(vovworld) - ຕາມກົມສະຖິຕິນະຄອນ ຮ່າໂນ້ຍ ແລ້ວ,ໃນໄຕມາດ 1/2012, ນະຄອນຫລວງ ຮ່າໂນ້ຍ ດຶງດູດໂຄງການທີ່ມີເງິນລົງທຶນຂອງຕ່າງປະເທດ ຫລື FDI ໄດ້ 39 ໂຄງການດ້ວຍຍອດຈຳນວນທຶນຈົດທະບຽນເກືອບ 120 ລ້ານ USD, ກ່ຽວກັບຈຳນວນໂຄງການແມ່ນເພີ່ມຂຶ້ນ 2% ແລະ ເງິນລົງທຶນເພີ່ມຂຶ້ນທົບ 5,9 ເທົ່າ ເມື່ອທຽບໃສ່ໄລຍະດຽວກັນຂອງປີກາຍແມ່ນ. ຈຸດເດັ່ນໃນການດຶງດູດທຶນ FDI ຂອງນະຄອນ ຮ່າໂນ້ຍ ໃນໄລຍະຕົ້ນປີ ນັ້ນແມ່ນໄດ້ສຸມໃສ່ເຂົ້າໃນຄຸນນະພາບ ແລະ ຍົກສູງປະສິດທິຜົນບັນດາໂຄງການລົງທຶນ, ເປັນຕົ້ນແມ່ນບັນດາໂຄງການ FDI ກ່ຽວກັບເທັກໂນໂລຊີ ແລະ ການຄຸ້ມຄອງ, ປະກອບສ່ວນຊຸກຍູ້ແຫລ່ງກຳລັງພາຍໃນ ແລະ ການເຕີບໂຕລວມຂອງພື້ນຖານເສດຖະກິດນະຄອນຫລວງຮ່າໂນ້ຍ.
ເຂດອຸດສາຫະກຳແຫ່ງຫນຶ່ງຢູູ່ ຮ່າໂນ້ຍ
ພາບປະກອບ: internet
|
ຕາມບັນດາຜູ້ຊ່ຽວຊານເສດຖະກິດແລ້ວ, ເລື່ອງກະແສທຶນ FDI ທີ່ລົງທຶນເຂົ້ານະຄອນ ຮ່າໂນ້ຍ ໄດ້ເພີ່ມຂຶ້ນຢ່າງແຮງໃນໄຕມາດ 1/2012 ນັ້ນແມ່ນສັນຍານອັນຕັ້ງຫນ້າ, ເປັນຕົ້ນແມ່ນໃນສະພາບເສດຖະກິດຢູ່ພາຍໃນ ແລະ ຕ່າງປະເທດຍັງປະສົບກັບຄວາມຫຍຸ້ງຍາກຫລາຍຢ່າງ. ທ່ານ Nguyen Van Tu ຮອງຫົວຫນ້າພະແນກແຜນການ ແລະ ການລົງທຶນ ນະຄອນຮ່າໂນ້ຍ ໃຫ້ຮູ້ວ່າ:
“ປະຈຸບັນ ຮ່າໂນ້ຍ ພວມຢືນໃນຈຳນວນ 3 ນະຄອນນຳຫນ້າກ່ຽວກັບການດຶງດູດເງິນລົງທຶນຂອງຕ່າງປະເທດ. ປະຈຸບັນ ຮ່າໂນ້ຍ ມີ 2.250 ໂຄງການຍັງມີຜົນສັກສິດ ດ້ວຍຍອດຈຳນວນທຶນຈົດທະບຽນປະມານ 22 ຕື້ USD. ໃນນັ້ນ ປີ 2011 ຜ່ານມາ ແມ່ນປີທີ່ການດຶງດູດເງິນລົງທຶນຂອງຕ່າງປະເທດປະສົບຜົນສຳເລັດພໍສົມຄວນ ດ້ວຍປະມານ 300 ໂຄງການ, ລວມຍອດຈຳນວນ ທຶນໝັ້ນໝາຍແມ່ນ 1.5 ຕື້ USD, ເພີ່ມຂຶ້ນທົບ 1,75 ເທົ່າເມື່ອທຽບໃສ່ປີ 2010. ນັ້ນແມ່ນຕົວເລກທີ່ຍັງຈຳກັດຢູ່ເມື່ອທຽບກັບຄວາມສາມາດບົ່ມຊ້ອນ, ແຕ່ມັນມີຄວາມໝາຍໃນສະພາບເສດຖະກິດໂລກຍັງປະສົບກັບຄວາມຫຍຸ້ງຍາກ ແລະ ໃນຂະນະທີ່ການດຶງດູດການລົງທຶນຢູ່ຫລາຍທ້ອງຖິ່ນຖືກຫລຸດລົງຢ່າງແຮງ.”
