(vovworld) - ປີ 2015, ໃນສະພາບການສົ່ງອອກລວມຂອງໂລກຖືກຫລຸດລົງນັ້ນ, ແຕ່ຍອດວົງເງິນ ສົ່ງອອກຂອງ ຫວຽດນາມ ຍັງເພີ່ມຂຶ້ນ 8,1% ເມື່ອທຽບໃສ່ປີ 2014. ເຖິງວ່າຕ່ຳກ່ວາເມື່ອທຽບໃສ່ຄາດໝາຍສູ້ຊົນເພີ່ມຂຶ້ນ 10% ກໍ່ຕາມ, ແຕ່ການເຄື່ອນໄຫວສົ່ງອອກ - ນຳເຂົ້າໃນໄລຍະຜ່ານມາຍັງໄດ້ຮັບການຕີລາຄາວ່າແມ່ນຈຸດພົ້ນເດັ່ນຂອງພື້ນຖານເສດຖະກິດປະເທດຊາດ. ຂອບຂະໜາດການສົ່ງອອກໄດ້ຮັບການເປີດກ້ວາງ, ປະກອບສ່ວນເຂົ້າໃນການເຕີບໂຕ GDP, ສ້າງວຽກເຮັດງານທຳໃຫ້ແກ່ຜູ້ອອກແຮງງານ, ພິເສດແມ່ນຄາດໝາຍຊຸກຍູ້ການຈຳໜ່າຍຜະລິດຕະພັນກະເສດໃຫ້ແກ່ຊາວກະສິກອນ. ບົດຂຽນ “ມູນຄ່າການສົ່ງອອກປະກອບສ່ວນໃຫ້ແກ່ພື້ນຖານເສດຖະກິດ ຫວຽດນາມ ໃນປີ 2015” ຂອງຈູງຖູຍ, ນັກຂ່າວວິທະຍຸກະຈາຍສຽງ ຫວຽດນາມ.
ພາບປະກອບ |
ປີ 2015, ເສດຖະກິດໂລກໄດ້ປະສົບກັບຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ, ລາຄານ້ຳມັນດິບຖືກຫລຸດລົງຢ່າງຕໍ່ເນື່ອງ, ຕະຫຼາດເງິນຕາໂລກມີການຜັນແປໃນຊຸມເດືອນທ້າຍປີຍາກທີ່ຄາດຄະເນລ່ວງໜ້າໄດ້ສົ່ງຜົນສະທ້ອນເຖິງການສົ່ງອອກຂອງຫຼາຍປະເທດ, ໃນນັ້ນມີ ຫວຽດນາມ. ໄລ່ລວມແລ້ວ, ປີ 2015 ວົງເງິນສິນຄ້າສົ່ງອອກຂອງ ຫວຽດນາມ ບັນລຸກ່ວາ 162 ຕື້ USD, ເຖິງວ່າຕ່ຳກ່ວາຄາດໝາຍທີ່ໄດ້ວາງອອກແມ່ນ 165 ຕື້ USD ກໍ່ຕາມ, ແຕ່ຍັງຄົງເພີ່ມຂຶ້ນ 8,1% ເມື່ອທຽບໃສ່ປີ 2014. ວົງເງິນການສົ່ງອອກຂອງພາກພື້ນທີ່ມີເງິນລົງທຶນຂອງຕ່າງປະເທດບັນລຸປະມານ 115 ຕື້ USD, ເພີ່ມຂຶ້ນເກືອບ 14% ເມື່ອທຽບໃສ່ປີ 2014. ອາເມລິກາ, ອີຢູ ສືບຕໍ່ແມ່ນຕະຫຼາດສົ່ງອອກທີ່ກວມອັດຕາສ່ວນຫຼາຍ.
