(vovworld)- “ປະຕູໜຶ່ງ-ບ່ອນຢຸດດຽວ” ແມ່ນຮູບແບບທີ່ເປັນແບບຢ່າງໄດ້ຮັບການຜັນຂະຫຍາຍເປັນຄັ້ງທຳອິດຢູ່ຫວຽດນາມ ໂດຍ ກົມພາສີສາຂາດ່ານຊາຍແດນສາກົນ ລາວບ໋າວ ຊື່ງແມ່ນອົງການພາສີທຳອິດຂອງຫວຽດນາມ ປະຕິບັດ ພ້ອມກັບດ່ານຊາຍແດນສາກົນ ແດນສະຫວັນ ຂອງລາວ. ຕາມຮູບແບບນີ້, ຜູ້ໂດຍສານ, ສິນຄ້າ ແລະ ພາຫະນະ ເຂົ້າອອກເມືອງ ໂດຍຝ່າຍ ລາວ ແລະ ຫວຽດນາມ ສົມທົມກັນກວດກາ, ເຮັດລະບຽບການຢູ່ປະຕູດຽວ, ສ້າງຄວາມສະດວກໃຫ້ແກ່ວິສາຫະກິດ ກໍຄືປະຊາຊົນ.
ດ່ານຊາຍແດນລາວບ໋າວ
ພາບ:internet
|
ດ່ານຊາຍແດນ ລາວບ໋າວ ເມືອງ ເຮືອງຮວາ ຫ່າງຈາກນະຄອນ ດົງຮ່າ ແຂວງ ກວ໋າງຈີ້ ປະມານ 80 ກິໂລແມັດ, ເຊື່ອມຕໍ່ດ່ານຊາຍແດນສາກົນ ແດນສະຫວັນຂອງລາວ ແລະ ນອນໃນແລວເສດຖະກິດ ຕາເວັນອອກ - ຕາເວັນຕົກ. ປີ 2005 ຫວຽດນາມ ແລະ ລາວ ໄດ້ລົງນາມໃນບົດບັນທຶກຊ່ວຍຈຳກ່ຽວກັບການຜັນຂະຫຍາຍວຽກງານກວດກາຕາມຮູບແບບ “ປະຕູໜຶ່ງ-ບ່ອນຢຸດຽວ” ຢູ່ດ່ານຊາຍແດນສາກົນ ລາວບ໋າວ (ຫວຽດນາມ) - ແດນສະຫວັນ (ລາວ). ດ້ວຍຮູບແບບນີ້, ຜູ້ໂດຍສານ, ພາຫະນະ ແລະ ສິນຄ້າ ພຽງແຕ່ຕ້ອງເຮັດລະບຽບການຢູ່ບ່ອນດຽວ ສະນັ້ນ ເວລາລໍຖ້າ ກໍຄືຄ່າຂົນສົ່ງສິນຄ້າໄດ້ຫລຸດຜ່ອນຫລາຍສົມຄວນ ເພື່ອຮັບໃຊ້ໃຫ້ວຽກງານກວດກາ, ຕິດຕາມກວດກາຂອງບັນດາອົງການກ່ຽວຂ້ອງ. ທ່ານ ດີງງອກແທງ, ຫົວຫນ້າກົມພາສີສາຂາດ່ານຊາຍແດນ ລາວບາວ ສັງກັດ ກົມພາສີແຂວງ ກວ໋າງຈີ້ ໃຫ້ຮູ້ວ່າ: ປະຕິບັດຮູບແບບກວດກາດັ່ງກ່າວ ໄດ້ນຳມາເຊິ່ງປະສິດທິຜົນກ່ຽວກັບວຽກງານປະຕິຮູບລະບຽບການບໍລິຫານຢູ່ດ່ານຊາຍແດນຢ່າງເຫັນໄດ້ຊັດ, ສ້າງເງື່ອນໄຂສະດວກຫລາຍຢ່າງໃຫ້ຜູ້ໂດຍສານ, ພາຫະນະ, ສິນຄ້າເຂົ້າອອກເມືອງຜ່ານຊາຍແດນ. ນອກນັ້ນ ຮູບແບບນີ້ ຍັງຊ່ວຍຮັດແຫນ້ນນ້ຳໃຈສາມັກຄີ, ຫນູນຊ່ວຍ, ຊ່ວຍເຫລືອ ລະຫວ່າງບັນດາກຳລັງກ່ຽວຂ້ອງຂອງຫວຽດນາມ ແລະ ລາວ.
