ການຜະລິດຊາຂອງຫວຽດນາມຢືນອັນດັບທີ 5 ໃນໂລກ. ປະຈຸບັນ ຊາ ຫວຽດນາມ ໄດ້ສົ່ງອອກໄປຍັງ 110 ປະເທດ ແລະ ເຂດແຄ້ວນ. ເຖິງຢ່າງໃດກໍຕາມ, ຢູ່ຕະຫລາດໂລກ, ເຄື່ອງໝາຍການຄ້າ ຊາ ຂອງຫວຽດນາມ ຍັງບໍ່ທັນມີຊື່ສຽງໃນໂລກເທື່ອ, ຍ້ອນ 95% ປະລິມານຊາຫວຽດນາມສົ່ງອອກຍັງແມ່ນຊາດິບ. ສະນັ້ນ ການສ້າງເຄື່ອງໝາຍການຄ້າຊາຫວຽດນາມ ແມ່ນວຽກງານທີ່ຈຳເປັນ ແລະ ຮີບດ່ວນ ເພື່ອໃຫ້ຊາຫວຽດນາມ ຢັ້ງຢືນເຄື່ອງໝາຍການຄ້າຂອງຕົນໃນໂລກ.
ຫວຽດນາມມີເຂດປູກຊາທີ່ມີຄຸນນະພາບສູງຫລາຍແຫ່ງ, ດ້ວຍບັນດາເຄື່ອງໝາຍການຄ້າທີ່ລືຊື່ຄື: ເຕີນເກືອງ ຂອງ ທ໋າຍງວຽນ, ໂມກເຈົາ ຂອງ ເຊີນລາ, ຊ້ວຍຢ່າງ ຂອງ ອຽນບ໋າຍ ຫລື ຊານຕວຽດ ຂອງ ຮ່າຢາງ. ໃນນັ້ນ ທ໋າຍງວຽນ ໄດ້ຮັບຖືວ່າແມ່ນເມືອງເອກຂອງຊາ ຫວຽດນາມ ດ້ວຍເນື້ອທີ່ປູກຊາເກືອບ 18.000 ເຮັກຕາ. ດ້ວຍການນຳໃຊ້ມາດຖານ VietGap ເຂົ້າໃນການປູກຊາ, ທ໋າຍງວຽນ ມີຜະລິດຕະພັນຊາຫລາຍຊະນິດທີ່ມີຄຸນນະພາບສະເໝີກັນ, ເປັນປົກກະຕິ. ເຖິງຢ່າງໃດກໍຕາມ, ເລື່ອງຈົດທະບຽນປົກປ້ອງກາໝາຍສິນຄ້າ, ຕົ້ນກຳເນີດ, ຄຳແນະນຳທີ່ຕັ້ງພູມສາດຂອງຜະລິດຕະພັນຊາຢູ່ແຂວງ ທ໋າຍງວຽນ ຍັງບໍ່ທັນໄດ້ຮັບຄວາມເອົາໃຈໃສ່ປານໃດ. ທ່ານ ດັ້ງຫວຽດທ່ວນ, ຮອງປະທານຄະນະກຳມະການ ປະຊາຊົນ ແຂວງ ທ໋າຍງວຽນ ໃຫ້ຮູ້ວ່າ:
“ມາຮອດຈຸດເວລານີ້ ພວກຂ້າພະເຈົ້າໄດ້ມີເຄື່ອງໝາຍການຄ້າຊາ ເຕີນເກືອງ, ຮ່ວາງບີ່ງ, ມີການແນະນຳທີ່ຕັ້ງພູມສາດ ແລະ ກໍມີກາໝາຍສິນຄ້າຊາລວມໝູ່ສຳລັບຊາທັງໝົດຂອງແຂວງ ທ໋າຍງວຽນ. ແຕ່ຂ້າພະເຈົ້າຄິດວ່າ ບັນດາກາໝາຍສິນຄ້ານີ້ບໍ່ທັນມີກຳລັງແຮງຢ່າງພຽງພໍເພື່ອຮັບການປົກປ້ອງໃນຕະຫລາດໂລກ. ສະນັ້ນ ຈຳເປັນ ຕ້ອງຈົດທະບຽນການປົກປ້ອງກາໝາຍສິນຄ້າຊາຢູ່ໃນຕະຫລາດໂລກຢ່າງຮີບດ່ວນ ເພື່ອໃຫ້ຊາ ທ໋າຍງວຽນ ພັດທະນາຢ່າງຍາວນານ.“
