“ເຂົ້າຮ່ວມໂຄງການ OCOP, ເຄື່ອງໝາຍການຄ້າຂອງຕົນໄດ້ໄປໄກກວ່າ, ຜະລິດຕະພັນ OCOPແມ່ນໄດ້ຮັບຄວາມນິຍົມຈາກລູກຄ້າຫລາຍກວ່າ. ຈາກນັ້ນ ຜະລິດຕະພັນໄດ້ນຳໄປຂາຍຢູ່ບັນດາຮ້ານສັບພະສິນຄ້າ, ສົ່ງອອກໄປຍັງຕະຫລາດຕ່າງປະເທດ, ຜູ້ບໍລິໂພກມີຄວາມເຊື່ອໝັ້ນຕໍ່ຜະລິດຕະພັນກວ່າ”.
ຄຽງຄູ່ກັບການພັດທະນາຜະລິດຕະພັນໃຫມ່, ໄລຍະຜ່ານມາ ເມືອງ ຟຸ້ງຫຽບ ແຂວງ ເຫົ້າຢາງ ຍັງສົມທົບກັບບັນດາອົງການທີ່ມີບົດບາດຫນ້າທີ່ເພື່ອຫນູນຊ່ວຍວິສາຫະກິດປັບປຸງສຳເລັດບັນດາຜະລິດຕະພັນຕາມທິດຍົກສູງຄຸນນະພາບ ແລະ ເຄື່ອງຫຸ້ມຫໍ່, ຂັ້ນຕອນການຜະລິດ, ສ້າງຜະລິດຕະພັນໃຫ້ສົມບູນແບບ. ພ້ອມກັນນັ້ນ ຍັງເອົາໃຈໃສ່ຍູ້ແຮງວຽກງານສົ່ງເສີມການຄ້າພັດທະນາຕະຫລາດ, ໂຄສະນາຜະລິດຕະພັນ, ໝູນໃຊ້ບັນດາຊ່ອງການຄ້າເອເລັກໂຕນິກຄື: Voso, Postmart, Shopee, Lazadaເພື່ອແນະນຳ, ໂຄສະນາ, ຈຳຫນ່າຍຜະລິດຕະພັນ ແລະ ປະຕິບັດການປົກປ້ອງຊັບສິນທາງປັນຍາໃຫ້ແກ່ຜະລິດຕະພັນ.
 ທ່ານນາຍົກລັດຖະມົນຕີ ຟ້າມມິງຈິງ ໃນໂອກາດລົງເຮັດວຽກຢູ່ ແຂວງ ເຫົ້າຢາງ ໄດ້ມາຢ້ຽມຊົມຮ້ານວາງສະແດງບັນດາຜະລິດຕະພັນ OCOP ຂອງຮາກຖານຜະລິດເຫລົ້າພື້ນເມືອງ ອຸດໄຕ. ພາບ;OCOP |
ມາຮອດປະຈຸບັນ, ມີຫລາຍຜະລິດຕະພັນ ພິເສດແມ່ນຜະລິດຕະພັນ OCOPຂອງເມືອງ ຟຸ້ງຫຽບ ແມ່ນໄດ້ຮັບການສັ່ງຊື້ ແລະ ຈຳຫນ່າຍຈາກວິສາຫະກິດ, ຮ້ານສັບພະສິນຄ້າໃຫຍ່. ປ້າ ຫວໍທິເຟືອງຈາງ, ເຈົ້າຂອງຮາກຖານຜະລິດເຫລົ້າແບບພື້ນເມືອງ ອຸດໄຕ ຢູ່ ບ້ານ ເຕີນລອງອາ ຕາແສງ ເຕີນບິ່ງ ເມືອງ ຟຸ້ງຫຽບ ແຂວງເຫົ້າຢາງ ໃຫ້ຮູ້ວ່າ: ປະຈຸບັນ ມີ 4 ຜະລິດຕະພັນບັນລຸ OCOP 4 ດາວຂັ້ນແຂວງ ພ້ອມທັງກໍ່ບັນລຸຜະລິດຕະພັນOCOPດີເດັ່ນຢູ່ເຂດທົ່ງພຽງແມ່ນ້ຳຂອງ.
“ ແຫລ່ງວັດຖຸດິບເພື່ອຜະລິດເຫລົ້າ ອຸດໄຕ ແມ່ນເຮັດມາຈາກເຂົ້າສານ,ເຂົ້າຫັກ (Broken rice),ສະນັ້ນອຸດໄຕ ກໍ່ປະກອບສ່ວນຍົກລະດັບຄຸນຄ່າຂອງເມັດເຂົ້າສານ ແລະ ພ້ອມທັງປະກອບສ່ວນເຂົ້າໃນລະບົບຜະລິດແບບຄົບວົງຈອນ, ມຸ່ງໄປເຖິງເສດຖະກິດສີຂຽວ.ຫວັງວ່າ ຜະລິດຕະພັນກະເສດຂອງ ເຫົ້າຢາງ ຈະມີບາດກ້າວພັດທະນາໃຫມ່, ຍົກສູງຄຸນຄ່າຂອງຜະລິດຕະພັນກະເສດທຸກປະເພດ”.