“ໂດຍປະຕິບັດຮູບແບບນີ້, ວຽກງານຕ້ານການຄ້າເຖື່ອນ, ສໍ້ໂກງການຄ້າມີປະສິດທິຜົນທີ່ສຸດ. ເມື່ອອົງການກ່ຽວຂ້ອງຂອງສອງປະເທດສົມທົບກັນປະຕິບັດ ເປັນເຈົ້າການສະຫນອງຂໍ້ມູນຂ່າວໃຫ້ກັນເພື່ອປ້ອງກັນ ແລະ ມີມາດຕະການແກ້ໄຂ, ມີແຜນການຕໍ່ສູ້ປ້ອງກັນ,ຕ້ານການຄ້າເຖື່ອນ ແລະ ສໍ້ໂກງການຄ້າ ຢ່າງທັນການ. ສະນັ້ນ ນັບແຕ່ຕົ້ນເດືອນ 1/2015 ມາຮອດປະຈຸບັນ, ພວກຂ້າພະເຈົ້າໄດ້ພົບເຫັນບັນດາກໍລະນີເຮັດລະບຽບການພາສີຜິດ, ສ່ວນການຄ້າເຖື່ອນກໍຫລຸດລົງ.”
ປະຈຸບັນ, ຢູ່ ບ່ອນເຮັດລະບຽບການພາສີ ຫລືຢູ່ສະຖານທີ່ກວດກາສິນຄ້າ ລ້ວນແຕ່ມີພະນັກງານພາສີ, ທະຫານປ້ອງກັນຊາຍແດນ, ກຳລັງກວດກາໂລກລະບາດ ລາວ ແລະ ຫວຽດນາມສົມທົບກັນແກ້ໄຂລະບຽບການການແຈ້ງພາສີໃຫ້ເຈົ້າຂອງສິນຄ້າ, ຜູ້ໂດຍສານ, ພາຫະນະເຂົ້າອອກເມືອງຢ່າງວ່ອງໄວ. ທ່ານ ດີງງອກແທງ, ຫົວຫນ້າກົມພາສີສາຂາ ດ່ານຊາຍແດນລາວບ໋າວ ໃຫ້ຮູ້ວ່າ: ເວລາເຮັດລະບຽບການໃຫ້ ສິນຄ້າງວດໜຶ່ງພຽງແຕ່ເສຍເວລາ 10-15 ນາທີເທົ່ານັ້ນ.
“ຄູ່ດ່ານຊາຍແດນ ລາວບາວ -ແດນສະຫວັນ ປະຈຸບັນ ແມ່ນ ຄູ່ດ່ານຊາຍແດນຫນຶ່ງດຽວໃນທົ່ວປະເທດທີ່ເຮັດວຽກແຕ່ 7 ໂມງເຊົ້າຮອດ 22 ໂມງໃນມື້ຫນຶ່ງ. ສິ່ງດັ່ງກ່າວໄດ້ສ້າງຄວາມສະດວກໃຫ້ການຈໍລະຈອນສິນຄ້າ, ຜູ້ໂດຍສານ ແລະ ພາຫະນະຜ່ານດ່ານຊາຍແດນ. ພິເສດ ໃນແລວເສດຖະກິດຕາເວັນອອກ- ຕາເວັນຕົກ, ການຈໍລະຈອນສິນຄ້າ, ຜູ້ໂດຍສານລະຫວ່າງບັນດາປະເທດພາຍໃນພາກພື້ນຜ່ານຊາຍແດນ ລາວບ໋າວ ສາມາດດຳເນີນໃນມື້, ສະນັ້ນ ພວກຂ້າພະເຈົ້າເປັນເຈົ້າການໃນການແກ້ໄຂບັນດາລະບຽບການທີ່ແກ່ຍາວຮອດຄ່ຳຄືນ. ນອກນັ້ນ ບັນດາວິສາຫະກິດກໍ່ສາມາດນຳເຂົ້າສົ່ງອອກສິນຄ້າຢ່າງທັນການໃນມື້ໄດ້.”
ຜົນສຳເລັດຂອງຮູບແບບ “ປະຕູໜຶ່ງ, ບ່ອນຢຸດດຽວ” ນັ້ນແມ່ນຍ້ອນມີການປະສານສົມທົບຂອງກຳລັງກ່ຽວຂ້ອງສອງປະເທດ. ນອກນັ້ນທັງສອງຝ່າຍກໍສົມທົບກັນ, ແລກປ່ຽນເປັນປະຈຳ, ເພື່ອແກ້ໄຂບັນດາບັນຫາທີ່ຍັງຄົງຄ້າງ ເຮັດໃຫ້ການຈໍລະຈອນສິນຄ້າສະດວກສະບາຍ. ສອງຝ່າຍຍັງແລກປ່ຽນຂໍ້ມູນຂ່າວເພື່ອຄົ້ນພົບບັນດາກໍລະນີການຄ້າເຖື່ອນ, ຂົນສົ່ງສິນຄ້າຢ່າງຜິດກົດໝາຍຜ່ານຊາຍແດນຢ່າງທັນການ. ທ່ານ ໄຊຍະວົງ ພານິດ, ພະນັກງານຄຸ້ມຄອງດ່ານຊາຍແດນ ແດນສະຫວັນ (ລາວ) ໃຫ້ຮູ້ວ່າ:
“ກຳລັງກ່ຽວຂ້ອງຂອງສອງປະເທດຄື: ພະນັກງານພາສີ, ທະຫານປ້ອງກັນຊາຍແດນ, ຕຳຫລວດ ຫວຽດນາມ ແລະ ລາວ ໄດ້ສົມທົບນຳກັນຢ່າງແຫນ້ນແຟ້ນ, ສ້າງເງື່ອນໄຂສະດວກໃຫ້ສິນຄ້າ, ຜູ້ໂດຍສານ ແລະ ພາຫະນະຢ່າງວ່ອງໄວ. ຂ້າພະເຈົ້າເຫັນວ່າ ລັດຖະບານສອງປະເທດ ກໍເອົາໃຈໃສ່ທີ່ສຸດແລະ ຊີ້ນຳກ່ຽວກັບວຽກງານກວດກາສິນຄ້າຂອງກຳລັງກ່ຽວຂ້ອງສອງປະເທດ.”
