(vovworld) - ປະຈຸບັນ, ຫວຽດນາມ ມີວິສາຫະກິດເອກະຊົນປະມານ 500.000 ແຫ່ງ ທີ່ພວມເຄື່ອນໄຫວ ແລະ ສ້າງ 1,2 ລ້ານ ວຽກງານເຮັດງານທຳ, ດ້ວຍ 51% ກຳລັງແຮງງານທົ່ວປະເທດ. ລັດຖະບານຫວຽດນາມ ໄດ້ກຳນົດບົດບາດເສດຖະກິດພາກເອກະຊົນແມ່ນກຳລັງໜູນສຳຄັນຂອງພື້ນຖານເສດຖະກິດ ແລະ ກໍແມ່ນພາກສ່ວນສຳຄັນໃນການປ່ຽນໃໝ່ລະບອບລະບຽບການເສດຖະກິດຂອງປະເທດ. ຍ້ອນເຫດນັ້ນ, ຫວຽດນາມ ໄດ້ກຳນົດສ້າງທຸກເງື່ອນໄຂສະດວກ, ກົນໄກສະດວກສະບາຍເພື່ອໃຫ້ວິສາຫະກິດພາກເອກະຊົນພັດທະນາກວ່າອີກ, ໂດຍສະເພາະແມ່ນໃນເງື່ອນໄຂປະເທດຊາດພວມເຊື່ອມໂຍງຢ່າງເລິກເຊິ່ງກວ້າງຂວາງກວ່າເຂົ້າພື້ນຖານເສດຖະກິດໂລກ. ບົດຂຽນ “ປ່ຽນໃໝ່ລະບອບລະບຽບການ, ສ້າງເງື່ອນໄຂສະດວກໃຫ້ເສດຖະກິດພາກເອກະຊົນພັດທະນາ” ຂອງ ວູຢຸງ, ນັກຂ່າວ VOV.
ວິສາຫະກິດພາກເອກະຊົນໄດ້ປະກອບກວ່າ 40% ຍອດຜະລິດຕະພັນພາຍໃນ (GDP) ແລະ ນຳໜ້າໃນການພັດທະນາເສດຖະກິດຂອງປະເທດຊາດ. ວິສາຫະກິດພາກເອກະຊົນພວມພັດທະນາດ້ວຍລະດັບໄວວາ ເຖິງວ່າຈະຕ້ອງປະເຊີນໜ້າກັບຄວາມຫຍຸ້ງຍາກຫຼາຍຢ່າງຄື: ການຂາດບັນດາແຫຼ່ງໜູນຊ່ວຍຮັບໃຊ້ໃຫ້ແກ່ການປ່ຽນໃໝ່ຢ່າງມີຫົວຄິດປະດິດສ້າງ, ບັນດານະໂຍບາຍ ແລະ ໂຄງການໜູນຊ່ວຍ ພ້ອມກັບບັນດາຂໍ້ຈຳກັດໃນການສຳພັດກັບບັນດາການບໍລິການການເງິນ. ທ່ານ ວູຕ໋ຽນໂລກ, ປະທານຫ້ອງການອຸດສາຫະກຳ ແລະ ການຄ້າຫວຽດນາມ ຖືວ່າ, ລັດຖະບານ ຕ້ອງປະກາດໃຊ້ມະຕິກ່ຽວກັບໂຄງການເຄື່ອນໄຫວແຫ່ງຊາດພັດທະນາວິສາຫະກິດ. ພ້ອມທັງປ່ຽນໃໝ່ຈິນຕະນາການກົງຈັກບໍລິຫານຢູ່ຂັ້ນສູງກາງ ແລະ ທ້ອງຖິ່ນຢ່າງຮອບດ້ານ.ເພື່ອປະຕິບັດຈິດໃຈອຳນາດການປົກຄອງຮັບໃຊ້ປະຊາຊົນ ແລະ ວິສາຫະກິດຢ່າງຄົບຖ້ວນ. ທ່ານຮອງນາຍົກລັດຖະມົນຕີ ເວືອງດິ່ງເຫ້ວ ກໍຖືວ່າ: ຕ້ອງມີນະໂຍບາຍໜູນຊ່ວຍວິສາຫະກິດດຳເນີນອາຊີບ, ສ້າງວິສາຫະກິດຫວຽດນາມ ໃຫ້ພັດທະນາຢ່າງໄວ ແລະ ໝັ້ນຄົງ. ໃນໄລຍະຈະມາເຖິງ, ລັດຖະບານຈະຍື່ນສະເໜີຕໍ່ສະພາແຫ່ງຊາດບັນດາລັດຖະນະໂຍບາຍເພື່ອແນໃສ່ໜູນຊ່ວຍວິສາຫະກິດ.