ທີ່ກອງປະຊຸມໂດຍກົງຜ່ານເຄືອຂ່າຍອິນເຕີເນັດຂອງລັດຖະບານ ກັບບັນດາທ້ອງຖິ່ນທີ່ໄດ້ຮັບການຈັດຕັ້ງໃນທ້າຍປີ 2015, ທ່ານລັດຖະມົນຕີວ່າການກະຊວງອຸດສາຫະກຳ ການຄ້າ ຫວຽດນາມ ຫວູຮູຍຮ່ວາງ ຢັ້ງຢືນວ່າ: ຍ້ອນຄວາມຕ້ອງການຂອງຕະຫຼາດໂລກຫລຸດລົງໄດ້ສົ່ງຜົນສະທ້ອນເຖິງສິນຄ້າບາງປະເພດທີ່ມີທ່າແຮງໃນການສົ່ງອອກຂອງ ຫວຽດນາມ ຄື: ຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳ, ນ້ຳມັນດິບ, ຖ່ານຫີນ. ສິ່ງສຳຄັນແມ່ນ ຫວຽດນາມ ຍັງຄົງຮັກສາໄດ້ບັນດາຕະຫຼາດທີ່ມີຢູ່ແລ້ວ. ເລື່ອງມູນຄ່ານ້ຳມັນດິບໃນຕະຫຼາດຖືກຫລຸດລົງກ່ວາ 3 ຕື້ USD ກໍ່ແມ່ນໜຶ່ງໃນບັນດາສາຍເຫດທີ່ເຮັດໃຫ້ການເຕີບໂຕການສົ່ງອອກບໍ່ບັນລຸຕາມແຜນການທີ່ວາງອອກ. ເຖິງຢ່າງໃດກໍ່ຕາມ, ໃນປີ 2015, ຫວຽດນາມ ໄດ້ມານະພະຍາຍາມຫຼາຍຢ່າງເພື່ອແນໃສ່ຊຸກຍູ້ການສົ່ງອອກ, ພິເສດແມ່ນບາງປະເພດສິນຄ້າຕົ້ນຕໍຄື: ເຂົ້າສານ, ປະກອບສ່ວນເພີ່ມວົງເງິນສົ່ງອອກ. ໃນສະພາບການສົ່ງອອກລວມ, ໝວດສິນຄ້າອຸດສາຫະກຳປຸງແຕ່ງຍັງຮັກສາບົດບາດສຳຄັນ, ປະກອບສ່ວນເຂົ້າໃນການເຕີບໂຕຂອງວົງເງິນສົ່ງອອກເວົ້າລວມ. ການຜະລິດຂອງບາງໝວດຂະແໜງອຸດສາຫະກຳປຸງແຕ່ງທີ່ມີລະດັບເຕີບໂຕສູງຄື: ເຄື່ອງຕ່ຳແຜ່ນຕັດຫຍິບ, ເກີບໜັງ, ຜະລິດຕະພັນເອເລັກໂຕນິກ. ໃນນັ້ນ, ຂະແໜງຕ່ຳແຜ່ນຕັດຫຍິບຍັງສືບຕໍ່ແມ່ນປະເພດສິນຄ້າສົ່ງອອກນຳໜ້າໄດ້ປະກອບສ່ວນຍົກສູງຍອດວົງເງິນສົ່ງອອກຂອງທັງປີ.
ປີ 2015, ການສົ່ງອອກຂອງ ຫວຽດນາມ ບັນລຸໄດ້ໝາກຜົນທີ່ໜ້າຊື່ນຊົມຍ້ອນບັນດານະໂຍບາຍໜູນຊ່ວຍການສົ່ງອອກ, ສົ່ງເສີມການຄ້ານັບມື້ນັບສົມບູນແບບ. ພິເສດແມ່ນເລື່ອງ ຫວຽດນາມ ໄດ້ປະຕິບັດສຳເລັດການເຈລະຈາສັນຍາການຄ້າເສລີ (FTA) ກັບບັນດາຄູ່ຮ່ວມມືເສດຖະກິດໃຫຍ່ທີ່ມີໂຄງປະກອບສິນຄ້າການຄ້າເພີ່ມເຕີມກັບ ຫວຽດນາມ ຢ່າງລຽນຕິດລວມມີ: ສ. ເກົາຫຼີ, ພັນທະມິດພາສີລັດເຊຍ, ເບລາຣຸດ, ກາຢັກສະຖານ ແລະ ສິ້ນສຸດການເຈລະຈາສັນຍາການຄ້າເສລີ ຫວຽດນາມ - ອີຢູ ແລະ ສັນຍາຄູ່ຮ່ວມມືຂ້າມປາຊີຟິກ (TPP). ບັນດາສັນຍານີ້ໄດ້ເປີດກາລະໂອກາດ ແລະ ຄວາມສາມາດບົ່ມຊ້ອນໃໝ່ຫຼາຍຢ່າງໃຫ້ແກ່ການສົ່ງອອກຂອງ ຫວຽດນາມ. ດຣ ຫວໍຈີ໋ແທ່ງ, ຮອງຫົວໜ້າສະຖາບັນຄົ້ນຄ້ວາ ແລະ ຄຸ້ມຄອງເສດຖະກິດສູນກາງ, ໃຫ້ຂໍ້ສັງເກດວ່າ:
“ຜົນກະທົບຂອງບັນດາສັນຍານີ້ເຖິງການສົ່ງອອກຂອງ ຫວຽດນາມ ແມ່ນຫຼາຍທ່ີສຸດບໍ່ເຄີຍມີມາກ່ອນ. ໃນກຸ່ມ TPP ລວມມີ 12 ປະເທດ, ຫວຽດນາມ ໄດ້ຮັບການຕີລາຄາວ່າມີກະທົບເຖິງການສົ່ງອອກໃຫຍ່ຫຼວງທີ່ສຸດໂດຍອີງໃສ່ອັດຕາສ່ວນຂອງສັນຍາສຳລັບຍອດມູນຄ່າສົ່ງອອກ. ສະເພາະຂະແໜງຕຳ່ແຜ່ນຕັດຫຍິບເພີ່ມຂຶ້ນທົບ 2 ເທົ່າ. ຍ້ອນມີບັນດາສັນຍານີ້ໄດ້ສ້າງວຽກເຮັດງານທຳໃໝ່ໃຫ້ຜູ້ອອກແຮງງານນັບລ້ານຄົນ. ຫຼືວ່າສັນຍາ ຫວຽດນາມ - ອີຢູ, ກໍມີຜົນກະທົບໃຫຍ່ຫຼວງທີ່ສຸດ, ເຮັດໃຫ້ການສົ່ງອອກເພີ່ມຂຶ້ນແຕ່ 30 – 35%.”
