(vovworld)-ປີ 2014 ແມ່ນປີສ້າງເປັນຂີດໝາຍສຳຄັນຂອງຂະແຫນງກະສິກຳຫວຽດນາມ ໃນການປະຕິບັດແຜນຮ່າງສ້າງໂຄງປະກອບຄືນໃຫມ່ ໂດຍທ່ານນາຍົກລັດຖະມົນຕີ ເຊັນອະນຸມັດໃນເດືອນ 6/2013 ຈາກ, ດ້ວຍການສ້າງຕັ້ງ ແລະ ພັດທະນາຢ່າງແຮງຂອງບັນດາ “ຮູບແບບ”ຄື: ທົ່ງນາຂະຫນາດໃຫຍ່; ເຂດປູກວັດຖຸດິບຮັບໃຊ້ຕະຫລາດພາຍໃນປະເທດ ແລະ ສົ່ງອອກ; ເຂດລ້ຽງສັດປອດໄພຢູ່ຫລາຍທ້ອງຖິ່ນ… ເຖິງວ່າຫາກໍ່ເລີ່ມຕົ້ນ ແຕ່ດ້ວຍຜົນສຳເລັດທີ່ບັນລຸໄດ້, ບັນດາ “ຮູບແບບ” ນີ້ຈະແມ່ນທິດພັດທະນາແບບຍືນຍົງ, ມີປະສິດທິຜົນໃຫ້ແກ່ພື້ນຖານກະສິກຳ ຫວຽດນາມໃນອະນາຄົດ.
ພາບປະກອບ:internet
|
ໂດຍປະຕິບັດແຜນຮ່າງສ້າງໂຄງປະກອບຄືນໃຫມ່, ຂະແຫນງກະສິກຳ ຫວຽດນາມ ກຳນົດຈຸດສຸມແມ່ນປ່ຽນໃຫມ່ ແລະ ພັດທະນາບັນດາຮູບການຈັດຕັ້ງການຜະລິດ. ຈາກນັ້ນ ຂະແຫນງກະສິກຳໄດ້ຜັນຂະຫຍາຍການສ້າງບັນດາແຜນຮ່າງນ້ອຍກ່ຽວກັບຂົງເຂດປູກຝັງ, ລ້ຽງສັດ, ສິນໃນນ້ຳ, ປ່າໄມ້, ຊົນລະປະທານ, ດ້ວຍບັນດາຈຸດໝາຍບຸລິມະສິດ ແລະ ກຳນົດທິດຍູ້ແຮງຈັດຕັ້ງການຜະລິດຕາມລະບົບການຜະລິດ ແລະ ລະບົບມູນຄ່າ. ຈຸດໝາຍຂອງແຜນຮ່າງແມ່ນສ້າງໂຄງປະກອບຂະແຫນງກະສິກຳຄືນໃຫມ່ ຕາມທິດມຸ່ງໄປເຖິງມູນຄ່າເພີ່ມ ແລະ ພັດທະນາກະສິກຳແບບຍືນຍົງ. ເພາະສະນັ້ນ, ບັນດາທ້ອງຖິ່ນໃນທົ່ວປະເທດ ໄດ້ຫັນປ່ຽນເນື້ອທີ່ນາບັນລຸສະມັດຕະພາບຕ່ຳ 87.000 ເຮັກຕາມາປູກພືດມີມູນຄ່າສູງກວ່າຄື: ສາລີ, ໝາກຖົ່ວດິນ, ຜັກ, ໝາກງາ. ບັນດາເຂດປູກເຂົ້າສະເພາະຕາມຮູບການຮ່ວມສຳພັນລະຫວ່າງຊາວກະສິກອນຮ່ວມມືກັບວິສາຫະກິດ ຢູ່ 43 ແຂວງ, ນະຄອນ ໃນທົ່ວປະເທດ, ດ້ວຍເນື້ອທີ່ 121.000 ເຮັກຕາ ກໍໄດ້ຮັບການສ້າງຕັ້ງຂຶ້ນ. ຂົງເຂດລ້ຽງສັດກໍໄດ້ຈັດຕັ້ງ ຄືນໃຫມ່, ຈັດສັນເຂດລ້ຽງສັດປອດໄພຫລີກລ້ຽງໂລກລະບາດ. ກ່ຽວກັບຂົງເຂດປ່າໄມ້, ຂະແຫນງກະສິກຳໄດ້ກຳນົດ 4 ຫນ້າທີ່ຈຸດສຸມ ຊື່ງລວມມີ: ຍົກສູງສະມັດຕະພາບ, ຄຸນນະພາບ ແລະ ຄຸນຄ່າການປູກປ່າ. ຍົກສູງມູນຄ່າເພີ່ມຜະລິດຕະພັນໄມ້ຜ່ານການປຸງແຕ່ງ; ພັດທະນາຕະຫລາດໄມ້ ແລະ ຜະລິດຕະພັນໄມ້ ແລະ ພັດທະນາເສດຖະກິດຮ່ວມມື ແລະ ຮ່ວມສຳພັນຕາມລະບົບມູນຄ່າຜະລິດຕະພັນປ່າໄມ້.