ມາຮອດປະຈຸບັນ, ເຫົ້າຢາງ ໄດ້ຮັບຮູ້ 278 ຜະລິດຕະພັນ OCOP, ໃນນັ້ນ ມີ 92 ຜະລິດຕະພັນບັນລຸມາດຖານ 4 ດາວ ແລະ ອີກ 186 ຜະລິດຕະພັນບັນລຸມາດຖານ 3 ດາວ. ຄຽງຄູ່ກັບການເພີ່ມຂຶ້ນທັງປະລິມານ, ຄຸນນະພາບຂອງຜະລິດຕະພັນກໍ່ໄດ້ຍົກສູງຂຶ້ນຫລາຍສົມຄວນ. ເພື່ອພັດທະນາແບບຍືນຍົງ, ຜະລິດຕະພັນ OCOPຂອງແຂວງ ພວມເອົາໃຈໃສ່ຮັບປະກັນລັກສະນະສະຫມ່ຳສະເຫມີ ແລະ ຄວາມເປັນປົກກະຕິຂອງຄຸນນະພາບ, ຮູບແບບ, ສ້າງຂັ້ນຕອນການຜະລິດຕອບສະຫນອງບັນດາມາດຖານຄຸນນະພາບສູງສຸດຄື: GlobalGAP, HACCP ISO 22000ເພື່ອປັບປຸງໃຫ້ສຳເລັດ, ເປີດກວ້າງຂອບຂະຫນາດ, ຍົກສູງຄວາມສາມາດແກ່ງແຍ້ງຢູ່ຕະຫລາດສາກົນ. ທ່ານນາງ ຫລີເລະຮວາ, ຮອງຫົວຫນ້າພະແນກເສດຖະກິດ ຕາແສງ ລອງໝີ້ ແຂວງ ເຫົ້າຢາງ ແບ່ງປັນວ່າ:
“ພວກຂ້າພະເຈົ້າມຸ່ງໄປເຖິງການຜັນຂະຫຍາຍບັນດາໂຄງການຮ່ວມສຳພັນລະຫວ່າງບໍລິສັດ, ວິສາຫະກິດ, ຮາກຖານເພື່ອໃຫ້ບັນດາສະຫະກອນ, ຮາກຖານການຜະລິດສ້າງໄດ້ເຂດວັດຖຸດິບ, ສ້າງເປັນຜະລິດຕະພັນໃຫຍ່, ມີຄຸນນະພາບສະຫມ່ຳສະເຫມີ, ແຫລ່ງວັດຖຸດິບມີຄວາມເປັນປົກກະຕິ ຊ່ວຍວິສາຫະກິດມີຄວາມເປັນເຈົ້າດ້ານວັດຖຸດິບຢູ່ກັບທີ່, ປະກອບສ່ວນຍົກສູງປະສິດທິຜົນ ແລະ ມູນຄ່າຜະລິດຕະພັນ, ປະກອບສ່ວນແກ້ໄຂວຽກງານງານທຳໃຫ້ຊາວທ້ອງຖິ່ນ”.
ໄລຍະຈະມາເຖິງ, ແຂວງ ເຫົ້າຢາງ ຈະສືບຕໍ່ຍູ້ແຮງການດຶງດູດການລົງທຶນເຂົ້າໃນການພັດທະນາການຜະລິດຢູ່ເຂດຊົນນະບົດ, ໝູນໃຊ້ເຕັກໂນໂລຊີທັນສະໄຫມເຂົ້າໃນການຜະລິດ ແລະ ປຸງແຕ່ງ, ດັດປັບຂັ້ນຕອນການຜະລິດ, ຊອກຫາ ແລະ ພັດທະນາບັນດາຜະລິດຕະພັນໃຫມ່ຈາກບັນດາແຫລ່ງວັດຖຸດິບທີ່ພວມມີຢູ່ທ້ອງຖິ່ນ. ທ້ອງຖິ່ນຈະສືບຕໍ່ຮ່ວມມືກັບບັນດາອົງການຈັດຕັ້ງສາກົນ, ຜູ້ຊ່ຽວຊານແຖວຫນ້າໃນຂົງເຂດກະສິກຳ ແລະ ເຕັກໂນໂລຊີປຸງແຕ່ງ ເພື່ອຮັບເອົາເຕັກນິກກ້າວຫນ້າທີ່ສຸດ. ບາດກ້າວບຸກທະລຸໃນເຕັກໂນໂລຊີ ແລະ ປະດິດຄິດສ້າງໃນການຜະລິດ, ປຸງແຕ່ງ ຈະແມ່ນຈຸດເດັ່ນຂອງ OCOPເຫົ້າຢາງ, ນຳເສດຖະກິດທ້ອງຖິ່ນພັດທະນາແບບຍືນຍົງ.