ກ່ອນນີ້, ເມື່ອບໍ່ທັນຜັນຂະຫຍາຍຮູບແບບ “ປະຕູໜຶ່ງ,ບ່ອນຢຸດດຽວ”, ບາງເທື່ອສິນຄ້າ, ພາຫະນະຖືກຕິດຂັດຢູ່ດ່ານຊາຍແດນຫລາຍສົມຄວນ. ເຖິງວ່າກຳລັງກ່ຽວຂ້ອງສອງປະເທດໄດ້ເຮັດວຽກຈົນເດີກ. ແຕ່ປະຈຸບັນ, ເມື່ອຜ່ານຄູ່ດ່ານຊາຍແດນນີ້, ວິສາຫະກິດ, ຜູ້ໂດຍສານ ແລະ ສິນຄ້າກໍ່ລ້ວນແຕ່ປະຢັດເວລາ, ລາຍຈ່າຍໄດ້, ວຽກງານເຮັດລະບຽບການຜ່ານຊາຍແດນກໍວ່ອງໄວ ແລະ ສະດວກກວ່າ. ອ້າຍ ຫງວຽນມີງເຕີນ, ພະນັກງານຫ້ອງຂາອອກຂາເຂົ້າ, ບໍລິສັດຫຸ້ນສ່ວນຂາອອກຂາເຂົ້າ ຮ່ວາເລີ້ຍ, ມີສຳນັກງານຕັ້ງຢູ່ແຂວງ ລ້າງເຊີນ ໃຫ້ຮູ້ວ່າ:
“ນັບແຕ່ເມື່ອຫວຽດນາມ ແລະ ລາວ ຜັນຂະຫຍາຍຮູບແບບ “ປະຕູໜຶ່ງ, ບ່ອນຢຸດດຽວ” ໄດ້ສ້າງຄວາມສະດວກໃຫ້ແກ່ວິສາຫະກິດ, ເປັນຕົ້ນແມ່ນເວລາ. ພະນັກງານພາສີສອງປະເທດເຮັດວຽກຢ່າງເຂັ້ມງວດ, ສຸດຈິດສຸດໃຈ, ແນະນຳຢ່າງລອບຄອບຖິ່ຖ້ວນໃຫ້ແກ່ວິສາຫະກິດ. ບັນດາກຳລັງກ່ຽວຂ້ອງຂອງລາວກໍສ້າງຄວາມສະດວກໃຫ້ວິສາຫະກິດກ່ຽວກັບພາຫະນະອຸປະກອນ, ພື້ນຖານໂຄງລ່າງກໍຄືຮັບໃຊ້ການແຈ້ງພາສີ ແລະ ເຮັດລະບຽບການສິນຄ້າ”
ບັນດາຜົນປະໂຫຍດຊື່ງຮູບແບບ “ປະຕູໜຶ່ງ, ບ່ອນຢຸດດຽວ” ນຳມາໃຫ້ແມ່ນມີຄວາມໝາຍຢ່າງແທດຈິງ, ສ້າງຄວາມສະດວກໃຫ້ແກ່ປະຊາຊົນ, ວິສາຫະກິດສອງປະເທດໃນການເຮັດລະບຽບການສິນຄ້າ, ພັດທະນາເສດຖະກິດ. ໃນໄລຍະຈະມາເຖິງ, ເພື່ອປະຕິບັດຮູບແບບນີ້ຢ່າງຄົບຖ້ວນ, ບັນດາອົງການກ່ຽວຂ້ອງຂອງສອງປະເທດ ຫວຽດນາມ ແລະ ລາວ ຈະປັບປຸງບັນດາຮົ້ວກີດຂວາງກ່ຽວກັບພື້ນຖານດ້ານກົດໝາຍ, ວັດຖຸຕະຫລອດຮອດການຍົກສູງຄຸນນະພາບແຫລ່ງຊັບພະຍາກອນມະນຸດ, ເພື່ອເຮັດໃຫ້ຄູ່ດ່ານຊາຍແດນ ລາວບ໋າວ - ແດນສະຫວັນ ນັບມື້ນນັບສົມບູນແບບກວ່າ, ກາຍເປັນປະຕູພັດທະນາຂອງແລວເສດຖະກິດຕາເວັນອອກ ຕາເວັນຕົກ.