“ລັດຖະບານຈະເຮັດຈົນສຸດຄວາມສາມາດຂອງຕົນເພື່ອປັບປຸງສະພາບແວດລ້ອມແຫ່ງການລົງທຶນ ແລະ ດຳເນີນທຸລະກິດ, ຍົກສູງກຳລັງແກ່ງແຍ້ງຂອງວິສາຫະກິດຫວຽດນາມ, ສ້າງເງື່ອນໄຂສະດວກທີ່ສຸດໃຫ້ທຸກພາກສ່ວນເສດຖະກິດ, ທຸກຮູບແບບວິສາຫະກິດ, ທຸກພາກສ່ວນເສດຖະກິດຂອງຕະຫຼາດ, ມີເງື່ອນໄຂສະເໝີພາບ, ແກ່ງແຍ້ງຢ່າງຍຸຕິທຳເຊິ່ງກັນ ແລະ ກັນຕາມພື້ນຖານເສດຖະກິດການຕະຫຼາດ. ພ້ອມກັນນັ້ນ, ລັດຖະບານກໍພວມສ້າງກົດໝາຍວ່າດ້ວຍການໜູນຊ່ວຍວິສາຫະກິດຫວຽດນາມ ຂະໜາດນ້ອຍ ແລະ ກາງ ເພື່ອສາມາດໜູນຊ່ວຍວິສາຫະກິດພາກເອກຊົນ, ຂະໜາດນ້ອຍ ແລະ ກາງຂອງຫວຽດນາມ ຕາມບັນດາຫຼັກການຂອງເສດຖະກິດການຕະຫຼາດ ໂດຍບໍ່ຈຳແນກການປະພຶດ ແລະ ເໝາະສົມກັບບັນດາຄຳໝັ້ນສັນຍາສາກົນ”.
ທີ່ການພົບປະກັບວິສາຫະກິດດ້ວຍຫົວຂໍ້ວ່າ “ວິສາຫະກິດຫວຽດນາມ - ກຳລັງໜູນພັດທະນາເສດຖະກິດຂອງປະເທດຊາດ” ທີ່ຫາກໍດຳເນີນຢູ່ນະຄອນໂຮ່ຈິມິນ, ບັນດາກະຊວງ, ຂະແໜງການໄດ້ໃຫ້ຄຳໝັ້ນສັນຍາຮ່ວມເດີນທາງ ແລະ ພ້ອມກັນແກ້ໄຂຄວາມຫຍຸ້ງຍາກໃຫ້ວິສາຫະກິດ. ກະຊວງແຜນການ ແລະ ການລົງທຶນໃຫ້ຄຳໝັ້ນສັນຍາ ແກ້ໄຂບັນດາລະບຽບການດຳເນີນກິດ, ສ້າງສະພາບແວດລ້ອມແຫ່ງການດຳເນີນທຸລະກິດຢ່າງສະດວກສະບາຍ. ກະຊວງການເງິນໃຫ້ຄຳໝັ້ນສັນຍາຍູ້ແຮງການປະຕິຮູບລະບຽບການບໍລິຫານຖອນເວລາແຈ້ງພາສີ, ເສຍພາສີ, ສົ່ງພາສີຄືນ, ເຮັດລະບຽບການພາສີຜ່ານຊາຍແດນ. ໃນຂະນະນັ້ນ, ກະຊວງອຸສາຫະກຳການຄ້າກໍຢືນຢັນຊຸກຍູ້ການປະຕິຮູບລະບຽບການບໍລິຫານ, ຮັບປະກັນສ້າງຄວາມສະດວກ, ສິດເສລີໃຫ້ວິສາຫະກິດຜະລິດ, ດຳເນີນທຸລະກິດ; ທະນາຄານແຫ່ງລັດໃຫ້ຄຳໝັ້ນສັນຍາໜູນຊ່ວຍທຶນ, ບັນດາທະນາຄານການຄ້າປະຢັດລາຍຈ່າຍ, ປັບປຸງອັດຕາດອກເບ້ຍໃຫ້ກູ້ຢືມໄລຍະກາງ ແລະ ໄລຍະຍາວຢູ່ໃນລະດັບເໝາະສົມ. ກ່າວຄຳເຫັນຊີ້ນຳກອງປະຊຸມ, ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ: ບັນດາອົງການກ່ຽວຂ້ງຕ້ອງຖືປະຊາຊົນ, ວິສາຫະກິດເປັນເປົ້າໝາຍເພື່ອຮັບໃຊ້, ລັດຮັບເອົາຄວາມຫຍຸ້ງຍາກ ແລະ ຕ້ອງມີນະໂຍບາຍສະເພາະເພື່ອໜູນຊ່ວຍວິສາຫະກິດໃຫ້ພັດທະນາ.