ມາຮອດປະຈຸບັນ, ໂຄງການ FDI ທີ່ມີຂອບຂະຫນາດໃຫຍ່ຈຳນວນຫນຶ່ງຢູ່ ຮ່າໂນ້ຍ ໄດ້ອອກໜັງສືອະນຸຍາດໃຫ້ລົງທຶນ ຫລື ໄດ້ເພີ່ມຈຳນວນທຶນຂຶ້ນຄື: ໂຄງການເຂດຕົວເມືອງ C2 Hoang Mai (ລວມ 262 ລ້ານ USD), ໂຄງການກິດຈະກຳບຳບັດນ້ຳເສຍ Yen So ດ້ວຍຈຳນວນເງິນລົງທຶນ 322 ລ້ານ USD, ສູນການຄ້າ Ha Dong Plaza ດ້ວຍຈຳນວນເງິນລົງທຶນ 23,3 ລ້ານ USD, ໂຄງການຮ່ວມດຳເນີນທຸລະກິດ Vietnam Mobille ເພີ່ມຂຶ້ນ 383 ລ້ານ USD ຫລື ໂຄງການ Panasonic VietNam ເພີ່ມຂຶ້ນ 32 ລ້ານ USD. ວັນທີ 23/3 ຜ່ານມາ, ບໍລິສັດຫຸ້ນສ່ວນລົງທຶນ ແລະ ພັດທະນາ N&G (N&G Corp ) ແລະ Shimizu Corp ຂອງຍີ່ປຸ່ນ ໄດ້ລົງນາມໃນຂໍ້ຕົກລົງກ່ຽວກັບການຮ່ວມມືກໍ່ສ້າງ ແລະ ພັດທະນາເຂດອຸດສາຫະກຳສຳຮອງແຫ່ງທຳອິດຢູ່ ຮ່າໂນ້ຍ (HANSSIP) ແລະ ເຂດຕົວເມືອງບໍລິການ, ເຮືອນຢູ່ໃຫ້ແກ່ກຳມະກອນ ບົນພື້ນຖານເປີດກວ້າງເຂດອຸດສາຫະກຳ Dai Xuyen ຢູ່ເມືອງ Phu Xuyen ນະຄອນ ຮ່າໂນ້ຍ ດ້ວຍຍອດເງິນລົງທຶນເກືອບ 1 ຕື້ USD. ເລື່ອງຜັນຂະຫຍາຍໂຄງການຈະສ້າງເງື່ອນໄຂໃຫ້ແກ່ບັນດາວິສາຫະກິດຂະຫນາດກາງ ແລະ ນ້ອຍຂອງຍີ່ປຸ່ນ ລົງທຶນເຂົ້າໃນຂົງເຂດອຸດສາຫະກຳສຳຮອງຢູ່ ຫວຽດນາມ, ປະກອບສ່ວນສ້າງວຽກເຮັດງານທຳ ແລະ ຍົກສູງກຳລັງແກ້ງແຍ້ງໃຫ້ແກ່ບັນດາຜະລິດຕະພັນພາຍໃນ. ເມື່ອຕີລາຄາກ່ຽວກັບການດຶງດູດທຶນ FDI ໃນໄລຍະຜ່ານມາ, ດອກເຕີ Nguyen Minh Phong ຜູ້ຊ່ຽວຊານເສດຖະກິດ ສັງກັດສະຖາບັນຄົ້ນຄ້ວາເສດຖະກິດ ສັງຄົມ ຮ່າໂນ້ຍ ຖືວ່າ: ເມື່ອທຽບໃສ່ໄລຍະດຽວກັນຂອງປີກ່ອນ, ຈຳນວນທຶນ FDI ຈົດທະບຽນ ແລະ ປ່ອຍເງິນ ໄດ້ສະແດງໃຫ້ເຫັນວ່າ ມີສັນຍານອັນຕັ້ງຫນ້າຫລາຍຢ່າງ. ກ່ຽວກັບອົງປະກອບທຶນ FDI ໄດ້ມີການປ່ຽນແປງ, ຫລາຍໂຄງການກ່ຽວກັບຂົງເຂດອຸດສາຫະກຳ ແລະ ບາງຂົງເຂດໃນກະສິກຳໄດ້ຮັບຄວາມເອົາໃຈໃສ່ຫລາຍກວ່າ. ເປັນຫນ້າສົນໃຈນັ້ນແມ່ນບັນດາໂຄງການ FDI ໃນໄລຍະມໍ່ໆມານີ້ໄດ້ມີການຫັນທິດຢ່າງແຮງກ່ຽວກັບດ້ານຄຸນນະພາບ, ໃນນັ້ນເອົາໃຈໃສ່ເປັນພິເສດເຖິງບັນດາໂຄງການສຳຄັນທີ່ນຳມາຊຶ່ງປະສິດທິຜົນດ້ານເສດຖະກິດສູງ, ບັນດາໂຄງການອຸດສາຫະກຳສຳຮອງ, ໂຄງການກ່ຽວກັບເທັກໂນໂລຊີ ແລະ ບົດຮຽນໃນການຄຸ້ມຄອງ ເພື່ອປະກອບສ່ວນພັດທະນາວິສາຫະກິດພາຍໃນ, ສົ່ງເສີມຕະຫລາດພາຍໃນປະເທດ. ນະຄອນ ຮ່າໂນ້ຍ ກໍວາງແຜນນະໂຍບາຍຫລຸດຜ່ອນບັນດາໂຄງການກ່ຽວກັບອະສັງຫາລິມະຊັບ, ບັນດາໂຄງການທີ່ມີລັກສະນະຜະລິດຊິ້ນສ່ວນ, ຕິດຕັ້ງ. ປີ 2012, ຮ່າໂນ້ຍໄດ້ວາງຄາດໝາຍຈະດຶງດູດທຶນ FDI ປະມານ 1,5 ຕື້ USD ເທົ່າກັບລະດັບຂອງປີ 2011, ເພາະວ່າ ຕາມການຮັບຮູ້ຂອງບັນດາຜູ້ຊ່ຽວຊານເສດຖະກິດແລ້ວ, ປີ 2012 ສະພາບການເສດຖະກິດໂລກ ແລະ ພາຍໃນປະເທດຍັງປະສົບກັບຄວາມຫຍຸ້ງຍາກຫລາຍຢ່າງ. ພິເສດ ໃນສະພາບທີ່ລັດຖະບານມີແຜນນະໂຍບາຍສ້າງໂຄງປະກອບເສດຖະກິດຄືນໃຫມ່, ນະຄອນ ຮ່າໂນ້ຍ ກໍມີແຜນນະໂຍບາຍກວດກາຄືນບັນດາໂຄງການບໍ່ມີປະສິດທິຜົນ ແລະ ພ້ອມກັບລັດຖະບານຜັນຂະຫຍາຍບັນດາມາດຕະການນັບທັງຢູ່ລະດັບມະຫາພາກ ແລະ ຈຸລະພາກ ເພື່ອສ້າງທຸກເງື່ອນໄຂດຶງດູດບັນດາໂຄງການ FDI ຢ່າງໝັ້ນຄົງ. ດອກເຕີ Nguyen Minh Phong ຖືວ່າ:
“ສິ່ງທຳອິດແມ່ນຕ້ອງມີສະພາບແວດລ້ອມ, ລະບອບທີ່ດີ ແລະ ເໝາະສົມກັບຄຳໝັ້ນສັນຍາໃນການເຊື່ອມໂຍງ, ສອດຄ່ອງກັບລະບຽບລວມ, ເໝາະສົມກັບຄວາມຮຽກຮ້ອງຕ້ອງການຂອງນັກລົງທຶນຕ່າງປະເທດ. ທີສອງແມ່ນ ຕ້ອງວາງແຜນກຳນົດຢ່າງແທ້ຈິງ, ມີການກຳນົດທິດໃນການດຶງດູດທຶນ FDI ຢ່າງເປັນປົກກະຕິ ເພື່ອໃຫ້ບັນດານັກລົງທຶນອຸ່ນອ່ຽນໃຈ. ທີສາມ ແມ່ນຕ້ອງສ້າງເງື່ອນໄຂພື້ນຖານໂຄງລ່າງໃນເບື້ອງຕົ້ນ. ນອກນັ້ນ ຕ້ອງເອົາໃຈໃສ່ເປັນພິເສດເຖິງການພັດທະນາບັນດາວິສາຫະກິດພາຍໃນ ເພື່ອໃຫ້ວິສາຫະກິດທີ່ມີເງິນລົງທຶນຂອງຕ່າງປະເທດມີບັນດາຄູ່ຮ່ວມມືຈັດແບ່ງວຽກງານ, ຂັ້ນຕອນເພື່ອຜະລິດຜະລິດຕະພັນສັງລວມ.”
ພ້ອມກັບບັນດານະໂຍບາຍຢູ່ໃນລະດັບມະຫາພາກ, ນະຄອນ ຮ່າໂນ້ຍ ຈະພ້ອມກັບວິສາຫະກິດແກ້ໄຂຄວາມຫຍຸ້ງຍາກ, ສ້າງເງື່ອນໄຂສະດວກທີ່ສຸດເພື່ອໃຫ້ບັນດາວິສາຫະກິດລົງທຶນໃຫມ່ ແລະ ເປີດກວ້າງຜະລິດຕະພັນຢູ່ ຮ່າໂນ້ຍ. ວຽກງານປະຕິຮູບດ້ານບໍລິຫານໄດ້ຮັບການປະຕິບັດຢ່າງຂ້ຽວຂາດ ເພື່ອຫລຸດຜ່ອນລາຍຈ່າຍໃຫ້ຕ່ຳສຸດ ແລະ ເວລາໃຫ້ແກ່ວິສາຫະກິດ ພ້ອມກັນນັ້ນ ເປີດເຜີຍຂໍ້ມູນຂ່າວສານໃຫ້ແກ່ບັນດາວິສາຫະກິດ ນີ້ແມ່ນຫນຶ່ງໃນບັນດາມາດຕະການທີ່ມີປະສິດທິຜົນ ເພື່ອສ້າງຄວາມໄວ້ເນື້ອເຊື່ອໃຈໃຫ້ແກ່ບັນດາວິສາຫະກິດ. ພ້ອມກັບວິວັດການສ້າງໂຄງປະກອບພື້ນຖານເສດຖະກິດຄືນໃຫມ່, ນະຄອນ ຮ່າໂນ້ຍ ໄດ້ ແລະ ພວມສ້າງທີ່ຕັ້ງທີ່ດີເພື່ອຮັບກະແສທຶນ FDI ຢ່າງມີປະສິດທິຜົນ, ປະກອບສ່ວນເຂົ້າໃນວິວັດການພັດທະນາເສດຖະກິດຂອງນະຄອນຫລວງ ແລະ ທັງປະເທດ ແບບຍືນຍົງ.
ນັກຂ່າວໂຕຕວັນ