(vovworld) - ໃນໄລຍະ 2 ປີ ມໍ່ໆມານີ້ໄດ້ຮັບຖືວ່າ ແມ່ນໄລຍະຫຍຸ້ງຍາກສຳລັບຂົງເຂດຂາຍຍ່ອຍ ຫວຽດນາມ, ພິເສດ ໃນໄລຍະຕົ້ນປີ ຍ້ອນຖືກຜົນສະທ້ອນຈາກການຊຸດໂຊມຂອງໂລກ ແລະ ພາຍໃນປະເທດ ຊຶ່ງເຮັດໃຫ້ກຳລັງຊື້ຖືກຫລຸດລົງຢ່າງແຮງ, ມີວິສາຫະກິດຫລາຍແຫ່ງຕ້ອງປະເຊີນຫນ້າກັບໄພເງິນເຟີ້, ຊ້ຳບໍ່ໜຳເກີດຄວາມສ່ຽງລົ້ມລະລາຍ. ໃນສະພາບການຄືແນວນັ້ນ, ລັດ ແລະ ສະຫະສະມາຄົມຂາຍຍ່ອຍ ຫວຽດນາມ ໄດ້ ແລະ ພວມຜັນຂະຫຍາຍຫລາຍມາດຕະການເພື່ອຫນູນຊ່ວຍບັນດາວິສາຫະກິດ ຮັກສາ ແລະ ສືບຕໍ່ພັດທະນາ.
ຮ້ານຊັບພະສິນຄ້າ
ພາບປະກອບ: internet
|
ຕາມຕົວເລກສະຖິຕິຂອງກະຊວງແຜນການ ແລະ ການລົງທຶນ ຫວຽດນາມ ແລ້ວ, ໃນ 4 ເດືອນຕົ້ນປີ ທົ່ວປະເທດມີວິສາຫະກິດ 17.700 ແຫ່ງຖືກຍຸບເລິກ ແລະ ຢຸດຕິການເຄື່ອນໄຫວ, ໃນນັ້ນມີວິສາຫະກິດດຳເນີນທຸລະກິດໃນຂົງເຂດຂາຍຍົກ, ຂາຍຍ່ອຍ 5.200 ແຫ່ງຖືກຍຸບເລິກ. ໃນຂະນະນັ້ນ ດັດຊະນີລາຄາໃຊ້ສອຍ (CPI) ໃນເດືອນ 4 ເພີ່ມຂຶ້ນພຽງ 0,05% ຊຶ່ງແມ່ນລະດັບຕຳ່ສຸດໃນໄລຍະ 2 ປີ ຜ່ານມາ ແລະ ແມ່ນເດືອນທີ 9 ຢ່າງລຽນຕິດ CPI ຫລຸດລົງ. ດ້ວຍໝາກຜົນນີ້ ໄພເງິນເຟີ້ໄດ້ຮັບການຄວບຄຸມ, ແຕ່ຜູ້ຊ່ຽວຊານເສດຖະກິດຫລາຍທ່ານມີຄວາມເປັນຫ່ວງກັງວົນວ່າ ໄພເງິນເຟີ້ຫລຸດລົງ ນັ້ນແມ່ນຍອດຄວາມຕ້ອງການໃຊ້ສອຍຕຳ່ ແລະ ນີ້ແມ່ນສັນຍານຂອງຄວາມຊັກຊ້າ ແລະ ເກີດໄພເງິນຝືດ ໄດ້ ແລະ ພວມສົ່ງຜົນກະທົບໂດຍກົງເຖິງຂະແຫນງຂາຍຍ່ອຍ. ໃນໄຕມາດ 1 ຂອງປີ 2012, ລະດັບເຕີບໂຕຂອງໝວດສິນຄ້າໃຊ້ສອຍບັນລຸພຽງ 5% ເມື່ອທຽບໃສ່ປີ 2011. ພື້ນຖານເສດຖະກິດຖືກຕົກເຂົ້າສູ່ສະພາບຫຍຸ້ງຍາກ ສະນັ້ນ ຜູ້ອຸປະໂພກບໍລິໂພກຕ້ອງມີການປະຢັດຫລາຍກວ່າ. ດອກເຕີ Dinh Thi My Loan ຮອງປະທານຜູ້ປະຈຳ, ການເລຂາທິການໃຫຍ່ສະຫະສະມາຄົມບັນດາບໍລິສັດຂາຍຍ່ອຍ ຫວຽດນາມ ໃຫ້ຮູ້ວ່າ:
“ປະຈຸບັນ ບັນດາວິສາຫະກິດເວົ້າລວມ ແລະ ວິສາຫະກິດຂາຍຍ່ອຍເວົ້າສະເພາະປະສົບກັບຄວາມຫຍຸ້ງຍາກຫລາຍຢ່າງ, ເປັນຕົ້ນແມ່ນກຳລັງຊື້ຫລຸດລົງ, ຜູ້ອຸປະໂພກບໍລິໂພກມີທ່າອ່ຽງຮັດເຂັມຂັດ, ຊ້ຳບໍ່ໜຳ ປະຈຸບັນມີສິນຄ້າຫລາຍປະເພດລາຄາຫລຸດລົງແລ້ວ ແຕ່ຜູ້ອຸປະໂພກບໍລິໂພກຍັງບໍ່ດີ ລໍຖ້າລາຄາອາດຈະຫລຸດລົງອີກ.”
ບໍລິສັດຄົ້ນຄ້ວາຕະຫລາດ Nielsen ຫວຽດນາມ ໃຫ້ຮູ້ວ່າ: ປີ 2011, ດັດຊະນີປະຢັດຢູ່ ຫວຽດນາມ ແມ່ນຂຶ້ນເຖິງ 70% ຊຶ່ງແມ່ນລະດັບສູງກວ່າຫລາຍເມື່ອທຽບໃສ່ລະດັບປານກາງຂອງຊາວ ອາຊີ 59%. ມາຮອດປະຈຸບັນ ມີ 63% ຜູ້ຊື້ເຄື່ອງຂອງມີຄວາມສົນໃຈເຖິງລາຄາ ແລະ ຍັງຊອກວິທີຊື້ສິນຄ້າຢ່າງປະຢັດທີ່ສຸດ.
ພາບປະກອບ:internet
|
ຄຽງຂ້າງບັນດານະໂຍບາຍຫລຸດຜ່ອນເງິນຕາ ແລະ ອັດຕາດອກເບ້ຍ, ລັດຖະບານ ຫວຽດນາມ ໄດ້ຕົກລົງຫນູນຊ່ວຍໂດຍກົງໃຫ້ແກ່ພາກສ່ວນຜະລິດດຳເນີນທຸລະກິດ, ໃນນັ້ນ ມີບັນດາວິສາຫະກິດຂະຫນາດກາງ ແລະ ນ້ອຍ ດ້ວຍບ້ວງເງິນກູ້ຊ່ວຍລວມມູນຄ່າ 29.000 ຕຶ້ດົ່ງ ໄດ້ສຸມໃສ່ບັນດາມາດຕະການພາສີອາກອນ. ທະນາຄານແຫ່ງລັດ ຫລຸດຜ່ອນອັດຕາດອກເບ້ຍເງິນຝາກຢ່າງຕໍ່ເນື່ອງ ແຕ່ 14%/ປີ ລົງ 12%/ປີ ແລະ ຕົ້ນເດືອນ 5 ນຳໃຊ້ອັດຕາດອກເບ້ຍໃຫ້ກູ້ຢືມ ແມ່ນ 15%/ປີ ສຳລັບ 4 ກຸ່ມລູກຄ້າ ພ້ອມທັງອະນຸຍາດໃຫ້ທະນາຄານການຄ້າສ້າງໂຄງປະກອບຫນິ້ສີນຄືນໃຫມ່ສຳລັບວິສາຫະກິດທ່ີພວມປະສົບກັບຄວາມຫຍຸ້ງຍາກໃນໄລຍະຊົ່ວຄາວ. ເພື່ອຮັບມືກັບສະພາບການປະຈຸບັນ, ດອກເຕີ Dinh Thi My Loan ຮອງປະທານຜູ້ປະຈຳການ, ເລຂາທິການໃຫຍ່ສະຫະສະມາຄົມບັນດາບໍລິສັດຂາຍຍ່ອຍ ຫວຽດນາມ ຖືວ່າ: ບັນດາວິສາຫະກິດຕ້ອງມີຄວາມໄຫວພິບກວ່າ, ຄວນສຸມໃສ່ຫລຸດຜ່ອນລາຍຈ່າຍ, ຈັດຕັ້ງການຄຸ້ມຄອງ ແລະ ແບ່ງປັນຄວາມສ່ຽງ. ດອກເຕີ Dinh Thi My Loan ຍົກຄຳເຫັນວ່າ:
“ບັນດາວິສາຫະກິດຕ້ອງກຳນົດທິດກ່ຽວກັບທີ່ຕັ້ງຂອງວິສາຫະກິດແຕ່ລະແຫ່ງ, ເພາະວ່າ ມາດຕະການບໍ່ແມ່ນເໝາະສົມກັບວິສາຫະກິດທຸກແຫ່ງໄດ້, ສະນັ້ນ ວິສາຫະກິດແຕ່ລະແຫ່ງຕ້ອງກຳນົດຍຸດທະສາດພັດທະນາຂອງຕົນ, ໃນນັ້ນບັນດາວິສາຫະກິດຂາຍຍ່ອຍຄວນເອົາໃຈໃສ່ເຖິງທ່າອ່ຽງຊື້ເຄື່ອງຂອງຜູ້ອຸປະໂພກບໍລິໂພກ.”
ປະຈຸບັນ ຂົງເຂດຂາຍຍ່ອຍທັນສະໄໝພວມພັດທະນາຢ່າງແຮງ. ທົ່ວປະເທດມີ ຮ້ານຊັບພະສິນຄ້າ 580 ແຫ່ງ ແລະ ສູນການສິນຄ້າ 120 ແຫ່ງ, ໃນນັ້ນຮູບແບບຮ້ານຂາຍເຄື່ອງຂະຫນາດນ້ອຍ. ເຖິງຢ່າງໃດກໍຕາມ, ໃນວິວັດທະນາການນັ້ນ ຮູບແບບຂາຍຍ່ອຍສິນຄ້າພວມຫັນປ່ຽນທັງຮູບການແລະ ຄຸນນະພາບ. ສະພາບການຄວາມຕ້ອງການ ແລະ ທ່າອ່ຽງຊື້ເຄື່ອງຂອງມີການປ່ຽນແປງ, ຜູ້ຂາຍຍ່ອຍກໍຕ້ອງມີແຜນການດຳເນີນທຸລະກິດໃຫ້ເໝາະສົມ, ສະນັ້ນ ຄຽງຂ້າງການພິຈາລະນາຢ່າງລະອຽດບັນດາບັນຊີລາຍຊື່ລົງທຶນ ເພື່ອໃຫ້ບັນດາວິສາຫະກິດລົງທຶນຢ່າງຖືກທິດ, ບັນດາວິສາຫະກິດຂາຍຍອ່ຍຕ້ອງມີແຫລ່ງສິນຄ້າເປັນປົກກະຕິ, ຮ່ວມສຳພັນນຳກັນເພື່ອນຳໃຊ້ລະບົບສະຫນອງສິນຄ້າ, ເປີດກວ້າງຕະຫລາດອອກສູ່ພາກພື້ນທີ່ມີຄວາມແກ້ງແຍ້ງຫນ້ອຍ ຫລື ລົງທຶນຮູບແບບໃຫມ່. ຕ້ອງຮັກສາກຳລັງຢ່າງເປັນປົກກະຕິເພື່ອຂຸດຄົ້ນຕະຫລາດ ແລະ ສ້າງຄວາມໄວ້ເນື້ອເຊື່ອໃຈຕໍ່ຜູ້ອຸປະໂພກບໍລິໂພກ, ຂະແຫນງຂາຍຍ່ອຍ ຫວຽດນາມ ຈະຜ່ານຜ່າໄລຍະຫຍຸ້ງຍາກເທື່ອລະກ້າວ, ຟື້ນຕົວ ແລະ ສືບຕໍ່ພັດທະນາ.
ນັກຂ່າວ To Tuan