ໃນຂົງເຂດສິນໃນນ້ຳ, ຂະແຫນງກະສິກຳສຸມໃສ່ຫັນປ່ຽນໂຄງປະກອບລະຫວ່າງການຂຸດຄົ້ນກັບການລ້ຽງປູກ ແລະ ຮັກສາແຫລ່ງຜົນປະໂຫຍດສິນໃນນ້ຳ, ຍູ້ແຮງການຫາປານອກຝັ່ງທະເລຕິດພັນກັບການປ້ອງກັນຊາດປ້ອງກັນຄວາມສະຫງົບເຂດທະເລ, ຫລຸດຜ່ອນຄວາມເສຍຫາຍພາຍຫລັງເກັບກູ້ ແລະ ຫັນເປົ້າໝາຍລ້ຽງສິນໃນນ້ຳເປັນຫລາຍຮູບຫລາຍແບບ. ບັນດາເຂດ ແລະ ທ້ອງຖິ່ນ ຜັນຂະຫຍາຍການສ້າງບັນດາຮູບແບບກະສິກຳໃຫມ່ ຊື່ງໄດ້ ຮັບການຕີລາຄາ ວ່າ ບັນລຸປະສິດທິຜົນເບື້ອງຕົ້ນ ແລະ ສາມາດກາຍເປັນບັນດາ “ຮູບແບບ”ຂອງຂະແຫນງກະສິກຳໃນອະນາຄົດ. ທ່ານນາງ ຫງວຽນທິຮົ່ງ, ຫົວຫນ້າກົມແຜນການ, ສັງກັດກະຊວງກະສິກຳ ແລະ ພັດທະນາຊົນນະບົດໃຫ້ຮູ້ວ່າ: ປະຈຸບັນ ມີ ກວ່າເຄິ່ງຫນຶ່ງຈຳນວນທ້ອງຖິ່ນໃນທົ່ວປະເທດໄດ້ຜັນຂະຫຍາຍແຜນຮ່າງສ້າງໂຄງປະກອບກະສິກຳຄືນໃຫມ່.
“ບັນດາຂົງເຂດປູກຝັງ, ລ້ຽງສັດ, ສິນໃນນ້ຳ, ຊົນລະປະທານ ລ້ວນແຕ່ສຸມໃສ່ສ້າງໂຄງປະກອບຄືນໃຫມ່ ຕາມທິດຍົກສູງຄຸນນະພາບ ແລະ ເພີ່ມມູນຄ່າເພີ່ມບັນດາປະເພດຜະລິດຕະພັນກະເສດ. ປະກົດມີບັນດາຮູບການຜະລິດໃຫມ່ຄື: ສຸມໃສ່ຮູບແບບທົ່ງນາຂະຫນາດໃຫຍ່, ຮ່ວມສຳພັນລະຫວ່າງຊາວກະສິກອນ ກັບວິສາຫະກິດ, ລະຫວ່າງສະຫະກອນ, ບັນດາຫນ່ວຍຜະລິດກັບວິສາຫະກິດ ຈາກການຜະລິດຕະຫລອດຮອດການຈຳຫນ່າຍຜະລິດຕະພັນ, ສ້າງລະບົບມູນຄ່າເພື່ອຈຳຫນ່າຍໃຫ້ດີກວ່າ.”
ປີ 2014 ແມ່ນປີທຳອິດທີ່ຂະແຫນງກະສິກຳຫວຽດນາມ ບັນລຸມູນຄ່າ ສົ່ງອອກລື່ນກາຍຄາດໝາຍທີ່ວາງອອກ 30 ຕື້ USD, ການເຕີບໂຕບັນລຸກວ່າ 3%, ເພີ່ມຂຶ້ນເກືອບ 2,7% ເມື່ອທຽບໃສ່ປີກາຍ. ໝາກຜົນດັ່ງກ່າວສະແດງໃຫ້ເຫັນທາງຢ່າງຖືກຕ້ອງໃນວິວັດການສ້າງໂຄງປະກອບຄືນໃຫມ່, ໃນນັ້ນ ເອົາໃຈໃສ່ຍົກສູງມູນຄ່າ ຜະລິດຕະພັນກະເສດ.