ປະຈຸບັນ ບັນດາວິສາຫະກິດພຽງແຕ່ເອົາໃຈໃສ່ເຖິງການສ້າງກາໝາຍສິນຄ້າ, ເຄື່ອງໝາຍການຄ້າທີ່ມີຕໍ່ບັນດາຜະລິດຕະພັນຊາເວົ້າສະເພາະ, ຜະລິດຕະພັນກະເສດເວົ້າລວມ, ຍ້ອນເຄື່ອງໝາຍການຄ້າ ຍາມໃດກໍຕິດພັນກັບຄຸນຄ່າທາງດ້ານເສດຖະກິດ ແລະ ການພັດທະນາຂອງແຕ່ລະວິສາຫະກິດ. ສ່ວນການຈົດທະບຽນ ແລະ ປົກປ້ອງກາໝາຍສິນຄ້າ, ຕົ້ນກຳເນີດ, ການແນະນຳທີ່ຕັ້ງພູມສາດໃຫ້ແກ່ແຕ່ລະຜະລິດຕະພັນຂອງແຕ່ລະທ້ອງຖິ່ນ ພັດບໍ່ທັນໄດ້ຮັບຄວາມເອົາໃຈໃສ່ຢ່າງເຖິງຖອງ. ທ່ານ ດ່າວແອນຕວັນ, ປະທານສະຫະສະມາຄົມຊາ ຫວຽດນາມ ໄດ້ຖືວ່າ:
“ເຄື່ອງໝາຍການຄ້າແມ່ນຂອງວິສາຫະກິດ, ສະນັ້ນ ບັນດາວິສາຫະກິດເຄີຍມີສະຕິຄວາມເຂົ້າໃຈໄດ້ເຖິງຄຸນຄ່າຂອງວິສາຫະກິດ. ແຕ່ເມື່ອເວົ້າເຖິງເຄື່ອງໝາຍການຄ້າ, ການແນະນຳທີ່ຕັ້ງພູມສາດຂອງທັງເຂດແຄ້ວນທີ່ຂຶ້ນກັບກຳມະສິດຂອງຫລາຍຄົນ, ຂອງທັງແຂວງ, ຂອງປະເທດຊາດ, ສະນັ້ນ ເກືອບຄືວ່າບໍ່ທັນມີອົງການໃດມີຄວາມຮັບຜິດຊອບຕົ້ນຕໍໃນການປົກປ້ອງເຄື່ອງໝາຍການຄ້າ.“
ເຖິງວ່າ ເຄື່ອງໝາຍການຄ້າ ຊາ ຫວຽດນາມ ໄດ້ຮັບການສ້າງຂຶ້ນໃນຫລາຍປີມານີ້ ແລະ ມາຮອດປະຈຸບັນ ເຄື່ອງໝາຍການຄ້າ ຊາ ຫວຽດນາມ ໄດ້ຈົດທະບຽນປົກປ້ອງຢູ່ 77 ປະເທດໃນໂລກກໍຕາມ, ແຕ່ປະຈຸບັນ ມີພຽງເກືອບ 20 ວິສາຫະກິດຈົດທະບຽນເຂົ້າຮ່ວມການຜະລິດຊາ ຕາມມາດຕະຖານຂອງຊາຫວຽດນາມ. ຍ້ອນຜົນປະໂຫຍດໃນພາຍພາກຫນ້າ, ສະນັ້ນ ບັນດາວິສາຫະກິດພາຍໃນປະເທດພຽງແຕ່ຢາກຂາຍຊາຍິ່ງຫລາຍກໍຍິ່ງດີ, ບໍ່ເອົາໃຈໃສ່ເຖິງການສ້າງເຄື່ອງໝາຍການຄ້າ, ສ່ວນບັນດາວິສາຫະກິດຕ່າງປະເທດ ກໍພຽງແຕ່ຢາກນຳເຂົ້າຊາດິບ ຍ້ອນລາຄາຕຳ່. ສະຫະສະມາຄົມ ຊາ ຫວຽດນາມ ໄດ້ ສະເຫນີທາງລັດ ຄວນມີຂໍ້ກຳນົດກ່ຽວກັບບັນດາຜະລິດຕະພັນຊາ ຕ້ອງບັນລຸ ຄຸນນະພາບຕາມມາດຖານຊາ ຫວຽດນາມ ຈຶ່ງໄດ້ຮັບອະນຸຍາດສົ່ງອອກ, ແຕ່ມາຮອດປະຈຸບັນ ຍັງບໍ່ທັນໄດ້ຮັບຄວາມເອົາໃຈໃສ່ເທື່ອ. ຄຽງຂ້າງນັ້ນ ມີໂຮງງານປຸງແຕ່ງຊາຫລາຍແຫ່ງໄດ້ຮັບຫນັງສືອະນຸຍາດ, ພາໄປເຖິງສະພາບມີເຂດປູກຊາຫລາຍແຫ່ງ ພຽງແຕ່ສາມາດສະຫນອງຊາດິບໃຫ້ແກ່ໂຮງງານດຽວເທົ່ານັ້ນ ແຕ່ມີເຖິງ 7 -8 ໂຮງງານຍາດແຍ່ງກັນຊຶ້ຊາດິບ ຈຶ່ງເຮັດໃຫ້ເກີດການຄວາມສັບສົນວຸນວາຍໃນການເກັບຊຶ້, ໂດຍບໍ່ຫົວຊາຕໍ່ຄຸນນະພາບຂອງຜະລິດຕະພັນ. ນັ້ນແມ່ນສາຍເຫດເຮັດໃຫ້ຄຸນນະພາບຊາຕຳ່, ກໍ່ຜົນສະທ້ອນເຖິງອິດທິພົນຊື່ສຽງຂອງຊາ ຫວຽດນາມ. ນັ້ນກໍແມ່ນສາຍເຫດ ເປັນຫຍັງ ລາຄາຊາຂອງຫວຽດນາມ ພຽງເທົ່າກັບເຄິ່ງຫນຶ່ງເມື່ອທຽບໃສ່ ລາຄາຊາໃນໂລກ, ອັນໄດ້ພາໃຫ້ການສົ່ງອອກຫລາຍ ແຕ່ວົງເງິນການສົ່ງອອກບັນລຸບໍ່ໄດ້ຫລາຍປານໃດ, ສະເລ່ຍແຕ່ລະປີປະມານ 130 ລ້ານໂດລາສະຫະລັດ.
ຫວຽດນາມ ພວມສູ້ຊົນຮອດປີ 2015 ຈະສົ່ງອອກຊາໃຫ້ໄດ້ 200.000 ໂຕນ/ປີ, ບັນລຸວົງເງິນ 400 ລ້ານ ໂດລາສະຫະລັດ/ປີ. ເຖິງຢ່າງໃດກໍຕາມ, ເພື່ອບັນລຸໄດ້ຄາດໝາຍດັ່ງກ່າວ, ນອກຈາກເລື່ອງຍົກສູງຄຸນນະພາບຊາແລ້ວ, ຂະແຫນງຊາ ພ້ອມກັບບັນດາທ້ອງຖິ່ນທີ່ມີສ່ວນກ່ຽວຂ້ອງ ຕ້ອງສ້າງໃຫ້ໄດ້ເຄື່ອງໝາຍການຄ້າຢ່າງແຂງແຮງ, ເພື່ອໄດ້ຮັບການປົກປ້ອງກາໝາຍສິນຄ້າໃນທົ່ວໂລກ, ຜ່ານນັ້ນ ຈຶ່ງມີກາລະໂອກາດສົ່ງອອກຜະລິດຕະພັນຊາສຳເລັດຮູບ, ແທນທີ່ຊາດິບຄືປະຈຸບັນ./.