(vovworld) - ໃນສະພາບການທີ່ ຫວຽດນາມ ພວມເຊື່ອມໂຍງນັບມື້ນັບເລິກເຊິ່ງ, ກ້ວາງຂວາງເຂົ້າໃນພື້ນຖານເສດຖະກິດໂລກນັ້ນ, ການສ້າງ ແລະ ຄຸ້ມຄອງບັນດາເຄື່ອງໝາຍການຄ້າຂອງ ຫວຽດນາມ ໃຫ້ໃຫຍ່ໂຕເຂັ້ມແຂງ, ມີອິດທິພົນຊື່ສຽງແມ່ນຈຸດໝາຍສຳຄັນຂອງລັດ, ປະຊາຄົມວິສາຫະກິດ. ສິ່ງດັ່ງກ່າວຢັ້ງຢືນວ່າ: ຫວຽດນາມ ແມ່ນປະເທດທີ່ມີສິນຄ້າ, ບໍລິການມີຄຸນນະພາບສູງ, ມີອິດທິພົນຊື່ສຽງ, ມີກຳລັງຄວາມສາມາດແກ່ງແຍ້ງສູງທັງຢູ່ຕະຫຼາດພາຍໃນປະເທດ ແລະ ຕະຫຼາດໂລກ. ຍ້ອນເຫດນັ້ນ, ການເຄື່ອນໄຫວກໍ່ສ້າງ ແລະ ພັດທະນາເຄື່ອງໝາຍການຄ້ານັບມື້ນັບກາຍເປັນບັນຫາຈຳເປັນ ແລະ ຮີບດ່ວນສຳລັບວິສາຫະກິດ ຫວຽດນາມ ແຕ່ລະແຫ່ງ. ບົດຂຽນ “ສ້າງເຄື່ອງໝາຍການຄ້າໃຫ້ແກ່ວິສາຫະກິດໃນການເຊື່ອມໂຍງ” ຂອງ ຈູງຖູຍ, ນັກຂ່າວ VOV.
ໂລກາພິວັດ ແລະ ການເຊື່ອມໂຍງເສດຖະກິດເຂົ້າກັບສາກົນ ໄດ້ ແລະ ພວມກາຍເປັນປະຕູເປີດທິດທາງໃໝ່ໃຫ້ແກ່ວິສາຫະກິດ ຫວຽດນາມ. ແຕ່ເຖິງຢາງໃດກໍຕາມ, ພ້ອມກັບກາລະໂອກາດນັ້ນ ແມ່ນບັນດາສິ່ງທ້າທາຍບໍ່ແມ່ນໜ້ອຍ. ຕາມບັນດານັກຊ່ຽວຊານດ້ານເສດຖະກິດ ແລະ ປະຊາຄົມວິສາຫະກິດແລ້ວ, ຄວາມດັ່ນຈາກການແກ່ງແຍ້ງນັບມື້ນັບຂ້ຽວຂາດ ເມື່ອປະຊາຄົມເສດຖະກິດ ອາຊຽນ (ACE) ໄດ້ຮັບການສ້າງຕັ້ງຂຶ້ນໃນທ້າຍປີ 2015 ເຮັດໃຫ້ພາສີອາກອນສຳລັບສິນຄ້າປະເທດທຳມະດາຈາກບັນດາປະເທດອາຊຽນ ຖືກຍົກເລີກ 100%. ໃນຂະນະນັ້ນ, ບັນດາເຄື່ອງໝາຍການຄ້າຂອງ ຫວຽດນາມ ຈະຖືກແກ່ງແຍ້ງຢ່າງຂ້ຽວຂາດກ່ວາ, ເຄັ່ງຂັດກ່ວາກັບຫຼາຍຄູ່ແຂ່ງກ່ວາ, ໃນຫຼາຍຂົງເຂດຢ່າງກ້ວາງຂວາງ ແລະ ເລິກເຊິ່ງກ່ວານັບທັງຢູ່ຕະຫຼາດພາຍໃນປະເທດ.