ຄຽງຄູ່ກັບບັນດາໝາກຜົນບັນລຸໄດ້, ຂະແຫນງກະສິກຳຍັງປະສົບກັບຄວາມຫຍຸ້ງຍາກບໍ່ແມ່ນຫນ້ອຍໃນວິວັດການປະຕິບັດແຜນຮ່າງສ້າງໂຄງປະກອບຄືນໃຫມ່, ເປັນຕົ້ນໃນສະພາບການເຊື່ອມໂຍງເຂົ້າກັບສາກົນນັບມື້ນັບເລິກເຊິ່ງ ແລະ ກວ້າງຂວາງ, ດ້ວຍວິວັດການຕ້ອງປະຕິບັດການຫັນເປັນອຸດສາຫະກຳ ແລະ ທັນສະໄຫມຢ່າງແນ່ນອນ. ບັນດາຂໍ້ຈຳກັດ ແລະ ອ່ອນດ້ອຍ ຕ້ອງໄດ້ຮັບການແກ້ໄຂໃນໄລຍະຈະມາເຖິງຄື: ວິວັດການຜັນຂະຫຍາຍ ແລະ ປະຕິບັດຍັງປະສົບກັບຄວາມຫຍຸ້ງຍາກຫລາຍຢ່າງ, ການປ່ຽນໃຫມ່ບັນດາຮູບການຈັດຕັ້ງການຜະລິດຍັງຊັກຊ້າຢູ່; ເລື່ອງທະວີຄູນຮູບແບບການຜະລິດກະສິກຳຍັງຊັກຊ້າ ແລະ ຂາດນະໂຍບາຍຫນູນຊ່ວຍ. ຕາມ ດຣ ດັ້ງກີມເຊີນ, ຫົວຫນ້າສະຖາບັນນະໂຍບາຍ ແລະ ຍຸດທະສາດພັດທະນາກະສິກຳຊົນນະບົດ ຖືວ່າ:
“ກຳລັງຫນູນໃນອະນາຄົດຂອງການສ້າງໂຄງປະກອບຄືນໃຫມ່ ນັ້ນແມ່ນຕ້ອງຫັນປ່ຽນຈາກການຂຸດຄົ້ນຊັບພະຍາກອນທີ່ມີຢູ່ແລ້ວມາສູ່ການຂຸດຄົ້ນຊັບພະຍາກອນສຳຄັນທີ່ສຸດນັ້ນແມ່ນຊັບພະຍາກອນມະນຸດ. ຫວຽດນາມຕ້ອງເອົາໃຈໃສ່ເປັນພິເສດເຖິງການພັດທະນາວິທະຍາສາດເຕັກໂນໂລຊີໃນກະສິກຳຢ່າງແຮງ, ສຸມໃສ່ສ້າງ, ສຳເລັດພື້ນຖານໂຄງລ່າງ ແລະ ປະຕິບັດວຽກງານພະນັກງານ, ບຳລຸງສ້າງແຫລ່ງຊັບພະຍາກອນມະນຸດເປັນຢ່າງດີ. ພ້ອມກັນນັ້ນ ຕ້ອງປັບປຸງລະບອບນະໂຍບາຍ, ນັບທັງການຈັດຕັ້ງ ແລະ ກົນໄກເພື່ອສ້າງກຳລັງຫນູນໃຫມ່ໃຫ້ແກ່ແຫລ່ງກຳລັງນີ້.”
ການສ້າງໂຄງປະກອບຂະແຫນງກະສິກຳຄືນໃຫມ່ ແມ່ນການ ສ່ວນຫນຶ່ງຂອງການສ້າງໂຄງປະກອບພື້ນຖານເສດຖະກິດຄືນໃຫມ່, ສອດຄ່ອງກັບຍຸດທະສາດ ແລະ ແຜນການພັດທະນາເສດຖະກິດສັງຄົມຂອງຫວຽດນາມ, ຕິດພັນກັບການພັດທະນາເສດຖະກິດ, ສັງຄົມ ແລະ ຮັກສາສິ່ງແວດລ້ອມ. ເຖິງວ່າ ຍັງມີຫລາຍວຽກງານຕ້ອງປະຕິບັດ, ຫລາຍບັນຫາຕ້ອງແກ້ໄຂກໍຕາມ, ແຕ່ດ້ວຍບັນດາໝາກຜົນບັນລຸໄດ້ໃນເບື້ອງຕົ້ນຂອງວິວັດການຜັນຂະຫຍາຍແຜນຮ່າງສ້າງໂຄງປະກອບກະສິກຳຄືນໃຫມ່ນັ້ນ ໄດ້ ແລະ ພວມສ້າງທ່າຟື້ນຟູ ແລະ ກ້າວໄປເຖິງການເຕີບໂຕຢ່າງໝັ້ນຄົງໃຫ້ແກ່ຂະແຫນງກະສິກຳກໍຄືພື້ນຖານເສດຖະກິດຫວຽດນາມ.