(vovworld) - ການເຄື່ອນໄຫວຊື້ຂາຍ, ໂຮມວິສາຫະກິດເຂົ້າກັນ (M&A) ຢູ່ຫວຽດນາມ ພວມດຳເນີນໄປຢ່າງຟົດຟື້ນ, ດ້ວຍການມີໜ້າຂອງວິສາຫະກິດໃຫຍ່, ນ້ອຍຫຼາຍແຫ່ງທັງພາຍໃນ ແລະ ຕ່າງປະເທດ. ຕໍ່ໜ້າກາລະໂອກາດໃຫຍ່ຈາກສັນຍາເສດຖະກິດ ແລະ ການຄ້າເຊັ່ນ: TPP, FTA… ເຊິ່ງຫວຽດນາມ ເຂົ້າຮ່ວມ, ພ້ອມກັບນະໂຍບາຍຕ່າງໆຄື: ອະນຸຍາດໃຫ້ນັກລົງທຶນຕ່າງປະເທດຊື້ເຮືອນຢູ່ຫວຽດນາມ, ເພີ່ມອັດຕາກຳມະສິດໃຫ້ນັກລົງທຶນຕ່າງປະເທດຕື່ມອີກ. ສິ່ງດັ່ງກ່າວໄດ້ເພີ່ມກຳລັງໜູນເພື່ອໃຫ້ວິສາຫະກິດຍູ້ແຮງການຊື້ຂາຍ, ໂຮມວິສາຫະກິດເຂົ້າກັນ ແນໃສ່ເພີ່ມກຳລັງແກ່ງແຍ້ງໃຫ້ແກ່ຕົນ.
ປີ 2014, ການເຄື່ອນໄຫວຊື້ຂາຍ ແລະ ໂຮມວິສາຫະກິດເຂົ້າກັນ (M&A) ໄດ້ເພີ່ມຂຶ້ນ, ດ້ວຍລະດັບ 4,2 ຕື້ USD, ເພີ່ມຂຶ້ນ 15% ເມື່ອທຽບໃສ່ປີ 2013. ກ່ຽວກັບການພົວພັນດ້ານການຄ້າ, ຄິດສະເລ່ຍມູນຄ່າການພົວພັນດ້ານການຄ້າແຕ່ລະຄັ້ງບັນລຸປະມານ 11 ລ້ານ USD. ບັນດາການພົວພັນດ້ານການຄ້າສ່ວນຫຼາຍລ້ວນແຕ່ມີການເຂົ້າຮ່ວມຂອງຕ່າງປະເທດ, ເພາະວ່າບັນດານັກລົງທຶນຕ່າງປະເທດມີຄວາມສາມາດດ້ານທຶນຮອນ ແລະ ມຸ້ງໄປເຖິງຄາດໝາຍເປັນບັນດາບໍລິສັດທີ່ມີຂະໜາດໃຫຍ່ສົມຄວນ, ດ້ວຍຈຳນວນທຶນປະມານ 20-100 ລ້ານ USD. ນຳໜ້າໃນການເຄື່ອນໄຫວ M&A ປີຜ່ານມາ, ແມ່ນຂະແໜງຂາຍຍ່ອຍ, ກວມ 36% ຍອດມູນຄ່າການເຄື່ອນໄຫວ M&A ທັງໝົດ. ດ້ວຍຈຳນວນພົນລະເມືອງແມ່ນ 90 ລ້ານຄົນ, ໃນນັ້ນ 60% ແມ່ນໃນເກນອາຍຸອອກແຮງງານ, ຕະຫຼາດຂາຍຍ່ອຍຫວຽດນາມ ສືບຕໍ່ສ້າງຄວາມດຶງດູດບັນດານັກລົງທຶນທັງພາຍໃນ ແລະ ຕ່າງປະເທດ. ບັນດາການເຄື່ອນໄຫວດ້ານການຄ້າທີ່ໜ້າສົນໃຈນັ້ນແມ່ນ, Vingroup ຊື້ Ocean mart ເພື່ອພັດທະນາ ກາຍເປັນ Vinmart; ກຸ່ມບໍລິສັດຂອງໄທ ຄາດຈະຊື້ Metro, ຫຼື Acon ຂອງຍີ່ປຸ່ນ ລົງທຶນເຂົ້າ Citimart ແລະ Fivimart. ຖັດຈາກນັ້ນແມ່ນຂົງເຂດສິນຄ້າອຸດສາຫະກຳຜະລິດໃຊ້ສອຍ, ດ້ວຍອັດຕາ 21% ຍອດມູນຄ່າການເຄື່ອນໄຫວ M&A ໃນປີຜ່ານມາ. ໃນຂົງເຂດທະນາຄານ, ໄລ່ຮອດກາງປີນີ້, ໄດ້ດຳເນີນການໂຮມທະນາຄານເຂົ້າກັນເຖິງ 