າພະເຈົ້າເຫັນວ່າ ມີກະແສເງິນລົງທຶນໃຫມ່ເຂົ້າໃນ ຂົງເຂດເຕັກໂນໂລຊີຂໍ້ມູນຂ່າວສານ. ພິເສດແມ່ນບໍລິສັດພັດທະນາຊອບແວ Quang Trung ມີກະແສເງິນລົງທຶນຈາກ ຍີ່ປຸ່ນ, ອາເມລິກາເຫນືອ. ປະຈຸບັນ ພວກເຮົາຕ້ອງເຮັດແນວໃດເພື່ອມີກຳລັງແຮງພາຍໃນຢ່າງແຂງແຮງສາມາດນຳໃຊ້ບັນດາແຫລ່ງທຶນດັ່ງກ່າວໃຫ້ໝົດ. ພວກເຮົາຕ້ອງສຸມໃສ່ເຂົ້າໃນຂົງເຂດແຫລ່ງຊັບພະຍາກອນມະນຸດ, ສ່ວນພື້ນຖານໂຄງລ່າງ, ສິ່ງແວດລ້ອມ ພວກເຮົາໄດ້ກໍ່ສ້າງສຳເລັດເກືອບໝົດແລ້ວ.”
ພາບປະກອບ:internet
|
ພາຍຫລັງໄພພິບັດຈາກແຜ່ນດິນໄຫວຄື້ນຍັກເກິດຂຶ້ນຢູ່ ຍີ່ປຸນ ໃນໄລຍະຜ່ານມາ, ແທນທີ່ຈະກໍ່ສ້າງບັນດາພື້ນຖານໂຄງລ່າງຢູ່ພາຍໃນປະເທດ, ມີວິສາຫະກິດຍີ່ປຸ່ນຫລາຍແຫ່ງໄດ້ຄິດໄລ່ເຖິງເລື່ອງລົງທຶນຢູ່ຕ່າງປະເທດ. ບັນດາມາດຖານຄື: ແຮງງານ, ນະໂຍບາຍບຸລິມະສິດ ພິເສດແມ່ນບັນຫາທໍລະນີສາດຢູ່ແຫ່ງລົງທຶນຕ້ອງເປັນປົກກະຕິ. ນັ້ນແມ່ນສາຍເຫດຕົ້ນຕໍເພື່ອໃຫ້ ຫວຽດນາມ ກາຍເປັນຫນຶ່ງໃນບັນດາສະຖານທີ່ ຊຶ່ງນັກລົງທຶນຍີ່ປຸ່ນ ເລືອກເຟັ້ນ. ທ່ານ Nguyen Kim Cuong ສັງກັດກຸ່ມບໍລິສັດ CMC ຢູ່ ນະຄອນ ໂຮ່ຈິມີນ ຖືວ່າ:
“ໃນ 10 ປີ ຜ່ານມາ, ຫວຽດນາມຍັງແມ່ນແຫ່ງສະຫນອງແຫລ່ງ ຊັບພະຍາກອນມະນຸດໃຫ້ແກ່ ຍີ່ປຸ່ນ. ຫວຽດນາມ ແລະ ຍີ່ປຸ່ນ ໄດ້ມີສາຍພົວພັນຢ່າງແຫນ້ນແຟ້ນໃນຂະບວນວິວັດແຫ່ງການຮ່ວມມືນຳກັນ, ສະນັ້ນ ເມື່ອຍີ່ປຸ່ນ ມີຄວາມຕ້ອງການຫັນການລົງທຶນອອກສູ່ຕ່າງປະເທດ, ຫວຽດນາມ ແມ່ນປະເທດທຳອິດ ທີ່ເຂົາເຈົ້າຄິດເຖິງ .”
ໃນໄລຍະຜ່ານມາ, ເຕັກໂນໂລຊີສູງຂໍ້ມູນຂ່າວສານ ຂອງຫວຽດນາມ ມີບາດກ້າວພັດທະນາເປັນຫນ້າຮັບຮູ້. ກະຊວງຖະແຫລງຂ່າວ ແລະ ສື່ສານ ຫວຽດນາມ ໄດ້ສ້າງແຜນຮ່າງ: ເຮັດໃຫ້ຫວຽດນາມ ກາຍເປັນປະເທດພັດທະນາເຕັກໂນໂລຊີຂໍ້ມູນຂ່າວສານຢ່າງແຂງແຮງໂດຍໄວ”, ໃນນັ້ນ ຈຸດໝາຍທີ່ວາງອອກຮອດປີ 2015, ຫວຽດນາມ ຈະນອນໃນຈຳນວນ 70 ປະເທດພັດທະນາ ເຕັກໂນໂລຊີຂໍ້ມູນຂ່າວສານ ແລະ ໂທລະຄົມອັນດັບຫນຶ່ງຂອງໂລກ. ເພື່ອບັນລຸໄດ້ຈຸດໝາຍດັ່ງກ່າວ, ຫວຽດນາມ ໄດ້ວາງອອກຫລາຍນະໂຍບາຍບຸລິມະສິດໃຫ້ແກ່ບັນດານັກລົງທຶນຕ່າງປະເທດ, ເປັນຕົ້ນແມ່ນການລົງທຶນເຂົ້າໃນຂົງເຂດເຕັກໂນໂລຊີຂໍ້ມູນຂ່າວສານ. ທ່ານ Nguyen Hai Long ຮອງຜູ້ອຳນວຍການບໍລິສັດພັດທະນາຊອບແວ Quang Trung ນະຄອນໂຮ່ຈິມີນ ໃຫ້ຮູ້ວ່າ:
“ປະຈຸບັນ ຖ້າຫາກເວົ້າເຖິງນະໂຍບາຍບຸລິມະສິດ, ຫວຽດນາມແມ່ນປະເທດມີນະໂຍບາຍນີ້ດີພໍສົມຄວນ, ຕົວຢ່າງຄື: ກ່ຽວກັບດ້ານພາສີ, ພວກເຮົາຍົກເວັ້ນພາສີໃຫ້ແກ່ບັນດາວິສາຫະກິດຕ່າງປະເທດໃນໄລຍະ 4 ປີຢ່າງລຽນຕິດ ແລະ ຫລຸດຜ່ອນ 50% ໃຫ້ແກ່ 9 ປີຕໍ່ໄປ. ແຕ່ເຖິງຢ່າງໃດກໍຕາມ ການຫນູນຊ່ວຍກ່ຽວກັບຊັບພະຍາກອນມະນຸດກໍແມ່ນບັນຫາສຳຄັນກວ່າໝູ່. ເພາະສະນັ້ນ ເມື່ອບັນດານັກລົງທຶນ ມາ ຫວຽດນາມ, ເຂົາເຈົ້າໄດ້ຊົມໃຊ້ແຫລ່ງຊັບພະຍາກອນມະນຸດຫນຸ່ມ ທີ່ມີລະດັບຄວາມຮູ້, ຄວາມ ຊຳນານງານ. ”
ຍຸດທະສາດພັດທະນາເຕັກໂລໂບຊີ ຂອງ ຫວຽດນາມ ໃນໄລຍະຈະມາເຖິງ ຍັງຄົງສືບຕໍ່ພັດທະນາແຫລ່ງຊັບພະຍາກອນມະນຸດໃນຂົງເຂດເຕັກໂນໂລຊີຂໍ້ມູນຂ່າວສານ ຢ່າງແຮງ ພິເສດແມ່ນຊັບພະຍາກອນມະນຸດມີສີມືດີ. ທ່ານ Nguyen Trong Duong ຫົວຫນ້າ ກົມເຕັກໂນໂລຊີສູງຂໍ້ມູນຂ່າວສານ ສັງກັດກະຊວງຖະແຫລງຂ່າວ ແລະ ສື່ສານ ຫວຽດນາມ ໃຫ້ຮູ້ວ່າ:
“ໃນໄລຍະ 10 ປີຜ່ານມາ ຢູ່ ຫວຽດນາມ ຈຳນວນໂຮງຮຽນບຳລຸງສ້າງກ່ຽວກັບ ເຕັກໂນໂລຊີຂໍ້ມູນຂ່າວສານ ນັບທັງມະຫາວິທະຍາໄລ ແລະ ວິທະຍາໄລ ໄດ້ເພີ່ມຂຶ້ນ ຈາກ 10 ແຫ່ງໃນປີ 2000 ເຖິງງເກືອບ 300 ແຫ່ງແລ້ວໃນປະຈຸບັນ. ແຕ່ລະປີ ບັນດາໂຮງຮຽນດັ່ງກ່າວຕ້ອງຮັບນັກຮຽນ ປະມານ 60.000 ຄົນ ແມ່ນທົບສອງເທ່ົາເມື່ອທຽບໃສ່ປີ 2005 ແລະ ຫວຽດນາມ ມີ 250.000 ຄົນເຄື່ອນໄຫວໃນຂົງເຂດດັ່ງກ່າວ ແລະ ຫວຽດນາມ ກໍມີຖັນແຖວຊັບພະຍາກອນມະນຸດດ້ານ ເຕັກໂນໂລຊີສູງຂໍ້ມູນຂ່າວສານ ໄປເຮັດວຽກຢູ່ບັນດາປະເທດຄື: ອາເມລິກາ, ຍີ່ປຸ່ນ…”
ຕາມບັນດາຜູ້ຊ່ຽວຊານເສດຖະກິດແລ້ວ, ທ່າອ່ຽງໃນປີ 2012 ແມ່ນພັດທະນາ ອຸປະກອນໂທລະສັບມືຖື, ອຸປະກອນໂທລະຄົມທັນສະໄຫມຢ່າງວ່ອງໄວແທນໃຫ້ບັນດາອຸປະກອນເກົ່າ, ຫລ້າຫລັງ ສະນັ້ນ ນີ້ກໍແມ່ນກາລະໂອກາດເພື່ອໃຫ້ຂະແຫນງຜະລິດອຸປະກອນຊອບແວພັດທະນາ. ຄາດຄະເນວ່າ ເຕັກໂນໂລຊີຂໍ້ມູນຂ່າວສານ ຖືກ ແມ່ນຂະແຫນງດຶງດູດນັກລົງທຶນເປັນຈຳນວນຫລວງຫລາຍ ເພາະວ່າ ເຕັກໂນໂລຊີຂໍ້ມູນຂ່າວສານ ພັດທະນາຢ່າງວ່ອງໄວ ແລະ ໄດ້ຮັບຄວາມນິຍົມຈາກລຸ້ນຫນຸ່ມ. ນັ້ນກໍແມ່ນສາຍເຫດເພື່ອໃຫ້ ຫວຽດນາມ ພ້ອມແລ້ວທີ່ຈະຕ້ອນຮັບກະແສເງິນລົງທຶນໃຫມ່ເຂົ້າໃນຂົງເຂດ ເຕັກໂນໂລຊີຂໍ້ມູນຂ່າວສານທີ່ເຕັມໄປດ້ວຍຄວາມສາມາດບົ່ມຊ້ອນນີ້.
ນັກຂ່າວ To Tuan