(vovworld)- ຕາມການຄາດຄະເນແລ້ວ, ສະພາບການເສດຖະກິດໃນປີນີ້ ຍັງປະສົບກັບຄວາມຫຍຸ້ງຍາກຫລາຍຢ່າງ, ໃນຂະນະທີ່ກຳລັງຊື້ບໍ່ທັນໄດ້ຮັບການປັບປຸງປານໃດ, ການສຳພັດກັບແຫລ່ງທຶນທະນາຄານຍັງຫຍຸ້ງຍາກຢູ່. ຕໍ່ຫນ້າສະພາບການດັ່ງກ່າວ, ມີວິສາຫະກິດຫລາຍແຫ່ງຢູ່ນະຄອນ ໂຮ່ຈິມີນ ພວມປັບປຸງແຫລ່ງກຳລັງ, ຄວາມສາມາດຂອງຕົນ, ຊອກຮູ້ຄວາມຕ້ອງການຂອງຕະຫລາດໃນປີ 2014 ພ້ອມທັງວາງອອກບັນດາມາດຕະການໃຫ້ເໝາະສົມເພື່ອພັດທະນາ.
ຮ້ານຊັບພະສິນຄ້າ Saigon Co.op
ໂດຍໄດ້ຮັບການສ້າງຕັ້ງຂຶ້ນກອ່ນນີ້ 5 ປີ, ກົງກັບສະພາບເສດຖະກິດປະສົບກັບຄວາມຫຍຸ້ງຍາກ, ພິເສດ ໃນໄລຍະມໍ່ໆມານີ້, ມີວິສາຫະກິດຜະລິດເກີບຫລາຍແຫ່ງຢູ່ບໍລິເວນນະຄອນໂຮ່ຈິມີນ ຖືກລົ້ມລະລາຍ ຫລືຢຸດຕິການເຄື່ອນໄຫວ, ແຕ່ການເຄື່ອນໄຫວຜະລິດດຳເນີນທຸລະກິດຂອງບໍລິສັດຜະລິດເກີບ ຫວຽນທີ້ງ ຍັງເປັນປົກກະຕິຢູ່, ແຕ່ລະປີບັນລຸລະດັບເຕີບໂຕ 30%. ໂດຍບັນລຸໄດ້ໝາກຜົນດັ່ງກ່າວ ຍ້ອນໃນຊຸມປີຜ່ານມາ ຍາມໃດບໍລິສັດກໍຖືການພັດທະນາຕະຫລາດພາຍໃນເປັນຈຸດສຸມ, ເປີດກວ້າງການພັດທະນາຕະຫລາດຕາມທິດລົງເລິກ, ເປັນຕົ້ນແມ່ນຈັດແບ່ງເຂດຊົນນະບົດ ຈຶ່ງແມ່ນທິດທີ່ໝັ້ນຄົງໃຫ້ແກ່ວິສາຫະກິດ. ໂດຍຮັບຮູ້ຄືດັ່ງກ່າວ, ສະນັ້ນ ໃນແຕ່ລະປີ, ບໍລິສັດຜະລິດເກີບ ຫວຽນທີ້ງ ໄດ້ລົງທຶນຈຳນວນເງິນນັບສີບຕື້ດົ່ງ ເພື່ອປ່ຽນໃຫມ່ຕ່ອງໂສ້ເຕັກໂນໂລຊີ, ສ້າງບາດກ້າວບຸກທະລຸໃຫມ່ໃນຂະແຫນງເກີບຫນັງ. ຍ້ອນສິ່ງດັ່ງກ່າວ ມາຮອດປະຈຸບັນ 80% ຜະລິດຕະພັນເກີບ ດ້ວຍຍີ່ຫໍ້ Vitco, Ever, Hodono.. ຂອງ ບໍລິສັດຜະລິດເກີບ ຫວຽນທີ້ງ ໄດ້ຮັບການຈຳຫນ່າຍຢ່າງກວ້າງຂວາງເຖິງບັນດາແຂວງ, ນະຄອນໃຫຍ່ຕະຫລອດຮອດບັນດາເຂດຊົນນະບົດໃນທົ່ວປະເທດ. ທ່ານ ເລີມຕຸງກວນ, ຮອງຜູ້ອຳນວຍການ ບໍລິສັດຜະລິດເກີບ ຫວຽນທີ້ງ ໃຫ້ຮູ້ວ່າ:
“ຕະຫລາດພາຍໃນແມ່ນຕະຫລາດທີ່ມີຄວາມສາມາດບົ່ມຊ້ອນຫລາຍຢ່າງ ແຕ່ຮຽກຮ້ອງໃຫ້ມີການຕິດຕາມຢ່າງໃກ້ຊິດ ແລະ ຊອກຮູ້ຢ່າງເລິກເຊິ່ງ. ບໍລິສັດຜະລິດເກີບ ຫວຽນທີ້ງ ແມ່ນບໍລິສັດຜະລິດເກີບ ມີຄຸນນະພາບສູງຂອງຫວຽດນາມ.ຕ່ອງໂສ້ເຕັກໂນໂລຊີທັງໝົດແມ່ນນຳເຂົ້າຈາກຕ່າງປະເທດກໍຄືພະນັກງານ, ກຳມະກອນ ກ່ອນນີ້ເຂົາເຈົ້າລ້ວນແຕ່ເຮັດວຽກຢູ່ບໍລິສັດຂອງຕ່າງປະເທດ ສະນັ້ນຈື່ງມີປະສົບການໃນການຜະລິດເກີບ.”
ປະຈຸບັນ, ວິສາຫະກິດແຕ່ລະແຫ່ງຢູ່ ນະຄອນ ໂຮ່ຈິມີນ ລ້ວນແຕ່ຊອກຫາມາດຕະການສະເພາະໃຫ້ແກ່ຕົນ, ໃນນັ້ນ ມີວິສາຫະກິດຫລາຍແຫ່ງໄດ້ລົງທຶນພັດທະນາຕ່ອງໂສ້ເຕັກໂນໂລຊີການຜະລິດ, ພື້ນຖານໂຄງລ່າງ ເພື່ອພັດທະນາຕະຫລາດພາຍໃນ. ຕົວຢ່າງຄື: ບໍລິສັດ Saigon Co.op ເພື່ອຜ່ານຜ່າຄວາມຫຍຸ້ງຍາກຂອງພື້ນຖານເສດຖະກິດໃນໄລຍະຜ່ານມາ, ບໍລິສັດນີ້ໄດ້ເປັນເຈົ້າການຜັນຂະຫຍາຍຫລາຍມາດຕະການເພື່ອພັດທະນາບັນດາສະຖານທີ່ໃຫມ່ເພື່ອຂາຍສິນຄ້າ, ພ້ອມກັບການປະຕິບັດຫນ້າທີ່ທີ່ໄດ້ຮັບການມອບໝາຍຈາກອຳນາດການປົກຄອງນະຄອນແມ່ນຮັກສາລາຄາໃນທ້ອງຕະຫລາດເປັນປົກກະຕິ. ປີນີ້ Saigon Co.op ຍັງສືບຕໍ່ສຸມໃສ່ເຂົ້າໃນການເຄື່ອນໄຫວຕົ້ນຕໍ ນັ້ນແມ່ນຂາຍຍ່ອຍສິນຄ້າ, ພ້ອມທັງຍູ້ແຮງການຮ່ວມສຳພັນກັບບັນດາຫົວຫນ່ວຍພາຍໃນປະເທດ. ຄຽງຄູ່ກັນນັ້ນ Saigon Co.op ຍັງຍູ້ແຮງການລົງທຶນຢ່າງແຂງແຮງໃນຂົງເຂດ logistics, ໃນນັ້ນ ວາງແຜນກຳນົດຄືນເຄືອຄ່າຍ ເພື່ອຕອບສະຫນອງຄວາມຕ້ອງການສະສົມ ແລະ ສະຫນອງສິນຄ້າໃຫ້ແກ່ບັນດາຮ້ານຊັບພະສິນຄ້າ ແລະ ຮ້ານຄ້າໃຫ້ດີກວ່າເກົ່າ. ທ່ານ ຫງວຽນງອກຮ່ວາ, ປະທານສະພາບໍລິຫານ ສະຫະພັນສະຫະກອນການຄ້ານະຄອນ ໂຮ່ຈິມີນ (Saigon Coop)ໃຫ້ຮູ້ວ່າ:
“ພວກຂ້າພະເຈົ້າສືບຕໍ່ປະຕິບັດຍຸດທະສາດຫັນບັນດາຮູບການດຳເນີນທຸລະກິດເປັນຫລາຍຮູບຫລາຍແບບ, ປັບປຸງ concept ແລະ ບັນດາຮູບແບບດຳເນີນທຸລະກິດໃຫມ່ໃຫ້ສົມບູນແບບ ຊື່ງພວກຂ້າພະເຈົ້າໄດ້ພັດທະນາ. ຕົວຢ່າງຄື: ຮູບແບບສັບພະສິນຄ້າຂະຫນາດໃຫຍ່, ຮູບແບບເຂດການຄ້າປະສົມ Sencity ແລະ ບັນດາຮູບແບບດຳເນີນທຸລະກິດອື່ນ. ຄຽງຄູ່ກັນນັ້ນ ພວກຂ້າພະເຈົ້າຈະສຸມໃສ່ຍົກລະດັບ ແລະ ລົງທຶນພັດທະນາລະບົບ logicstic.”
ຄວາມຈິງ ບັນດາວິສາຫະກິດຫວຽດນາມປະຈຸບັນ ດ້ານທຶນຮອນຄວາມສາມາດບໍລິຫານວິສາຫະກິດ ແລະ ຕ່ອງໂສ້ເຕັກໂນໂລຊີຍັງຈຳກັດຢູ່, ສະນັ້ນ ບັນດາຜະລິດຕະພັນບໍ່ທັນມີລັກສະນະແກ້ງແຍ້ງສູງ, ບໍ່ທັດທຽມກັບຕະຫລາດ, ວຽກງານໂຄສະນາ ແລະ ອາລັກຂາການຄ້າຍັງອ່ອນດ້ອຍ. ໃນສະພາບປະຈຸບັນ, ຖ້າຫາກກຳລັງຄວາມສາມາດບັນດາວິສາຫະກິດບໍ່ທັນແຂງແຮງເທື່ອ, ບັນດາວິສາຫະກິດມີຂະແຫນງອາຊີບດຽວກັນ ຄວນ ຮ່ວມສຳພັນກັບບັນດາວິສາຫະກິດເພື່ອຫນູນຊ່ວຍເຊິ່ງກັນແລະກັນໃນແຕ່ລະຂັ້ນຕອນການຜະລິດ ຈຶ່ງພັດທະນາຢ່າງໝັ້ນຄົງໄດ້. ຖ້າຫາກບັນດາວິສາຫະກິດບໍ່ສ້າງກຳລັງຄວາມສາມາດຢ່າງແທ້ຈິງ ແລະ ຄວາມສາມາດແກ້ງແຍ້ງຢ່າງປອດໄສນັບແຕ່ຈຸດເວລານີ້, ຮອດປີ 2015 ເມື່ອສັນຍາຄູ່ຮ່ວມມືເສດຖະກິດຍຸດທະສາດເຂດປາຊີຟີກ( TPP) ໄດ້ຮັບການລົງນາມ, ບັນດາຄຳໝັ້ນສັນຍາກ່ຽວກັບດ້ານພາສີໄດ້ຮັບການປະຕິບັດ, ການແກ້ງແຍ້ງກ່ຽວກັບພາສີຈະຂ້ຽວຂາດກວ່າ. ພ້ອມກັບບັນດາມາດຕະການຫນູນຊ່ວຍຂອງນະຄອນ, ສະຫະສະມາຄົມ, ມາດຕະການຊ່ືງວິສາຫະກິດຄວນປະຕິບັດຢ່າງທັນທີ່ ນັ້ນແມ່ນຕ້ອງຕີລາຄາຄືນຄວາມສາມາດຂອງຕົນເພື່ອເລືອກເຟັ້ນມາດຕະການສະເພາະໃຫ້ແກ່ຕົນ. ທ່ານ ຟ້າມງອກຮືງ, ຮອງປະທານປະຈຳສະຫະພັນວິສາຫະກິດນະຄອນ ໂຮ່ຈິມີນ ໃຫ້ຮູ້ວ່າ:
“ພວກຂ້າພະເຈົ້າເຫັນວ່າວຽກງານທຳອິດຕ້ອງເຮັດ ນັ້ນແມ່ນວິສາຫະກິດຕ້ອງສຳຫລວດກວດກາຕົນເອງຄືນ, ຕ້ອງຕີລາຄາທ່າແຮງຂອງຕົນປະຈຸບັນແມ່ນແນວໃດ, ດ້ານໃດແຮງ, ດ້ານໃດອ່ອນ. ຈາກນັ້ນ ພວກເຮົາຈ່ຶງຮູ້ໄດ້ວ່າ ຕະຫລາດພວມຕ້ອງການຜະລິດຕະພັນປະເພດໃດເພື່ອເລືອກເຟັ້ນມາດ
ຕະການ, ຍຸດທະສາດໃຫ້ແກ່ຕົນເອງ. ພິເສດແມ່ນຕ້ອງເລືອກເຟັ້ນຜະລິດຕະພັນໃດ ທີ່ສາມາດແກ້ງແຍ້ງໄດ້, ມີຄວາມໝັ້ນຄົງໄດ້ຮັບການຮັບຮູ້ຈາກຕະຫລາດເໝາະສົມກັບຄວາມສາມາດ, ຄຸນຄ່າຫລັກແຫລ່ງຂອງວິສາຫະກິດຕົນ ນັ້ນຈຶ່ງແມ່ນບັນຫາສຳຄັນກວ່າໝູ່.”
ບັນດາຜູ້ຊ່ຽວຊານເສດຖະກິດຖືວ່າ: ນັບແຕ່ນີ້ຮອດທ້າຍປີ 2015, ການແກ້ງແຍ້ງລະຫວ່າງບັນດາວິສາຫະກິດແມ່ນຂ້ຽວຂາດທີ່ສຸດ ເມື່ອຫວຽດນາມ ເຂົ້າຮ່ວມ TPP. ເວລານັ້ນ ດ້ວຍຄວາມເປັນເອກະພາບກ່ຽວກັບດ້ານພາສີ, ຕາຕະລາງພາສີຂອງບັນດາປະເທດສົ່ງສິນຄ້າໄປຂາຍຢູ່ຫວຽດນາມຈະຢູ່ໃນລະດັບ 0%, ຜະລິດຕະພັນຂອງຫວຽດນາມ ຕ້ອງແກ້ງແຍ້ງຢ່າງສະເຫມີພາບຕາມກົດເກນເສດຖະກິດການຕະຫລາດ. ສະນັ້ນ ນີ້ຈະເປັນປີແຫ່ງການທ້າທາຍກ່ຽວກັບການປ່ຽນໃຫມ່ຫລືບໍ່ປ່ຽນໃຫມ່ສຳລັບບັນດາວິສາຫະກິດ. ນັບແຕ່ຈຸດເວລານີ້, ນອກຈາກການນຳໃຊ້ບັນດານະໂຍບາຍບຸລິມະສິດຂອງລັດ, ບັນດາວິສາຫະກິດຕ້ອງຕັດສິນໃຈຊອກຫາມາດຕະການສ້າງຍຸດທະສາດສະເພາະໃຫ້ແກ່ຕົນ, ເວລານັ້ນ ຈຶ່ງພັດທະນາແບບຍືນຍົງແລະ ມີປະສິດທິຜົນໄດ້.