4 ຄັ້ງ. ໃນນັ້ນ, ໜ້າສົນໃຈແມ່ນການໂຮມທະນາຄານ Viettinbank ກັບ PGbank, ທະນາຄານ Sacombank ກັບທະນາຄານເຟືອງນາມ, ທະນາຄານ BIDV ກັບທະນາຄານ MHB…ທ່ານ ຫງວຽນແທງຮ່າ, ຜູ້ອຳນວຍການກຸ່ມບໍລິການທະນາຄານການຄ້າຫຸ້ນສ່ວນຫວຽດນາມ ທິ້ງເວື້ອງ (VPBank), ໃຫ້ຮູ້ວ່າ:
“ມີບາງວິສາຫະກິດດີທີ່ສຸດ, ເຂົາເຈົ້າຢາກສືບຕໍ່ເປີດກວ້າງບັນດາຂະແໜງອາຊີບທີ່ເຂົາເຈົ້າໄດ້ລົງທຶນ ແລະ ປະສົບຜົນສຳເລັດແລ້ວ, ແຕ່ຄວາມຕ້ອງການດ້ານທຶນແມ່ນຫຼາຍທີ່ສຸດ, ດັ່ງນັ້ນເຂົາເຈົ້າຈຶ່ງເຊີນບັນດາຄູ່ຮ່ວມມືທີ່ມີຂະແໜງອາຊີບ, ວິຊາສະເພາະ ແລະ ທິດທາງດຽວກັນລົງທຶນເພື່ອພັດທະນາຢ່າງໄວ ແລະ ໝັ້ນຄົງກວ່າ ກໍ່ຄືສຳຜັດກັບເຕັກໂນໂລຢີຈາກຕ່າງປະເທດ ເພື່ອໃຫ້ທັງສອງຝ່າຍຕ່າງມີຜົນປະໂຫຍດ.”
ຕາມບັນດານັກຊ່ຽວຊານດ້ານເສດຖະກິດ, ໃນປີ 2015, ການເຄື່ອນໄຫວ M&A ສືບຕໍ່ໄດ້ຮັບການຍູ້ແຮງ ຍ້ອນມີການຫັນປ່ຽນນະໂຍບາຍເຊັ່ນ: ກົດໝາຍວ່າດ້ວຍການລົງທຶນ ແລະ ກົດໝາຍວ່າດ້ວຍວິສາຫະກິດສະບັບປັບປຸງ, ເຊິ່ງມີຜົນສັກສິດນັບແຕ່ວັນທີ 1/7 ເປັນຕົ້ນໄປ. ລັດຖະບານປະກາດໃຊ້ດຳລັດອະນຸຍາດເພີ່ມອັດຕາກຳມະສິດໃຫ້ບັນດານັກລົງທຶນຕ່າງປະເທດໃນຫຼາຍຂົງເຂດ, ພ້ອມກັບບັນດາຄຳໝັ້ນສັນຍາຫັນເປັນຫຸ້ນສ່ວນຂອງບັນດາລັດວິສາຫະກິດ, ການພັດທະນາຂອງບັນດາບໍລິສັດເອກະຊົນພາຍໃນປະເທດນັ້ນ, ໄດ້ເປັນກຳລັງໜູນ ເຮັດໃຫ້ການຊື້ຂາຍແລະໂຮມວິສາຫະກິດເຂົ້າກັນຢູ່ຫວຽດນາມ ພັດທະນາໃນໄລຍະຈະມາເຖິງ. ທ່ານນາງ ທ໋າຍວຽດແອງ, ຜູ້ອຳນວຍການທີ່ປຶກສາບໍລິສັດຫຼັກຊັບນຳ້ມັນອາຍແກສ, ຖືວ່າ:
“ບາງເທື່ອນັບແຕ່ນີ້ເປັນຕົ້ນໄປ, ກຸ່ມລັດວິສາຫະກິດຈະມີການເຄື່ອນໄຫວ M&A ຫຼາຍທີ່ສຸດ, ເພາະທີ່ໜຶ່ງແມ່ນ, ຕາມການຊີ້ນຳສ້າງໂຄງປະກອບຄືນໃໝ່ຈະຕ້ອງຍູ້ແຮງ. ທີສອງແມ່ນ, ປະຈຸບັນມີບັນດາກົນໄກເພື່ອໃຫ້ລັດວິສາຫະກິດມີໄຫວພິບກວ່າໃນການຂາຍໃຫ້ຜູ້ຖືຫຸ້ນພາຍນອກ ແລະ ແຜນນະໂຍບາຍຂອງລັດຖະບານກໍ່ສ້າງຄວາມສະດວກຫຼາຍໃຫ້ບັນດານັກລົງທຶນຕ່າງປະເທດ“.
