(vovworld)-ປີ 2013, ສະມາຄົມນັກທຸລະກິດຫນຸ່ມຫວຽດນາມ ໄດ້ຈັດຕັ້ງພີທີສະເຫລີມສະຫລອງ 20 ປີແຫ່ງຂະບວນການນັກທຸລະກິດຫນຸ່ມຫວຽດນາມ ແລະ ເປັນຂີດໝາຍ 10 ປີແຫ່ງການຈັດຕັ້ງພິທີມອບລາງວັນດາວຄຳແດນຫວຽດ, ຊື່ງແມ່ນລາງວັນທີ່ມີອິດທິພົນຊື່ສຽງ ປະກອບສ່ວນຍົກສູງທີ່ຕັ້ງຂອງເຄື່ອງໝາຍການຄ້າວິສາຫະກິດຫນຸ່ມ ຫວຽດນາມ ໃນວິວັດການເຊື່ອມໂຍງເຂົ້າກັບເສດຖະກິດໂລກ.
ພິທີມອບລາງວັນດາວຄຳແດນຫວຽດ
ພາບ:internet
|
ໂດຍເລີ່ມມາຈາກສະໂມສອນນັກທຸລະກິດຫນຸ່ມ ດ້ວຍສະມາຊິກໃນເບື້ອງຕົ້ນແມ່ນ 15 ຄົນ, ໃນນັ້ນ ເປັນຫລັກແຫລ່ງແມ່ນ ສະໂມສອນນັກທຸລະກິດຫນຸ່ມຢູ່ ຮ່າໂນ້ຍ ແລະ ສະໂມສອນນັກທຸລະກິດຫນຸ່ມ ໂຮ່ຈິມີນ, ສະມາຄົມນັກທຸລະກິດຫນຸ່ມຫວຽດນາມໄດ້ຮັບການສ້າງຕັ້ງຂຶ້ນເມື່ອປີ 2003. ໃນ 20 ປີແຫ່ງການເຕີບໃຫຍ່ ແລະ ພັດທະນາ, ມາຮອດປະຈຸບັນ ສະມາຄົມນັກທຸລະກິດຫນຸ່ມຫວຽດນາມ ໄດ້ມີການເຄື່ອນໄຫວຢູ່ 63 ແຂວງ, ນະຄອນ ແລະ ໄດ້ເຂົ້າຮ່ວມຫລາຍຂະແຫນງເສດຖະກິດ ດ້ວຍສະມາຊິກເກືອບ 10.000 ຄົນ. ຄຽງຂ້າງຫ້ອງການສະມາຄົມນັກທຸລະກິດຫນຸ່ມຢູ່ ສູນກາງ, ສະມາຄົມ ໄດ້ສ້າງຕັ້ງບັນດາຫ້ອງການສະມາຄົມສາຂາຢູ່ບັນດາທ້ອງຖິ່ນ ແລະ ຂະແຫນງການ. ບັນດາວິສາຫະກິດຂອງສະມາຄົມ ໄດ້ສ້າງວຽກເຮັດງານທຳໃຫ້ແກ່ຄົນງານກວ່າ 2,5 ລ້ານຄົນ ດ້ວຍຍອດລາຍຮັບແຕ່ລະປີບັນລຸກວ່າ 25 ຕື້ USD. ພິເສດຜ່ານການເຄື່ອນໄຫວໃນ 4 ອາຍຸການຜ່ານມາ, ສະມາຄົມໄດ້ປະກອບສ່ວນຍົກສູງຄວາມຮັບຮູ້ກ່ຽວກັບທີ່ຕັ້ງ, ບົດບາດຂອງຖັນແຖວນັກທຸລະກິດຫນຸ່ມສຳລັບອະນາຄົດຂອງປະເທດຊາດ. ການນຳວິສາຫະກິດຫນຸ່ມລຸ້ນທຳອິດຫລາຍຄົນ ປະຈຸບັນໄດ້ກາຍເປັນບັນດາວິສາຫະກິດມີຊື່ສຽງ, ມີເຄື່ອງໝາຍການຄ້າລະດັບຊາດ ແລະ ສາກົນຄື: ທ່ານ ເຈືອງຢາບິ່ງ ປະທານກຸ່ມບໍລິສັດ FPT, ທ່ານ ຫວໍກວກທັງ, ປະທານສະພາບໍລິຫານ ກຸ່ມບໍລິສັດ ດົງເຕີມ ແລະ ທະນາຄານກຽນລອງ, ທ່ານ ເຈີນບາເຢືອງ ປະທານສະພາບໍລິຫານບໍລິສັດຫຸ້ນສ່ວນໂອໂຕ ເຈື່ອງຫາຍ ຫລື ທ່ານດັ້ງເລຫງວຽນຫວູ ປະທານສະພາບໍລິຫານ, ທັງເປັນຜູ້ອຳນວຍການໃຫຍ່ກຸ່ມບໍລິສັດ ກາເຟຈູງງວຽນ. ດ້ວຍກຳລັງແຮງຂອງລຸ້ນຫນຸ່ມ, ຂະຫຍັນຂັນເຄື່ອນ, ມີຫົວຄິດປະດິດສ້າງ, ບັນດານັກທຸລະກິດຫນຸ່ມໄດ້ສ້າງບັນດາວິສາຫະກິດຊັ້ນນຳຂອງປະເທດຊາດ, ປະກອບສ່ວນສຳຄັນເຂົ້າໃນພາລະກິດພັດທະນາເສດຖະກິດສັງຄົມຂອງປະເທດຊາດ. ໃນໂອກາດສະເຫລີມສະຫລອງ 20 ປີແຫ່ງວັນສ້າງຕັ້ງສະມາຄົມ ນັກທຸລະກິດຫນຸ່ມ ຫວຽດນາມ 2013, ທ່ານຮອງນາຍົກລັດຖະມົນຕີ ຫວຽດນາມ ຫວູວັນນີງ ຊີ້ແຈ້ງວ່າ:
“ສະມາຄົມນັກທຸລະກິດຫນຸ່ມ ຫວຽດນາມ ສູ້ຊົນສືບຕໍ່ກາຍເປັນອົງການເຕົ້າໂຮມ ນັກທຸລະກິດຫນຸ່ມ. ສະມາຄົມ ນັກທຸລະກິດຫນຸ່ມ ຄວນສ້າງຄວາມສາມັກຄີເປັນຫລາຍຮູບການ, ຮ່ວມເດີນທາງກັບນັກທຸລະກິດຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ສາມັກຄີກັນ, ມີຫົວຄິດປະດິດສ້າງ ເປັນກຳລັງນຳຫນ້າໃນແນວໂຮມເສດຖະກິດ, ພັດທະນາວິສາຫະກິດ, ປະກອບສ່ວນເຂົ້າໃນການພັດທະນາແບບຍືນຍົງຂອງປະເທດຊາດ. ”
ໄປຄຽງຄູ່ກັບການພັດທະນາຂອງສະມາຄົມນັກທຸລະກິດຫນຸ່ມຫວຽດນາມ, ການມອບລາງວັນ ດາວຄຳແດນຫວຽດ ໄດ້ຮັບການສ້າງຕັ້ງຂຶ້ນແຕ່ປີ 1993 ເປັນຂີດໝາຍແຫ່ງບາດກ້າວໃຫມ່ຂອງບັນດານັກທຸລະກິດຫນຸ່ມຫວຽດນາມ. ສະເພາະໃນ 10 ປີມານີ້ ການມອບລາງວັນດັ່ງກ່າວໄດ້ດຶງດູດການເຂົ້າຮ່ວມຂອງກວ່າ 5.400 ເຄື່ອງໝາຍການຄ້າ, ຜະລິດຕະພັນ, ໃນນັ້ນມີ 1.700 ເຄື່ອງໝາຍການຄ້າ, ຜະລິດຕະພັນໄດ້ຮັບລາງວັນ. ນອກນັ້ນ ມີຫລາຍຜະລິດຕະພັນ, ເຄື່ອງໝາຍການຄ້າ ຫວຽດນາມ ສາມາດແກ່ງແຍ້ງກັບສາກົນຕາມມາດຖານ: ຄຸນນະພາບ, ລາຄາ, ເຕັກໂນໂລຊີ ແລະ ບັນດາບໍລິການຫລັງການຂາຍ. ທ່ານ ມາຍຫືວຕີນ, ປະທານສະມາຄົມນັກທຸລະກິດຫນຸ່ມຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າວາງຄາດໝາຍ ລາງວັນດາວເຫລືອງແດນຫວຽດ ບໍ່ພຽງແຕ່ແມ່ນລາງວັນທີ່ມີຊື່ສຽງໃນຂອບເຂດຂອງປະເທດຫວຽດນາມເທົ່ານັ້ນ ຫາກຍັງກາຍເປັນລາງວັນລະດັບສາກົນ ອີກດ້ວຍ. ເພື່ອປະຕິບັດສິ່ງດັ່ງກ່າວ, ພວກຂ້າພະເຈົ້າສືບຕໍ່ຄົ້ນຄ້ວາເພີ່ມເຕີມບັນດາມາດຖານດີກວ່າເພື່ອໃຫ້ລາງວັນດາວຄຳແດນຫວຽດມີລັກສະນະທົ່ວໂລກຫລາຍກວ່າໃນອະນາຄົດ.”
ຊຸມປີມໍ່ໆມານີ້, ໃນເງື່ອນໄຂທີ່ຕະຫລາດພາຍໃນປະເທດຍັງປະສົບກັບຄວາມຫຍຸ້ງຍາກຫລາຍຢ່າງ ແຕ່ວິສາຫະກິດຫນຸ່ມຫລາຍແຫ່ງໄດ້ເສີມຂະຫຍາຍກຳລັງແຮງຂອງລຸ້ນຫນຸ່ມທີ່ມີຫົວຄິດປະດິດສ້າງໃນການຜະລິດດຳເນີນທຸລະກິດ, ຊອກຫາທິດ ສົ່ງອອກ, ລົງທຶນອອກສູ່ຕ່າງປະເທດ, ນຳເງິນຕາຕ່າງປະເທດມາໃຫ້ປະເທດຊາດ ແລະ ຈາກນັ້ນສ້າງເງື່ອນໄຂສະດວກເພື່ອໃຫ້ຜະລິດຕະພັນຂອງຫວຽດນາມ ສົ່ງອອກໄປຍັງຕະຫລາດໂລກ. ການເຄື່ອນໄຫວຂອງສະມາຄົມ ແລະ ຂະບວນການນັກທຸລະກິດຫນຸ່ມຫວຽດນາມ ໄດ້ ແລະ ພວມປະກອບສ່ວນໃຫ້ມີຖັນແຖວນັກທຸລະກິດລຸ້ນຫນຸ່ມຂອງປະເທດຊາດ ດ້ວຍຄວາມຫວັງ, ພູມປັນຍາ, ໄດ້ ແລະ ພວມແມ່ນກຳລັງຫລັກແຫລ່ງແກ່ນສານໃນປະຊາຄົມວິສາຫະກິດ, ນັກທຸລະກິດ ຫວຽດນາມ.