ພາບປະກອບ
|
ທ່ານ ຫງວຽນຮ່ວາງເງິນ, ຜູ້ອຳນວຍການໃຫຍ່ບໍລິສັດຫຸ້ນສ່ວນຢາງ ບີ່ງມີງ, ຖືວ່າ: ວິສາຫະກິດ ຫວຽດນາມ ຫຼາຍແຫ່ງໄດ້ ແລະ ພວມສ້າງຍຸດທະສາດເພື່ອພັດທະນາໃນການເຊື່ອມໂຍງ. ພິເສດ, ບັນດາວິສາຫະກິດຍັງເອົາໃຈໃສ່ເປັນພິເສດເຖິງການພັດທະນາຕະຫຼາດພາຍໃນປະເທດ ແລະ ເພີ່ມກຳລັງແກ່ງແຍ້ງກັບບັນດາວິສາຫະກິດຕ່າງປະເທດທີ່ລົງທຶນເຂົ້າ ຫວຽດນາມ ກ່ອນທີ່ນຳເຄື່ອງໝາຍການຄ້າຂອງ ຫວຽດນາມ ອອກສູ່ຕະຫຼາດໂລກ. ຕາມບົດຮຽນເມື່ອເຂົ້າຮ່ວມ WTO ແລ້ວ, ວິສາຫະກິດ ຫວຽດນາມ ຖືວ່າ ຢາກແຊກຊຶມເຂົ້າຕະຫຼາດສາກົນ, ຜະລິດຕະພັນ ແລະ ຄຸນນະພາບການບໍລິການຕ້ອງດີ, ດັ່ງນັ້ນຕ້ອງປະຕິບັດບັນດາມາດຕະຖານນີ້ໃຫ້ດີເພື່ອສ້າງເຄື່ອງໝາຍການຄ້າຢູ່ຕະຫຼາດພາຍໃນປະເທດກ່ອນ:
“ນີ້ແມ່ນໜຶ່ງໃນບັນດາບັນຫາຂອງການເຊື່ອມໂຍງເຂົ້າກັບສາກົນ, ເຖິງວ່າທຸກຄົນເວົ້າຫຼາຍເຖິງເລື່ອງສົ່ງອອກຕະຫຼອດໂລກ ແຕ່ພວກຂ້າພະເຈົ້າເອົາໃຈໃສ່ຫຼາຍເຖິງວຽກງານເຮັດແນວໃດເພື່ອຮັກສາຕະຫຼາດ, ເຄື່ອງໝາຍການຄ້າພາຍໃນປະເທດ ຕໍ່ໜ້າການແຊກຊຶມຢ່າງແຮງຂອງບັນດາກຸ່ມບໍລິສັດ, ຂອງບັນດາວິສາຫະກິດຂະໜາດໃຫຍ່ຢູ່ໃນໂລກເຂົ້າ ຫວຽດນາມ. ສຳລັບວິສາຫະກິດແຕ່ລະແຫ່ງກໍ່ມີຍຸດທະສາດສະເພາະ ທີ່ສຸມໃສ່ເຂົ້າໃນວຽກງານຕ້ອງເຮັດແນວໃດເພື່ອຄົງຕົວໄດ້ໃນໄລຍະແຫ່ງການເຊື່ອມໂຍງ.”
ໃນໄລຍະເກືອບ 10 ປີແຫ່ງການເຂົ້າຮ່ວມລາຍການເຄື່ອງໝາຍການຄ້າແຫ່ງຊາດ, ປະຈຸບັນ, ຫວຽດນາມ ບໍ່ທັນມີເຄື່ອງໝາຍການຄ້າທີ່ສ້າງຊື່ສຽງໃນຕະຫຼາດໂລກໄດ້ຫຼາຍ. ເຖິງວ່າຜະລິດຕະພັນ, ສິນຄ້າຂອງ ຫວຽດນາມ ໄດ້ມີໜ້າຢູ່ຫຼາຍຕະຫຼາດໃນໂລກແລ້ວກໍຕາມ ແຕ່ເຄື່ອງໝາຍການຄ້າຍັງບໍ່ທັນມີທີ່ຕັ້ງຢ່າງໝັ້ນຄົງໃນຕະຫຼາດ ແລະ ລູກຄ້າສາກົນ. ທ່ານ ຫງວຽນເທ໋ວີງ, ເລຂາທິການໃຫຍ່ສະຫະສະມາຄົມ ກາເຟ - ກາກາວ ຫວຽດນາມ, ຖືວ່າ: ເພື່ອໂຄສະນາເຜີຍແຜ່, ແນະນຳບັນດາເຄື່ອງໝາຍການຄ້າ, ວິສາຫະກິດຕ້ອງມີຍຸດທະສາດໂຄສະນາພາບພົດຂອງຕົນອອກສູ່ຕະຫຼາດຕ່າງປະເທດ:
“ຕາມຂ້າພະເຈົ້າແລ້ວ, ສິ່ງສຳຄັນທີ່ສຸດນັ້ນແມ່ນເມື່ອສ້າງເຄື່ອງໝາຍການຄ້າແຫ່ງຊາດໄດ້ແລ້ວຮຽກຮ້ອງໃຫ້ວິສາຫະກິດຕອ້ງເຮັດແນວໃດເພື່ອຮັກສາບັນດາເຄື່ອງໝາຍນີ້ໃຫ້ໝັ້ນຄົງ. ນອກຈາກບັນດາວິສາຫະກິດນີ້ແລ້ວ, ຕ້ອງສືບຕໍ່ສົ່ງເສີມບັນດາວິສາຫະກິດໃນຂະແໜງສິນຄ້າເຂົ້າຮ່ວມລາຍການເຄື່ອງໝາຍການຄ້າແຫ່ງຊາດ ຈາກນັ້ນສ້າງເງື່ອນໝາຍການຄ້າໃຫ້ທັງຂະແໜງສິນຄ້າອີກ”
ໄປຄຽງຄູ່ກັບການກໍ່ສ້າງ, ໂຄສະນາເຜີຍແຜ່ເຄື່ອງໝາຍການຄ້າແລ້ວ, ວິສາຫະກິດຕ້ອງຍົກກຳລັງແກ່ງແຍ້ງ, ຍົກສູງຄຸນນະພາບຜະລິດຕະພັນ, ເພື່ອບໍ່ໃຫ້ ເຄື່ອງໝາຍການຄ້າຂອງຕົນຖືກເສຍຫາຍໄປຫຼືຫລຸດມູນຄ່າ. ທ່ານ ບູ່ຍຮູຍເຊີນ, ຫົວໜ້າກົມສົ່ງເສີມການຄ້າ, ກະຊວງອຸດສາຫະກຳ - ການຄ້າ, ຖືວ່າ:
“ການກໍ່ສ້າງ ແລະ ໂຄສະນາເຄື່ອງໝາຍການຄ້າຂອງບັນດາຜະລິດຕະພັນໃນຕະຫຼາດທີ່ມີການແກ່ງແຍ້ງແມ່ນຄວາມຮຽກຮ້ອງທີ່ຈຳເປັນ ແລະ ມີຄຸນຄ່າສຳຄັນສຳລັບເລື່ອງຢັ້ງຢືນບັນດາມູນຄ່າຂອງວິສາຫະກິດ ແລະ ຍົກສູງປະສິດທິຜົນການຜະລິດດຳເນີນທຸລະກິດ. ໃນສະພາບການທີ່ພື້ນຖານເສດຖະກິດ ຫວຽດນາມ ພວມກ້າວເຂົ້າສູ່ໄລຍະເຊື່ອມໂຍງນັບມື້ນັບເລິກເຊິ່ງ, ກ້ວາງຂວາງດ້ວຍເລື່ອງເຂົ້າຮ່ວມການປະຕິບັດບັນດາຂໍ້ຕົກລົງການຄ້າເສລີ ແລະ ພິເສດແມ່ນບັນດາຂໍ້ຕົກລົງການຄ້າເສລີໃໝ່ຄວາມຮຽກຮ້ອງຕ້ອງການສຳລັບການພັດທະນາເຄື່ອງໝາຍການຄ້າໃນຕະຫຼາດທີ່ມີຄວາມແກ່ງແຍ້ງຢ່າງຂ້ຽວຂາດຄືແນວນັ້ນຍິ່ງມີຄວາມຮີບດ່ວນ ແລະ ຈຳເປັນ, ມັນຈະສ້າງເງື່ອນໄຂເພື່ອຍົກສູງມູນຄ່າການສົ່ງອອກ ແລະ ສິນຄ້າຂອງບັນດາການບໍລິການຂອງ ຫວຽດນາມ, ພ້ອມທັງຮັບປະກັນລັກສະນະແກ່ງແຍ້ງໝັ້ນຄົງເມື່ອເຂົ້າຮ່ວມການແກ່ງແຍ້ງຢູ່ຕະຫຼາດໂລກ.”
ໃນທ່າອ່ຽງເຊື່ອມໂຍງນັ້ນ, ເຄື່ອງໝາຍການຄ້າແຫ່ງຊາດຈະຊ່ວຍໃຫ້ບັນດາວິສາຫະກິດຈຳໜ່າຍສິນຄ້າໄດ້ຫຼາຍ ແລະ ມີຫຼາຍຄູ່ຮ່ວມມືຮູ້ຈັກເຖິງ ແລະ ຂາຍສິນຄ້າດ້ວຍລາຄາດີກ່ວາ. ດັ່ງນັ້ນ, ເລື່ອງສ້າງ, ກໍຄືບັນດາມາດຕະການເພື່ອໂຄສະນາເຜີຍແຜ່ເຄື່ອງໝາຍການຄ້າອອກສູ່ໂລກຈະຊ່ວຍບັນດາວິສາຫະກິດ ຫວຽດນາມ ໝູນໃຊ້ບັນດາກາລະໂອກາດເຊິ່ງບັນດາສັນຍາການຄ້າເສລີນຳມາໃຫ້ໄດ້.