ດ້ວຍການໜູນຊ່ວຍຢ່າງຕັ້ງໜ້າຈາກບັນດານະໂຍບາຍຂອງລັດຖະບານ, ພ້ອມກັບບັນດາສັນຍາເສດຖະກິດ ແລະ ການຄ້າໃຫຍ່ເຊິ່ງຫວຽດນາມ ພວມເຂົ້າຮ່ວມການເຈລະຈາ ແລະ ລົງນາມເຊັ່ນ: TPP, FTA, … ປີ 2015 ແມ່ນປີທີ່ການເຄື່ອນໄຫວ M&A ຈະຟົດຟື້ນ ແລະ ພັດທະນາຢ່າງແຮງ ເມື່ອມີກາລະໂອກາດໃຫຍ່ຫຼາຍຢ່າງໃຫ້ແກ່ບັນດານັກລົງທຶນຕ່າງປະເທດ. ດ້ານອື່ນ, ປີນີ້ກໍ່ແມ່ນກຳນົດເວລາສຸດທ້າຍເພື່ອໃຫ້ບັນດາປະເທດອາຊຽນສ້າງເຂດການຄ້າເສລີ. ຖ້າສຳເລັດຜົນ, ທັງ 10 ປະເທດສະມາຊິກຈະເຊື່ອມໂຍງເສດຖະກິດຢ່າງຮອບດ້ານເຂົ້າຕະຫຼາດລວມ ດ້ວຍພົນລະເມືອງເຖິງ 600 ລ້ານຄົນ.
ກະຊວງແຜນການ ແລະ ລົງທຶນຫວຽດນາມ ພວມມີແຜນການຈັດຕັ້ງເວທີປາໄສ M&A ປະຈຳປີຄັ້ງທີ 7 ຢູ່ນະຄອນໂຮ່ຈີມິນ ດ້ວຍຫົວຂໍ້ວ່າ “ລໍຖ້າການພັດທະນາ M&A “ ດ້ວຍຄວາມຫວັງວ່າ, ຈະສ້າງໂອກາດສົນທະນາຢ່າງກົງໄປກົງມາ ກ່ຽວກັບບັນດາບັນຫາແທດຈິງ, ແບ່ງປັນບົດຮຽນ ແລະ ເຊື່ອມຕໍ່ກາລະໂອກາດລົງທຶນຕາມຮູບການ M&A ລະຫວ່າງວິສາຫະກິດ ກັບນັກລົງທຶນ. ບັນດານັກຊ່ຽວຊານດ້ານເສດຖະກິດຄາດຄະເນວ່າ. ດ້ວຍຄວາມສາມາດບົ່ມຊ້ອນ ແລະ ກາລະໂອກາດທີ່ມີຢູ່ແລ້ວ, ການເຄື່ອນໄຫວ M&A ຈະພັດທະນາຢ່າງແຮງ, ເພື່ອໃຫ້ເສດຖະກິດຫວຽດນາມ ເຊື່ອມໂຍງ ແລະ ພັດທະນາຢ່າງແທ້ຈິງ.