“ວິສາຫະກິດມີບົດບາດສຳຄັນໃນການສ້າງວຽກເຮັດງານທຳ, ເພີ່ມລາຍຮັບຂອງສັງຄົມ, ປຸກລູກການປ່ຽນໃໝ່ຢ່າງມີຫົວຄິດປະດິດສ້າງໃນການດຳເນີນທຸລະກິດ ແລະ ຕ້ອງມີນະໂຍບາຍໜູນຊ່ວຍສະເພາະ ເພື່ອສ້າງເງື່ອນໄຂໃຫ້ແກ່ການພັດທະນາ ແລະ ເຊື່ອມໂຍງ. ມີພຽງ 1,8% ວິສາຫະກິດຂະໜາດກາງ, 2% ວິສາຫະກິດຂະໜາດໃຫຍ່, ສ່ວນ 96% ແມ່ນວິສາຫະກິດຂະໜາດນ້ອຍ. ທີ່ກອງປະຊຸມນີ້, ຂ້າພະເຈົ້າຢືນຢັນວ່າ, ແນວທາງຂອງພັກ, ລັດ ແມ່ນຖືວິສາຫະກິດພາກເອກຊົນແມ່ນກຳລັງໜູນເພື່ອພັດທະນາເສດຖະກິດ. ຄຽງຂ້າງນັ້ນ, ສະກັດກັ້ນການຫັນບັນດາການພົວພັນດ້ານເສດຖະກິດເປັນອາຍາຢ່າງມີປະສິດທິຜົນ ເພື່ອສ້າງຄວາມໄວ້ເນື້ອເຊື່ອໃຈໃຫ້ວິສາຫະກິດ”.
ທ່ານນາຍົກລັດຖະມົນຕີ ຫງວຽນຊວນຟຸກ ກໍຮຽກຮ້ອງໃຫ້ບັນດາກະຊວງ, ຂະແໜງການ ຕ້ອງແກ້ໄຂບັນດາບັນຫາກ່ຽວຂ້ອງເຖິງການປະຕິຮູບລະບຽບການບໍລິຫານຢ່າງໄວ, ສ້າງຄວາມສະດວກໃຫ້ບັນດານັກລົງທຶນ, ວິສາຫະກິດ.
“ສືບຕໍ່ຍູ້ແຮງ, ສ້າງ, ປັບປຸງລະບອບ, ສະພາບແວດລ້ອມແຫ່ງການລົງທຶນຢ່າງສະດວກສະບາຍໃຫ້ບັນດານັກລົງທຶນ ແລະ ວິສາຫະກິດ, ກ່ອນອື່ນໝົດແມ່ນກວດກາຄືນແກ້ໄຂບັນດາສິ່ງທີ່ຍັງຄົງຄ້າງ, ບໍ່ທັນເໝາະສົມລະຫວ່າງກົດໝາຍວ່າດ້ານການລົງທຶນ, ກົດໝາຍວ່າດ້ວຍວິສາຫະກິດ ແລະ ບັນດາກົດໝາຍທີ່ກ່ຽວຂ້ອງຢ່າງເຖິງຖອງ. ສຸມໃສ່ສ້າງກົດໝາຍໜູນຊ່ວຍວິສາຫະກິດຂະໜາດກາງ ແລະ ນ້ອຍ; ແກ້ໄຂບັນດາບັນຫາເກີດຂຶ້ນທີ່ກ່ຽວຂ້ອງເຖິງລະບຽບການລົງທຶນ, ຈົດທະບຽນວິສາຫະກິດ, ໂດຍສະເພາະແມ່ນສຳລັບນັກລົງທຶນຕ່າງປະເທດ. ບັນຫາໜຶ່ງອີນນັ້ນແມ່ນ ຊຸກຍູ້ຈິດໃຈເດຳເນີນທຸລະກິດຢ່າງແຮງ ດ້ວຍຫຼາຍຮູບການເຊິ່ງລັດ ແລະ ບັນດາທ້ອງຖິ່ນຕ້ອງເອົາໃຈໃສ່. ສ້າງເງື່ອນໄຂສະດວກໃຫ້ບັນດານັກລົງທຶນຕ່າງປະເທດເຂົ້າຮ່ວມການລົງທຶນເຂົ້າບັນດາວະສາຫະກິດດຳເນີນອາຊີບ”.
ເອກະສານກອງປະຊຸມໃຫຍ່ພັກກອມມູນິດຫວຽດນາມຄັ້ງທີ 12 ໄດ້ກຳນົດບົດບາດເສດຖະກິດພາກເອກະຊົນ ແມ່ນກຳລັງໜູນສຳຄັນຊອງພື້ນຖານເສດຖະກິດ. ພ້ອມທັງຢືນຢັນວ່າ ຫວຽດນາມ ຈະສ້າງທຸກເງື່ອນໄຂສະດວກໃຫ້ແກ່ການພັດທະນາວິສາຫະກິດພາກເອກະຊົນຢ່າງແຮງ ເພື່ອສ້າງກຳລັງໜູນຍົກສູງກຳລັງແກ່ງແຍ້ງຂອງພື້ນຖານເສດຖະກິດ. ດ້ວຍທ່າອ່ຽງເຊື່ອມໂຍງຄືປະຈຸບັນ, ວິສາຫະກິດພາກເອກຊົນຫວຽດນາມ ປາດຖະໜາຢາກມີລະບອບເສດຖະກິດທີ່ມີໄຫວພິບ, ຊ່ວຍໃຫ້ວິສາຫະກິດຍົກສູງຄຸນນະພາບຜະລິດຕະພັນ ກໍຄືກຳລັງແກ່ງແຍ້ງໃຫ້ວິສາຫະກິດໃນຕະຫຼາດສາກົນ.