ຮ້ານເຈາະນຳ້ມັນຂອງ ຫວຽດນາມ
|
ເພື່ອແນໃສ່ກຳແໜ້ນບັນດາກາລະໂອກາດໂດຍບັນດາສັນຍາເສດຖະກິດນຳມາໃຫ້, ລັດຖະບານ, ບັນດາອົງການຄຸ້ມຄອງລັດກໍ່ພວມຕັ້ງໜ້າຜັນຂະຫຍາຍບັນດາມາດຕະການຊຸກຍູ້ການສົ່ງອອກ. ຕາມນັ້ນແລ້ວ, ສຸມໃສ່ຍົກສູງກຳລັງແກ່ງແຍ້ງຂອງພື້ນຖານເສດຖະກິດ, ກຳລັງແກ່ງແຍ້ງຂອງວິສາຫະກິດ, ຍົກສູງປະສິດທິພາບ, ຄຸນນະພາບ. ທ່ານ ເຈີ່ນແທງຫາຍ, ຮອງຫົວໜ້າກົມຂາອອກ - ຂາເຂົ້າ, ກະຊວງອຸດສາຫະກຳ - ການຄ້າ ໃຫ້ຮູ້ວ່າ:
“ປະຈຸບັນ, ບັນດາອົງການແຫ່ງລັດພະຍາຍາມເປີດກ້ວາງຕະຫຼາດຜ່ານການເຈລະຈາບັນດາສັນຍາການຄ້າເສລີ FTA ເຊິ່ງ ແງ່ຫວັງໃນໄລຍະຈະມາເຖິງແມ່ນຕະຫຼາດ ອາເມລິກາ ແລະ ອີຢູ. ບົດບາດຂອງອົງການຄຸ້ມຄອງລັດແມ່ນປົກປ້ອງວິສາຫະກິດໃນບັນດາກໍລະນີນັ້ນ, ຮ່ວມກັບວິສາຫະກິດ, ພັດທະນາບັນດາບໍລິການໜູນຊ່ວຍກ່ຽວກັບການສົ່ງອອກ, ຕົວຢ່າງຄື logistics, ປະຕິຮູບລະບຽບການບໍລິຫານ, ກົນໄກປະຕູດຽວແຫ່ງຊາດ ແລະ ກົນໄກປະຕູດຽວອາຊຽນ”
ເພື່ອຮັກສາລະດັບເຕີບໂຕໃນການສົ່ງອອກປີ 2016, ມາດຕະການເຊິ່ງລັດຖະບານໄດ້ຍົກອອກມາແມ່ນສຸມໃສ່ຂຸດຄົ້ນ, ເສີມຂະຫຍາຍບັນດາກາລະໂອກາດຂອງຕະຫຼາດ, ສ້າງເງື່ອນໄຂສະດວກເພື່ອໃຫ້ບັນດາວິສາຫະກິດຍົກສູງກຳລັງແກ່ງແຍ້ງ ແລະ ເຊື່ອມໂຍງຢ່າງເລິກເຊິ່ງກ່ວາເຂົ້າໃນການສະໜອງທົ່ວໂລກ. ຄຽງຄູ່ກັນນັ້ນ, ຫວຽດນາມ ສືບຕໍ່ປັບປຸງບັນດາລະບອບກ່ຽວກັບນະໂຍບາຍ, ໜູນຊ່ວຍໃຫ້ວິສາຫະກິດ, ຮັບຟັງຄຳເຫັນຂອງວິສາຫະກິດ, ປະຊາຊົນ, ສຳພັດຢ່າງທັນການກ່ວາອີກເພື່ອເພີ່ມທະວີການໜູນຊ່ວຍໃຫ້ແກ່ວິສາຫະກິດໃນໄລຍະເຊື່ອມໂຍງ.